السلام عليكم ورحمه الله وبركاته
بجد اتمني اي حد يفيدني
انا عندي ١٨سنه ومش مرتبطه حاليا انا بكمل دراستي بعد ثانوي فني، بركب مواصلات كتير وكده علي ما اوصل المعهد بتاعي ومن ضمن المواصلات دي في باص وانا بركب فيه فصاحب الباص ده انا كان معايا رقمه علشان أقوله انا هستناه فين واعرف التفاصيل علشان كنت اول مره أركب وكده
فهو حبني وكان بيكلمني بس مكنش عبر عن اللي حاسس بيه وبعدين قلت له انت بتكلمني ليه فقالي انا عاوز أتكلم معاكي في موضوع مش ينفع احكي فيه ف التليفون قولت تمام فركبنا انا وهو نفس المواصلات واتكلمنا وقالي وقتها إن هو بيحبني وقالي كلام حلو كتير مش كلام حب وكده ...
لا هو قال كلام محترم بجد وقتها بس هو بجد كلامه محترم جدا وهو محترم معلمش اي حاجه غلط ولا قال اي حاجه غلط فقال أنا كنت عاوز اروح لابوكي بس قولت اعرف رأيك انتي الاول علشان رأيك انتي اللي يهمني وانتي اللي هتعيشي معايا ولو وافقتي هروح لابوكي واطلبك منه وحكالي كل حاجه عنه ووقتها كنا وصلنا المكان اللي كنا رايحينه وقالي في نقطه عاوز اكلمك فيها قولتله طب قول ايه هي
قالي هيطول شرحها جدا واحنا كنا وقتها وصلنا المكان فقالي قولي رأيك ايه فمردتش عليه قال تمام هسيبك تفكري كل الكلام ده حاصل يوم السبت اللي فات ده ولحد الان احنا بنتكلم بس لسه مردتش عليه وكل ما نتكلم يقولي قولي رأيك ايه وانا بقوله إن انا بجد متلغبطه ومش عارفه افكر خالص دلوقتي
دخلت ع الاكونت بتاعه ع الفيسبوك وعرفت أنه عنده ٣٣ سنه وعرفت أنه كان متجوز قبل كده فلما قلت له قولي ايه هي النقطه اللي انت كنت عاوز تقولي عليها قالي مش هعرف احكيلك كده عاوز نتقابل علشان بس تفهميني فقلت له انا شاكه ف حاجه ولو صح انا مش هوافق فقالي قولي شاكه ف ايه فسألته انت كنت متجوز قبل كده قال اه بس والله انا مش اخترتها دي كانت جواز صالونات واتجوزتها علي اساس الكلام اللي سمعته لما سألت عليها ومكنتش مرتاح معاها في الخطوبه بس بقى اهلي بيقولولي هترتاح بعد الجواز فاتجوزت ومكملتش ٣ شهور وحصل بيني وبين امها خلاف وامها حلفت لاطلقها وفي الاخر بعد ما طلقتها اكتشف أن هما جماعه من جماعه الاخوان
المهم انا قلت له انا مش موافقه ع كده قالي والله العظيم اللي حصل كان غصب عني وبعدين انا برضو انسان وعندي احساس وعندي مشاعر ومن حقي أحب برضو وقالي والله العظيم انا شاريكي بجد وانا مش بلعب ولا بتسلى والله انا عاوزك بس تقولي انك موافقه وانا هاجي لابوكي واطلبك منه
وقالي أقسم بالله العظيم انا من اول ما كلمتك اول مره وانا كنت بقوم ف نص الليل ادعي ربنا انك تكوني من نصيبي وقالي انا عاوز اقولك كلام كتييير انا حاسس بيه تجاهك بس مستني بس إن أي حاجه تتم ما بينا خطوبه أو حتي قراءة فاتحه.
حسيت اني ممكن اوجعه جدا لو قولتله انا مش موافقه وحاسه من كلامه أن هو فاهم الدنيا كلها وفاهم الصح من الغلط ولو غلطت بيقولي أن ده غلط وبيقولي ع الصح انا بجد مش عاجبني وضع أنه كان متجوز قبل كده خالص قالي انا عارف ان اتحسبت عليا جوازه بس والله كل ده مكنش بأيدي هو ده نصيبي وده اللي مكتوب لي عند ربنا بجد والنبي قولولي اعمل ايه وانا متاكده أن اهلي برضو مش هيوافقو علي حكايه الجوازه اللي فاتت دي ولا حتي هيوافقو علي السن
رجاءا فيدوني
طبعاً تحولي الموضوع لبابكي مباشرةً وتقولي له إن في شخص جه طلب منك رقمه وانتي أديتله الرقم، وباباكي راجل واعي وكبير وعنده خبرة أكثر منك بكثير لو شاف الشخص ده مناسب هيوافق لو مش مناسب مش هيوافق. وساعتها لما باباكي مش هيوافق الشخص ده هيبعد عنك تماماً. كمان نصيحة مني أوعي تاخدي رقم حد متعرفهوش تاني، ولو هيحصل لأي ظرف متفتحيش مجال نهائي نهائي للنقاش وبلاش نقاش جانبي انتي لسه صغيرة وكويس إنك وقعتي في شخص محترم، لو بعد الشر موقف ده حصل مع شخص مش محترم كان بجد العواقب هتبقا بشعة أرجوكي خلي بالك من نفسك اكتر من كده وبلاش أمان زائد. وبلاش تنزلي تقابلي حد ولا حتى تركبي مواصلات مع حد متعرفهوش في أشخاص مريضة في أشخاص ممكن تركبي معاهم باص أو ميكروباص عام وتكتشفي أن كل في ميكروباص أو باص تبعهم، ممكن تطلع بعد الشر عصابة، تجارة أعضاء ألخ. أرجوكي لا تستهوني بالموضوع الموضوع بقا منتشر خلي بالك ومتعمليش كده تاني أنا بنصحك علشان خايفة عليكي، حافظي على نفسك البنت في سن ده الناس بتستغل حسن ظنها وبتبقا عواقب وحشة.
تم النشر الثلاثاء، ٥ نوفمبر ٢٠٢٤
طالما رأيت أن أهلكِ لن يوافقوا، فالأمر شبه محسوم مسبقا. سواء كنتِ ميالة له أم لا، أطلعي من أسرتك من ترينه مناسباً ويفضل أن يكون رجلاً كأباكِ أو أخاكِ، وناقشيه في الأمر واسمعي منه وزن وتقييم الرجال للرجال. ستتوصلون سوية لما هو أنسب وأصلح لكِ أنتِ أولا وقبل كل شيء آخر. إن وجدتما الأمر مرفوض في جملته، أوكليه إبلاغ خاطبك بالرفض. وإن وجدتما بصيصا من نور، سيكون عليه التواصل مع خاطبك وتحديد مقابلة بينهما ليتعارفا أكثر، ثم تعيدون تقييم الموقف. في جميع الأحوال لا تتركي نفسك فريسة لذريعة أنك ستجرحينه لو رفضته. هذه سنة الحياة وأي رجل عاقل واعٍ متزن يدرك الصواب من الخطأ سيتقبل الرفض وسيعرف أن نصيبه مع أخرى.
تم النشر الثلاثاء، ٥ نوفمبر ٢٠٢٤
انت ادرى انت عايزة ايه بالظبط والعيب طالما مش عارفه تتخطيه يبقى اتخطى الشخص نفسه لكن متروحيش تختارى واحد اكبر منك بجيل وكمان كان متجوز قبل كدا ومش بتحبيه ولا حاجة عشان بس هوه قالك كلام حلو فكرى كويس عشان دى حياتك محدش هيتظلم قدك واظن والدك مش هيوافق ع كدا برده
تم النشر الأربعاء، ٦ نوفمبر ٢٠٢٤
«إذا جاءكم من ترضون دينه وخلقه فزوجوه» صراحة لا تحتاج لسن معين لكن تحتاجين لإنسان مسئول ذو خلق ودين واللي هما بيكوني قليلين، مش لازم تحكمي على حد عشان ظروف حصلت معاه الراحه بتكون في المعامله والمسانده والاخلاق الطيبه والكرم بقدر الاستطاعه.... ومن فضلك فكري انتي الأول في الموضوع وصلي استخاره وما تقابلي حد لو حسيت انك مش مرتاحه انهي الأمر لو حسيت انك متلغبطه كلمي والدك لو ارتحتي خلي يتقدم ونصيحه بلاش اي تعارف خارج حدود البيت لانها ممكن تجيب تعلق والكسره هنا بتوجع الطرفين لا خلي الموضوع شرعي ومع الخطوبه تعرفوا بعض بالضوابط.... وبالتوفيق
تم النشر الثلاثاء، ٥ نوفمبر ٢٠٢٤
وعليكم السلام ورحمة الله وبركاته اول حاجه اذا كان محترم او لا دي مش انتي اللي تحدديها لما حد من اهلك يسال عليه كويس جدا جدا كمان جدا ويحاول يعرف طريقه تعامله مع اهله وطريقه تعامله مع المسجد يعني ساعتها نتاكد من كدا وبعدين من وجهه نظري اللي ملهاش لازمه هو لو عايز فعلا يتقدملك مكنش هيستنا ياخد رايك احنا كارجاله كدا لما بنعوز حاجه بجد مش بنستنا راي حد تاني حاجه فكره انك يبقي فيه بينكم تواصل ومكالمات دي مش مسموح بيه (غير للحاجه وبقدر الحاجه وشكرا) لو عايز نتعرف تعالي اتقدم وفيه حاجه اسمها رؤية شرعية دي بتتكرر عادي ونتكلم برحتنا ونعرف بعض وبعدين هو مش غاضض بصره عنك تتوقعي هيعمل كدا مع باقي البنات اللي في الشارع يعني (تعالي نتخيل يتقدملك واحد بيغض بصره حرفيا مشفش بنات غير قليل عشان الزمن اللي احنا فيه دا بيجبرك يعني انتو بتطلعو من كل حته دلوقتي.. بس حتي لو انتي مش جميله والله هيشوفك اجمل بنت في الكون ولو انتي جميله متخيله هتبيقي بالنسباله ازاي دي نقطه النقطه التانيه نفس الشخص الملتزم دا هيراعي ربنا فيكي يعني دا الاصل الموضوع بيبقا جميل )بالنسبه لي مش غاضض بصره هو حرفيا شاف كل الاصناف والانواع يعني سوشيل ميديا مش بتحرم حد من حاجه دلوقتي والتفزيون كمان تتوقعي لما يشوفك بلبس البيت هتكوني جميله بالنسباله )(الشاهد اي من الكلام ) انتي مش بتختاري كيس شبسي دا شريك حياه ولو طلع مش زي مانتي متوقعه مفيش حد هيلبس في الحيط غيرك برضو من نفس وجهة نظري اللي ملهاش لازمه طبيعي تكوني شايفه فيه كل حاجه جميله ببساطه انتي متعرفهوش اصلا وهتندمي لو حكمتي علي الكتاب من عنوانه فا سيبك من السن وسيبك من الهري بتاعي دا خدي لفه في التطبيق هتلاقي ناس كتيره اتبلت بالموضوع دا وانتي فسنك دا اسف بس مش السن اللي تقدري تحددي فيه مصلحه نفسك خصوصا في الجواز
تم النشر الأربعاء، ٦ نوفمبر ٢٠٢٤
اعتقد انى اهلك مش هيوافقوا عشان فرق السن والجواز لو انتى مقتنعى بيه خليه يتقدم وجربى
تم النشر الأربعاء، ٦ نوفمبر ٢٠٢٤
و عليكم السلام و رحمة اللّٰه و بركاته ، صلي استخاره في الأمور الي ذي دي و ربنا هيقدرلك الخير كلو ، و طالما هو انسان محترم و كويس ممكن يعجب اهلك غير إن الموضوع المفروض واقف عليكي انتي ، يعني لو عجبك الموضوع هيمشي و هتقدري تقنعيهم بس الأول استخيري ربنا و شوفي إذا كان مناسب ولا لاء ساعتها فكري في الخطوه الي بعد كدا ، بس لحد ميحصل ده حاولي متتواصليش معاه كتير عشان مفيش حاجه رسمية مبينكم و بالتوفيق
تم النشر الأربعاء، ٦ نوفمبر ٢٠٢٤
لعرض السؤال في فدني اضغط هنا