قصتى بدات لما شوفته صدفه مره معرفش ايه اللى حصل بس فى حاجه شدتنى ليه جامد اتكررت الصدف ومع الوقت طلعت اعرفه وان اهلنا معارف وبدات احبه رغم ان لا بينا كلام ولا حاجه وان اى تعامل كان بيحصل كان بحدود وكلمه قد الكلمه اذا كان منى او منه بش كل يوم بيعدى بيزيد حبى ليه مش عارفه اتعافى منه ولا ابطل احبه .. فى لحظه ضعف منى وانى كنت تعبت من الحب دا قررت ادخل اكلمه واعترفله وهو لا رفض ولا رحب بالموضوع اتعامل عادى فاعتذرت وقطعت كلام وعملت كل الطرق علشان انساه
بدات ابعد عن اهله واى حاجه ممكن تربطنا ببعض وفضلت اكتر من ٥ شهور مبروحش المكان اللى هما فيه رغم ان اهلى كانوا بيروحوا
عملتله بلوك علشان مدخلش عنده ولا اعرف حاجه عنه خالص وقفلت سوشيال علشان اقطع الطريق كله
وقربت لربنا اكتر وكنت بدعى والله فى صلاتى انساه وان ربنا يزيل حبه من قلبى
بس رغم كل محاولاتى اللى عملتها فشلت ابطل احبه .. ف عز ما كنت ببعد وبقفل اى طريق يوصلنى ليه او ييجى فى بالى كان بيحصل مواقف غريبه تمنع دا زى انى اكون ماشيه ف الشارع الاقيه ف وشى اجى اركب مواصلات الاقيه راكب فيها او انى اتزاول بحد من ضهره شبهه بالظبط وحاولت كتير والله ابطل احبه واكرهه بس معرفتش
فممكن تساعدونى انا بقالى سنتين على الحال دا وحرفيا مبقاش يفارق تفكيرى ابدا كل ما اصلى ادعيله وبقيت بحس بيه لو متضايق ولو مبسوط معرفش ازاى بس فى حاجه جوايا بتعرفنى
انا اوقات كتير بستغرب طب اشمعنا الشخص دا ليه دا الوحيد اللى وقعت فحبه بالشكل دا رغم انى شخص عملى وكنت رافضه الفكره فليه طيب هو؟
ومش هخبى بس اوقات كتير بتمنى انه يكون من نصيبى وبدعى ربنا بكدا مش عايزه لا قلبى ولا خاطرى يتكسروا وانا مليش ايد ف الحب دا والله ما بايدى .. للعلم هو شخص محترم جدا يعرف ربنا الحمدلله ربنا يديم القرب عليه ويثبته يارب ومش مرتبط لان مش طريقه ولا سكته زيى واكتشفت ان فى اهتمامات كتير بينا مشتركه زى حب الكلاب والموسيقى وهكذا واكتشفت برضو ان بنات كتير اوى معجبه بيه وبتبعتله على صراحه وكدا وهو بيرد عادى
انا رجعت اتعامل معاه ومع اهله تانى وهو بيتعامل كويس جدا معايا وكله بحدود لا تغضب ربنا الحمدلله
واسفه على الاطاله
الحب اللى بدون سبب ده رخم اوى. متفهميهوش ده رزق ولا ابتلاء ولا ايه بالظبط . تدعى ربنا انه يكون من نصيبك ولا من كتر ما بيوجعك تقولى يارب امحيه خالص. بس هو بيبقي خيله كدابه كده ...بتخلى الواحد يجرب حاجة جديدة ولانها جديدة بتاخد كل الانتباه بتاعنا فى الحياه...غصبن عننا ونبقي شايفين ده فى كل حته . هو بيبقي زى دور البرد كده ....لو اخدتى حاجة تقوى المناعه هيروح لوحده ...لو اهملتى هيهدك. قوى مناعتك انك تستقبلى الحب من كل اللى حواليكى...وتقدمى حب للى بيحبوكى *اهلك وصحابك * تعمدى الضحك والسعادة فى كل مكان يظهر عليكى دور البرد ...لان عينيكى هتفضحك ...اوعى تبقي دبلانه ولا مكسوفه ...ما الناس كلها بيجيلها برد ( قصدى كلهم بيقعوا فى الحب )😁 بس مش كلهم زيك مركزين ومسيطرين وواخدين بالهم من نفسهم....ان شاءالله دور برد وهيروح لحاله 😉....او هتتصالحى معاه وتبقي عندك مضادات حيويه طبيعيه ويجى هو يقولك انا اتعديت منك 😊
تم النشر الجمعة، ٢٨ يوليو ٢٠٢٣
انتي مش بتحبيه .. هو الموضوع وما فيه انه انجذاب واعجاب شديد منك له .. لكن ازاي الواحد هيحب حد وهو اساسا متكلمش مع الشخص ده كلمتين ع بعض .. مش اقولك بقى عارفاه مثلا واصحاب ف مثلا حبتيه! لا انتي حبتيه بينك وبين نفسك لمجرد انك كنتي بتلمحيه صدفة كل كام مرة .. هل ده حب ف انا بصراحه بقولك لا .. ده مجرد اعجاب .. طيب ايه اللي مخلي الموضوع معاكي شديد اوي كده؟ العقل وما ادراكي ما العقل .. عقلنا ممكن يفضل يوهمنا بحاجات كتير، وفي الحيقة احنا عندنا قدرة غير عادية اننا نقدر نحول من اي حاجه صغيرة قد كده .. لحاجه كبيرة جدا جوانا. يعني مثلا عمرها مثلا ما حصلت ليكي انك قعدتي تتخانقي مثلا مع واحدة صاحبتك ولكن الموضوع كان صغير وانتي مثلا توقعتي حاجات جوه دماغك والموضوع كبر بقى جواكي .. واصلا الموضوع مكانش يستاهل ده كله ... علشان يطلع من جواكي .. لازم تقنعي نفسك بكده .. ان ده مش حب، ان ده مجرد اعجاب وانا اللي عملت ده كله جوه عقلي. علشان يطلع اكتر واكتر بقى متحاوليش تشوفيه .. حاجه كمان علشان توفري ع نفسك كل ده بقى .. انتي قولتي انك روحتي وقولتي له انك بتحبيه .. طيب هو ولا رحب ولا رفض .. يعني اللي هو ساب الموضوع عايم كده والنوع ده تقلقي منه شوية .. ولكن ممكن برضه يكونش مش عايز يحرجكك ويقول صراحة انه لأ .. ف انتي افهمي انتي ان الموضوع مقفول وشيليه من دماغك.
تم النشر السبت، ٢٩ يوليو ٢٠٢٣
كون إنك صرحتي له بحبك فأنت كدة (بحسب مصطلحات العلوم السياسية) أخذت الخيار النووي:) يعني الخيار الذي ليس بعده خيار! وبعد .. فقد عملت كل ما يمكن عمله من أجل رعاية جذوة الحب التي اشتعلت في قلبك والإحسان إليها ولم يبق إلا أن تتركيها تنطفئ بهدوء! ولكن ماذا لو لم تنطفئ من تلقاء نفسها؟ هناك أمور كثيرة يمكن عملها ولكن أبسطها أن تعتقدي يقينا من كل القصص التي تسمعين عنها أن الحب ليس مرادفا للسعادة الزوجية وأنك لا تدرين لو تزوجك هذا الشخص هل كنت ستعيشين معه في سعادة أم لا .. هذه الفكرة وحدها إذا ترددت في ذهنك مرارا مع الاستمرار في البعد التام عن هذا الشخص وكل ما يذكرك به قد تساعدك في تخطي هذه العلاقة .. وطبعا لا تنسي الدعاء بأن يحفظ الله عليك قلبك ويرزقك خيرا منه.
تم النشر الجمعة، ٢٨ يوليو ٢٠٢٣
تمام حصل خير
تم النشر السبت، ٢٩ يوليو ٢٠٢٣
أنا مش قصدي إن دا حب متساوي أقصد إن في بشر بيبقوا واقعين في الأبتلاء دا فا عشان كدا ذكرت النقطه دي مقصدكيش أنتي خالص ولا قصتك أصلاً
تم النشر السبت، ٢٩ يوليو ٢٠٢٣
تقرييا حضرتك اللى محتاج تقرا الكومنت كويس .. الكومنت بتاعك لا كان فيه آيه من القرآن ولا بتقول فيه كدا كان كل الكلام عباره عن ان دا حب متساوى لحب ربنا ودا مينفعش رغم انى لا ذكرت الجمله دى ولا ينفع اصلا تتكتب ولا ينفع يبقى ف مقارنه من الاساس ولا عمرها حصلت فاتمنا تكون عارف ايه اللى يتكتب وايه لا للن الانسان هيتحاسب على كل كلمه بيقولها وهو مش واخد باله
تم النشر السبت، ٢٩ يوليو ٢٠٢٣
أنا ذكرت النقطه دي وذكرت بعدها إنك ممكن متكونيش فيها و لأن كان في قصص كتير في الموضوع دا وبيبقى مشاعر الحب أختبار ربنا ليهم و أستدليت عليها بآيه من القرآن (ومن الناس من يتخذ من دون اللّه أندادا يحبونهم كحب اللّه) أتمنى تقرأي الكومنت كويس لأني مقولتش فعلاً إنك في النقطه دي أنا بقول عشان لو حد عندوا المشكله دي وبيقرأ
تم النشر السبت، ٢٩ يوليو ٢٠٢٣
حضرتك بتتكلم ف نقاط بعيده تماما ومعرفش جبتها منين .. انا واخده بالى ان بتعمل نقارنه بين حبى ليه وحبى لربنا من العدم واللى هو مينفعش اصلا ودخلت حاجات ف بعض ... ايه اللى جاى حب دنيوى لحب بين العبد وربه وايه اللى ذكر كل اللى حضرتك بتتكلم فيه دا .. حضرتك انا لا قولت بحبه قدر حبى لربى استغفر الله ولا ذكرت اى حاجه خاصه بكدا هو لو الانسان حب حد اوى يبقر كدا يتقارن بالمكانه دى؟ مفيش مقارنه اصلا ومقبلش بيها اتمنا حضرتك تركز بتقول ايه
تم النشر الجمعة، ٢٨ يوليو ٢٠٢٣
متفهم جدا، طب مفكرتيش إنها ممكن تكون نعمه من ربنا بس مش دلوقتي وممكن عادي يكون أبتلاء عشان ربنا يختبرك يعني أستغفر اللّه أحنا كبشر ممكن نعمل كدا و يبقى في شخص في قلبنا بنحبه كتير اوي بنفس قدر حبنا لربنا ودا مينفعش بس مش شرط النقطه دي لأن من الواضح إنك متدينه، أهم حاجه في الموضوع دا الصبر على الألم فقط عارف حضرتك بتشعري بأيه وإن الحوار لا يطاق ومؤلم لأبعد حد في بعض الأوقات ولكن مشاعر الحب بالذات منقدرش نشيلها بدواء معين مثلاً عليكي بدعاء ربنا أولاً ثم الإنشغال في شئ ثانياً, عدم هجر القرآن لان القرآن هو اللي هيخليكي تشعري بالحب الحقيقي حبك لربنا فعلاً بيكون أقوى بكتير بس أحنا نسينا اللذه دي شويه
تم النشر الجمعة، ٢٨ يوليو ٢٠٢٣
وعليكم السلام بس هو اصلا مفيش حاجه بينا علشان ابعد عنه ومنكملش وكدا ولا حتى اعرف بيحبنى او فى حاجه ناحيتى ولا انا بس بتكلم من ناحيتى انا .. انا بحبه من غير حاجه ومش مستنيه منه اى حاجه وحاولت كتير انساه واكرهه بس معرفتش وكل محاولاتى فشلت + هو الحمدلله شغال وحاله كويس لكن دا ميفرقش معايا لان اصلا انا معرفش مشاعره اتجاهى ايه يعنى ممكن تقول عليه حب من طرف واحد بس
تم النشر الجمعة، ٢٨ يوليو ٢٠٢٣
السلام عليكم، أنا هقول حاجه مؤلمه شويه ولكن هي واقعيه للأسف، لو الشخص دا مش هيعرف يتجوز أصلاً يعني مش معاه شقه مثلاً مش شغال وما إلي ذلك حاولي فعلاً تبعدي عن كل الطرق الموصله ليه لو صدف عشان دا كدا هيبقي وجع ليكي ولو هو بيحبك هيبقي وجع ليه لأنه مفيش حاجه يعملها حرفياً الزمن دا هيبقي الجواز قليل بسبب التكاليف الغاليه جدا حتى الأيجار بقا محتاج تكاليف أنا أسف لو زعلتك بس دي نقطه لازم تشوفيها برضوا
تم النشر الجمعة، ٢٨ يوليو ٢٠٢٣
دا لو كان اعجاب كان فته وخلص لكن دا بقالى اكتر من سنتين على الوضع دا .. بتوتر لما بشوفه وبفرح وبنشغل عليه وعلى اخباره ويهمنى انه يكون بخير بدعيله دايما وبخاف عليه فاكيد كل دت مش اعجاب
تم النشر الجمعة، ٢٨ يوليو ٢٠٢٣
لعرض السؤال في فدني اضغط هنا