ديما بحس إن مفيش حد بيتمسك بيا في حياته... اقصد العلاقات اللي هيكون مصيرها للزواج ... بحس الناس اللي بتعامل معاهم معجبين بيا وباين عليهم دا جدا وكذا حد يقولي ان فلان معجب وفلان بيحبك لكن انا مش بهتم لأن انا مش عاوزة حد يكون مجرد معجب انا عاوزة اللي يجي يتقدم ويخبط ع باب ابويا ، مش بعرف اتعرف ع حد ولا اخرج مع حد علاقتي مع الجنس الاخر هي في حدود الشغل وبس اللي بيني وبينهم غير كدا مش مسموح... حتى لو هو اظهر شيء بتجاهلها وبقول لو عاوز حاجة هيجي يتقدملي ...بس في الواقع لا مبيحصلش ...ببقا مستغربة طب ليه رجع ومكملش .. اللي حوليا بيقولوا عشان انتي بتصديهم بطريقتك ...بس والله انا بتعامل بلباقة جدا وباحترام ...وممكن يكون عندي مشاعر لحد بس مش بوضح ولا بقول بخاف عشان اللي قدامي ممكن يكون شخص مش كويس ويلعب بيا وبقلبي فبكتم في نفسي ...وليه لازم انا اللي اظهر او الين...ليه مش هو اللي ياخد خطوة طالما اللي شافها دي معجب بيها وعايزها ...ليه لازم انا اللي اعمل عوامل جذب له... وفي الاخر بحس اني مستهلش حد يحاول عشاني
بس هو مفيش حد تخلى عنك في الاساس علشان يكون فيه تمسك .. يعني امتى نقول ع علاقة معينه ان طرف فيه بعد او تخلى عن الطرف التاني، ده بيحصل ف اطار اساسا علاقة، طيب هنا مفيش علاقة من الاساس عندنا. ولكن صراحة اللي انتي ماشية عليه ده صح جدا، انتي مش مضطرة تعملي اللي بيوقولا عليه الناس. اللي عايز هيجي، اصل ايه اللي يمنعه اساسا؟ انتي معاملتك مع الكل كويسة وبلباقة وب احترام .. يعني مفيش شئ وحش ف كده بالعكس. انتي محافظة ع نفسك وع حدودك وده شئ لا يعيبك ابدا. بالعكس ده قليل اللي كده. اللي عايز صدقيني هيجي خصوصا بقى لو غرضه عايز يدخل البيت من بابه، مش عايز يتسلى ..
تم النشر السبت، ٢١ أكتوبر ٢٠٢٣
اولا انتي تحكمي علي نفسك لما بتقولي محدش بيتمسك بيا وده محصلش التمسك او التخلي ده في العلاقات واللي فهمته من كلامك محصلش علاقه اصلا مع حد واتخلي عنك دي افكار سلبيه عن نفسك اتخلصي منها ثانيا انتي مش مطلوب منك تتوددي لحد او تحاولي تجذبي حد كل الموضوع ان الامور دي بتاخد وقت وده نصيب خليكي طبيعيه بشوشه والتعامل بحدود وممكن فكره خوفك من ان العلاقه متكونش رسمي تخليك مش بطبيعتك او مشدوده وانتي بتتعاملي خليكي طبيعيه متصديش ومتتقربيش من حد حياديه في تعاملك معاهم انتي تستحقي علاقه امنه ومستقره مع حد يستاهلك وان شاء الله ربنا يرزقك بالزوح الصالح اللي يفرحك ويقدرك
تم النشر السبت، ٢١ أكتوبر ٢٠٢٣
شوفي انتي صح خالي العلاقات محدوده معا الأشخاص واذا دخل حد يقول ليكي انا معجب او غيره فا دا مش هنقول عليه غير صالح او مش جاد ولكن بدام مجاش البيت من بابه فا بلاش منهم ودايما كوني واثقه ف نفسك وان نصيبك مجاش لسا وان ربنا شايل ليكي الأحسن والأفضل وربنا يسدد خطاكي لما يحبه ويرضاه
تم النشر السبت، ٢١ أكتوبر ٢٠٢٣
هبداء الإجابة من اخر كلمه في حديثك حد يحاول عشاني حضرتك اكيد تستهلي بس هو علشان موش جاهز محاولش علشان هو لو معجب علي الاقل بنسبة ٥٠% هيحاول يتواصل معاك يكلمك يتفقد حياتك من بعيد مؤدابه ولا .... في حياتك حد ... بتحبي اي وبتكرهي اي من عائلة مين؟ مستوى عائلتك ؟ فعلا انت صح هيحاول بكل قوته تعرفي علشان هو جاهز أن هو يدخل في علاقة يتجوز لكن العكس هو ما يدور مع حضرتك العيب موش فيك خالص لكن احب اتكلم معاك من منطق أن. انا شاب واقدر احكم علي موضوع ، انا هنا هتكلم علي شب سوي العاقل الر جل موش العيل تمام اول حاجه بفكر فيها شكل البنت طريقه كلامها أسلوبها واهم شيء احترمها في لبسها مستواها التعلمي انا بدور علي ام لي ولاولادي علشان زوجة صالحة بتكون ام لزوجها مجرد مبداءا كده ما يتوفر عناصر الأساسية في البنت إلا قدمي ببداء اشوف هي في حد في حياتها ببداء بعد كده اخد خطوة احاول اتقدم لها وهو دا صح لكن ممكن احاول اني اكلامها وتعرف عليها بحيث ألقي قبول منها فيه قبول اتقدم لها . انا هنا بتكلم معاك علي شاب عايز بجد يتجوز موش يتسل بيك . لكن احب اضيف بعض النصائح ليك ؛ اولا اهتمي بنفسك حبي نفسك خليك مميزه بين الناس صوتك لازم يكون واطي اقربي من ربنا اوي علشان يفتح نفسك للحياة ويجعل في وجهك القبول بين الناس دائما خليك بشوشة الوجه موش لازم ضحكه مجرد ابتسامه أثناء التعامل الغير لازم تكوني مثقفة اقرأ كتب وربنا معاك ويرزقك بالإنسان الصالح 🌸🤲
تم النشر الجمعة، ٢٠ أكتوبر ٢٠٢٣
عن تجربه... الرجال دول مش بتوع علاقات جادة... احمد ربنا والله... دول هتلاقيهم خارجين من علاقات أو الموضوع مش فى دماغه أو مرتبط ومش عاوز يقول بزياده الخير خيرين.... فجاه هتلآقى أللى بيقتحمك.... بيجبرك تفكرى فيه.... بيخطفك... وبعدين آنتى نفسك اصبرى... مش اى حد عنيكى شيفاه كويس هو كويس.... أنا حاسه إن آنتى مش فارق عندك إن أللى يجيلك ده يكون عنده حاجه آنتى محتاجاها أو لا.... يعنى مثلا شارى خاطرك آوى... بيحبك فعلا وقولا آوى... مستحمل عيوبى آكتر من مميزات ومع المواقف وبيحبنى برضو... عينه مثلا مش بحس إنه بيشوف حد غيرى.... محتاجين نحدد أولويات اختيارنا وطبعا حسب ظروفنا وسننا... مش اى حد هتتعلقى بيه يصلح إنه يتحط فى الخانه ديه.... كلمه الحب ديه سهله آوى الصعب إنه يثبتلك ده... فهمانى... متستعجليش كل حاجه هتيجى فى وقتها... وبلاش تجهدى قلبك فى علاقات من النوع ده عشان لما يجى الراجل الصح و يثبتلك بشتى الطرق إنه جدير بيكى تلآقى مشاعر حلوة تديهاله... ربنا يسعد قلبك ويريح بالك
تم النشر السبت، ٢١ أكتوبر ٢٠٢٣
الحياه مليئه بالمتاعب فتيقني أنه محفوظلك الخير
تم النشر السبت، ٢١ أكتوبر ٢٠٢٣
مش كل من قالك بحبك يبقي بيحبك اصل مش كل مسلم بيصلي
تم النشر الجمعة، ٢٠ أكتوبر ٢٠٢٣
لعرض السؤال في فدني اضغط هنا