السلام عليكم
كنت حابب اساليب التعامل مع الاتي
انك تبقي عارف عايز تعمل ايه او تطور من نفسك ومتعملوش حتي لو دافع فلوس في سبيل التطوير ده ؟
انك تحس انك موصلتش لاي حاجة رغم انك ما شاء الله وصلت لحاجات كنت بتتمني توصل ليها امبارح ؟
الفراغ حتي لو عملت حاجة تملي وقت ؟
وعليكم السلام ورحمة الله وبركاته.. خلينا نبدأ من الاخر للاول .. ايه مفهومك عن الفراغ؟ يعني حاسس بفراغ من ناحية انك مش بتعمل حاجه في يومك مع انك بتعمل ويومك مشغول؟ ولا حاسس بفراغ انك مستفدتش باي حاجه عملتها وانك ضيعت يومك ف حاجات مش مفيده؟ ولا فراغ من نوع تاني؟ حاسس انك موصلتش لحاجه مع انك وصلت وحققت بتتمناها .. ده سلاح ذو حدين.. ممكن جدا الفكرة دي تبقى هي الدافع ليك إنك تعلي طموحك وإنك تشتغل وتتطور اكتر .. وممكن جداً تكون هي السبب في هدم كل ده والاحساس بالفشل واليأس لإنك مش مقتنع بيها. ف وجود الفكرة في دماغك بالنسبالي مش حاجه مُضره لكن تبعيات الفكرة هي اللي ممكن تبقى مضره حسب تعاملك معاها. جرب تقسم اي هدف عايز توصله لاهداف صغيرة وكل هدف صغير توصله تكافئ نفسك وتقضي وقت حلو مع ناس بتحبها او مع نفسك لو بتفضل ده اكتر وتتكلم مع نفسك في كل اللي فات واللي عملته وتوضح قد ايه مبسوط بنفسك .. المهم انه يكون وقت تطلع منه حاسس انك عملت حاجه فعلا وانك فعلا انجزت. نيجي لاخر جزء ليه ممكن ندفع فلوس في حاجه مفيده لينا ومنعملهاش؟ من وجهة نظري في أسباب كتير ممكن تخلينا نعمل ده وانت ادرى بنفسك وبايه اللي ممكن يكون سبب ليك فعلا .. ممكن مثلا تكون بتيجي على نفسك جامد ومفيش وقت راحه وترفيه كافي .. ممكن كمان بتلزم نفسك بانك تدفع فلوس بس مش دي الطريقة الالزامية ليك يعني مش دي الحاجه اللي هتخليك ملتزم، ممكن مثلا تكون بتلتزم بالتشجيع أو ان يكون عندك دافع قوي يحركك أو انك يكون عندك تهديد بحاجه معينه مش هتحصل عليها لو معملتش ده.. ف منكن تفكر مع نفسك شويه ف النقطه دي وتشوف الانسب ليك.. ممكن كمان تكون بتحاول تعمل كذا حاحه ف نفس الوقت يعني مثلا عايز تطور نفسك في مجال دراستك أو شغلك وعايز تطور نفسك بدنياً من ناحية الرياضة وعايز تطور موهبة عندك .. ف طبيعي جداً متقدرش تبدأ كل ده مع بعضه .. لكن تبدأ حاجه وبعد فترة اسبوعين او تلاته تكون اتعودت على الحاجه دي ف تبدأ ف حاجه تانيه وهكذا. اتمنى اكون افدتك ولو في نقطه مش واضحه او محتاج تسأل اكتر هكون في انتظارك.
تم النشر الاثنين، ١٢ ديسمبر ٢٠٢٢
لعرض السؤال في فدني اضغط هنا