انا شخص انطوائي مبعرفش اكون صدقات وحاولت قبل كدا من علي النت بس طلعت بخساير كبيرة خلتني اكره نفسي وحياتي فوق ما انا كرههم وبقيت دايما مبحسش بالامن من الي بكلمه/بتعرف عليه حتي لو بقينا اصحاب، عيوبي اني مبعرفش اقول لا ودايما بخاف علي زعل القدامي (حتي لو الشخص ده لسه عارفه من خمس دقايق) ومش بعرف احط حدود للشخص الي بكلمه، هتقولي النت كذبه وانزل واتعرف علي ناس من الشارع والجيم وكدا هقولك اني شخصيه خجوله وبخاف احسن اكون انا شخص ساجج او رخم او ممل للشخص الي بيكلمني، ده غير اني من النوع الي ملهوش في الخناقات والضرب والزعيق والصوت العالي وكرة القدم والقهاوي (وحاجات الي المفروض بتاعت الرجالة) فبالتالي كنت بتعرض للتنمر دايما بسبب ده واني المفروض راجل متكسفش ومبقاش فرفور، كنت فاكر انهم صح انا وصغير فبدات اكره نفسي واشوف اني مش راجل واني مختلف عنهم وان في حاجة غلط فيا، حتي اهلي كانوا شايفين كدا اني فرفور ومبعرفش اتصرف ودايما في البيت وكانوا دايما يقولوها في وجهي بقيت بكره الناس واهلي وكل حد عرفته في حياتي، كرهي ليهم بيزداد كل يوم عن الي قبله + فترة الاخيرة التقلبات بقت واضحة جدا عليا يعني يوم ابقا عادي ومبسوط وعندي امل ويوم ابقا كاره حياتي وبفكر في الموت ويوم اقول انا اتحسنت وابدا احط خطط واحسن من نفسي وبعدها العن اليوم الي جيت فيه وتفكير ٢٤ ساعة والدايرة شغاله هي هي بقيت عامل زي الفأر الي بيلف في الدائرة
انت فعلا التديت انك تصلح في نفسك وانت مش حاسس . انت عارف الحاجات اللي المفروض تبطلها زي انك توافق ع كل حاجه ، حاول انك تجرب الرفض مع اخوانك وبعد كدا جربه ع الناس اللي برا . وخليك حاطط في راسك انك كدا كدا مش خسران حاجه لو قلت لا . وانت شكلك من الناس اللي بتحب بكل قلبها وبتندفع في العلاقات ، انك تحب بكل قلبك دي حاجه كويسه جدا بس المش كويس الاندفاع حاول لما تقرب من حد تحط مراحل لقربكم لبعض ، يعني مثلا " انا حبيت فلان ده هو لو عملي كذه هعمله كذه لو قدملي هقدمله لو سابني هسيبه " دي معاير تحطها انت وملهاش علاقه بالماديات. والخجل ده مش عيب انت شخصيتك كدا حبها وبعدين في حديث بقول ان الدين 99 شعبه والحياء شعبه من شعب الإيمان
تم النشر الخميس، ١٦ مارس ٢٠٢٣
هو للاسف انت سلمت دماغك للناس لدرجة انك بقيت تشك في نفسك - يعني ايه؟ يعني هل لو انت شخص ملوش في الخناقات، والزعيق والضرب والقهاوي والكورة؟ يبقى كده انت مش راجل هي الرجولة دلوقت بقت بالزعيق والضرب، طيب احنا بنقول عن الناس ديه انها همجية ومش متحضرة هل ده معنى الرجولة لا طبعا. المفاهيم ديه غلط كليا ... وهل علشان مش بتحب القهاوي والكورة تبقى كده فيك حاجة غلط .. طيب انت واحد مش من اهتمامته الكلام ده ، ايه المشكلة يعني مثلا لو فيه بنت مهتمة اوي بالكورة وبتحضر كل الماتشات هل اقدر اقول عليها مسترجلة، ولا مش بنت زي باقي البنات؟ لا طبعا هي شخصيتها بتحب الكورة ... من امتى الكورة كانت بتصنف الجنس اذا كان راجل ولا بنت؟ متسلمش دماغك للناس ... ده الغلط اللي انت وقعت فيه، وللاسف هما فضلوا يهزوا ثقتك في نفسك عن طريق انك شخص مختلف شوية .. وده مش عيب فيك ، شوف مميزاتك فين لان اكيد فيه مميزات وحاول استغلها واشتغل على نفسك. من الواضح انك شخص حساس شوية .. وبتخاف تزعل اللي قدامك ده سؤال مشابه شوية لكل اللي عايزه اقوله ليك اتمنى تشوف كل اجاباته https://fedni.net/q/81320362/ازاي-ماخدش-كل-حاجة-على-اعصابي
تم النشر الثلاثاء، ١٤ مارس ٢٠٢٣
شوف هي الفكره مش ف انك انطوائي او وسيله تعرفك ع الناس قد مهي مجرد افكار كتير زادت واتشكلت وادت احكام سيئه عن نفسك ف كرهت طبعك الي اصلا ممكن يكون ميزه ميزه انك شخص هادي ميزه انك شخص متزن مش بتدخل ف خناقات شخص هادي شخص بيبعد عن الدوشه وشخص مهذب بتبعد عن اي مكان فيه اي سلوك مخل مفيش قانون يقول ان الراجل لازم يتخانق ويقعد ع قهوه ويغلط خالص اصلا لما بيجوا يمدحوا ف راجل يقولوا ده عاقل رصين ملهوش ف القهاوي وبيعرف ربنا ومش ضروري يبقا كل واحد عارف عشرين شخص يبقوا صحابه ربنا خلقنا متفاوتين ف طباعنا ورغباتنا الاجتماعيه ف خلق الاجتماعي وخلق المنطوي وخلق مابينهم وده حقك انك تكون ع اي شكل اجتماعي مريحك ف نصيحتي ليك ان كنت هتعرف صحاب من نت او صحاب من الواقع انك تاخد مبدأ واحد ربنا خلق كام مليار بني ادم يعني لو خسرت واحد عشان تجاوز حقوقك مش هتخلص الدنيا وهتلاقي بني ادم غيره كمان الي يمشيلك خطوه امشيله خطوه مش ميت خطوه والي يبعد خطوه ابعد زيها خطوه ومتديش لحد اكتر من حقه عشان انت بتحبه لانه مش ضروري يكون يستحق الحب والعطاء ده ومتسمحش بأي شكل كان ان حد يجي عند احترامك لذاتك وكبريائك ويهينك هنا حطلها خط احمر والاهم من كل ده حب اختلافك وحب طبعك وخليك فخور بيه متغيرهوش عشان ةي حد ومتسمعش اي تعليق سلبي واول متجيلك افكار سلبيه عن نفسك انفيها متجاوبش عليها بالموافقه ابدا لانها هادمه للذات
تم النشر الثلاثاء، ١٤ مارس ٢٠٢٣
ثقتك بنفسك ممكن تكتسبها من كل المواقف اللى عدت عليك بس لو كنت قولت فيها لا او وقفت عند حاجة ومقبلتهاش احنا مش لازم نبقي شبه حد خالص عشان نبقي مش فرافير. اعتز بشخصيتك بالعكس هتلاقيهم بيقولوا ياريتنا زيك ومنهتمش بالحاجات دى ...بس ده لما يشوفوك واثق فى نفسك. طيب هتصاحب مين وازاى. انشطة تحبها تعرفك على ناس شبهك . مش اى حد بيبقي صاحب ...اللى افعاله بتثبت انه يستاهل بنقول عليه صاحب ...غير كده انت اللى تقول لا.
تم النشر الأربعاء، ١٥ مارس ٢٠٢٣
حاضر + شكرا ليك
تم النشر الجمعة، ١٧ مارس ٢٠٢٣
طب هقولك على حاجة حلوة تعملها بس لازم تستلم لتأثيرها و متقاومش و تقفل على نفسك وعقلك الابواب اقرأ كتاب الانسان يبحث عن المعنى لفكتور فرانكل هيعرفك ازاى مهما حصل مش بس تتمسك بالامل بل تخلقه كمان
تم النشر الجمعة، ١٧ مارس ٢٠٢٣
تابع يا اسطا حد ع النت بيتكلم عن علاج للحاجات دى و انصحك جدا بياسر الحزيمى تحديدا دورة الشخصية القوية هتتعلم فيها كل حاجة نقصاك + انا اول مرة اشوف حد نسخة طبق الاصل منى و الله افتكرت إن انا لوحدى
تم النشر الخميس، ١٦ مارس ٢٠٢٣
سمعت له بعض المقاطع بالفعل بس للاسف انا من جوايا ياس وفاقد الامل وكل حاجة
تم النشر الجمعة، ١٧ مارس ٢٠٢٣
لعرض السؤال في فدني اضغط هنا