قصة حياة ضائع

Question

انا انسان تقريبا ميت من سنين .... حياتى منقسمة قسمين فترة الطفولة والمراهقة ...و فترة الشباب ...انا كنت انسان عادى جدا مجتهد فى دراسته وعنده اصدقاء وبيتعامل فى الحياة بطريقة طبيعية ... مع بداية تانية ثانوى بدات احس بالتوتر والقلق وكنت فى الفترة دى بمارس العادة السرية بشراسة ... بدات احس بتوتر وقلق شديد لدرجة انى ساعات مكنتش بعرف اقعد على بعضى من كتر القلق ... كنت مش مركز خالص وتايه مش عارف انا عاوز ايه ... وبدا يظهر عندى وسواس قهرى فى العقيدة ... كنت بتهرب من الدروس لانى بحس فيها انى مش مركز وانى مخنوق ومتضايق ... بدات اهرب من كل حاجة فى الدنيا بانى انام كتير عشان انسى او اروح السايبر افل على النت طول الليل ... انتهت التجربة دى باول صدمة ليا فى حياتى وهو الفشل التام فى الدراسة ... النتيجة كانت 50 فى المية .. ومنجحتش فى الكيمياء كمان ... الصدمة اكنت كبيرة لاهلى وللناس والاساتذة الى كانوا بيعقدوا عليا امال كبيرة .... الصدمة دى اثرت عليا لدرجة انى لسه فاكرها كانها امبارح رغم ان مر عليها اكتر من 14 سنة ... استمر الوسواس والتوتر والقلق والشعور بالضياع واحيانا الخوف الى مش عارف له سبب ... حاولت كتير اقرب من ناس واحكى لهم لانى مش عارف ايه الى بيحصلى اصلا ... اكتر ردود فعل للناس كانت السخرية والاستهزاء ... دايما كنت بفكر هو ايه الى بيحصلى دا ... هو انا فعلا صاحى ولا بحلم .... مرت الايام ودخلت كلية حقوق ومكنتش بعرف اذاكر خالص بسبب الوسواس الشديد الى بيزيد ايام الامتحانات ... فكنت بجيب جيد لانى بذاكر قبل الامتحان بيوم بصعوبة شديدة جدا ... خلصت كلية الحقوق فكرت انى اعوض الفشل الى فاتنى بانى اكمل دراسة دخلت امتحان الماجستير مرات كتير كانت دايما بتنتهى بالفشل الذريع لانى مش بعرف اذاكر خالص وكنت دايما بهرب من الواقع دا بانى ادخل المواقع الاباحية او اهلك نفسى بالعادة السرية وانام بس ... كتير مكنتش بروح الامتحانات لانى كنت بكون متوتر جدا وخايف وكتير لانى مكنتش مذاكر حاجة اصلا .... اتجهت للطب النفسى تعرف على د شيرين احمد خليل استاذ الطب النفسى فى جامعة عين شمس ... اول انسانة قدرت تدينى تفسير منطقى للى بيحصل فى حياتى وبدات اخد دوا اسمه فافرين اتحسنت شوية واتفقت معاها انى هتحدى كل الظروف وهدخل تانى امتحان الماجستير للاسف كنت بفشل بردو لانى مش سليم تماما واحيانا لانى بكون متوتر جدا قبل الامتحانات ومش عارف اذاكر وساعات لمجرد الهروب ... فاتت السنين كتير وانا بحاول اخد الماجستير ... اخدت دبلومة واحدة فى العلوم الادراية ... حسيت ان عمرى جرى اوى ولسه مش بشتغل ولا كونت نفسى ... بدات اشتغل امن لانها كانت متوفرة كنت بشتغل عدد ساعات كتير ومكنش فى اجازات فكان الموضوع ممل جدا ومكنش فى ناس بفدر اتعامل معاهم لان اكتر الناس مش متعلمة ... قررت اسيب الشغل لانه مش مناسب ليا ... وحاولت بعدها اشتغل امن تانى ففشلت اكتر من مرة ... حاولت ادرب مع ماحمى قلت دى المفروض شغلتى وهتعامل مع ناس تعليمها زيى وهيفهمونى بردو فشلت ... المحامى كان بيعتنى مشاوير بعيدة جدا وانا مش عارف الطريق اصلا ومش فاهم حاجة وكنت بتبهدل من موظف لموظف ودا يبعتنى لدا ودا لدا وانا مش فاهم حاجة وكنت بمشى اسأل المحامين ... مع الوقت حسيت انى مش بستفيد حاجة وبصرف من جيبى ... جربت محامى تانى كان عصبى وعاوز كل حاجة بالظبط وانا لسه مش فاهم وكل ما اغلط غلطة يزعق لى وسط زمايلى بدات احس بالتوتر والقلق واكره الشغل معاه ... جربت مع محامى غيره كان بيطلب منى اقابل الناس واكدب عليهم وبردو كان عصبى جدا وبيهينى ادام الناس ومكنتش بتعلم حاجة غير انه بيستغلنى بس وبدفع فلوس من جيبى ... فصرفت نظر ... للحظة دى انا عندى 32 سنة ونص .. حصاد حياتى هو انى تايه تماما ومش لاقى نفسى ... حاسس انى واحد تانى معرفوش ... مهزوز مش واثق فى نفسى ... فشلت فى كل حاجة تقريبا ... كان نفسى اعمل دكتوراة واكون متخصص وفشلت ... الشغل فشلت فيه لانه دايما بيكون مش مناسب ليا وبشتغل شغلانات بتبهدل فيها وبتعامل مع ناس مش نفسى تعليمى ... مش عارف اتجوز ... اصلا مش عارف اعيش ... وحاسس ان عمرى بيضيع وبس وكان انا عمرى وقف عند 18 سنة وبس .... بكتب الكلام دا وانا محطم تماما معنديش امل فى اى حاجة ... وزنى زاد جدا بسبب الدوا الى باخده ... مش عارف اخس لانى لازم ابطل الدوا ولما ببطله حالتى بتسوء .. حتى دى كمان فشلت فيها .... لو ينفع حد متخصص يدينى وسيلة تواصل معاه هيكون ساعد انسان مات من زمان انه يحس بوجوده فى الحياة

Accepted Answer

بالنسبة لموضوع العادة السرية فالأهم من الدواء هو أن يكون جواك وازع ديني يخليك تبطل العادة دي .. وقناعة أن ربنا ما حرمش علينا حاجة غير لحكمة والحكمة الواضحة هنا هي أن إفراغ الشهوة في غير محلها سيضعف لديك الوازع للزواج وهذا سيؤخر نضجك وتكوينك للأسرة .. لازم يكون امتناعك عن مشاهدة الحرام بسبب خوفك من ربنا في المقام الأول وأكتر ما يساعدك على كدة هي أنك تشغل نفسك بالبديل الحلال كلما أوعزتك إليك نفسك او شيطانك مشاهدة الحرام أو تخلي حواليك صحبة صالحة من أهل المسجد تساعدك على نفسك. واسمح لي أقول لك نصيحة بخصوص الجانب المهني من مشكلتك .. العمل في مكتب محامي ليس هو مصير كل من يتخرج من كلية الحقوق! الوقت الذي أنت فيه الآن الدنيا مفتوحة فيه جدا عما كانت عليه من عشرين سنة وممكن خريج الحقوق والتجارة وغيرها يتعلم مهارات يشتغل بيها شغلانات مطلوبة جدا دلوقتي مثل البرمجة - التسويق الإلكتروني - التصميم وغير كدة كتير وهتلاقي كورسات مجانية وكورسات مدعمة من وزارة الاتصالات تتيح لك تتعمق في أي مجال من دول.

Answer

ازيك يا محمد، بتمنى ليك الشفاء العاجل بإذن الله. أول شيء يا محمد، مينفعش ابدا تقرر من نفسك تقطع الدواء، وترجعله تاني، أو حتى تلعب في الجرعة، لازم قبل ما تأخذ أي قرار بشأن موضوع الدواء ترجع للدكتور المختص اللي بتابع معاه. من كلامك هنا، بيوضح لينا انك مش مرتاح لسه مع المعالج بتاعك، ف لازم في أسرع وقت تتوجه لمعالج نفسي أخر، ميكونش بس بيدي علاج فقط. هنا هفتح معاك كذا نقطة انت اتكلمت فيها. أولها الوسواس القهري، محمد هل انت في طفولتك كان فيه عنف في البيت خاص بموضوع الدين، يعني مثلا ضرب على الصلاة، كان فيه تذمت مثلا، هل كان الكلام ده موجود؟ وهل حاسس بالذنب تجاه ربنا علشان بتمارس العادة، أو انك بتشاهد مواقع الاباحية؟ موضوع الوسواس الخاص بالاله، أول حاجه لازم تكون متيقن منها، هو انك مش كافر بالله، أو حتى خرجت من الملة. تعرف يا محمد ايه الفرق بينك وبين مريض الوسواس مثلا الخاص بالنظافة، هو أنه قادر يفرغ الفكرة، قادر يطمئن نفسه بأنه مثلا يروح يغسل إيده كذا مرة، أو أي فكرة تجيله. هنا أنت مش قادر تفرغ اللي جواك، فالبتالي ده بيتعبك أكتر، هي ديه كل الفكرة. الوسواس يا محمد بيلمس في أكتر حاجه شغلاك، أو خايف منها.. ف معايرك اتجاها بتزيد. أما بالنسبة للدراسة أو الشغل، محتاجة اعرف منك هل الأهل وانت ف سن المراهقة كانوا شادين عليك في موضوع المذاكرة، أو كانوا بيقارنوا بينك وبين زمايلك أو قرايبك؟ لو كان ده بيحصل ف ده تفسير منطقي لكل اللي حصلك، عدم الثقة في النفس، توتر وقلق، مش عارف تركز، مش عارف تاخد بالك من نفسك أو مذاكرتك. وده بيبقي نتيجة طبيعة لاختيارتك في الشغل أو الحياة عموما. وعلى فكرة مش شرط علشان انت فشلت في كل اللي فات يبقي انت عليك الغلط ١٠٠٪، بالعكس انت ذكرت في كلامك أن اساسا كل الشغل ده، كان مش مناسب ليك، بل بالعكس كانت بتحصل حاجات في الشغل ده انت غير راضي عنها، ف مش طبيعي تجيب كل اللوم على نفسك ولا ايه؟ انت ممكن تكون اختارت غلط في الاول، لكن ده طبيعي جدا، احنا كلنا بنغلط وكلنا لازم نجرب، ما هو احنا مش هتعرف الغلط ده غلط ليه أو صح ليه من غير ما نعرف. واخيرا .... العمر لسه مراحش منك يا محمد، لسه بايدك. العمر مجرد رقم، انت لسه صغير، قادر انك تسعى وتعافر وتكتب قصة نجاح تفتخر بيها. وانا شايفة انك لسه بتعافر، ولسه عايز توصل. المهم تركز ... اختار معالج كويس تستمر معاه، وياريت ميكونش بس بيعتمد على الدواء فقط، لا لازم يتكلم معاك ويشوف خطة علاجية يتابع معاك بيها. حاول تبدأ يا محمد بعمل أنشطة بسيطة.. زي مثلا انزل اجري كل يوم نص ساعة أو ساعة. حاول لو بتحب القراءة تشوف انت مهتم باي مجال واقرا فيه. انصحك انك تقرأ في المجال النفسي وتنمية الذات، أكتر حد يا محمد ممكن يساعدك في الدنيا هو نفسك، انك تعرف عن نفسك اكتر وتفهمها ده هيساعدك بدرجة كبيرة. يرشح ليك كتب د. محمد طه (علاقات خطرة، الخروج عن النص الجزء الاول والثاني، لأ بطعم الفلامنكو) ابعد عن الناس السلبية، فيه حد بيحبط تجنبه، طيب لو كان الناس دول أهلي، حاول على اد ما تقدر انك تتجنب الكلام السلبي منهم. احمي نفسك... بتمني ليك السلامة

Answer

صباحك فل ياولد 🥰 بص هما كلمتين يابني ملهمشي تالت ومش هرغي كتير ، محدش خالي ولا حد سليم ، كلنا فينا أمراض الدنيا ، إنما مش كل واحد شجاع زيك كده علشان يعبر ويفضفض. ده معناه انك قوي جدا والاعتراف هو بداية العلاج ، تتوكل علي الله واستمر مع طبيبك وخليه يديك بديل للدوا الي بيتخنك ومارس رياضتك والتزم بقيام الليل والصلوات وقرب من ربنا وادعيله يابني ، ده علاجك في كبسولة وطالما بتسعي هيديك ولو بعد حين اسأل واحده شعرها شاب من التجارب بحبيبي وربنا يرتضي قلبك وصباحك منور زي وشك

قصة حياة ضائع

نفسية

العادة السرية

سؤال من mohamed khater

تم النشر الأحد، ١١ سبتمبر ٢٠٢٢

6 إجابة

9 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك