انا الاخت الصغيره من بين 3 بنات واخواتي متزوجين وانا كمان متزوجه ومعايا ولد بس علي طول اهلي شايفين ان دايما الصغيره ال يجوا عليها ويزعوها وممكن انها تتشتم امام ولاد اخواتها وحتي لو بربي ابني او بزعق علي حاجه غلط عملها شايفين لا احنا نفهم عنك او احنا ربينا قبلك ولازم تسمعي احنا بنقولك ايه مع العلم ان زوجي مش شايف ان بربي ابني بطريقه غلط او حتي شايف ان بعمل اي حاجه غلط ودايما امي ف وجودي لوحدي مش بتقولي كلمه تزعلني لكن ف وجود اخواتي احس ان قليله اوي ومش زيهم مع ان مفيش فرق وانا متعلمه ومعايا كليه وخلصتها والحمدلله بعرف احل مشاكلي ومش بحتاج لحد يدخل في حياتي
اسفه علي الاطاله ممكن حد يقولي اتعامل ازاي مع الطريقه دي
تصرفاتهم دليل انك شخصية مسئولة وبتعرفى تتصرفى وهما خوفهم عليكى لان انتى دايما االصغيره فى عينهم. حقك طبعا تحافظى على خصوصيتك وترفضى اى طريقة تعامل بتأذيكى ولازم تقوليلهم ده بشكل صريح عشان تحسي بتحسن مره مع مره هيشوفوا انك كبرتى اعملى حاجة بأيدك ووزعى منها على اخواتك...خلى ليكى مواقف تطلعك الاهدى والاكثر ذكاءا
تم النشر الثلاثاء، ٢٠ ديسمبر ٢٠٢٢
خلينا نقسم السؤال لجزئين جزء معاملة أهلك معاكي وجزء تدخلهم في تربية طفلك... بالنسبة لمعاملتهم معاكي هل هم طول الوقت بيعاملوكي وحش ولا في وقت معين مثلا؟ لو ده على طول ف اتكلمي مع اللي بيعاملك كده لوحدكم وجه لوجهه واسأليها ليه بتعاملك كده وشوفي لو في سبب مضايقها منك مثلا أو مشكلة حلوها سوا ولو مفيش سبب وده بيحصل تلقائي فوضحيلها إنك بتضايقي وانك بتحبيها وعايزة علاقتهم تكون كويسه ومش عايزة تشيلي منها واكيد انتي ادرى بالطريقة المناسبة اللي تتكلمي بيها لكن المهم تكون بدون خناق .. بهدوء عشان منكبرش المشكلة. لو ده بيحصل بناءاً على موقف معين مثلا ف هتتكلمي مع اللي بتعمل كده وتوضحيلها برضو انك بتضايقي وقولتيلها عشان تاخد بالها وتبقى علاقتكم احسن. بالنسبة لتدخلهم في تربيتك لابنك فأول حاجه متزعقيش لابنك قدامهم ولا تعاقبيه لإن ده مش صح .. طبيعي الاطفال مش بيكونوا ملتزمين وهم عند قرايبهم زي ما بيكونوا ف البيت وطبيعي يعملوا تصرفات مش بيعملوها ف العادي .. ف كبري دماغك خالص ومش وقته زعيق قدامهم عشانك وعشانه وعشان علاقتكم .. نيجي بقى لنقطة تانيه .. لو هم بيتدخلوا في كل حاجه ليها علاقة بابنك ف قوليللهم يتكلموا معاكي بس مش قدام الاولاد.. ولما يتكلموا معاكي في حاجه اما تتناقشي معاهم فيها وفي الاخر كل واحد له رأيه إما اسمعي الكلام منهم ومتركزيش فيه من ناحية تبقى مكسرتيش بخاطرهم وعلاقتكم كويسه ومن ناحيه الكلام بينكم وبين بعض وانتي حره مع ابنك ف بيتكم. مهم تقرأي وتعرفي طرق مختلفة للتربية عشان تربي ابنك كويس وعشان تبقى تعرفي تردي على أي حد يعدل عليكي ويقولك اعملي ومتعمليش وتتناقشي معاه وانتي واثقه من كلامك.
تم النشر الاثنين، ١٩ ديسمبر ٢٠٢٢
عندك حق جدا بعا وحقك تتضايقي لكن دي في اسر كتير بتكون نظرة الاهل لاصغر فرد فيها حتى لو كبر وتزوج فهو في نظرهم لسه الصغير شفت اكتر من نموذج كده لكن الحل الوحيد ال شفته هو المواجهه والمصارحه دول اهلك مش اغراب قوليلهم انا كبيرة وبعرف اتصرف .ياريت محدش يتدخل في علاقتي بابني لو سمحتم محدش يشتم عشان بزعل وتبدأي تفرضي شخصيتك ال انت حاباها وبتحترميها ومبسوطة بيها وزوجك راضي بيها تفرضيها عليهم ده عن تجربه من عدة نماذج شفتها في نفس وضعك وربنا يصلح لك الحال
تم النشر الاثنين، ١٩ ديسمبر ٢٠٢٢
لعرض السؤال في فدني اضغط هنا