انا مطلقه وعندي ٣٤ سنه وعندي ولد بنت ٦ سنين النهارده طلبت من ابي انه يحترمني قدام ولا يهن فيا هو عمال يفتكر ويضحك ولادي عليا على مواقف كنت بخاف فيها من ٢٠ سنه من وقت ماكان عندي ١٨ سنه زعل وزعق انا ابويا شخص دكتاتورية مينفعش حد يرده او يعترض عليه شتمني وزلني بطلاقي وازاي هو وقف جنبي في الطلاق ومش سابني وانه اتبهدل واتوحل في الطين بسبب طلاقي مع انه عارف اني معملتش حاجه ولا كان ليا سبب في خراب ولا طلاق زلني على تصرفاتي وانا طفله من كان عندي ١٣ و١٤ سنه لما كنت بدور على أصحاب وازاي كنت بحال اصاحب بنات خالتي علشان كان نفسي يكون عندي اخت بنت افتكر لما اتولد قد ايه كان يوم اسود وطين لما لاقيني بنت وقد ايه هو حزين طول عمره على خلفتي بعد كده بدا يتهمني ف شرفي وازاي انا ممكن اروح اتجوز واسيب العيال ده طبعا مش حاصل بس هو باباكده من زمان وقت الزعل يتهم الناس في شرفها وفي نفس الوقت لو سمع حد بيعمل كده يقوله حرام متسبش حد في شرفه
زل فيا واهانه وتحقير بسبب اني طلبت منه يحترمني بلاش يصدر لولادي اني كنت ضعيفه
اهانه وتحقير فيا بسبب اني طلبت الاحترام
انا غلطت في ايه
بابا منع عني كل الناس معنديش أصحاب حتى امي انا مش بفرق معاه ولا اعرف يعني ايه ام وحضن ام من زمان قوي وكانت بدور في اصحابي على وحده تديني الحنان والحب ولما لاقيتها صحبتي وعرفوا خلوني سبتها وكل شويه يعيروني بيها وانت كنتي مصاحبه وبتزلي نفسك ليها وشغاله ليها خدامه وتروحي توصليها بالعربيه علشان بتخليها
حتى اخواتي ليا اخين اخ سافر وبيجي كل فين وفين علشان ميتعاملش مع بابا وده مفيش كلام بيني وبيه
وأخ معانا هنا ده بابا بيحبه جداااااا ولو عمل ايه ولا اتكلم معاه ازاي مستحيل يزعل منه ولا يزله ولا يجرحه ولا حتى يفتكر ليه اي حاجه وحشه اخويا ده حتى لو شافني بعيط ميجيش يسالني مالك فيكي ايه ولو انا حكيت من نفسي يقولي بصي الواحد قرفان وحده يخليني اسكت
معنديش أصحاب اخاف من بابا
حتى لما حد يتصل بيا من أصحابي في البيت مش برد لحد مابقاش حد يتصل ولا يسأل عليا
تعبت من وحدتي
انا ام الطفلين لا أعرف اخذ قرار في حياتهم ولا اقدر اوجهه ولادي بطريقتي انا مش عايزاهم زي مالهمش شخصيه ولا ضعفا اي حوار بيني وبينهم لازم يدخل فيه ويشتمني او يتنمر عليا على طول شايفني انا غلط على طول شايف اني لازم اكفر عن ذنبي هو اني أطلقت
علشان مطلقه قالي كده بابا بالحرف انتي ليكي عين لسه تتكلمي وتقول احترمني ليكي عين تعترضي انتي الي زيك يعيش وهو ساكت زي الكلب مش كفايه الي عملتيه فينا
مع العلم الجواز ده كان اختياره بابا وكل الي حصل في الجواز الخطوبه من مشاكل هو كان على علم بيها وكان بيسكت وشاف الغلط اكتر من مره وكان بيعديه
انا تعبت ومش عارفه ازاي انا واقفه على رجلي وازاي انا معنديش ضغط وسكر لحد النهارده
انا ببقى موجوعه واخاف اعيط ببقى حزينه واخاف ابين امسك المخده واكتم بيها نفسي واعيط وابكي علشان محدش يسمع صوتي او افضل اعيط لجوا واكتم في نفسي لدرجه بحس تنميل في وشي من كتر الضغط على نفسي علشان مطلعش صوت
ميجيش مره في يوم حد يقعد يقولي مالك او يسالني انتي كويسه مفيش كده كله بيتعامل معايا اني مطلقه ماليش حق في حاجه
مع العلم ان كل أمورهم انا الي بخلصها اي حاجه مش عارفين يجيبوها انا الي بعملها حتى اخويا انا الي بخلص ليه أموره الاداريه في الشغل طلبات ابويا وامي انا الي بجيبها والف عليها في الوقت الي بيكونوا محتاجين حاجه ببقى جدعه بعد مايخدوا مصلحتهم انا ببقى مطلقه
بصى يا بنت الناس ...انتى 34 سنة بس مش حرة نفسك ..والدك ليه عليكى البر والاحترام فقط مسؤوليتك تجاه نفسك وتجاه اولادك تحتاج الى صبر ومواقف ثابته وحازمه ...عاوزه الحكايات القديمة الضعيفة متأثرش عليكى ,..اعملى مواقف جديدة تكون هى الدرع اللى يقول انك فعلا شخصية تانيه استسلامك وسكوتك عمره ما هيوصلك لشىء انتى متقبلة عدم الاحترام ممكن قصاد ان ابوكى متحمل مصاريف اولادك ...انتى متقبله انك تكونى مربوطة بسلسلة من رقبتك كل ما يشدوها تتألمى ...بأيدك تفكى السلسلة وتكونى حرة وتديرى امورك انتى واولادك للاسف مقدرش اقول غير انك محتاجة تستقلى باولادك مهما كان الوضع المادى هيكون صعب ...لكن ده الحل اللى تقدرى بيه تتعافى من الالم وتكونى سوية واولادك اسوياء ...لان والدك مش هيغير اسلوبه ( الا ان يشاء الله )
تم النشر السبت، ٩ سبتمبر ٢٠٢٣
انا متفقة في الرأي مع كوتش ياسمين .. انتي اللي ب ايدك تفكي السلسلة اللي حوالين رقبتك .. مش هنضحك عليكي ونقولك ان بابا ممكن حاله ينصلح، لان من الواضح هو معاملته كده، ومش هتتغير ومحاولتك معاه حتى ف تغييرها ضعيفة جدا. انتي كبيرة مش صغيرة، وتقدري تستقلي بنفسك وتشتغلي ومتسمحيش لحد انه يذلك ولا يقولك كلمة جارحه، اشتغلي واعملي فلوس .. واستقلي انتي واولادك .. لو مش ف الامكان دلوقت .. انتي ممكن تستقلي وانتي قاعدة ف البيت معاهم. ده برضه بيتك كده كده. بس ب ايدك انك تعملي لنفسك كرامه وشخصية، مش بقولك اتخانقي معاهم، انتي ما عليكي غير البر والاحترام .. له ولوالدتك. بس لازم تعملي حدود لنفسك ول اولادك .. متستلميش للوضع الحالي .. الوضع مش هيتغير من نفسه واحنا قاعدين كده! احنا اللي مسؤولين عن كل اللي بيحصل.
تم النشر السبت، ٩ سبتمبر ٢٠٢٣
السلام عليكم ورحمة الله وبركاته شكرا لحضرتك ع المشاركة الأذي النفسي بيكون مضاعف اما يحدث من الدائرة المقربه الله يعينك ويجعله في ميزان حسناتك ويجعل المحنة دي تبصير للمنحة اللي ربنا مقدرها ليكي هاخد منك كلامك انك ام مسئولة عن نفسك وعن أولادك ومسئولة عن تخليص أمور عيلتك حتي اخوكي بتخلصيله اموره يبقي حضرتك علي قدر يحترم من المسئوليه ودا يخليكي فخورة بنفسك كل واحد ليه كذا دور فحياته وكل دور بيتطلب مني بذل وعطاء وعشان حياتنا تكون علي قدر كافي من الاعتدال أشوف نفسي فكل دور فحياتي بعمل ايه دورك مع خالقك دورك مع نفسك دورك مع أولادك دورك مع والديكي دورك مع أسرتك الصغيره وهكذا ممكن اشوف نفسي انا فين في كل دور وازاي ابقي أحسن ازاي بإمكانياتي المتاحة دلوقتي بظروفي اللي انا فيها أكون أفضل عشان نفسي اولا وعشان أكون مثل لأولادي أترك أثر طيب في نفوسهم اليوم هو ذكري الغد اعمل ذكريات ايه حلوة لاولادي لو اشتغلنا علي كل دور وطورنا نفسنا فيه هتلاقي تغير جذري في حياتك وفي معاملاتهم معاكي وربنا يقدرلك الخير ويرشدك للصالح
تم النشر الثلاثاء، ١٩ سبتمبر ٢٠٢٣
انزلي دوري ع شغل و خدي شقه ايجار و خدي عيالك و امشي متسمحيش لحد يذلك ولا يهينك حتي لو كان والدك
تم النشر الثلاثاء، ١٢ سبتمبر ٢٠٢٣
ربنا يهدي
تم النشر الأحد، ١٠ سبتمبر ٢٠٢٣
لو بتشتغل او تقدري تجيبي فلوس انك تشتري او تأجري بيت تعيش فيه انت واولادك ده افضل حل وحاولي تسمعي فديوهات وتقراءي عن كيفيه معامله الاطفال وطرق التربيه علشان متقعيش في حاجه انتي بتحاول ماحصلش ليهم
تم النشر السبت، ٩ سبتمبر ٢٠٢٣
بصي لازم تفهمي حاجتين لازم تعرفي نفسك وتفهميها وماتستنيش الثقة أو الاحترام من حد لو احترمتي وقدرتي نفسك والديني لنفسك الحب والحنان كدة هتبقي متواضعة ومش محتاجة لحد حتي أمك وابوكي وقال الرسول أن ربنا رحم الله امرئ عرف قدر نفسه وانت في التلاتينات يعني في الشباب ابني لنفسك هدف مثلا استغلي واتعلمي في الدين وعلمي ولادك في الدين ولمدة هتبقي كبيرة في عينهم عشان هتبقي صاحبة كيان غير كدة النقطة التانية اللي لازم تفهميها إن الطلاق دا بلاء والبلاء عامل زي سؤال من ربنا ليكي في الدنيا الدنيا اللي هي الامتحان انت عندك سؤال في امتحان ومعرفة السؤال نصف الإجابة يعني أنك تعرفي ليه ربنا خلاك مطلقة دا هيزيد الرضا عندك وهيزيد نجاحك في سؤال ربنا ليك ليه ربنا خلاك مطلقة ؟ عشان تقوي نفسك انت بتقولي أن ماكنش فيه داعم طفولة ليكي ولا حد تحبيه واهو جوزك كمان راح بس ربنا بقي هو الداعم الوحيد ليكي واطفالك فكدة ربنا بيقولك أنا شديت عليك عشان تقوي وعشان تعتمدي علي نفسك وتكوني قوية وعندك كيان وشخصية وحكيمة واعرفي أن ربنا مش بيفرق بين الذكر والانثى أنت ربنا بيحبك دا اللي ربنا ماحطهوش في مشكلة أو بلاء لمدة ٤٠ يوم يراجع نفسه ربنا بايده يقوم نفسك اربطي حلمك بإرادة ربنا مش ارادتك يعني ازاي يعني وانت بتشتغلي تخيلي الحاجات الجميلة اللي نفسك توصلي لها دا هيديك دافع وحافز انك تكملي ايوا ماتستلميش ربنا بيحبك جدا علي فكرة كفاية بس إن حنان وحب ربنا معاك انتي وبس احمدي عشان انت قوية اعرفي نفسك وحبيها وعوضي نقص حنانك بنفسك واعرفي أن البلاء اللي انت فيه دا كأنه سؤال من ربنا بيقول لك فيه هل أنت هتحبيني انا ربك حبيبك مهما حطيتك في مشاكل وأوضاع وحشة هل أنت هترضي باللي انا اديتهولك وتتقربي مني رغم كل دا دا فعلا اللي هيثبت انك بتحبيني انا ربك حبيبك فأنت اعرفي أن قدر ربنا كله خير ليكي ودائما فكري في الإيجابيات والنعم والمميزات اللي ادهالك ربنا واعرفي نفسك اكتر انت بتحبي اي ونفسك في اي بس لازم يرضي ربنا
تم النشر السبت، ٩ سبتمبر ٢٠٢٣
معلش لو طولت
تم النشر السبت، ٩ سبتمبر ٢٠٢٣
لعرض السؤال في فدني اضغط هنا