عاوزه اقول اني في ثانويه عامه قسم ادبي وحقيقي حاسه بكميه احباط أن مش هلاقي شغل أو حتي لو لقيت مش ليها لازمه بعد الجواز يعني دايما العلمي بيبقي افضل للبنات وعموما ف فرص العمل والمشكلة والي تاعبني اكتر اني مش عندي هدف وحقيقي طالع عيني ف مذاكره بس خلاص إجمالي احباط مش عارفه انا بذاكر لي او كل ده لي اصلا انا ف الآخر هبقي اى يعني حتي لو جبت اعلي مجموع مع أن اكيد مش هجيب لان عمري ما جبت قبل كد والفشل ملازمني مهما حاولت
الثانوية العامة مش اخر الدنيا و دي اكيد مرحلة صعبة بس لازم نتجاوز كل دا
تم النشر الأربعاء، ١١ أكتوبر ٢٠٢٣
انتي ضربتي كده بمقتل كل اللي كانوا أدبي أو اللي كانوا أدبي. محتاجه افهم منك مين اللي مصور ليكي الصورة ديه بالشكل ده..؟ خلينا فى الاول متفقين .. ان مش شرط دخولك لكلية معينه انك بعد كده هتشتغلي في نفس المجال، ده اول حاجه وده المتعارف عليه الحقيقي. عدد كبير بيعمل شيفت كارير من الناس .. وفيه اللي بيكون مهندس وصيدلي وبيعمل شيفت كارير .. يعني من كليات علمية اهو حتى مش أدبية. تاني شئ .. الاعلام والصحافة دول برضه بالنسبة ليكي ايه؟ ده شغلهم كويس جدا. الحقوق، والتجارة، لا غنى عنهم اساسا برضه. كليات التربية والاداب بيكونوا مدرسين وفيه اللي بيكون اخصائي اجتماعي او نفسي .. وتقدري من كلية اداب علم نفس بعد ما تستوفي شروط معينه تاخدي رخصة من وزارة الصحة وتفتحي عيادة. كلية فنون جميلة تو تربية فنية، برضه بتدخليها من ادبي. كليات كتيرة فعلا كويسة .. المهم تشوفي انتي عايزة ايه او حلمك ايه او عايزة تتخصي ف ايه. اقولك سيبك من ده كله .. وتعالي كده مع بعض نشوف كذا مجال من المجالات اللي ليها تقل على الارض حاليا زي البرمجة او غيره .. الحاجا ديه انتي تقدري تتعلميها وتتقنيها وتشتغلي بيها من غير ما تكوني خريجة كلية معينه. اقولك تاني .. من احسن الناس في مصر او لاوطن العربي واحد اسمه اسامه الزيرو .. بيعلم الناس برمجة، وتخيلي كان خريج معهد خدمة اجتماعية. انتي برضه ممكن تدخلي السن، الترجمة بيتجيب فلوس كويسة اوي، ف لو دخلتي لغة كويسة وليها تقلها. هيبقى ممتاز. معرفش ف الحقيقة مين كان مصور ليكي عكس كده، ولكن لو انتي السبب ف كده ف صدقيني هتبقى انتي اللي بتجيبي الفشل لنفسك.
تم النشر الثلاثاء، ١٠ أكتوبر ٢٠٢٣
هُما بيبوصلها بنظرة فَشَل وإنها ولا حاجةة بس محدش شاف المُعناه اللي انتِ بتعملِيها عشان تذاكري وتروحِي الدروس وكِـده سيبك منهم مورهمش غير الكـلام انتِ دخلتي أدبي انتِ فِ أمر واقِع دلوقت هه، هتقدري توصلي وتحققي ذاتِك لو انتِ عاوزه ده لو هتستسلمي لكلام النـاس هتكونِي انتِ اللي عطلتي حياتِك بنفسِك تمام. حققي اللي نفسك فِيه مش ضروري كُليه او حاجةة مُعينةة انِك تكونِي ناجحةة مش بعد السنين دي هتعطلي دلوقت ماشِي لو ذاكرتي أدبي كويس هتلاقي نفسك بتستخدمي فِ حياتِك الطبيعيةة متعرفيش كام حد بيحب علم النفس انتِ بتدرسي ده من جذوره هه،حققي اللي هيخليِك مبسوطةة انتِ من نفسِك عشان متندميش بعدين مفيش مشكلةة لو مجموعك مكنش احسن حاجةة قبل كده تقدري تحققي ده دلوقت اوزنيها بِـ النظام انِك تكونِي منظمةة نظام اكتر تفوق اكتر فاهمةة، متخليش حد يشمت فيكِ وعملي اللي عليكِ اللي مش هيخليكِي تأنبي نفسِك بعدين بالتوفيق.💜🤲🏻🌻"""""".
تم النشر الثلاثاء، ١٠ أكتوبر ٢٠٢٣
طيب أولا مبروك انك عديتى بكل سنين الدراسة الى فاتت ونجحتى فيها لحد ما وصلتى انك تبقى فى ثانوية عامة (ده فى حد ذاته إنجاز حتى لو مش شايفة ده دلوقتى) ثانيا معضلة كليات القمة (الى بتحتاج مجموع كبييير) هو انها فعليا فى الزمن ده الى بيتخرج منها وبيشتغل بشهادته منها اغلبهم بياخدوا فلوس قليلة جدا مقارنة بمجالات تانية كتير ممكن تدخليها من أى كلية (وده عن تجربة شخصية) ثالثا بقى وده الاهم انتى ممكن بعد ما تدخلى كلية وتخلصيها وتاخدى شهادتك احتمال تغيرى المجال بتاعك تانى لحاجة انتى شايفة نفسك فيها اكتر، احنا برضه لما بنكون فى سنين المراهقة بتاعتنا مبنكونش على دراية كافية بنفسنا ولا بتوجهاتنا وقيمنا الى غالبا بتظهرلنا بعد كده فى سنوات الرشد لما بنبتدى نتعرف على نفسنا اكتر ونعرف اكتر عن العالم الى حوالينا والمكان الى عايزين نكون فيه - هنروح بعيد ليه! عندك انا مثلا كنت علمى رياضة فى ثانوية عامة ودخلت كلية هندسة واتخرجت منها واشتغلت معيدة وبعدها ب 6 سنين قررت ان مش دى الحياة الى عايزة اعيشها ولا ده الطريق الى عايزة اكمل فيه ف عملت تغيير مجال العمل وبقيت اخصائية صحة نفسية وعندى دلوقتى 31 سنة ولسه بتعلم عن نفسى ومكانى فى العالم- نيجى بقى لنقطة الشغل والجواز كلنا عارفين طبعا ان دول بيكونوا رزق وبأننا نشتغل على نفسنا ونسعى عشان ناخد او يجيلنا المناسب لينا (فى كل الاحوال اتأكدى ان دايما هتاخدى الاحسن ليكى طول ما انتى بتشتغلى عليه) ولو على موضوع الفشل ف فعليا مفيش نجاح من غير فشل ف متخافيش انك تفشلى مرة واتنين وعشرة لأن فى كل مرة بتفشلى فيها بتكتسبى معلومة او مهارة جديدة انتى مكنتيش تعرفيها قبل كده وده الى بيقربك خطوة وخطوات كتير للنجاح (قليل اوى الى بينجح من اول مرة فى حاجة جديدة يجربها بالعكس الاكتر والاعم بياخدوا وقت ومجهود ومحاولات كتير عشان ينجحوا فى الى هم عايزينه) ف خلينا نغير نظرتنا للفشل على انه نجاحات صغيرة اوى بتؤدى لنجاح كبير. الى عايزة اوصلهولك من الرغى الكتييير ده ان اوقات كتير مبنشوفش الحاجات الكويسة الى جوانا او حوالينا عشان مخنا بيكون مركز بس على الخوف او اسوأ سيناريو، وفى الاول والاخر دى مش الحقيقة، الحقيقة هى ان كل دى احتمالات وارد تحصل او متحصلش محدش فينا يعرف المستقبل لكن طول ما بنحاول اكيد بنوصل لاحسن حاجة لينا. ربنا معاكى فى الدراسة انا عارفة اد ايه ثانوية عامة بتكون سنة صعبة جدا والضغط النفسى بيكون فيها عالى بس نصيحتى ليكى هى إنك تاخدى بالك من نفسك الاول بإنك تعملى حاجات انتى بتحبيها جنب المذاكرة لأن بأى حال من الاحوال إنتى أهم من كل الدرجات والكليات والمذاكرات :)
تم النشر الثلاثاء، ١٠ أكتوبر ٢٠٢٣
لعرض السؤال في فدني اضغط هنا