السلام عليكم ورحمة الله وبركاته،
انا بنت عندي 22 سنه رابعه صيدله ،افتكر وانا ف أولي كنت لسه داخله جامعه جديد وللاسف اتعرفت ع بنات مش كويسه جدا لابسين خمارات ومنهم نقاب بس لا اخلاق لاء خالص اتغريت وافتكرت صحبه صالحه انا قبل كده مكنش مقفول عاليا بس طبعا الجامعه عالم مختلف تماما،
كنت بروح كُتاب وبطلت للاسف بس حاليا بدأت حفظ قرآن تاني الحمد لله ،
منهم الي كان بيكلم شباب كنت بضحك عليهم لما يحكوا وبتاع وبقول انا عارفه حدودي وأخلاقي ،وكذا مره والله العظيم فعلا يجي ولد او صحابهم الولاد يقعدوا معانا اقوم لان عارفه حرام جدا وغير اخلاقي وكنت بحكي لماما تقولي ابعدي وتزعقلي
كانو البنات يجوا يكلموني وقالوا خلاص محدش هيقعد تاني وبتاع طلع انو لاء مش كده بس، دخلني جروب شلتهم بتاعه ثانوي بنات بس فعلا بس للاسف كان بيبعتوا فيه حاجات مش كويسه وانا اول مره ف حياتي اشوف كده ولا كان يخطر ف بالي كده اصلا
وشفت واحده منهم بقت تبعتلي ع الخاص فيديوهات من نوع ده( اباحي) وللاسف شفت ، بقيت مخنوقة وتعبت وجبت تقدير مش كويس وانا كليه صعبه اوى جبت تقدير وحش ربنا شال مني التوفيق ،
تبت بجد وخرجت صدقه بنيه التوبه والهداية عملت لهم كلهم بلوكات وخرجت من الجروب وعاهدت ربنا بجد ،الحمد الله ، قربت من ربنا من ساعتها من 3 سنين بقيت عاده اصلي ركعتين توبه عن اكبر ذنب انا عملته الي انا للاسف مش عارفه انساه
انا حاليا ف رابعه باقيلي سنه ، لما بآجي ادعي بالزوج الصالح اللي يصلحني اكتر بخاف بحس انو ربنا مش هيستجاب انا عصيته رغم اني تبت بس فعلا مش قادره انسى بخاف ربنا يعاملني بذنبي بقيه تعبانه جدا نفسيا بجد اعمل اي هل ربنا ممكن يعاقبني كده فعلا ،
وعليكم السلام ورحمة الله وبركاته كنتي مخدوعة فيهم، و الحاجات اللي بعتوهالك دي انتي مستمرتيش فـ الفُرجة عليها، ومكلمتيش ولاد... هو إيه الغلط مش فهماكِي؟ وبعدين ربنا مش زي البشر مفيش تبرير بينك و بينه ده هو اللِّي خلقك وعالم بيكي هل ممكن يفهمك غلط؟!! عفا الله عنك وعني كـإضافة حابه أقولهالك النموذج اللِّي شوفتِيه ده لا يُمثِل كُل المُنتقبات او المُختمرات متعمميش بينك وبين نفسك ربّ يصلح حالنا و حالِك
تم النشر الأحد، ٢ فبراير ٢٠٢٥
السلام عليكم ورحمة الله انتى ونحن بشر وذنبنا ليس مانع لدعائنا ...تعرفى اكثر على اسم الله الغفور ...الغفران يعنى انه لا يعاملك بما مضى الله اكبر من ذنوبنا وهو يفرح بدعائك وطلبك منه وان كان مستحيلا للبشر الشيطان يضع لكى الياس لكى يلهيكى عن اسم الله الرحيم الكريم تذكرى
تم النشر السبت، ١ فبراير ٢٠٢٥
الحمد لله من لطف ربنا بينا انه مش بيعاملنا بناءً على ذنبنا بل بناءً على رحمته و حلمه و ربك مشلش منك التوفيق لانه لو اتشال انتي مش هتعرفي تمشي خطوة واحدة عشان احنا كل حياتنا بتوفيق ربنا ده ابتلاء و زي ما تقولي كده الشيطان بيحاول يدخللك فلحظة ابتلائك و بيصطاد في المياه العكرة
تم النشر الأحد، ٢ فبراير ٢٠٢٥
وعليكم السلام ورحمة الله وبركاته، أختي العزيزة، أشعر بمدى الألم والتعب الذي تعانين منه، وأريد أن أخبرك أن شعورك بالندم والتوبة هو خطوة مهمة ومشرفة، فالإنسان معرض للخطأ، ولكن الأهم هو العودة إلى الله والتوبة الصادقة. إن الله سبحانه وتعالى غفور رحيم، وقد ورد في الحديث الشريف عن النبي صلى الله عليه وسلم قال: "إن الله تعالى ينزل إلى السماء الدنيا كل ليلة، فيبقى حتى يبقى ثلث الليل، فيقول: من يدعوني فأستجيب له، من يسألني فأعطيه، من يستغفرني فأغفر له" (رواه البخاري). فهذا الحديث يعطيك الأمل في أن الله يقبل التوبة من عباده. عليك أن تواصلي توبتك وتثبتي عليها، وابعدي عن كل ما كان سببًا في بعدك عن الله، وكرري الدعاء بأن يهديك ويساعدك على تجاوز الماضي. وأيضًا، يمكنك أن تقومي بأعمال صالحة، مثل مساعدة الآخرين، أو مشاركة في الأنشطة الخيرية، فهذا سيساعدك في تطوير نفسك روحيًا. للتخلص من الأفكار السلبية والخوف من عقوبة الذنب، عليك العمل على تقوية إيمانك من خلال قراءة القرآن وذكر الله، وتذكير نفسك برحمة الله الواسعة. الحزن والتعب النفسي يمكن أن يكون صعبًا، لذا من الجيد أن تتحدثي مع شخص تثقين به، مثل أحد أفراد عائلتك أو مرشد روحي. لا تخافي من الدعاء للزوج الصالح، بل اجعلي نيتك صادقة وابحثي عنمن يذكرك بالله. تذكري أن الله لا يُظهر لك إلا الخير، وأمره بين الكاف والنون. أسأل الله أن يثبتك على طريق الخير، وأن يرزقك راحة البال والتوفيق في دراستك وحياتك.
تم النشر السبت، ١ فبراير ٢٠٢٥
لا، أبشري خلاص الموضوع ده يعتبر انتهى وما كان موجود في حياتك بعد التوبة " التائب من الذنب كمن لا ذنب له " فأنت رجعتي كأنك ما عملتي.... الفكره بقى اللي في دماغك حابب اشرحها لك دي عباره عن استراتيجية للشيطان للتحايل على النفس لان هنا عايز يكرهك في نفسك فتكرهي رحمة ربنا فيقدر يوقعك في ذنوب اكثر ودي بتحصل بعد التوبه بس هي مش حقيقيه ما دام تبتي فمفيش عقاب هيحصل ممكن يحصل ما هو ابتلاء فدا بيرفع منك لأعلى الدرجات لكن كعقاب لا طالما توبتي الأصعب هو الإصرار في الذنب ساعتها بس الإنسان بيهلك لانه بيكون عرف الصح من الغلط واستمر في الغلط زي الأقوام اللي استكبرت وربنا انزل فيهم العذاب وبس كده اتمنى تكوني فهمتي وشيلتي الوسواس ده من دماغك وارتاحي منه
تم النشر السبت، ١ فبراير ٢٠٢٥
التوبة تمحو ما قبلها .. كوني على يقين .. الله غفور رحيم
تم النشر الاثنين، ٣ فبراير ٢٠٢٥
انتي مش عارفه اسماء الله الحسنى فكري في معناها كويس انتي مهما تعملي من ذنوب ربنا هيغفرلك حتي لو تبتي ورجعتي ملايين المرات ربنا لا يمل ربنا بيفرح لما بنتوب ليه وطالما ضميرك بيوجعك تبقي إنسانه صالحه وربنا هيغفرلك
تم النشر الأحد، ٢ فبراير ٢٠٢٥
حقيقي شكرا لحضراتكم
تم النشر الأحد، ٢ فبراير ٢٠٢٥
ربك غفور رحيم والإخوة ما شاء الله قالوا بما فيه الكفاية أعانهم الله ووفقهم وأصلح حالهم 🤲💛طيب دلوقتي لما تقابليهم في سكتك ازيك يا فلانة سلام وعليكم السلام بس، انا في الكلية وقفت برده جنب واحد لقيته بيورني صورة فيها سيجارة جنب بتاعة كنز كدا ، فبسألوا ايه ده رد عليا بيقول لو جيت امبارح كنت هظبطك حشيش، رديت عليه مباشره لا يعم ربنا يكفينا شر الحرام ، ومن ساعتها بينا وبين بعض السلام فقط فدا برده اللي المفروض تعملي ، ربنا معاكي 🤲💛
تم النشر الأحد، ٢ فبراير ٢٠٢٥
لعرض السؤال في فدني اضغط هنا