السلام عليكم،
انا شاب مستقم حمدلله داخل علي ١٥ سنة انا عيلتي مش مستقمة اوي أو مش متمسكة بدينها اوي يعني بزات اهل امي اول ما التزمت مش من بعيد اقل من سنة حمدلله التزمت وربنا هوه الي هداني وتيسرت معايا اوي لقيت الصحبة صالحة والبيئة الإيمانية وبحفظ قرآن ومع صحبة محافظة علي اورادها في اليوم لما بان عليا التزامي بحاجات معينة في دين زي اني بصلي ٥ فروض في مسجد أو بنزل اصلي فجر في مسجد اهلي بحسهم مش واثقين فيا خالص ودايما بحسسوني اني متطرف مع اني أماكن الي بروحها اصلا موثوق فيها يعني انا بروح أكاديمية في نادي مشهور أكاديمية موثوقة من الآخر وهما عارفين كده بس بقيت بلاحظ تريقة من اهل امي بيقولولي ياشيخ يوسف بتريقة ولما اروح اصلي عايزين يوجوا معايا وانا عارف انهم عايزين يجوا معايا عشان مش واثقين فيا يعني أبويا سئلني بصلي فين الفجر عشان ينزل يصلي معايا وانا أبويا مش ساكن جمبي هوه بعيد ومن طريقة كلامه واضح انه مش واثق فيا وشاكك اني بروح حتة تانية غير مسجد الي بقولهم بروحه ولما اقولوا اسأل فلان مثلا يعرفه باجي ولا لا يقولي انا واثق فيك بلاقي تريقة وابويا ياخد مني موبايل عشان يشوف بكلم مين في الواتس وانا بكره حركة دي مع اني مش بعمل حاجة غلط بس بيكون في أسرار مع صحابي أو كده أو حتي أسرار مش بقولها لحد هوه عايز يعرفها فأنا بضايق ويشوف انا بكلم مين وبيحاولوا يبعدوني بس انا بحاول علي قد ما اقدر اتجنب الفتن دي يعني بلاقي محاولات انهم يبعدني عن دروس فقه الي في مكان موثوق وهما عارفين كذا وشايفين ان ملتحي بزات اهل امي أنه شخص سيئ متطرف وقليل اوي أو معدوم يبقا في ملتحي محترم بس انا بحاول ابعد عن فتن دي يعني انا بقالي شهور محافظ علي اوراد يومية زي أذكار أو قيام ليل كل يوم أو ورد قرآن مع مجموعة كل يوم بنأكد علي بعض في واتس وأهلي ميعرفوش عشان مافتتنش عشان مش عايز ابعد عن طريق الهداية وشيطان بيلعب في حتة دي اوي وحاسس ان علاقتي بأمي أو أبويا أو أختي مش زي اول يعني ماقدرش احكيلهم حاجة زي دي ، يعني معرفش انصحهم أو أمرهم بالمعروف أو كده لأن انا كده إلي هتفتح يعني هيقولولي مين قالك كده ومش عارف ايه وهيدخلوني في حوارات ومعرفش اكلم مع اختي في موضوع ديني أو حلال أو حرام عشان اخاف اختي تقول لبويا أو امي تسمع عشان انا جربت مواقف دي في أول التزامي واتفتنت وحصل مشاكل بس حمدلله ربنا فرجها وتحلت فأنا بخاف اتفتن تاني فبحس علاقتي بأهلي مش قد كده في ثقة يعني كان نفسي أبويا ولا امي يساعدوني ويثبتوني في طريق الهداية اكتر وعارف انهم خايفين عليا بس هما تفكيرهم سيئ عن ملتزم أو المستقم يعني انا ساعات بفكر مع نفسي بقول امال لو عايز اطلب علم شرعي ولا عايز اكون داعية هعمل ايه يعني انا متأكد في المستقبل أبويا هيقف ضدي في حتة دي بس انا متأكد ان ربنا اكيد هيعوضني ويجيبلي الخير كلو مهما حصل بس اتصرف صح لأن ربنا بيقول فاتقوا الله ما استطعتم، فسؤالي هنا اتصرف ازاي مع الفتن يعني مضايقات الي بتحصل مع اهلي دي اتصرف ازاي خصوصا ان علاقتنا بقيت بحس اني مبقتش واثق فيهم زي اول وثاني حاجة انا للأسف جالي وساوس قهرية بسبب اني اتفتنت من مكايد شيطان مش مهم ايه الي حصل المهم اني عرفت ان مرض ده محتاج علاج من مختص نفسي اعمل ايه؟؟ اشوف فيديوهات علي يوتيوب بتكلم عن علاجه ولا اقول لأهلي عشان يودوني عند مختص ولا اعمل ايه مع العلم اني لو قلت لأهلي اخاف اتفتن في ديني وابعد عن طريق فإني اقول لأهلي صعبة بنسبة لي
بزات اهل امي مش هيسوبوني في حالي لأنهم عندهم جهل شوية في الدين وبيستخفوا بصلاة ومش هيفهموا حاجة زي كده
وعليكم السلام ورحمه الله وبركاته يا يوسف يعني ان شاء الله باذن الله تتقبل كلامك لاني انا حابه اقول لك انه المشكله الاكبر هنا مش جهل اللي قدامك قد ما هي انك لسه في بدايه الطريق مجرد ما تحسست ان انت بقيت احسن من اللي حواليك اللي هم اهلك. شويه كده بشويه الالتزام اللي انت بداتهم بدات تبص لهم بنظره تانيه. ولو في فتنه فهي دي اكبر فتنه دلوقتي انت هتكون بتقابلها مش الفتنه ان هم يكونوا مش واثقين فيه او انهم بيحاولوا يرجعوك عن الطريق اللي انت فيه لا هو الفتنه الحقيقيه انك بتحس بنوع من التعالي تجاه اللي حواليك.
تم النشر الأربعاء، ٢٠ مارس ٢٠٢٤
طب متتكلم مع شيخ المسجد افضل وتطلب منه النصيحة؟! ثانيا يجوو الايام دي عادي بسبب الافكار المغلوطة عن الدين، انا امي كانت فكراني كدا ولما قصرت ثوبي (الجلبيه) امي خافت عليا احسن اكون ار7ابي 😂😂 ولما تشوفني لابسها دايما كانت تديني نظرات بس دلوقتي لا بقا الامر عادي بل لما مبقتش انزل المسجد هي الي بتسألني لي مبنزلش وكدا.. الوساوس كانت عندي وساوس دين وعقيدة وبول ونجاسة كان عندي كل الوساوس تقريبا بس الحمد لله الموضوع قل لما اتكلمت مع شيخ المسجد الموضوع كله من الشيطان من تلبيس ابليس
تم النشر الأربعاء، ٢٠ مارس ٢٠٢٤
ربنا يثبتك الاول والله ابني الاهل كلهم عندهم جهل ف دين الا من رحمي ربي طبعا انا اقسم بالله ع قد مبقدر بردو احافظ ع نفسي واقرب من ربنا وخصوصا اهل ابويا اقسم بالله بيقولوا عليا شيخه ويتريقوا انا مثلا مبسلمش ع رجاله يقولوا دا شيخه بتاعت العيله مبرضاش ادخل معاهم ف اي نقاش ف دين بذات بحس اني بتعامل مع عقول تعبانه وضحك وهزار وللا بقيت انصح حد اقول دا حلال ولا حرام بيتقال عليا معقده ف اعمل ف صمت انا اتعرضت لحاجات كتير والله بردو بس هقولك هما ممكن يكونوا خايفين عليك بردو لتتاخد واكيد فاهمني تتاخد تروح فين هو واحد بيكون مقرب من ربنا مش اكتر بس دماغهم بتسرح لبعيد بعدين حتت باباك ياخد منك فون دي يعني لو تحت 20سنه تمام فوق 20سنه دي غلط بصراحه يعني وعيبه جداا ملخص مش اهلك لواحديهم وحرفيا واحد هو بيريي نفسه بنفسه والله ابني انا امي اتوفت حدش رباني حرفيا ولا حد قالي اتوضي ازاي اصلا وخليك فاكر ان يوم لا ينفع مالا ولا بنون فخليك ع مبدائك وربنا يثبتك ودي حياتك وانته حر فيها ومفروض والله ليهم الشرف ان ليهم ابن زيك
تم النشر الخميس، ٢١ مارس ٢٠٢٤
وعليكم السلام ورحمة الله وبركاته .. اتكلم معاهم بصراحه وقرب منهم، التزامك كويس دجدا وخليك ثابت على مبدأك. ولكن متبعدش عن اهلك، اكيد هيكون فيه حوار مشترك ما بينكم، قرب منهم اكتر .. علشان ميحسوش انك متغير، او انك بعدت عنهم وانك في وادي تاني. وحاول تتكلم معاهم في الحاجات اللي بتضايقك زي مثلا التفتيش ف الفون، واتكلم معاهم في التزامك .. هل عاجبهم ولا لا؟ وايه هو اعتراضهم. افتح نقاشات معاهم .. ومتيأسش من انك تحاول تشدهم معاك للطريق الحق. بالنسبة للوسواس ايه نوع الوسواس اللي عندك؟ ولكن لو وسواس عقيدة او نظافة .. الموضوع ده بيجي لما تبقى ملتزم اكتر او مهتم بشئ معين زيادة، لان الوسواس بيلمس ع اكتر شئ انت مهتم بيه. وله كمان طريق تاني غير انه يكون نفسي. طريق ديني، الشيطان مش هيسيبك بالسهولة ديه .. هيفضل يحاول ويحاول مع اي حد مؤمن. اي محاولة منك للاستجابة في الوسواس كأنك بترجع خطوة لوراء .. اكتر حاجه تخليك تهزمه، انك متسمعلوش، لا تستجيب له .. يعني هل انا صليت 3 ركعات ولا 4؟ انا مش متاكد .. لا انا صليت! هل انا اتوصيت صح ولا لا؟ لا اتوضيت، لان اول شئ لازم تقتنع بيه انك شخص موسوس وان الشيطان بيحاول يضللك .. ف اوعى تسيبله فرصة انه يعمل كده معاك. تجاهل الموضوع تماما. هتحس بقلق وتوتر ف الاول .. وده عادي جدا، لازم تمر بالمرحلة ديه. هتعدي متقلقش. كأنه زي الدواء المر اللي بتشربه متضطر علشان تصحى.
تم النشر الأربعاء، ٢٠ مارس ٢٠٢٤
ولو انت بتتكلم عن الوسواس ف الصلاه انك صليت ثلاثة أو اربعه مثلا أنا كنت كدا بصراحه ولحد دلوقتي بعاني اني بحس اني صليت ثلاثة ركعات مش اربعه لكن الوضوء الحمدلله مش بحس نفسي ناسيه لكن الصلاه وده من الشيطان اللي عايز يبعدك عن ربنا والتفكير اللي بياجي وحنا بنصلي عشان نسهى عن الصلاه ادعي كثير متخليش الموضوع ده ف دماغ عشان طول ما هو شاغلك هتلاقي نفسك مش بتتقدم خالص أنا كان بيجيلي كدا بس حاليا والحمد لله مش اوي واحتمال يكون حقيقي اني نسيت ركعه بس نصيحه متفكرش ف الموضوع كثير عشان ده هياثر عليك وعلى عقلك الباطن ومش هتعرف تخرج من المرحله دي غير بصعوبة
تم النشر الخميس، ٢١ مارس ٢٠٢٤
شوف طلاما انت اخترت الطريق الصح وانك تكون ملتزم عشان ترضي ربنا ف اكيد لازم تلاقي اختبارات من ربنا عشان يشوفك انت هتكمل ولا لاء متشغلش بالك بكلام حد الكلام طلاما مفيش منه فايده سيبك منه ودعي لأهلك ان ربنا يرشدهم أنا مثلا لبست النقاب من وانا ف بدايه تانيه ثانوي الحمدلله بردو أهل امي وناس كثيره فضلوا يقولوا لبستيه ليه مانتي صغيره أما تكبري البسيه وكلام كثير بصراحه ولحد دلوقتي بسمع الكلام ده ولا بيهمني طلاما أنا عايزه كدا ملايش دعوه بكلام الناس بسمع من هنا وبخرج من هنا ده كله ابتغاء وجهه الله وانت ابحث عن مرض الوسواس اللي عندك على اليوتيوب وشوف اي الحل ليه لقيت نفسك مش عارف تتعامل قول لأهلك وشوف دكتور خلي عندك ايمان بربنا كبير مش اي حاجه تبعدك عنه مش عشان هتكشف وربنا يشفيك تبعد عنه وربنا يصلح حالك ويسرلك امرك
تم النشر الخميس، ٢١ مارس ٢٠٢٤
لعرض السؤال في فدني اضغط هنا