السلام عليكم
انا بنت وحاليا عندي 14 سنه
انا الكبيره بين اخواتي الولاد ولما جابوني
ابويا فرح بيا اوي لأني كنت اول فرحته وكدا يعني بس الموضوع دا مطولش كتير لأنه بعدها بسنتين امي خلفت اخويا الوسطاني فا انشغلو بيه ومدونيش الاهتمام الكافي ليا وبعدها بكم سنه يعني كنت في حدود حوالي ٧ أو ٨ او ٩ سنين
ابويا بقا يضربني ويزعقلي على اتفه الاسباب وانا كنت طفله مش بفهم هما عاوزين مني ايه بالظبط وليه بيضربوني
وفاكره مره كنت مصلتش لأني لسه مكنتش اعرف اهميه الصلاه اوي وانها فرض
لقيت ابويا مسك الحزام وانا رحت جريت ورا ماما عشان تلحقني أو تساعدني
بس هي مساعدتنيش وبصت لي كدا وتجاهلتني ولقيت ابويا ضربني بالحزام لحد ما جسمي كله بقا لونه احمر وعيطت جامد اليوم دا
وبردو كنت فاكره انه كان بيجيب لاخويا الوسطاني حلويات ومكنش بيجيب لي حاجه منهم وبيزعقلي لو طلبت من اخويا حاجه منهم
المهم لما كبرت شويه بقا عندي مشاكل كتير زي اني بتعلق بالناس بطريقه فظيعه وانهار لو واحده من صاحبتي مثلا سابتني أو قطعنا علاقتنا ببعض وابكي جامد وبحس اني مش محبوبه ومحدش بيحبني وبردو وانا كان عندي 11 او 12 سنه حملت تطبيق كانو بيعملو منه أصحاب وفيه جروبات وكدا اسمه امينو
المهم دخلت جروب منهم على أمل اني الاقي صحاب فيهم يحسسوني بالأمان ويواسوني بس محصلش الكلام دا وبقيت انا اتكلم في الجروب ومحدش بيرد عليا ومحدش مهتم بيا خالص ولا كأني في الجروب وبيعملو فعاليات فيه ومش بيدخلوني وعيطت ومسحت التطبيق كله
وبقيت بدور على الاهتمام من كل الناس ومن الي يسوى وميسواش وبقيت بس عايزه الناس تواسيني على اتفه الاسباب بقيت حساسه جامد وبعيط على أقل اقلل حاجه والناس عرفتني من ابتدائي وانا حساسه جدا حتى معلماتي عارفين
وبقا عندي مشكله غريبه انا مش فاهماها وهو انه بقيت احيانا بكره الناس بدون سبب ومش طايقه اتكلم مع حد ولو حد كلمني اتعصب عليه بس بردو احيانا بحب الناس دي اوي وبتمنى لهم الخير وعكس الي كنت بعمله خالص حتى اصحابي مثلا ببقا بحب صاحبتي جدا ومتعلقه بيها واحيانا تانيه اكرهها وما اطيقهاش ومش عاوزاها في حياتي ابدا
ساعدوني وازاي اتخلص من كل الحاجات دي عشان تعبت جامد
وعليكم السلام هو بما انك فاكره التفاصيل من وانتى صغيره كده ..يبقى بذرة الموضوع بدأت بالغيرة من اخوكى اللى بعدك لما اتولد لانه اخد من الاهتمام والدلع اللى انتى كنتى واخداه 100 % يعنى مش شرط يكونوا فعلا اهملوا فيكى وفى الاهتمام ..هو بس الطبيعى انه بيتوزع على الاولاد كلهم طريقتهم فى التعنيف للاسف ممكن متعودين عليها من تربية اهلهم ليهم ...يعنى ده مش ليكى مخصوص ..هما ميعرفوش غير الطريقة دى للاسف الاول شوفى ايه اشكال الاهتمام اللى انتى منتظراها فى خيالك منهم ..وبعدين شوفى اذا كانت فى مقدرتهم فعلا ولا لا ثانيا شوفى بقى اشكال الاهتمام اللى فعلا بيقدموها وقدريها وحسيها ..عشان متكونيش ظالماهم ولا تكونى حارمه نفسك الاستمتاع بيها عشان بس باصه على اللى ناقص عشان تاخدى اهتمام اتعلمى ودربى نفسك تكونى بتقدمى اهتمام انتى كمان وقدميه بكل حب مش عشان تاخدى مقابل اهتمى انتى بنفسك واستشعرى نعم ربنا عليكى ...وقدرى نفسك عشان تقربى منك الناس اللى يناسبوكى بس بلاش تقيمى الاشخاص بالاهتمام وانهم لازم يكونوا مش شايفين غيرك وبس ...لان زى مامتك وباباكى ما ضرورى اهتمامهم هيتوزع ...اى حد تانى هيبقى كده
تم النشر الجمعة، ٥ أبريل ٢٠٢٤
حبيبتي اللي بتمري بيه الان هو نتيجه لمشكله في مفهوم الامان عندك من الاهل ، لو فكرنا ان اهلنا هما بشر مش ملايكه ، اوقات بيغلطوا اوقات بيحزنوا واوقات بيكونوا سعداء ووقتها بيعطونا السعاده هنقدر نتقبل بعض تصرفاتهم ، وكتير من الاهل ليس لديهم الوعي الكافي في التعامل او تاثير سلوكهم علي الغير ، هنا مش بندافع عنهم ولكن ممكن لما نري الصوره من جهه نظر مختلفه ،مشاعرنا تصبح اهدي .الحب بنأخذه من مصادر كثيره ، من علاقتنا بربنا ، من اهلنا واقاربنا ، من مذاكرتنا ودراستنا ، اصدقاءنا ، لو عندنا حيوان أليف والمواقف الصغيره اللي بتقابلنا في حياتنا ، حاولي تكتبي وتسجلي اي موقف جميل وقابلك في يومك هيفرق معاكي
تم النشر السبت، ٦ أبريل ٢٠٢٤
بصى مفيش اب وام مش بيحبو أولادهم بس تلاقيهم مش عارفين يوزعو الحب والاهتمام بالتساوي مابينكم ودة إلى عامل الفجوة دى بس صدقينى محدش هايحبك قدهم صلى وادعيلهم بالهدايا واقعدى اكلمى مع مامتك واعتبرني اختك او صحبتك
تم النشر الجمعة، ٥ أبريل ٢٠٢٤
انت قابلتي ناس مش سوية في حياتك ممكن يكونوا مش أسوياء نتيجة حجود وقسوة اهاليهم فبيحطوا العصبية والحجود ده عليك وبيتصرفوا بأنانية سيلك من دوول دي أمراض نفسية خليك سليم وسوي ومحترم وهيحبكةالناس ويقربوا منك
تم النشر الجمعة، ٥ أبريل ٢٠٢٤
احساسك بعدم الامان الي كان مفروض تاخديه من اهلك هو الي مخليكي شويه بتحبي الناس وشويه بتكريهم انتي جواكي كويسه بس عشان حاسه بالظلم وانك مش مقبوله من اقرب الناس بس تخيلي الطفله دي حد محتاح مساعدتم وانك تحميها الي هو انتي وانتي صغيره وحاولي تحميها بالعكس ادي للناس الحاجه الي كنتي مستنياها من اهلك الناس ملهاش ذنب خليكي انتي الامان لنفسك انك تحمي نفسك من اي اذي وتدي الحب لنفسك وكل الي محتاحه منك ❤️
تم النشر الجمعة، ٥ أبريل ٢٠٢٤
ربنا يهدي ابائنا جميعاً،، ،،،، حاولي تتكلمي مع مامتك وتفهمي منها ليه بيعاملوكي كده وبيفرقو ف المعاملة بينك وبين اخواتك
تم النشر الجمعة، ٥ أبريل ٢٠٢٤
أنك لقيت ناس قاسية في حياتك مش كلهم كده في ناس عندها عقد نفسية ممكن علشان اهاليهم كانت كده متعقدش نفسك وابعد عن كل العقد دي وخليك انسان سوي وجميل وهيجيلك كتير ويصاحبك
تم النشر الجمعة، ٥ أبريل ٢٠٢٤
لعرض السؤال في فدني اضغط هنا