السلام عليكم ورحمة الله وبركاته
انا حاسة دايما اني متضايقه وده عكس طبيعتي انا مكنتش كده ابدا وكنت دايما احب الضحك والهزار وكان ليا صحاب كتيره فجأة بقيت مش حابه حد، مش معنى كره بس مبقتش احب اتعامل مع الناس بمعني اصح ودايما قاعدة في اوضتي ومبقتش انزل الا مع واحده صحبتي بس علشان هي بتقعد تقولي ننزل بس من جوايا بكون مش عايزه انزل ولما بنزل ببقي عايزه اروح ومش مبسوطه رغم ان مبيكونش في حاجة تزعلني وحتي اهلي مبقتش احب اني اتكلم معاهم ومحدش منهم ضايقني او اذاني بس بقيت احس اني غريبه وسطهم ووسط صحابي ومبقتش حاسه ان حد فهمني الا نفسي وحتي انا مبفهمنيش كتير مع العلم اني بصلي الحمدلله وعلاقتي مع ربنا كويسه بس مكنتش كده انا مكنتش بصلي دايما وبقطع لكن دلوقتي الحمدلله احسن وبصلي وبقيت اهدا كتير عن الاول بس حاسه اني مش مبسوطه وبقول ده شيطان بيهايلي اني مش مبسوطه بس انا فعلا من جوايا مش مبسوطه وحاسه مش واثقه في اي حد حواليا اتعدمت الثقه مني لأي شخص اي كان مين وتعبت وعايزة حل يخليني مرتاحه نفسيه عن كده او اكون حاسه اني مبسوطه لان مبقتش مبسوطه والفتره دي حاسه اني مش حبه نفسي حته
وعليكم السلام ورحمه الله وبركاته. طالما حاسه انك متضايقه طول الوقت وده عكس طبيعتك اكيد في حاجه حصلت غيرت طبيعتك في حاجه يعني هي متقلت الموازين عندك في الناحيه بتاعه المتضايقه اكثر من اي حاجه ثانيه. في الاغلب هتكون الحاجه دي انك توقعتي شيء من الحياه من شخص من مجموعه اشخاص وتوقعتي قوي قوي وما لقيتيش ده. فلما ده حصل انت خلاص بقيتي حا تيجي انت تكوني خلاص اخذتي رد فعل وبدات تاخدي جنب منهم وزعلانه منهم فهما يزعلوا انك بتعملي معاهم كده وانت وهما كانوا قاعدين بيحضروا لك مفاجاه فكل الدنيا دي تتلاعبك فتبقى النتيجه في الاخر انا واخده جنبي وبنعزل وااا فكرت بشكل غلط تجاه اصدقائي اللي هم اصلا بيحبوني في الاخر انا متضايقه هم متضايقين حياتي باظت خلاص شكرا كله بسبب ايه بسبب انه في تفاصيل انا عمري ما هعرفها مخفيه عني طب احنا بنعمل في نفسنا كذلك اصلا بصراحه مفيش داعي خالص واا علشان. فيه محتاجه انك تفكري اكتر ايه هي النقطه الفاصله اللي خلتك تتحولي من طابعتك لعكس طبيعتك وبصي على النقطه دي كويس وشوفيها بشكل اعمق وشوفيها بشكل اوسع هتلاقي الدنيا بدات تختلف معك هتلاقي الميزان بدا يتضبط. ما تخسريش عمرك وما تخسريش ايامك ان كل يوم بيعدي انت اولى بيه تعيشيه وانت متضايقه ولا تعيشيه وانت مش هقول لك مبسوطه وانت مرتاحه.سه بعد الثقه بقيتي حاسه انه لا بقى ان الواحد يحط جهد تجاه الحياه او تجاه الاشخاص اللي حواليه ده شيء ما فيش منه داعي لانه كده كده مش هيلاقي اللي هو عايزه فخلاص بنخش بقى في الدايره بتاعه انا متضايق اصل انا خلاص فرضت على نفسي فكره انه مفيش حاجه هتيجي حلوه ولا تبسط. الفرضيه دي هي اللي هتخلينا يعني عايشين في شقه؟ محتاجين نعمل ايه احنا بنفسنا زي ما في فكره عندنا قلبت الموازين محتاجين ان احنا نعدل الميزان من اوله جديده نعدلوه ايه هنعدله بفكره جديده هي الاصح ايه هي الفكره الاصح ان هيحصل حاجات حلوه وهيحصل حاجات وحشه هتحصل حاجات يعني. ده توقعاتنا وحاجات ثانيه هتحصل عكس توقعاتنا فايه اللي يخلينا نبص على نص ونسيب النص الثاني نبص على جزء ونسيب الجزء التاني ايه اللي يخلينا نعمل كده. طيب هل احنا محتاجين ان احنا طول الوقت نبقى فاكرين نفسنا جامدين جدا واحنا بنتوقع شيء وهو اللي هيحصل لا هو ده في الاغلب اللي احنا بنتوقعه انه مش هيحصل ليه لان احنا قدراتنا العقليه مهما كانت فهي محدوده قصاد تدابير وقدره ربنا واللي مكتوب اصلا لينا بناء على حاجات كتير بتحصل احنا ما نعرفهاش اجيب لك مثال بسيط انت ممكن تبقي يوم عيد ميلادك وانت متوقعه ان صحابك هيعملوا لك مفاجاه ويحتفلوا بيكي وانت متوقعه ده لانك عارفه ان صحابك بيحبوكي وانت بتحبيه. فهنيجي نلاقي الواقع انه هيجي يوم عيد ميلادك وما عملوش ااا مفاجاه واحتفاله وكل الكلام ده. طيب الجزء اللي انت عارفاه بس هو انه اللي انت توقعتيه منهم ما حصلش فرحتي رايحه قايله خلاص ان هم كده ما بيحبونيش وانا كنت متوقعه انهم بيحبوني فاكيد هيعملوا ده وطالما ما عملوش يبقى بيحبونيش خلاص الحقيقه ممكن تكون ايه الحقيقه ممكن تكون انه هم بيحبوكي وكانوا ناويين يعملوا لك المفاجاه فعلا وكانوا مرتبين ولكن حصلت ظروف عند حد او اثنين فيهم ولذلك الترتيبات بتاعتهم باظت والموضوع ما ظبطش معاهم على عيد على عيد ميلادك بالظبط او على تاريخ عيد ميلادك. فيجوا هم كانوا مرحلين الموضوع.
تم النشر الثلاثاء، ٢ يوليو ٢٠٢٤
انا زيك و لكن هيساعدك الخروج و الكلام مع صحابك و تعملي حجات جديدة
تم النشر الثلاثاء، ٢ يوليو ٢٠٢٤
وعليكم السلام ورحمه الله وبركاته ، غالباً انتى جواكى تراكمات كبيره جدا ناتجه عن مشاكل نفسيه معالجتهاش زمان لحد ما اتكرامت جواكى وخلتك مش قادره تكملى حياتك بشكل طبيعي سعات الإنسان بيتعرض لصدمات نفسيه كتير خذلان من الصحاب مشاكل من الأهل البعد عن ربنا ارتكاب ذنوب مثلا وده شىء طبيعي أن اى حد يكون ارتكب ذنب فى حياتو المهم ممكن من كتر مانتى بتراكمى المشاكل النفسيه جواكى بدون ما تعالجيها اتراكمت جواكى لحد ما خلتك حاسه انك مش قادره تعيشي حياتك بشكل طبيعي وبنسبه كبيره ممكن تكون مش فاكره المشاكل دى لانك راكمتيها من زمان مثلا وده ينقلنا لحاجه تانيه وهى انك مش عارفه نفسك اعتقد انى مراهقه ف لسه كل حاجه فيكى تتغير فى شخصيتك وهكذا والموضوع مش بس للناس المراهقه كمان فى ناس كبيره مش قادره تعرف نفسها ، خليكى رحيمه مع نفسك اكتر يعنى عادى لو حد سألك ايه اكتر لون بتحبيه حسيتى نفسك مش عارفه لو حد سألك ايه هوايتك معرفتيش لو حد خيرك بين حاجتين حسيتى انك مش عارفه تحددى كل واحد فينا مر بالتجربه دى الطبيعي الإنسان بيتغير تفكيرو مره يحب حاجه ومره يكرها اقعدى مع نفسك كتير اسألى نفسك أسأله زى ايه اكتر حجات بتحبيها اسأله تعرفك عن نفسك عشان تقدرى تعالجى مشاكلك النفسيه مفيش مشكله لو نزلتى مع صحابك وحسيتي انك مدايقه كل انسان بيمر بمرحله مش بيكون طايق حتى نفسو حرفيا حاولى تتقبلي كل مراحلك النفسيه اهم حاجه اعرفي نفسك انا مش دكتوره نفسيه ف الي هيفيدك دكاتره نفسيين على اليوتيوب اتكلموا فى موضوع التراكمات النفسيه أو ازاى اعرف نفسي كويس بالتوفيق ربنا يريح بالك 🤍
تم النشر الاثنين، ١ يوليو ٢٠٢٤
حاولي تخرجي وتغيير جو وحاولي متقعديش في البيت كتير وصاحبي ناس اكتر أو اشتغلي
تم النشر الاثنين، ١ يوليو ٢٠٢٤
ربنا معاكم يارب انشاء الله ربنا هيفكلك خنقتك بأذن الله
تم النشر الاثنين، ١ يوليو ٢٠٢٤
وعليكم السلام ورحمة الله وبركاته، أول شيء خليني أقولك إنك شجاعة جدا لأنك بتتكلمي عن مشاعرك ومش بتكتمي في نفسك. دي خطوة مهمة قوي في انك تبدأي تحلي مشكلتك. واضح إنك بتمرّي بفترة صعبة، ومهم إنك تفهمي إننا كلنا بنمر بفترات زي دي في حياتنا. ممكن يكون السبب حاجة معينة حصلت في حياتك أو يمكن تكون تراكمات لحاجات صغيرة. أول خطوة إنك تحاولي تفكري في الأسباب اللي خلتك توصلي للحالة دي. زي ما قلتِ، علاقتك بربنا اتحسنت وده حاجة كويسة جدا بس أكيد في حاجة تانية مأثرة عليك. بالنسبة للعزلة والشعور بالغربة بين الناس اللي حوالك، ممكن يكون عندك قلق أو اكتئاب. الأعراض دي ممكن تكون بسبب ضغوط نفسية أو جسدية. مهم إنك تتحدثي مع شخص موثوق فيه، ممكن يكون شخص من العيلة دايما موجود لإسندك، أو حتى مستشار نفسي. من الحاجات اللي ممكن تساعدك برضه هي إنك تخرجي من نفسك شوية، جربي حاجات جديدة، زي هواية جديدة، أو رياضة، أو تطوعي في حاجة ممكن تكوني بتحبيها. تفاعلي مع الناس اللي بيحبّوك واللي انتِ واثقة إنهم عاوزينلك الخير. وما تقلقيش يا حبيبتي، الفترة دي هتعدي. بس لازم تبدئِي بالخطوات البسيطة وتدي نفسك الوقت والتحفيز اللازم. ولو حسيتي إنك محتاجة مساعدة متخصصة، ما تتردديش في طلب المساعدة من طبيب نفسي. دايما افتكري إنك مش لوحدك وإن في ناس حواليك مستعدين يدعموك بكل حب. ربنا يريح قلبك ويحفظِك يا رب.
تم النشر الاثنين، ١ يوليو ٢٠٢٤
طب ايه السبب ؟ البيئة بتاعتك بيئة تافهة بيحبوا يتكلموا علي عيوبك قدام الناس بشكل ساخر أو أنتي مش حابة ميولهم واهتماماتهم ؟ أهلك واخدين الحياة باستقامة دايما مش مرنين مش بيحاولوا يتفاهموا معاكي دايما حازمين وحياتهم جد ومشقة وتحمل مفيش حاجة اسمها نقعد مع بعض أو نتبسط أو نتقبل بعض او كده ؟ حياتك أصبحت اعتيادية مفيش شئ جديد يذكر ؟ الأحداث الحلوة اللي كنتي بتعيشيها في الماضي معنتيش بتعيشيها دلوقتي مفتقرة للحظات دي ؟ فيه ذكريات وحشة عيشتيها وانتي صغيرة واتكررت لما كبرتي أو دايما حد بيعايرك بيها بشكل ساخر ف بقيتي تخاف تتواصلي مع أي حد ؟ الناس اللي حواليكي بيمارسوا البرود عليكي ؟ حصلك تروما من تجربة مؤلمة عيشتيها ؟ ايه السبب اللي وصلك لكده الحياة بالنسبة لك بقيت كليشيه ؟
تم النشر الثلاثاء، ٢ يوليو ٢٠٢٤
حاولي تتعرفي عل ناس جديده و تغيري ديكور الاوضه بتاعتك يمكن بسبب أن مفيش تجديد انتي حاسه بكدا
تم النشر الاثنين، ١ يوليو ٢٠٢٤
ربنا معاكي وانشاء الله هتعدي من كل ده انتي بس قولي يارب
تم النشر الثلاثاء، ٢ يوليو ٢٠٢٤
السبب غريب عارف الا وهو ادمان السوشيال ميديا او المقاطع القصيرة
تم النشر الثلاثاء، ٢ يوليو ٢٠٢٤
لعرض السؤال في فدني اضغط هنا