السلام عليكم
أنا حابة اتكلم يمكن حد يفدنى بحاجه علشان تعبت من كتر الكلام مع اهلى ومفيش حد بيفهمنى ولا حتى بيسمعنى وتعبت من الكلام معاهم
فيا ريت يكون فى حد هنا قادر يريحني
أنا مخطوبه بقالى 9 شهور، اتخطبت زى اى بنت لما بتتخطب اتقدم لي عريس شاب محترم اكبر منى بـ4 سنين كويس وشغله حلو واهله ناس كويسين
اهلى اقنعونى بيه وقالوا لي ده شخص كويس ملكيش حق ترفضى ومع اصرارهم الكبير وافقت بالرغم انى مكنتش عايزه أتخطب
المهم اتخطبت والموضوع عدى، اتكلمنا واتعرفنا على بعض عادى بعدها انا مرتحتش خالص وقلت لأهلي قالوا لي ده بس علشان اول مره تتكلمى مع شاب وبكره تتعودى عليه.
سكت وقلت لهم ماشي، بعدها بشهر كنت مخنوقه منه ومش مرتاحه قلت لهم انا مش مرتاحه وعايزه اسيبه بابا رفض وزعق لى جامد وقالى بتتبطري على ايه؟ ده شخص كويس وبيكسب حلو وهيسعدك وهيعرف يفتح بيت ومش هيحوجك لحد والكلام ده كله.
عيطت وسكت وبقيت كل فتره اشتكى لان هو كان بيضغط عليا وعايز يسمع منى كلام حلو وكلمه بحبك والكلام ده وانا قلتله احنا لسه مخدناش علي بعض
بصراحه هو كان بيعاملنى كويس اوى وبيجيب لي هدايا وبيخرجنى بس انا مفيش حاجه من ناحيتى ليه مش حاسه بأى حاجه خالص
بعدها بفتره كنت ناويه اسيبه خلاص بابا قالى اديله فرصه ده كويس ومحترم ومش هنلاقى زى ابدا وبيحبك خدى اللي بيحبك ومتخديش اللي بتحبيه والكلام ده
سمعت كلامه وصبرت مع العلم انى مكنتش قادره اكمل معاه بعد ضغط كبير منه من ناحيه المشاعر بقيت اتبادل معاه اطراف الغزل واقوله حبيبي والكلام ده علشان يسكت لانه كان بيزن بس انا مكنتش قادره أكمل وكنا بنتخانق خناق اى اتنين مع بعض وكان بيتضايق انى مش بغير وكده بس ده مش بإيدي
أنا من ساعه ما اتخطبت وكل يوم بنطفى اكتر من اليوم اللي قبله ومش عارفه اعمل ايه اهلى مش سامعيني وانا بقيت من كتر ضغطه عليا بقا يفكر انى بحبه بسبب معاملتى معاه هو شخص كويس اوى ويستحق واحده تقدر مشاعره وانا مش عارفه اعمل ايه هو بيحبى اوى لدرجه خايفه اصارحه لاكسر قلبه وانا مش عايزه اكون السبب فى كسره قلب حد مش عارفه اصارحه واكسر قلبه والا اكمل معاه واشوف ربنا كاتبلى ايه. مع العلم انا عمرى 18سنه
وعليكم السلام ورحمة الله وبركاته.. مبدئيا يقمر، اسمعي الدڪتور عمرو أبو خليل هتلاقيه علي يوتيوب بيتڪلم عن موضوع الخطوبه والجواز، وازاى تتصرفي ف المواضيع دي في دايرة العلاقات، بس قبل أي شيء استخيري ربنا وشوفي، وأهم حاجه القبول، لو مفيش قبول ليه وخصوصا بعد الاستخاره، خلاص ڪده حطي نقطه واقفلي الصفحه، انك تصارحيه دلوقتي وتبعدو، احسن م تكملو وانتِ مش قبلاه وبعدين يحصل مشاكل ومش هتكملو برضو، ف انتِ قولي لخطيبك ڪده، وحبيت أنوّه بس إن في ضوابط للخطوبه، سواء مع خطيبك ده أو مع أي حد ف المستقبل إن شاء الله، شوفيها للدكتوره هاله سمير او اي شيخ بيتكلم عنها، ثانيا.. حضرتك ليڪي أهميه، يعني حضرتك غاليه أوي، وقيمتك ڪبيره، فـ متسمحيش لأي حد يقلل منك أو يغصبك علي حاجه وخاصة ف الزواج، علشان انتِ اللي هتجوزي مش والدك ولا والدتك، خدي النصيحه منهم باحترام، بس لو انتِ مش مرتاحه يبقي خلاص انتهينا مفيش نقاش، صحيح أنا معرفش حضرتك ڪلية اي، بس ايا كانت كليتك عاليه او متوسطه، مش ده المهم، عشان قيمتك بتنبع منك مش من كليتك، لاني عارفه اى اللى ممكن يحصل ف النقطه دي، لأاه انتِ تجوزي أحسن واحد ڪمان، حتي لو انتِ كليتك مش هاي، وادعي ربنا يرزقك زوج تقي وحنين ويضحكك وبصي بكل الصفات اللي تتمنيها وبالوظيفه اللي انتِ عايزاها، بس ادعي بيقين وهو هيستيجب والله ومش هيسيبك.. ومتشليش هم يقمر وتوڪلي علي الله وسيبيها عليه وهو هيحلها من عنده ❤️🩹❤️🩹
تم النشر الاثنين، ٣٠ ديسمبر ٢٠٢٤
وعليكم السلام ورحمة الله وبركاته. أختي العزيزة، أقدر تماماً مشاعرك وصعوبة الموقف الذي تتواجدين فيه. من المهم الشعور بالأمان والراحة في العلاقة، سواء كانت علاقة خطوبة أو زواج. أولاً، يجب أن تتذكري أن الزواج هو خطوة مصيرية في حياة الإنسان ويجب أن يُبنى على الحب والتفاهم والاحترام المتبادل. إذا كنتِ تشعرين بعدم الارتياح تجاه هذا الشخص، فهذا شعور يجب أن يؤخذ بعين الاعتبار. قومي بالبحث عن طريقة للتحدث مع عائلتك بصراحة وبهدوء. استخدمي عبارات تعبر عن مشاعرك ومعاناتك مثل "أشعر أنني تحت ضغط كبير" أو "أحتاج إلى حريتي في اتخاذ القرار". قد تكون المحادثة صعبة، لكن التواصل الصريح يمكن أن يساعد في تغيير نظرتهم. إذا كان لديكِ شخص تثقين به في العائلة مثل والدتك أو أحد الأقارب، يمكنكِ التحدث إليه ومشاركته مشاعرك، فقد يستطيع مساعدتكِ في التواصل مع والديك بطريقة تفهم مشاعركِ بشكل أفضل. وفي النهاية، لا تتجاهلي مشاعرك. إذا كنتِ تشعرين بأن الاستمرار في هذه العلاقة قد يضر بحياتك النفسية أو الاستقرار العاطفي لديك، فلابد من التفكير بجدية في اتخاذ قرار مناسب. اختاري ما تشعرين به بأنه الأفضل لك، واحرصي على اتخاذ القرار الذي يعكس قيمك وتطلعاتك. فالمستقبل أمامك والاستقرار النفسي والعاطفي هو الأهم. أسأل الله أن ييسر لكِ الأمور ويمنحكِ الحكمة في اتخاذ القرار الصحيح.
تم النشر الاثنين، ٣٠ ديسمبر ٢٠٢٤
الموضوع من ناحية اهلك مقفول ف كلمي الواد نفسه وصارحيه بشعور دا وخليه هو ال يطلب يسيبك بس من غير ما يعرف اهلك انك قولتيله حاجه
تم النشر الاثنين، ٣٠ ديسمبر ٢٠٢٤
عليه افضل الصلاة والسلام شكرا لكلامك ده بجد هحاول اعمل كده ويارب ابقى قده ولو انه صعب بس هحاول
تم النشر الاثنين، ٣٠ ديسمبر ٢٠٢٤
بنت ناس ومحترمة ربنا يبارك.... العمر طويل والارزاق بيد الله، انت صادقة في مشاعرك ولازم تحترميها، والخطوبة مشروعة عشان الموضوع ده تحديدا القبول والارتياح، ماحصلش يبقى كلها قسمة ونصيب
تم النشر الثلاثاء، ٣١ ديسمبر ٢٠٢٤
صلي على النبي بسم الله علي قلبك ي جميله هوني علي نفسك، ،اتكلمي آخر مره مع مامتك ويكون والدك مش موجود في البيت وقتها خدي راحتك وعيطي قولي كل شي قوليلها انا بنتك انا مش مرتاحه حسي بتعبي ،ممكن يكون شخص كويس بس بعد كده لاء ،انتي لسه صغيره والله وافقت وقالتك هشوف بابا وشوفي الموضوع هياخد جد ولا لاء ودي آخر مره ،يبقا تمام مخدتش وغلطوكي من نفسك تروحي للشخص اكتبي له رساله وقولي انت تستاهل الاحسن انا مش عارفه أتقبل ومش عاوزه اكلمك انا اهلي شايفينك شخص كويس بس انا مش عارفه اتأقلم سامحني انت ارفض ولو في خير نتجمع تاني ربنا يجمعنا بس حاليا مش عاوزه اظلمك
تم النشر الاثنين، ٣٠ ديسمبر ٢٠٢٤
بس كون انى مخطوبه لشخض مش مرتاحه معاه ده تعبنى وان محدش فاهم الاحساس ده وكلهم بيقولو لما تتجوزو هتحبو بعض اكتر الحب بييجى بالعشره وكده الى تاعبنى ان اهلى بيشوفو راحته هو مبسوط معايا ولا لأ مرتاح ولا لا لكن انا مش فى دماغهم وبيقلولى بنفرشلك قبل الجواز علشان يحطك فوق دماغه وكل ده وانا تعبت من كل حاجه نفسى اسيبه وفى نفس الوقت مش عارفه اهلى محوطينى من كل النواحى
تم النشر الاثنين، ٣٠ ديسمبر ٢٠٢٤
مكناش مرتبطين قبل كده لا ده واحد اتقدملى واهلى شفوه كويس وخطبونى ليه هو كويس وبيحبنى ومستعد يعمل اى حاجه علشان يسعدنى بس انا محبتوش ومش متقبلاه احساس انى مغصوبه عليه ده شديد اوى عليه وكون انى مش متقبلاه كخطيب ده حاجز كبير اوى بيبعد بينى وبينه انا مش عارفه اى السبب الرئيسى الى مش مخلينى اتشد ليه بس مفيش حد فى قلبى مش بحب حد بس كون
تم النشر الاثنين، ٣٠ ديسمبر ٢٠٢٤
والله صليت استخاره ومش مرتاحه معاه ابدا بس المشكله ان كل ما اتكلم مع بابا يزعق فيا وميرضاش يفركش انا بقالى ست شهور بنطفئ ببطئ وهما عارفين ده كويس وامى مش عارفه تعمل حاجه مع بابا وبتقولى سبيها على الله ومحدش قادر يفهم انا بمر بأيه لما بتكلم مع اى حد بيقولولى بابا عايز مصلحتك وانتى مش هتفهمى ده غير لما تكبرى وانا سيباها علي الله بس بجد الواحد ليه طاقه احتمال وانا حاسه انى جبت اخرى مش عارفه اتكلم مع مين او اتصرف ازاى انا مش عارفه حتى اتكلم مع خطيبى وافهمه لانه مش فاهمنى كل الى هو عايزه نفضل نحب فى بعض وبس وانا مش قادره اديلو المشاعر الى هو عايزها وقلتله لسه شويه لما نعرف بعض اكتر وبرضو مفيش فايده بس انا هصلى تانى وربنا ان شاءلله يحلها من عنده
تم النشر الاثنين، ٣٠ ديسمبر ٢٠٢٤
مشاعرك ناحيتة اتبدلت من مشاعر ارتباط وحب الى مشاعر شفقه! صعبان عليكى.. دا شئ مش لطيف ومش منطقى ابدا انك متقربيش منه كل الوقت دا ... طيب احنا ممكن نسأل.. هو راجل نحسبه ع الله كويس وفى مميزات زاى ماوضحتى.. مش متقبلاه ليه ؟.. ممكن يكون عشان اول مرة ؟ ولا اسلوبه وهزاره مش شادينك ؟ او انتى محتاجة وقت زيادة تاخدى عليه ؟ ولا انتى فى حد معجبة بيه ف دماغك ؟... حاولى تكونى صريحة مع نفسك وتجنبى شوية ضغط والدك.. هل انتى متقبلاه ولا لا... متظلمهوش معاكى وتظلمى نفسك
تم النشر الاثنين، ٣٠ ديسمبر ٢٠٢٤
مش عارفه اتكلم معاه خالص لسانى متلجم جامد كل ما احاول اتكلم معاه ابقا مش عارفه وكمان خوفى من اهلى لو اتكلمت معاه وجيه فركش اهلى معرفش هيعملو ايه فا الخوف محاوطنى جامد
تم النشر الاثنين، ٣٠ ديسمبر ٢٠٢٤
تقدري تتكلمي مع الشخص نفسه طيب
تم النشر الاثنين، ٣٠ ديسمبر ٢٠٢٤
بصي انا عشت كل الي انتي بتحكي عليه ده وأكتر ،لحد ما حرفيا من التعب مكنتش بعرف انام كنت لسه خارجه من ثانوي ،صغيره سبيه وتوكلي على الله، الله يرزقك بالزوج الصالح هين لين تقي يارب ،انتي مبتظلميش غير نفسك والله انا عدى ع الموضوع ثلات سنين والله من بعدها مش عارفه اكون نفسيا تمام ف صلي استخاره اخر مره اتكلمي مع مامتك براحه من غير عصبيه قولي لها انا لو اتجوزت حد مش بحبه ومش قبلااه هطلق طب الي نوصل للمرحله دي متسدقيش حد يقولك الحب بعد الجواز هيجي منين الحب وهو مفيش قبول اصلا فتوكلي ع الله صلي وربنا يرزقك بالزوج الصالح الخير ليكي
تم النشر الاثنين، ٣٠ ديسمبر ٢٠٢٤
لعرض السؤال في فدني اضغط هنا