نا في ثانويه عامه و بسبب الظروف الماليه مبخودش دروس و الهيا المصدر الوحيد الكنت بعتمد عليه في الدراسه عشان نا مكنتش بزاكر
و دلوقتي لما ببقا عايز ازاكر بحس بملل و مهما زكرت المعلومه مش بتسبت و ده ادي اني افقد الشغف و مزاكرش خالص
و المشكله ان الامتحنات بتقرب ونا حاسس اني بضيع
انا شايفه انك ربطت مذاكرتك واجتهادك بوجود الدروس وانك كنت معتمد عليها بشكل كامل فلما مبقيش في دروس انت حسيت بالفراغ او تهيأت انك في اجازة او بمعنى اصح اتلخبطت مبدأيا كده اقنع نفسك ان الدروس مش هي الاساس وان زمان مكنش في حاجه اسمها دروس اصلا وكانت الطلبه بتفهم وتقرا وتسال عن ال مش عارفاه ونجحوا وبقيوا دكاترة ومهندسين وعلماء وعادي يعني فمش هي الدروس ال من غيرها مش هنعرف نذاكر ميزة الدرس ان المستر بيكون قاري الدرس وعارف النقط المهمه ال فيه وعامل له تلخيص معين كده مضبط فيه الافكار وكده دلوقتي اليوتيوب بقي فيه الاف القنوات ال بتشرح بأسلوب متميز جدا والكتب الخارجيه كمان في منها ال شارح باسلوب مفصل جدا واحده واحده بحيث انك تفهم كويس جدا لو قرأت بتركيز ..انصحك تسمع الفيديو مرتين مش ورا بعض لان المرة التانيه بتثبت المعلومات جدا جدا في ذهنك انصحك جدا بالكتابه .كل جزء تقرأه وتفهمه كويس اكتب تلخيص له بنفسك في كشكول على جنب كده لما تقرا الدرس مرتين هتعرف تلمه كويس وتحدد عناصره وتقسمه لاجزاء محدده وواضحه وقبل كل ده استعن بالله ولا تعجز وقبل ما تفتح اي كتاب تدعي ( اللهم لا سهل الا ما جعلته سهلا وأنت تجعل الصعب اذا سئت سهلا) اللهم يسر امري واشرح صدري وانر بصيرتي وافتح لي فتوح العارفين
تم النشر السبت، ١٤ يناير ٢٠٢٣
في مدرسين كتير بينزلوا دروس ع اليوتيوب فري تقدري تتابعي معاهم وممكن تاخدي ملخصات المدرسين من صحابك وزمايلك تصوريها وتستخدمي اساليب مختلفه في المذاكره عشان احساس الملل والاحباط ..ف لو فرضنا انك جبتي درس من اليوتيوب شغليه ومعاكي كتابك ابدأي حددي فيه كل حاجه بتتشرح في الفديو وركزي عليها ولما تخلصي الفديو خدي بريك وارجعي لخصي الي سمعتيه وحددتيه ف كشكول عشان ده الي هتحفظي منه ومرجعك دايما وبعد كده حلي كتير عشان تثبتي المعلومه وممكن تذاكري عن طريق الشرح بانك تشرحي لحد معاكي كأنك انتي المدرس عشان تتأكدي من فهمك التام للي سمعتيه وربنا يوفقك يارب
تم النشر الاثنين، ٩ يناير ٢٠٢٣
لسه الوقت بايدك بس انت لا تستسلم. ركز على حلمك .. على مستقبلك .. مش معقول علشان ظرف عندك تقوم تضيع السنيين اللي انت ذاكرتها ديه كلها. أؤمن بنفسك وبحلمك .. فيه كذا طريقة علشان تقدر تذاكر وتفهم .. عندك الشرح الاونلاين .. عندك اليويتوب .. والفيديوهات كتير. عندك صحابك .. ذاكروا مع بعض. اللي عايز يعمل حاجة .. هيخلق الوسائل اللي تخليه يعملها .. فوق لنفسك
تم النشر الأحد، ٨ يناير ٢٠٢٣
ممكن تحضر الشرح اونلاين وفي ناس كتير انا اعرفهم شكروا في الاونلاين جداً عن تجربتهم الشخصيه وكمان بتوفر وقت كتير اووي، وبالنسبه ان انت حاسس بملل وفقدان شغف فدا طبيعي لان دي سنه صعبه وفارقه جدا في مستقبلك فلازم تحاول وطالما لسه في وقت يبقي لسه فيه امل، انما لو حطيت الافكار دي في دماغك زي فقدان الشغف والملل وما الي ذلك مش هتتحرك من مكانك فلازم انك تبدا متستناش لما الشغف يرجع او الكلام دا لان والله ما هتتحرك من مكانك والوقت هيسرقك وكمان الوقت بيعدي كلها كام شهر وهنبقي في 6 مش هتحس بالوقت فلازم تبدا دا اهم حاجه، وعاوزه اقولك قرب من ربنا اووووي وجاهد نفسك دايما وادعي كتير اووي ان ربنا يوفقك، متبطلش دعاء خالص ولا صلاة، وربنا يوفقك وتعدي السنه دي علي خير
تم النشر الأحد، ٨ يناير ٢٠٢٣
لعرض السؤال في فدني اضغط هنا