نصيحة عن تجربة، بلاش أفضل. أنا عن نفسي كنت بتفرج على مسلسلات وأفلام بلغات مختلفة، تركي وهندي وكوري وغيرها... وده لأني بحب تعلم اللغات والتعرف على ثقافات مختلفة لحد ما قررت أوقف. وبقيت لو عاوزة أتعلم اللغة أو أحسن مهارة الاستماع عندي أفتح بودكاست باللغة اللي عاوزاها أو قنوات يوتيوب وأتعلم منها. عشان عارفة لو قررت أرجع وافتح حلقة ولو ساعة في الأسبوع هرجع لدائرة المشاهدة، حتى وأنا عارفة إني ممكن أتحكم في وقت المشاهدة أو في الأفكار اللي بتتسرب لعقلي وهعرف أفرق الصح من الغلط. بس النفس لما بتبدأ تحصل على مرادها وهواها بتبدأ تطمع أكثر وأكثر وهتشدك بالتدريج. مش هكلمكِ هنا من ناحية حلال وحرام، بس هجاوبك على نقطة واحدة من ناحية قرار الرجوع وانتي فاكرة إنك هتقدري تتحكمي في وقتكِ والأفكار اللي بتدخل عقلكِ وكل ده. صدقيني، كنت بقول زيك كده.. لكن ده استدراج من الشيطان أو من نفسك وهواكِ. المهم إن في الأول دماغكِ هتقول لكِ ده مسلسل عائلي ولو قابلتني لقطة مش مناسبة هعديها بسرعة وهقضي ساعة واحدة في الأسبوع... مع الوقت المسلسل العائلي هيبقى مسلسل رومانسي وهيبقى الحلقة ساعتين وهيبقى مسلسل واتنين واللي بعده... ولو مسلسل كامل ومشوق جدًا ومش هتقدري تنتظري عشان تعرفي الأحداث هتفتحي الحلقات ورا بعضها. لو انتي في إجازة ممكن تعملي زي الناس اللي بتاخد المسلسل كامل دون فواصل وتخلص مواسم كاملة في أيام قليلة. التحكم هتخسريه مع الوقت، والأفكار حتى لو ظاهرة بريئة وقلتِ مش هسمح لها تدخل عقلي، جزء من الأفكار دي إن مكنش أغلبها هيتسرب بطريقة لاواعية فالأفضل تلتزمي بالقرار الأول وتوفري الوقت ده لتعلم مهارات أكثر فائدة لكِ. بالتوفيق.
تم النشر الخميس، ٥ سبتمبر ٢٠٢٤
0 تعليق
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك