ازاي ممكن الانسان يعمل move on من شخصيه نرجسيه ف حياته وبتستهلك طاقته كلها من غير تقدير وازاي اساسا يقدر ينهي العلاقه دي من غير ما يحس ب اي ندم بعدين ويعلي استحقاقه ب نفسه
الوعي نص الطريق وعيك بنفسك انك في علاقة خطر، أو سامة وعارفه أن النهاية مش في صالحك ابدا، وعيك ده نص الحل، والحلول التانية محتاجة مجهود، لكن في الحقيقة هي تستاهل كل المجهود اللي ممكن يتعمل علشان تبقي كويسة. نظرتك للأشياء هي نتيجة واقعك الحزن بيغطي على حاجات كتير مش كده؟ ممكن يكون الواحد مش شايف كل حاجة صح؟ يعني لو فيه حد في حياتك مش سوي نفسيا، وشخصية سامة بمعنى أصح، ممكن تقولي " ليه بيحصلي كدا، ليه الشخص ده في حياتي، هو انا عملت ايه لكل ده، هو انا استاهل ده" غالبا ممكن يحصل كدا خصوصا في بداية الصدمات، لكن في جانب مش متشاف، أو مش واضح، أو مش عارفين نوصله". الجانب ده أننا رسائل في حياة بعض، الشخص الغير سوي ده رسالة آه، رسالة تخليكي تفهمي، رسالة تخليكي هنا بتسألي السؤال ده، رسالة تخليكي أقوى، أقوى بكتير من أي وقت فات، أعرفي الرسالة، وافهميها لأنها هتخليكي شخص مختلف تماما. أقبلي اقبلي الفقد، من الحاجات اللي بتصعب حاجات كتير علينا هي أننا مش قادرين نتقبل، فكرة صعبة مش كده؟ هي آه صعبة لكن مش مستحيلة، ما هي لو كانت مستحيلة كان زمان الناس كلها ماتت ورا اللي بيحبوهم،لكن بيعدوا، وبيكملوا، وبيعيشوا. حب النفس ازاي متحسيش بالندم بعد ما سبتي العلاقة؟ طيب أسمحيلي اسالك سؤال، هو ليه أصلا تحسي بالندم بعد ما تنفصلي تماما عن علاقة سامة؟ يعني ايه الندم في كده؟ ايه مثلا ندم انك مش هتلاقي زيه، طيب ومين قالك أننا عايزين حد زيه، إذا كان هو في الأساس مش سوي، هل انتي عايزة شخص بالشكل ده في حياتك، عايزة بهدلة، هو هل الحب بهدلة؟ اكيد لا، اكيد الواحد بيحب وعايز احترام، عايز تقدير، عايز تفاهم، عايز مودة، عايز رحمة، اكيد مش عايز بهدلة. حبي نفسك وقدريها لأن السؤال ده يبان منه حاجه مهمة جدا وهي مشكلة في عدم تقدير النفس، وحبها، استثمري فيها، لأنها اغلى حاجة. لا..... أتعلمي تقولي لا. لأ للظلم، متظلميش نفسك، لأ للكره، حبي نفسك، حبيها واحترميها لأنها تستاهل، لأ للاستغلال والابتزاز، أتعلمي تقولي لأ. "المشاعر المكبوتة لا تموت". -فرويد الإنكار عمره ما كان ولا هيكون حل، خدي وقتك في الحزن، خدي وقتك في البكاء، الحزن له قدسية زي الفرح، بل إن الحزن مشاعر عظيمة لأنها الطريق أو النفق اللي بيكون في آخره النور. مينفعش تقسي على نفسك وتعنفيها "وتقولي، لأ مش انا اللي ابكي، مش انا اللي ازعل"... لأ وليه متزعليش، ازعلي لان من حق أي إنسان أنه يحس بالمشاعر ديه، المشاعر المكبوتة مش هتموت هتفضل جواكي، لحد ما يحصل موقف ما، وتنفجري فيه، وعلى فكرة ممكن ساعتها الموقف ده يكون ميستاهلش، ازعلي، وابكي، وخرجي كل اللي جواكي. الأعذار وما ادراكي ما الأعذار؟ بلاش الاعذار الغير منطقية، بلاش تخلقي اعذار زي ما بيقولوا من تحت الارض علشان تصدقي الشخصية ديه تاني، صدقي اللي قدامك، صدقي الحقيقة اللي انتي شايفاها، فتحي عينك. مش إحتمال الشخصية ديه ترجع تاني؟ اه، احتمال طبعا ترجع كل شيء ممكن، كمان ممكن يرجعوا بعد ما انتي تكوني تمام، بعد ما انتي تكوني خلاص قطعتي الصفحة، طيب هما ليه بيرجعوا تاني؟ علشان من جواهم كدا بيقولوا، ايه ده هو كدا خلاص، ازاي نسيت بالشكل ده، ممكن الكبرياء اللي جواهم والأنا تخليهم لا يتقبلوا الرفض ده، فيرجعوا علشانهم هما، وعلشان يحسوا بالاستحقاق أو المشاعر اللي بيتغذوا عليها منك. بلاش شخصية بديلة الدخول في علاقة تانية بعد الانفصال، مش هتعالج ابدا اي شيء، بل هتضرك انت والشخص الاخر. استبدلي العلاقة بالرياضه، بالشغل، بالمذاكرة، بالكورسات، أتعلمي حاجة جديدة نفسك تتعلميها من زمان، العبي رياضة تخرجي فيها طاقتك، اعرفي ناس جديدة ولذيذة وايجابية، اخرجي بره غرفتك، بره الكومفورت زون بتاعتك. تعملي إيه كمان؟ من الحاجات اللي هتساعد جدا في انك تنسي أو تتعافي هي انك تفرغي كل مشاعرك في الكتابة، أو انك تحطي لحد مقرب، بل بالعكس اوقات الكتابة تغني عن الكلام مع حد، لان اوقات كتير الواحد بيكون محتاج يطلع كلام محدش يعرفه غيره وبس. اقطعي علاقتك بكل صفحاته على السوشيال ميديا، عمرك ما هتعرفي تتعافي وانتي لسه بتراقبي صفحاته على الميديا. من الحاجات المهمة أننا نعرف أن العلاقات ممكن لا تدوم. للاسف ناس كتير بتكون عامله توقعات خرافية جدا، طموح العلاقة بيكون عالي جدا، لدرجة أنها بتدخل في حالة إنكار بعد كدا. مش شرط علاقة الصداقة تدوم. مش شرط الارتباط يدوم، مش شرط يتحول لخطوبة، مش شرط يتحول لجواز. مش شرط يعني من حق اي حد في العلاقة أنه يخرج منها، احنا مش أملاك لبعض، انتي شخص كامل متكامل وهو شخص كامل متكامل. كل مرحلة من مراحل الحب، سواء في الاول كانت ارتباط أو جواز أو خطوبة، هي مرحلة مُكملة للأخرى، ومش معنى كدا إننا منعملش احتمال أنها متكملش، طبعا ممكن متكملش، وطبعا احنا محتاجين سياسية التقبل، وسياسة الرفض. أتمنى لك السلامة
تم النشر الاثنين، ٨ أغسطس ٢٠٢٢
أهلا بك، للتعامل مع شخص متعنّت ونرجسي، يجب عليك أن تفهم أنه ليس من مسؤوليتك إصلاحه أو جعله يتغير، وأن المسؤولية الأساسية عليك تجاه نفسك وراحتك النفسية. 1- كن صريحًا ومباشرًا: عندما لا تكون مرتاحًا مع هذا الشخص، فضلًا عن أن تخبره بالأمر، اخبره بشكل صريح ومباشر بما تفكر به وما التحديات التي تواجهك في العلاقة. 2- ترك العلاقة: في بعض الحالات، قد يكون الخيار الأفضل لتعامل مع شخصية نرجسية هو ترك العلاقة، خاصة إن كان يستهلك جهودك ويؤثر على راحتك النفسية. 3- إنهاء الاتصالات بعد الانفصال: بمجرد الانفصال فإن العديد من الأزمات تصيب العلاقات ، قد تكون تجارب سيئة ، ولكن من المهم تذكر أن الاتصالات بعد انفصالك من الشخص النرجسي لن تساعد في تطويرك وسوف تبقيك في نفس المكان الذي عليه. 4- العناية بنفسك: قومي بالعناية بنفسك وتحسين معيشتك الشخصية. لديك حق في الشعور بالراحة والهدوء في حياتك ومن خلال المحافظة علي نمط حياة صحي ، ستتمكن من عيش حياة أكثر سعادة وارتياحًا. تذكر في النهاية، أنه من المهم أن تتقبل وجود هذه النوعية من الأشخاص في حياتك وتعرف كيفية التعامل معهم وما هي حدودك. زكية ليست بحاجة إلى شخص يؤثر سلبًا على راحتها الذهنية.
تم النشر السبت، ١٨ مارس ٢٠٢٣
انهاء العلاقة بيبدأ وانتى لسه فيها ...تبدأى تفصلى نشاطاتك عن النرجسي ...يكون مش مهم وجوده ..وهو شخصيا يبدا يحس بان الحياه مستمره من غيره ببساطة ...تشوفى نفسك حلوه ومهمه من غيره ...جيبي لنفسك هدية حلوه وقولى لنفسك انا مش هستناها منه .. كل ما تلاقى مصادر اخرى للى بيقدمهولك النرجسي هتقدرى بسهولة تنهى العلاقة بيه. ال move on هيبقي سهل بعد كده عشان هتكونى عرفتى ان اذاه كان اكبر من اللى بيقدمه وانه اساسا كان بياخد بس ومش بيقدم حاجة ...وهتكونى عارفه انك تستحقى تكونى نفسك وتحسي نفسك فى احسن صورة. المراية اللى تطلعنا وحشين نكسرها حتى لو الاطار بتاعها من دهب .💪💪
تم النشر الأحد، ١١ ديسمبر ٢٠٢٢
نصيحه اشغلى نفسك بمستقبلك وسيبك من اي شئ يوصل إليه واشتغل على نفسك في كل حاجه من ناحية الدين والصحه والتعليم والهوايات وكل ماهو مفيد
تم النشر السبت، ١ يوليو ٢٠٢٣
لو العلاقه انتهت هتاخدي وقت طويل للتعافي مش كشخص فقك ولكن لكل الذكريات نصيحتي ليك تقبلي الوضع وعيشي مشاعره كلها بكل ما فيها وخدي وقتك في الزعل علشان لما تقومي تقفي تكوني واقفه علي ارض صلبه من جديد بدون اي مشاعر ولا خوف ولا ندن
تم النشر الجمعة، ٢٥ نوفمبر ٢٠٢٢
لقيت السؤال من سنه بس جاني فضول اعرف ؟! عملتي اي ؟
تم النشر الخميس، ٢٩ فبراير ٢٠٢٤
اكيد هتحسي في الاول بالندم بس تاكدي ان قدام هتفخري بنفسك ال move on هييجي بالوقت وعدم التواصل مع الشخص النرجسي نهائيا لانه هيحاول يتواصل معاكي يستعطفك او يحسسك بالذنب
تم النشر الثلاثاء، ١٣ ديسمبر ٢٠٢٢
لعرض السؤال في فدني اضغط هنا