حد يتخيل انه بابا عنده ورم خبيث ومحجوز ف المستشفي وانا عادي عايشه وبروح الجيم وفرح ومش حاسه بحاجة؟
انا عارفه لو حصله حاجة انا اكتر واحده هتأذي. ع الاقل اخواتي عاش معاهم طفولتهم ودايما كان بيخرج ويسافر معاهم ،كبروا في حضنه وحضر فرحهم وشال عيالهم واتدخل ف مشاكلهم. انا ولا اي حاجة من كل ده، فرق السن اللي بينا كبير اوي وولا مره خرجنا او سافرنا سوا. دراستي وحياتي كلها ميعرفش عني حاجة . ففكرة انه ميبقاش موجود كمان في اللي جاي ...!!
تم النشر الاثنين، ٦ فبراير ٢٠٢٣
سؤالك ده دليل على انك تبالى وبشدة كمان. انتى بس زعلانة انك مش حاسه انه فارق. انتى خايفة تقولى انك بتحبيه وانه فارق معاكى رغم جفاه وقساوته عليكى. ع فكرة عادى جدا ...انك تحبي ابوكى وتتعلقى بيه رغم انه مقصر معاكى بشكل ما.. هيفضل لاخر يوم فى عمرك ..سواء هو لسه حى او حياته انتهت ...هيفضل كل املك وتركيزك فى علاقتك بيه وبانك تشوفى نفسك فى عينيه. انتى قررتى بشكل لاواعى انك تجمدى مشاعرك ناحيته ...زى ما هو بيعمل معاكى...بس المشاعر موجوده ...وزيادة عليها خوفك انه يبقي مش موجود خلاص ...فانتى بتنكرى انه فى حاجة ممكن تخليكى تفقديه فبتتعاملى كأن مفيش حاجة ...هى حالة انكار بس متخفيه فى اللامبالاه دى. قربي من ابوكى فى الفترة دى عشان لو حصل حاجة هترجعى تقولى ياريتنى كنت استفدت بالوقت ده ...حسسيه باللى انتى مفتقداه منه ...انتى قلبك مش قاسي ومتخليش حد يقنعك بكده ولا انتى تقنعى نفسك بده.
تم النشر الاثنين، ٦ فبراير ٢٠٢٣
الف سلامه عليه ربنا يشفيه ويعافيه يارب... علاقتك بباكي كانت عامله ايه من وانتي طفله؟ وعلاقته بوالدتك عامله ايه وعلاقتك بوالدتك عامله ايه؟ وبقاله قد ايه تعبان ؟ وحاولي توصفيلي مشاعرك اول معرفتي بتعبه؟
تم النشر السبت، ٤ فبراير ٢٠٢٣
لعرض السؤال في فدني اضغط هنا