اول نصيحه استعمليها في كل حاجه الالوان الفاتحه الهادية دي وسع للمكان وراحه كبيرة للعين تاني حاجه خلي الشقه كلها لون واحد فاتح بيدي وسع للمكان وراحه كبيرة جدا للعين واكتر الالوان المتعارف عليها هي الاوف وايت - الفانيلا لاتيه - البريز لو بتحبي الالوان ممكن تخلي حيطه واحده بس هي ال لونها مختلف في كل غرفه وبرضه يكون لونها فاتح وهادي وان كنت بفضل توحيد اللون بالنسبه للركنة هتلاقي عندك اتجاهين االاتجاه الاول انك تخليها كلها لون واحد ساده وتغيري في رسومات المخدات والخداديات كل فترة ولو هتمشي بكلام الاتجاه ده هتلاقي ناس بتنصحك تخلي اللون غامق عشان يستحمل الوساخه والبهدله وناس تانيه تقولك خليه فاتح عشان الوسع وحافظي عليه وهاتيله كسوة تغطيه بيها انا من الناس ال بحب ان اللون يكون فاتح ونحافظ عليه قدر المستطاع وحتى لو اتسخ بشكل كبير فشركات تنظيف الانتريهات والمفروشات مش بتقصر الاتجاه التاني انك تخلي جسم الركنه لون والظهر والقعدة لون مختلف ويكونوا اللونين لايقين على بعض الاتجاه ال ماشي اكتر دلوقتي هو انك تخلي الركنه كلها لون واحد وتغيري في المخدات والخداديات بعيدا عن الالوان بالنسبه للركنه منصحكيش تعملي كابوتونيه ال هو زي النغزات او الحفر في الظهر او اليد لانه بيلم تراب بيكون متعب جدا في تنضيفه ومش سهل اما الكاوبوتونيه ال هو خياطه منظر بس بيكون لطيف وبيدي شكل حلو لو حبيتي تضيفيه انصحك كمان تقولي للنجار يخلي القعدة واسعه تحديدا يكون صافي القعدة بعد ما يحط مخدات الظهر تكون ٦٠ سم يعني لو مخدات الظهر هتاخد ١٠ سم اذن يكون القعده كلها ٧٠ سم بالنسبه لوجود مخدات للظهر او لا ده راجع لتفضيلك انت في ناس بتحب الظهر يكون شلت متحركه وناس بتحبه ثابت حاولي تشوفي اي كرسي او كنبه عندك وخدي متر وقيسي القعده بالنسبه لك مريحه بمخدة ولا من غير المهم سواء كده او كده خلي صافي القعده ٦٠ سم بالنسبه لتنجيد المخدات والخداديات المنجدين عندهم حاجتين في منجدين بينجد فايبر على اسفنج وده اسمه مفروم وفي منجدين بينجدوا فايبر فقط الفايبر على اسفنج بيكون ناشف شويه وبيدي المخدات شكل ثابت وماسك نفسه بس بيكون ناشف شويه على الظهر اما الفايبر لو نوع نظيف اسمه هولو او سوفت بيكون مريح جدا في القعدة بس بعد فترة من الزمن بيهبط بنسبة بسيطه ووقتها ممكن يتملي تاني او يتزود يعني عشان ينفخ تاني انصحك تعملي المخدات والخداديات والشلت ال هتقعدي عليها كلها بسوسته تتفك تتغسل وتتركب تاني ده بيسهل عليكي تنظيفها جدا اطلبي من المنجد يخلي القعده سفنج كثافته عاليه متقلش عن ٣٥ في موضه طالعه حاليا وهي خداديات الفرو هي بتكون شكل ومنظر حلو لكن مش عمليه في الاستخدام غير ان ان الفرو النضيف سعره عالي فلو حبيتي تعمليها اعملي حسابك انها بتتغسل عالايد وتسرحيها وتكويها لما تنشف ومتعصريهاش جامد وفي ناس بتغسلها في الغساله بس هي ونصيبها يعني بالنسبه لقماش الركنه الحقيقه موصلتش لراي ثابت ناس كتير جدا بتشكر في القطيفه وناس كتير جدا بتشكر في الجلد المقلوب وناس كتير جدا بتشكر في الكتان وبرضه ناس كتير جدا بتشتكي من ال ٣ انواع عشان كده انصحك اختاري القماشه ال تعجبك بس هاتيها من مكان كويس انا بحب القطيفه وشكلها وملمسها والحقيقة تنظيفها من اسهل ما يكون ومن اسرع ما يكون الكتان متين اكتر وبيستحمل هبد وبهدلة اكتر ولكن في ناس اشتكت انه بيلم تراب بين انسجته مش بينضف وفي انواع جديدة طالعه منه ضد الاتساخ وضد المية لكن في ناس جابتها واشتكت برضه فانت شوفي ال بترتاحيله لاني ملقتش اي اتفاق على اي حاجه بخصوص القماش بالنسبة للصالون هتلاقي برضه رأيين راي يقول خليه كله لون واحد وراي يقول خليه لونين انا بشوف اللونين بيدوا بهجه اكتر بس يكونوا لونين هاديين وفاتحيين في ناس كتير بتختار اللون الاول بيج او اوف وايت او كافيه واللون التاني لبني او منت جرين او بني في ناس بتختار بينك او كشمير مع رمادي في لون جديد اخد الموضه حاليا وهو الاخضر الملكي بيكون اخضر غامق بس لامع شويه بس انا محبتهوش هو لون جميل بس مش فاتح حاولي متكتريش الخداديات في الصالون عشان بتعمل زحمه انصحك تكتبي في جوجل صور ركنة لونين واتفرجي على الصور صور صالون مودرن واتفرجي صور ركنه لون كذا واتفرجي مع كتر التفرج هتلاقي في حاجه معينه عينك اتشدت لها وعجبتك لان في الاخر كل انسان له تفضيلاته في الالوان فانت شوفي اللون ال يعجبك والتصميم ال يريحك وده بيجي من كتر التفرج على الصور والموديلات اوضه النوم واوض الاطفال حاولي متحطيش تفاصيل كتير وخليها بسيطه جدا اد ما تقدري كتر الرسومات والنقشات والزخرفات بيتعب العين وبيهيص الدنيا عالفاضي كل ما كان التصميم بسيط وهادي كل ما كان مريح جدا وجميل جدا خلي بالك ان اوض النوم اجزاء كتير من الحيطان بتتغطى بالدولايب والسراير والعفش فحاولي كتحطيش حاجه على الحيطان غير بعد ما تثبتي اماكن العفش بالتوفيق والف مبروك ربنا يتمم لك بخير
تم النشر الاثنين، ٢٩ يناير ٢٠٢٤
1 تعليق
تسلمى حبيبتى والله
تم النشر الأربعاء، ٣١ يناير ٢٠٢٤
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك