انا في تالتة اعدادي و مش قادر اركز في المذاكرة و حتى لما بذاكر بلاقي نفسي مش عارف احفظ او افهم و اصلا الامتحانات قربت فيريت حد يفيدني
مبسوطه بيك ي أحمد إنك مهتم بمذاكرتك ودراستك ده دليل إنك مجتهد وليك مستقبل بإذن الله. اول حاجه هنظبط مكان المذاكرة بحيث ان ميبقاش قدامك اي حاجه خالص غير المادة اللي بتذاكرها .. ومادة واحده بس مش اكتر عشان متتشتتش.. هنسيب الموبايل صامت او مقفول بره الاوضة عشان منبقاش مشغولين بيه وده مهم جداً عشان الموبايل بيشتت أي حد فما بالك بقى لو عايز تذاكر؟ حاجه كمان .. اول ما تيجي تذاكر هتتفق مع نفسك انك هتخلص درس (دراسات مثلا) وتحل عليه وبعدها هتقوم تعمل تمارين لمدة 10 دقايق مثلا عشان تفك عضلاتك وتنشط مخك وتقدر تكمل. بعد كده هتذاكر درس من مادة تانيه وتحل عليه وتظبطه ولما تخلصه خالص هتقوم تاخد الموبايل وتمسكه لمدة نص ساعة بس وبعدين تعمل حاجه خفيفه تاكلها او تشرب مشروب بتحبه ويا سلام لو عصير فريش او فاكهه وتروح تكمل مذاكرة. لما تيجي تمسك الموبايل متمسكهوش ف نفس الاوضة اللي بتذاكر فيها .. امسكه ف الصالة مثلا او في مكان تاني غير اللي بتذاكر فيه وبعد كده سيبه مكانه وهو صامت او مقفول وروح مكان مذاكرتك. هنرجع بعد كده لمذاكرتنا ونختار مادة تالته نذاكر منها درس برضو وتحل عليه وتثبته كويس. كده تبقى ذاكرت 3 دروس من 3 مواد مختلفين ف اليوم .. لو معندكش درس او مدرسه ممكن تاخد ساعتين مثلا بريك وترجع تذاكر ماده أو اتنين كمان وانت وشطارتك بقى. ناخد بالنا اننا لازم اول حاجه ف اي مادة اننا نبقى فاهمين اللي بنذاكره قبل ما نحفظه. لو لقيت صعوبة ف درس معين سيبه وذاكر درس غيره وارجعله بعدين .. لما جيت ترجعله مفهمتوش برضو اسأل حد كبير في عيلتك أو المدرس واول ما تفهمه ذاكره كويس اووي وحل عليه. مهم انك بعد ما تفهم الدرس تكرره كام مره عشان تثبته كويس وبعدين تحل عليه عشان تبقى اتأكدت من فهمك ومذاكرتك. لو حاسس انك مش بتعرف تركز خالص وبتفهم كل المواد بصعوبة اطلب من مامتك او حد مسؤول ف البيت انه يروح معاك عند دكتور مخ واعصاب او باطنه هيطلب منك تحاليل عشان ممكن يبقى في شوية انيميا مثلا مأثرين على تركيزك وبدوا بسيط هتبقى زي الفل. لو في حاجه في كلامي مش واضحه ممكن تقولي واوضحها اكتر .. ربنا يوفقك.
تم النشر السبت، ١٠ ديسمبر ٢٠٢٢
ذاكري في مجموعة اعملي جدول تمشي عليه استخدمي الألوان في المذاكرة متذكريش وانتي مشتته أو بالك مشغول ذاكري في الصباح الباكر مارسي الرياضة واهتمي بغذائك الصحي
تم النشر الأحد، ١١ ديسمبر ٢٠٢٢
لا حتى الموبايل مسحوب مني في وقت المذاكرة
تم النشر السبت، ١٠ ديسمبر ٢٠٢٢
هل فيه مشتتات بتبقى جانبك وأنت بتذاكر زي الفيس وخلافه؟
تم النشر السبت، ١٠ ديسمبر ٢٠٢٢
لعرض السؤال في فدني اضغط هنا