بقيت بكره حياتي وبكره كل الناس (اهلي -اصحابي-اخواتي) حرفيََا وبقيت بكره شكلي ولبسي وكل حاجة ، بقيت بحس أني نكره في الكون مليش اي لازمة ولا قيمة، وحاولت اتغير واحسن من نفسي وفشلت.. اصحابي المقربين الي بمشي معاهم ومعاهم في الحصص والمدرسة بقيت احس اني مش زييهم واني اقل منهم وان كلهم مميزين إلا انا، حاولت اني ابعد عنهم (لاني دايما كنت زي الكلب معاهم، مبقولهمش لا وبخاف علي زعلهم جدا وعادي يسمحوا بكرامتي الارض بس المهم انهم ميزعلوش او يضايقوا مني ولاني حاسس انهم احسن مني وحاسس بالنقص جنبهم) واعيش وحيد بس معرفتش، بحس اني مسخوط في الدنيا، وحاولت انتحر كذا مره ومعرفتش دايما كنت بتراجع..
حاليا بقيت احس بتقلبات يوم ابقا مبسوط وعايز اكون اجتماعي ويوم بكره حياتي وبكره البشر ومش بطيق نفسي
انت قولت انك حاولت تتغير يعني الحمدلله لسه بتحب نفسك ولو 1% كمان قولت حصص ومدرسه يعني ففتره مراهقه ويارب العمر كله في صحه وسعاده فبشويش كده وافهم انه طبيعي فمرحلتك تكون مشتت ومتقلب وطبيعه البشر اصلا التقلب ولكننا بنجاهد وبنروض نفسنا بالاستعانه بربنا اولا واخيرا والمعافره في الدنيا محدش فالدنيا ملوش لازمه بجد حتي الشخص المؤذي لازمته اننا نتعظ منه ,متخيل! انت بس لسه بتدور علي حاجه تلمسك وتشدك ,فممكن اعرف ازاي حاولت قبل كده هل حاولت فعلا كدراسه / كموهبه تتفوق فيها او كون انك تبقي قصه مجاهده مع نفسك ده تميز لان غيرك مش بيعرف يتراجع ولا يعبر يعني اصلا معافرتك ومحاولتك تميز كمان انت اسلوب كتابتك حلو اوي وحسيت اني سمعاك من اول الفواصل لحد كلمه مسخوط , يعني بتفكرني بمحمد طارق كاتب درامي وكلامه بيبقي فيه شجن كده شويه وانا حسيت انك شبهه اوي فطريقته ليه متجربش انك تسرد مشاعرك بشكل روائي هستناك تقولي حاولت ازاي وربنا يريح قلبك يارب وبلاش اسلوب الخلاط انك تقارن نفسك بصحابك كلهم فنفس الوقت وعاوز تبقي زيهم كلهم وانت واحد بس ! كده مقارنتك ظالمه لنفسك
تم النشر الجمعة، ٢٤ فبراير ٢٠٢٣
اول جمله : الكره سببه فى سنك الصغير ده يا اما احتياج وما اخدتهوش وزعلان اوى بسبب ده يا اما مواقف خذلان فى اشياء كتيرة توقعتها من القريبين منك وملقيتهاش . ده كله طبيعى يكلاك حزن واحباط . كمان انت لسه فى السن ده بتكتشف نفسك وتكتشف هدفك فى الحياة وتقدر تعمل ايه او هتمشي فى اى طريق. ازاى بقي هتستسلم وانت فى طريق الاستكشاف اصلا. انت كل اللى محتاج تعمله تجرب وتقرر . جربت صحاب طلعوا مش شبهك ...اعمل اكس عليهم وشوف ناس تانيه يكونوا شبهك . جربت لبس مش لايق عليك ...خلاص المره الجايه اشترى حاجة لايقه عليك. مش حاسس انك مميز ....لازم تعرف ان كل اللى حواليك مميزين عشان بس هما بيظهروا حاجة واحده وبيعتبروها دى اللى بتتكلم عن شخصيتهم فده بيظهر عليهم جدا للى حواليهم ( الحاجات دى مش شرط تكون حاجات كبيرة ... ممكن تكون ابتسامه حلوه مختلفة مرسومه على وشه طول الوقت ) ممكن تكون متضايق انك مش بتاخد وضع القيادة بين صحابك ...وده عادى لان فى حد بتكون الصفة دى فيه اكبر من الباقيين ..مش معنى كده اانهم مبيعرفوش غير يكونوا تابعين ...هى نسبه بس مش اكتر من كده. اشتغل على كل صفة فيك ...بس وانت متأكد وفاهم انك مش هتكون واخد ممتاز فى كل الصفات . طبيعى كل ما تبدأ تحس بذاتك هتبدأ تخف التعلق والاحساس بالامان اللى مرتبط باصحابك....لان ده اللى بيخليك تسعى لارضائهم . قبل كل الكلام ده ...انسي منزلتك عند البشر وارجع افتكر انك منزلتك كبيرة عند الخالق ...الله كرمك بانك تكون افضل المخلوقات ...ابدا من الفكرة دى وهتلاقى حاجات كتيره اوى اوى.
تم النشر السبت، ٢٥ فبراير ٢٠٢٣
بحس باحساسك ده كتير لكن للصراحة شايفة انك في حالة اصعب لا كلامي ولا كلام اي حد هنا هيقدر يهون عليك وينسيك غير نفسك ! صدقني احنا المتحكمين في كل حاجة مفيش حاجة هتفرحك غير لما تكون انت موافق انها تفرحك وانت للأسف من شدة حزنك مش سامح ان اي كلمة تأثر فيك محدش عارف كل مشاعرك غير نفسك محدش عارف اللي جواك غير نفسك انت ادرى بيه عن اي حد تاني والله اعلم الكلام ده فضل مكبوت جواك قد اي .. الكتمان حاجة صعبة اوي وانا فخورة بيك انك قررت اخيرا تتكلم وتخرج مشاعرك أنت بتقول انك بتكره اهلك وصحابك ونفسك وحاولت كتير تصلح نفسك ويأست لكن احب اقولك انك ميأستش وكلامك ده أكبر دليل لأنك جاي بتحاول تصلح شعورك تجاه نفسك وفعلا ده يدل انك لسة بتكافح وعايز تبقى احسن وانت تقدر تبقى احسن واوعى تيأس من الحياة انا متأكدة ان فيه جانب مليان من الكباية ولو كانت قطرة انن لازم تنتبه عليها لان القطرة ده هي باب سعادتك واوعى تفكر ان كل حاجة فيك وفي حياتك وحشة صدقني ربنا عمره ما هيكون ظالم بالشكل ده ويخلي حياتك كلها صعبة انت حاول تقعد تدور على الحلو اللي فيك واللي في حياتك صدقني هتلاقي حاجات كتير ويمكن تبانلك صغيرة في الأول بس لو اتمسطت بيها هتكون هي مخرجك من حالة الحزن اللي انت فيها
تم النشر الاثنين، ٦ مارس ٢٠٢٣
الفترة ديه طبيعي انك هتمر بتقلبات مزاجية حتى لو كل يوم بأمزجة مختلفة تمر عليك. ممكن أسالك كام سؤال! ايه اللي بيحسسك ان صحابك اهم وليهم قيمة عنك؟ يعني شايف ايه المميز فيهم اللي مش موجود فيك! وهل لو لقيت حاجة مميزة في حد وهي مش موجودة فيك هل ده يعني انك فاشل؟ الاجابة هي لأ، طيب ليه؟ لاننا كلنا فينا عيوب ومميزات .. لكنا فينا حاجات حلوة ووحشة، انت بس اللي مركز على عيوبك انت، ومركز برده على مميزات غيرك. طيب ما تيجي نعكس الموضوع، حاول كده تشوف مميزاتك مع عيوبك، تشوف مميزاتك وتقدم ليها الدعم، وتحاول تقويها اكتر. وتشوف العيوب على انها اشياء محتاجة انها تتحسن في حياتك. وتشوف مميزات وعيوب الناس على انهم شئ طبيعي جدا، محدش اقل من حد .. لان كلنا مش في نفس الظروف. يعني انت كانت نشأتك في مكان معين، معرفتك عن الاشياء مختلفة عن غيرك، اجتماعيا ونفسيا وهكذا .... وكل واحد فينا مختلف تماما عن التاني، فطبيعي اننا نكون مختلفين. مش لازم تسمح لحد انه يقلل من كرامتك ابدا مهما كان، اللي تلاقيه كده قوله مش هسمح ليك تتكلم معايا بالاسلوب ده تاني، ولو الامر ده اتكرر انا هنسحب من الصداقة ديه. اعمل ليك كرامة وعزة نفس، لما تبقى غالي في عين نفسك، هتكون غالي في عيون اي حد.
تم النشر السبت، ٢٥ فبراير ٢٠٢٣
كل ما تحاول وتفشل حاول تاني ده معناه انك بتتعلم سبب من اسباب الفشل شطرتك انك تعرف السبب وتتجنب الوقوع فيه، وللعلم اغلب الناس عمرهم ما بدأوا في حاجة ولقوها سهلة في البداية الطفل أول ما بيتولد بيقعد فترة عقبال ما يمشي بعكس اغلب الثدييات اللي تقدر تمشي وتتحرك في اقل من يوم فهل ده معناه أنه أقل لا والدليل أنه لما يتأسس صح ويأخذ بالاسباب يقدر يسيطر عليهم كلهم. خليك فاكر إنك لما تتبع دين الله وتنفذ تعاليمه ربنا هيبتليك لو ثبت هتلاقي ربنا يفتح لك من أبواب الخير والسعادة والرضي ما يرضيك كلما تستمر في العبادة إنما لو استسلمت من اول مرة هتستمر دائرة معاناتك لحد لما تموت
تم النشر السبت، ٢٥ فبراير ٢٠٢٣
ابدا بالصلاه وبعدها هتلاحظ فرق كبير في حياتك
تم النشر السبت، ٢٥ فبراير ٢٠٢٣
انت تستحق تتحب من اهلك وصحابك ويبقا حوليك ناس قريبين منك بيخبوك زي منت بتحبهم وحقيقي شعور الوحده صعب جدااا لكن مش حله انك تنتحر انت لسه قدامك حجات كتير ف الدنيا معنلتهاش وتجارب كتير تستخق ان تعيشها ممكن مخترتش صحابك صح من الاول وانهم مش شبهك وطبعهم وحش جدا انهم يوصلوا شخص يحس بكده بس عايزه اطمنك انك هتلاقي صاحب كويس جدا وشبهك وهتحس بالامان والتوازن والاستقرار معاه نصيحتي ليك ابعد عن اي حد هيقل منك او يتريق ويتنمر عليك حتى لو هتكون لوحدك تاني حاجه مش هنسيبك كده لا انزل انشطه تانيه تتعرف فيها ع ناس وهتكون قريب جدا منهم زي انك تروح الجيم او تعمل اي نشاط تطوعي هتقابل ناس كتير الناس دي هتقدرك وهتحترمك وهتشوفك من جواك صح مش هتستغل وجودك لاي سبب كان وخليك قريب من ربنا متخليش المشاعر دي تكون حاجز بينك وبين ربنا لانها الباب الي بيسهلك كل صعب
تم النشر الجمعة، ٢٤ فبراير ٢٠٢٣
إذا عرفت حقا أنك إنسان مكرم على كثير من المخلوقات ستعرف أن فيك ما يستحق أن تحب نفسك من أجله وإذا عرفت الغاية الحقيقية من الحياة ستجد أن فيها ما يستحق أن تحيا من أجله
تم النشر السبت، ٢٥ فبراير ٢٠٢٣
ده مود طبيعي كل الشباب بتعيشه بس خلي بالك القرب والبعد بينهم شعرة وهي الأمل في الله أن حياتك تتغير للأحسن فقرب من ربنا وحط أيدك علي أخطائك وأسأل وأتعلم وبأذن الله هتتجاوز ده
تم النشر السبت، ٢٥ فبراير ٢٠٢٣
لا تيأس من رحمة الله حتى لا تموت كافر تلقى عذاب النار
تم النشر السبت، ١١ مارس ٢٠٢٣
صدقني مفيش حاجة في الدنيا تستاهل انك تزعل من اهلك او أخواتك عمرك ما هتلاقي حد يحبك قدهم ، خلي حياتك عبارة عن دواير انت اول شخص جوة الدايرة دي غير من اسلوب حياتك جرب تنزل تتمرن شوف إنت بتحب تعمل إيه واتميز فيه
تم النشر الجمعة، ١٠ مارس ٢٠٢٣
ولا بحب الناس ولا بحب نفسي 😶😶
تم النشر الجمعة، ٢٤ فبراير ٢٠٢٣
انت لو فعلا بتكره الناس هتحب نفسك
تم النشر الجمعة، ٢٤ فبراير ٢٠٢٣
لعرض السؤال في فدني اضغط هنا