قبل اي حاجة .. بتمنى لو في دكتور نفسي هنا، يتواصل معايا حتى لو بمقابل ويتابع معايا لأن حقيقي أنا معنديش حل تاني..
مشكلتي..
أنا مبثقش ف حد نهائي وحقيقي عمري ما أئتمنت حد على نفسي والا خان، لدرجة ان حتى الناس اللي من دمي كانوا اكتر ناس اذوني ف حياتي .. واتحولت من شخص متسامح جدا الي أبعد الحدود لشخص لا قادر يعيش ولا يسامحهم لاني اتوجعت وجع فوق ما اي حد يتخيله لدرجة اني بقيت بصحى من النوم مفزوعة وكأني شوفت كابوس من كتر الخوف والقلق وعدم الآمان وبفضل اترعش واصحى ابكي بانهيار .. أنا حقيقي معنديش اي حد ف حياتي نهائي حتى ال best friend خذلتني ووجعتني بعد ما قولتلها مش باقي غيرك، فأنا مش ببالغ بس أنا رزقي مجاش لا ف ام ولا اب ولا اخوات ولا أصدقاء .. انا عندي 27 سنة وحرفيا كل يوم بتمنى انام مصحاش تاني بس للاسف لسه عايشة بس حياة تشبه الموت، بالعكس يمكن الموت افضل واريح .. ع الأقل هكون مبتألمش زي وضعي دلوقتي..
انا برغم كل الأذي النفسي اللي اتعرضتله دا شاطرة ف مجالي وبشتغل بس عشان اصرف علي نفسي لاني مضطره ومعنديش حل تاني ولا حتى عندي Option اني انهار لاني عارفة لو وقعت تاني مش هلاقي اللي يسندني ويقف جنبي عشان ملقتش سند قبل كدا..
حبيبتي حاسه بيكي وعارفه كل اللي بتمري بيه ومن الصعب جداا فقدان الثقه من الاهل لكن ربنا عارف الخير فين ويمكن يكون خير ليكي عشان عرف اللي جوا قلوبهم من ناحيتك وحب يظهر حقيقتهم قدامك لان انتي قلبك ابيض وطاهر والتغير ده للافضل ليكي مخدش يستاهل ثقتك الغاليه كوني لنفسك شغل ومكان واصحاب جداااد وامحي الناس المؤذيه من قلبك وحياتك وانبسطي وخرحي وجربي الدنيا لسه فيها حجات حلوه نغيشها كتير
تم النشر الأربعاء، ١٨ سبتمبر ٢٠٢٤
صلي وقربي من ربنا وادعي ادعي كتير ربنا سبحانه وتعالى قال في كتابه الكريم فإدعوني إني استجب لكم ادعي واقرئي قرآن وقولي يارب وكلتك نفسي وحياتي وكل اموري ف كن معي في كل وقت وحين واعنني يا الله وهتلاقي ان الدعاء هيفرج عنك كتير وحطي السماعه في أذنك َاسمعي قرآن بصوت اي شيخ انتي بتحبيه وطول ما انتي تشتغلي حطي القرآن في أذنك هتلاقي نفسك اندمجتي وتفكيرك بدا يقل وربنا يفرحك ويفرج همك يارب ويعوضك خير
تم النشر الأربعاء، ١٨ سبتمبر ٢٠٢٤
السلام عليكم و رحمه اللّٰه و بركاته أولاً و أهم حاجه مهما وثقتي ف شخص معين متقوليش او تبيني إنك واثقه فيه و ملكيش غيرو و كل الحاجات دي لإن ممكن من مجرد إن الشخص يدايق منك و يكون عايز يكسرك ف هيكسرك ب إنو يسيبك لوحدك لإن هيبقا عارف وقتها إن مكنش ليكي غيرو. و مهما وثقتي لازم يكون في اسرار ليكي و لنفسك بس محدش يعرف عنها حاجه ، حاولي تاخدي بالك من اي حد بس مش معنى كدا انك تقطعي علاقتك بكل الناس لاء بالعكس اتعرفي ع ناس كتير بس متخليش حد يعرف عنك حاجه ممكن ف يوم لو اتقالت تدمرك او تكون مؤذيه ليكي ذي مثلا متتكلميش مع حد مهما كان على حد تاني غير إن حرام طبعاً بس ممكن الشخص دا ف يوم من الأيام وقت خناق يعملك مشكله بالكلام الي قولتيه و بردو نفس الكلام ف صورك متبعتيش صور لحد حتى لو بست فريند ممكن تعملك مشكله ف يوم بردو طيب دي حاجات لازم تعمليها و تحطيها ك حدود بينك و بين اي حد تعرفيه نفترض إن انتي فعلاً محتاجه تحكي مع حد و تعيطي حتى و كل الحاجات دي ف مش هتلاقي احسن من ربنا تعيطي و تحكيلو مشاكلك صدقيني مش لازم الحد الي هتحكيلو مشاكلك و اسرارك يبقا بست فريند او غيرو ، خليكي عندك يقين إن ربنا سبحانه و تعالى هو الوحيد الي هيسمعك و يساعدك ف كل اوقات ضعفك و انهيارك و لازم تكوني عارفه إن مش كل الناس وحشه في ناس كويسه بس بتيجي مع الصبر ف اصبري و ادعي ربنا يرزقك ب حد كويس تقدري تثقي فيه و تديلو الأمان. و حاولي تشاركي في انشطه اجتماعيه عشان تنسي الي فاتك و تحسن من حالتك النفسيه و تعرفك على ناس و حطي بينهم الحدود الي ذكرتها هتلاقي حياتك اتحسنت بكتير إن شاء اللّٰه و اتمنى لكي التوفيق.
تم النشر الأربعاء، ١٨ سبتمبر ٢٠٢٤
السلام عليكم ورحمه الله وبركاته. طيب انا قبل اي حاجه هاقول لك ان شرب النوع ده من المشاكل هو معنى الكلمه بالنسبه لي معنى كلمه خيانه بالنسبه لك يعني ايه؟ هتقولي لي يعني ان انا أحط. الامان وآتمن حد على نفسي وعلى اسراري وعلى حالي وهو ما يكونش قد الامان. طيب هل بيكون اللي قدامك فاهم المعنى ده كويس قوي، فاهمه بتفاصيله قوي؟ في الغالب لأ. طيب هل وانت بتامني حد او انت بتاتمني حد وشايفه هو امانك وشايفه انك حاطه فيه ثقه كبيره جدا بتكوني في وقتها في نفس الوقت بتقولي بس لو هو ما صانش الامانه دي انا هعمل وهسوي وقد ايه هتوجع هل بتفكري كده دي اول حاجات هتكون هي سبب المشكله لو قدرنا نفصصها كويس قوي نقدر من هنا نحل الموضوع.
تم النشر الثلاثاء، ١٧ سبتمبر ٢٠٢٤
عزيزتي، أشكرك على مشاركتك لمشاعرك وتجاربك الصعبة. من الواضح أنك تعانين من ضغوطات نفسية كبيرة وشعور بالوحدة العميقة. هذا شعور مؤلم للغاية ويمكن أن يؤثر على جودة حياتك بشكل كبير. من المهم أن تعرفي أنك لست وحدك في هذا، وأن هناك من يهتم بك ويستطيع مساعدتك. الشعور بعدم الثقة بالآخرين وبالأخص من هم مقربون يمكن أن يكون نتيجة لتجارب سابقة مؤلمة. يجب أن تستعيدي الثقة بنفسك أولاً، ومن ثم تبدأي في بناء ثقة تدريجية بالآخرين. ما تشعرين به من القلق والخوف له أسباب وجذور عميقة، ومن الضروري التعامل معها بشكل مناسب. أنصحك بالتوجه إلى أخصائي نفسي يمكنه مساعدتك في معالجة هذه المشاعر والمساعدة في بناء مهارات التأقلم. كما يمكنك التفكير في إجابة العديد من الأسئلة حول نفسك، مثل: ما الذي يمكن أن يجعلك تشعرين بالأمان أكثر؟ ماذا يمكن أن تتطلبي من الآخرين بشكل واضح وما هي الحدود التي تحتاجين لوضعها لحماية نفسك؟ قد يكون من المفيد أيضًا أن تتبادلي الحديث مع أشخاص في نفس المجال الذي تعملين به، قد تجدين لهم هموم ودعمًا مشتركا. تذكري أن الحياة ليست دائمًا سهلة، ولكن بوجود السند والدعم المناسبين، يمكنك تجاوز هذه المحن. إذا كنت ترغبين، يمكنك البحث عن أخصائية نفسية من خلال منصة فدني، وهناك الكثير من الخبراء المتاحين للمساعدة. في النهاية، لا تترددي في طلب المساعدة فهذه خطوة شجاعة نحو الشفاء والتغيير.
تم النشر الثلاثاء، ١٧ سبتمبر ٢٠٢٤
انا بعمل حاجات كتير ترفيهية، وبشارك ف انشطة تطَوعية وعندي شغلي وبلعب رياضة ويوجا وبضيع وقتي ف حاجات مفيدة زي القراءة واني اتعلم اي skill جديدة، فالحقيقة انا مش مقصرة ف حق نفسي كفاية اللي قصروا ف حقي .. بس كل ما افتكر اني تخطيت، برجع لنقطة الصفر واحيانا كتير بتوقف عن كل دا وارجع لنفس النقطة تاني فاكيد في حاجة بعملها غلط ف طريقة علاجي لنفسي انا مش قادرة افهمها عشان كدا فكرت ف اللجوء لمتخصص يمكن يساعدني.
تم النشر الأربعاء، ١٨ سبتمبر ٢٠٢٤
هو مش هيحصل تخطي جواكي كامل للموضوع لان للاسف اي حاجة بتحصلنا واحنا صغيرين بتفضل معلمة فينا حتى وبتأثر علينا وعلى شخصيتنا انا مرريت بمواقف قد تكون مماثلة للي بتحكيه فقادر افهم شعورك كويس والحقيقة هي انك تعاملي مع الموقف وتعايشي معاه لكن لازم تاخدي قرار انك مع اولادك ان شاء الله تعوضيهم كل اللي انتي مشوفتيهوش وتقدميلهم الدعم اللي كنتي مستنياه دي اكتر حاجة تجدد عندك الشغف من تاني وتبقي شايفة فيهم كل اللي حلو اللي كنا بندور عليه واحنا صغيرين بالتالي هما هيعوضوكي عن كل حاجة .. محدش هيحس بالشعور اللي بيكون جوا ده ولا النغزة اللي بتيجي من لاشيء ولا نظرة اللوم اللي بنبصها ليهم ونقولهم ليه كدة محدش هيحس ويفهم كل ده غير اللي مر بيه وجربه وعشان كدة بقولك ان جه وقت حزن ولا زعل متقسيش ع نفسك ونفس الوقت متخليهاش تاخد راحتها انتي مكنش بايدك حاجة تتعمل ومعملتيهاش ومش مطلوب منك حاجة غير انك تهتمي بنفسك وتحبيها عشان الشخص المتسامح مع الناس بيهمل نفسه ويجي عليها وهي تستاهل منه انها تتحب
تم النشر الأربعاء، ١٨ سبتمبر ٢٠٢٤
طب ما شاء الله انتي ماشية كويس وخدي ده نقطة تحول جواكي ان اللي راهن عليكي تفشلي خسر وانتي اللي كسبتي وقولي الحمدلله .. انا عارف اننا فيه اوقات بنكون محتاجين دعم من اقرب الناس لينا وبتفرق كمان لو من الاهل وبكلمك عن تجربة شخصية وانا متفهم شعورك لكن ربنا خلق جوانا النسيان والتسامح والاحسان .. النسيان عشان لو فضلنا نفتكر كل كبيرة وصغيرة هنتعب والتسامح لان الدنيا متستاهلش نزعل ونغضب ونحمل نفسنا فوق طاقتها والتسامح عشان دي صفات المؤمن هين لين .. افتخري بنفسك وعدي اللي حصل الحياة تستاهل ابتسامتك
تم النشر الأربعاء، ١٨ سبتمبر ٢٠٢٤
لعله خير ربنا بيبعد عنك الناس الوحشة اللي في حياتك لأن غالبية الناس حاليا الا من رحم ربي لا تؤتمن الغدر بقى منتشر جدا ربنا يعينك أعيدي ترتيب الناس في حياتك واصبري ربنا يبعتلك حد يعوضك عن كل اللذي اللي انتي شوفتيه
تم النشر الأربعاء، ١٨ سبتمبر ٢٠٢٤
ما انتي لازم تقيمي وضعك وتصححي اختياراتك وتحاولي تغيري الروتين بتاعك وتخرجي عقلك من دايرة الخساير دي .. اصلا فكرتي ف مرة روتين يومك بيمشي ازاي بالنسبالك ؟
تم النشر الأربعاء، ١٨ سبتمبر ٢٠٢٤
اعتبري ان ربنا بيبعد عنك الناس المؤذية ولو على اهلك فالانبياء كان كتير منهم حياته صعبة مع اهله ونصحه ليهم والاذية منهم اصبري واحتسبي المعاملة ليهم لوجه الله وبالنسبة لاصحابك جايز تكون اختياراتك غلط ويمكن فيه حاجات بتفوت منك في معرفة شخصية اللي قدامك بتخليكي كل مرة تختاري ناس غلط حاولي تتعلمي من كل موقف بيحصل عشان بعد كدة تتعلمي وتاخدي بالك وحاولي تقربي من ربنا على قد ما تقدري وتصدقي بنية فك الكرب وخليكي عارفة اننا في الدنيا مش عشان نلعب ونرتاح هي دار شقاء انا ارف انك هتقولي فيه ناس حياتها حلوة ومبسوطة واشمعنى انا بس ده اللي ظاهرلك بس انتي متعرفيش كل واحد ربنا مرتبله حياته ازاي واخد منه ايه ومديلك انتي ايه خلي معاملتك مع ربنا واصبري مع كل حا٠ة بتحصل وهتلاقي ربنا بيعوضك
تم النشر الثلاثاء، ١٧ سبتمبر ٢٠٢٤
ممكن تصلي قيام الليل وتتكلمي مع ربنا سبحانه وتعالى وتفضفي باللي ف قلبك وتدعيه يزيح عنك ويعينك على نفسك ..وممكن حد يكون مصدر ثقة او ترتاحي معاه ف الكلام او يكون مر بمواقف شبه مواقفك فيكون قادر يفهمك اوقات كتيرة ده بيعمل فرق .. بصي هو حلو انك بتشغلي نفسك وبتحاولي تعملي حاجات كتير بس مينفعش ف لحظة كل ده يطير يبقى انتي شاغلة نفسك وخلاص لمجرد الانشغال والهروب من الشعور لا لازم تهدي نفسك وتتعاملي معاها صح وتاخدي بالخطوات اللي بنتكلم عليها بحيث ان يبقى عندك مرجع كل ما تحسي بلحظات الهزيمة تقدري ترجعي تاني ومتتأثريش وبعدين ابقي تعالي ارغي معانا هسمعك متخافيش 😅 وعندك اخوات بنات كتير هنا برضو .. هي مش قصة انك بتعملي غلط بس الفكرة في فهم الشعور وطريقة التعامل معاه زي ما قولتلك وانك تبقي عارفة ان كل اللي حصل مش منك جايز شخصيات والدك ووالدتك مكنش عندهم الثقافة الكبيرة اللي كله بيتكلم عليها حاليا وازاي نتعامل مع ولادنا والكلام ده لان اغلب عائلاتنا كدة او فيه جزء في شخصياتهم مثلا كان جاف شوية وبعدين كمان دوري ع الحاجات اللي بتحبيها وكتري منها مثلا اكلات اماكن لبس جديد العاب كدة يعني زي فيفي عبده وهي بتقول قومي دلعي نفسك متستنيش حد 😅 .. بحاول افكلك الجو شوية لان في الحقيقة الدنيا مش حمل انك تشيلي ف نفسك وتزعلي
تم النشر الأربعاء، ١٨ سبتمبر ٢٠٢٤
دا حقيقي، بس انا قريت ف علم النفس ان التراكمات دا بتأذينا ولازم من وقت للتاني نطلع اللي جوانا لان كل ما التراكمات زادت كل ما كان التخطي اصعب .. انا حاليا مبقولش ان عندي مشكلة ف حياتي، انا عندي مع اللي فات ولسه للاسف مأثر عليا ومش قادرة الاقي حل حتى الان يخرجني من حالة الحزن دي او ع الاقل اعمل اي ؟
تم النشر الأربعاء، ١٨ سبتمبر ٢٠٢٤
بس الحقيقة، اللي مش قادرة اعديه شعور الالم، انا باخد فترة كويسة واحس اني تعافيت ونسيت وفجاءة تيجي لحظة صعبة عليا بكره فيها الدنيا كلها وبتفكر كل حاجة تاني وبتهزم من تاني كأن لسه امبارح ومعدتش ايام ولا شهور ولا سنين ع الاذى دا وانهار تاني واكتشف اني متخطش .. بالعكس كاني كنت بأجل الشعور بالالم او بتجاهله.. فانا مش لاقيه حل للتراكمات اللي جوايا والكلام اللي زي الجبل فوق قلبي وشعور الحزن اللي جوايا ديما
تم النشر الأربعاء، ١٨ سبتمبر ٢٠٢٤
شكرا اوي ا/عمر ع الكلام دا .. بس انا كنت شخص متسامح لاقصى درجة ممكن حد يتخيلها بس الاذى اللي اتعرضتله كان اكبر من اي قدرة ع التسامح، انا بتقي الله ف المعاملة بس مش اكتر من كدا لكن لسه جوايا مش صافي من ناحيتهم .. وواضحة جدا ف التعامل معاهم، لان بمشي بمقولة سيدنا علي رضي الله عنه لما قال : "ابغض بغيضك هونا عسى ان يكون حبيبك يوما ما واحبب حبيبك هونا عسى ان يكون بغيضك يوما ما" فدي حاجة كويسة اني مبكرهش حد لان كان في بينا مودة او صلة الرحم ودي هتفضل موجودة للاسف غصب عني..
تم النشر الأربعاء، ١٨ سبتمبر ٢٠٢٤
ا/معوض .. شكرا جدا لحضرتك علي كلامك دا.. وعندك حق مفيش غير اننا نصبر ان ربنا يعوضنا عن كل الاذي دا + انا فعلا بقيت بختار عدد قليل جدا من الناس اللي بسمح انها تقرب ع الاقل
تم النشر الأربعاء، ١٨ سبتمبر ٢٠٢٤
ا/استاذ عمر .. شكرا مرة تانية لاهتمام حضرتك، بس الحقيقة انا شخصية مش روتينية خالص وبالعكس عندي شغلي وناجحة ف مجالي جدا وع الجانب المهني ممتاز الحمد لله وبطور من نفسي وبتعلم اكتر من لغة وبرمجة ويمكن اللي بيخليني انجح انهم راهنوا على فشلي والحمد لله نجحت واتشهرت ف مجالي اوي وبقا ناس كتير بتقولي نتمنى اولادنا يكونوا زيك، حتى اهلي بعد ما نجحت بقوا يفتخروا بدا بس انا مش فرحانة بيهم ولا اللي بيقولوه لاني كنت محتاجة دا ف وقت ما كنت محتاجة لايد تطبطب عليا كنت محتاجة دا ف الوقت اللي مهزومة فيه من العالم..
تم النشر الأربعاء، ١٨ سبتمبر ٢٠٢٤
اولا شكرا جدا لحضرتك.. اكيد انا متفقه مع حضرتك ميه فالميه، بس الموضوع صعب وجدا كمان .. انا بحاول اتخطى دا من سنين، بس خلاص وصلت لاخر مرحلة مبقتش قادرة اكمل ولا عندي رفاهية الاختيار اني مكملش
تم النشر الأربعاء، ١٨ سبتمبر ٢٠٢٤
لعرض السؤال في فدني اضغط هنا