طيب انتي قولتي كلامك دا لمامتك؟ ياريت تخليها تقرا اللى كتبتيه كله عشان ماما تعرف ازاي القطة كانت فارقة معاكي اوي .. وهي ماما تفكر هينفع او لا ترجع القطة .. هل انتي تقدري تتحملي مسؤولية رعاية القطة في البيت ومتتعبيش ماما في رعايتها؟ طيب مصاريفها واكلها وعلاجها ؟ تقدري توفري من مصروفك وتساعدي ماما؟ هي فعلا مسؤولية كبيرة اوي ، وبتكلف كتير جدا وبتحتاج رعاية طبية كل شوية مقدرش اقولك ان عندك مشكلة .. عارفة الصحابي ابو هريرة رضي الله عنه؟ كان اسمه ابو هريرة ، لانه كان بيحب القطط ، وكان معاه قطة صغيرة (هريرة) بيلاعبها ويراعيها .. فاتسمى بالاسم دا انتي قلبي طيب ورحيمة .. متفهمة الفرق بين القطط وبين تربية اي حيوانات او عصافير تانية ،فمش قادرة اقولك هاتي عصافير مثلا او سلحفا ، لان التعامل معاهم مختلف مش نفس القطط وكمان مش قادرة الوم على مامتك ، لان لو فعلا المسؤولية كبيرة على ماما انها تراعي القطة ، خصوصا مع المصاريف اللى بتزيد في كل البيوت ، فصعب دلوقتي تطلبي من ماما انها ترجع القطة البيت لو هي مش هتقدر تغطي مصاريفها وطلباتها ورعايتها. وفعلا زي ما (Sasa Dark) قال/قالت ، مش صح تعلقي قلبك بحاجة في الدنيا عموما ، ولا بالحيوانات ، لان عمرها قصير ، ولو علقتي قلبك بيها اوي هتتعبي جامد لو فقدتيها ، ودي حاجة مافيش منها مفر .. لاحظت كمان انك كنتي واخدة القطة بديل للصحاب والتعامل مع الناس .. انتي قافلة على نفسك اوي؟ دا مش حلو عشان هيفوت عليكي فرص كتير في فهم الدنيا ومهارات التعامل مع الناس ، ولو احتجتي تشتغلي ، هيبقى ناقصك مهارات كتير .. فانتي محتاجة تخرجي شوية من comfort zone وتتعاملي مع الناس في شغل ، دراسة ، اي نشاط اجتماعي .. دا مهم اوي وكمان هيحسن نفسيتك ويساعدك على تخطي مشاعر فقد القطة لحد ما تبقي قادرة تشيلي مسؤولية تربية قطة ماديا ومعنويا ، ممكن توفري من مصروفك ، ويكفي تقدمي خير بسيط للحيوانات في اي شلتر وتقعدي تلاعبيهم شوية في مكانهم من غير ما يبقو معاكي في البيت .. لو دورتي على النت هتلاقي كذا مكان .. تقدري تساعدي فيه بوقت او فلوس او رعاية ..
شكراً لنصائح حضرتك 💗
تم النشر السبت، ١١ يناير ٢٠٢٥
عشان كدا قلتلك خلي ماما تقرا الكلام اللى انتي كتباه ، لاني توقعت انك مبتقدريش تعبري عن اللي جواكي بالكلام .. دي صعوبة فعلا ، ولكن تقدري تتحسني فيها لانها مهارة من مهارات التواصل ، بالمحاولة المستمرة والتدريب ، هتقدري تعبري عن اللي جواكي للي قدامك بهدوء بدون انفعال .. اول خطوة انك تكتبي اللى عايزاه على الورق ، وبعدها تحاولي تقوليه بصوتك بينك وبين نفسك .. وتاني خطوة انك ممكن تسجلي فويس للشخص بصوتك ، تقوليله اللى انتي عايزاه ، دا هيكون اسهل كتير عليكي من انك تقولي اللى عايزاه قصاد الشخص دا .. بالتدريب المستمر هتقدري تنمى مهارة التعبير عن افكارك ومشاعرك بطريقة موزنة ، وهتكسبي كتير ساعتها ، لان الناس هتفهمك بشكل اكبر ، وتتطور علاقاتك بيهم بشكل سليم ، وكمان هتساعدك في عرض افكارك واجاباتك في اي دراسة او شغل ..
تم النشر السبت، ١١ يناير ٢٠٢٥
هي عارفه انها فرقت معايا و فرقت معاها هي كمان كل متفتكرها تعيط عشان هي فرقت معانا كلنا كانت بظبط ذي فرد من العيله ، انا عندي صحاب و بعرف اتعامل بس مبعرفش اطلع الي جوايا لحد معرفش بحس بعدم راحه مبعرفش خالص و دا ف اي حاجه مشاعر حب او حزن او اي مشاعر مبقدرش و لو حاولت بنهار بعيط بشكل مش طبيعي لدرجه بيأثر على تنفسي و ببقا بتنفس بصعوبه، جربت كذا مره اغير ده حتى احكي لماما عن مشاعري مثلا معرفتش عشان دي حاجه فيا من ونا صغيره
تم النشر السبت، ١١ يناير ٢٠٢٥
لعرض الإجابة في فدني اضغط هنا