السلام عليكم..
أنا بنت ف 3ث حاليا، ومستوايا متوسط بس يميل للتدهور والنزول اصلا والله المستعان، بس الاسوأ ان انا بحب ولد شاب زميلي من اولي اعدادي وانا بحبه، كل يوم اقعد مع نفسي اطلع اسباب لي مينفعش احبه وحرام ومش عارف اي، واقرر انى محبوش تاني، ويدوب اشوفه ف الدرس ولا اكني اتكلمت مع نفسي قبل كده وانا زهقت من نفسي اصلا، مع اني بحاول اغض بصري، بس الموضوع صعب جدا، وغيركده انا حتي مش عارفه اذا كان بيحبني ولا لأ، بس هو احيانا بيبصلي، اعمل اي ف اللي انا فيه ده؟؟
وعليكم السلام ورحمة الله وبركاته، خليني أقول لك إن كل ده طبيعي في عمرك وكلنا مرينا به وعشان كده عاوزاكِ تفهمي وتتأكدي إن المشاعر في الفترة دي متقلبة وخلال سنوات هتلاقي نفسك نسيتِ كل ده وبقى مجرد ذكرى ممكن تضحكي عليها بعدين. انتِ مش محتاجة تقعدي مع نفسك وتقولي لها مش هنحبه وهننساه وليه المفروض منحبش وكل ده لأن زي ما انتي شايفة ده مش جايب نتيجة وأول ما تشوفيه بتنسي كل قراراتك. الحل إنك تقعدي مع نفسك تقرري إيه المهم حاليًا في حياتك واللي المفروض يكون شاغلك وتبرمجي عقلك يشوف هدف محدد قُدامه. الحل إنك تحطي لنفسك خطة تركزي على المطلوب منك في المرحلة دي من حياتك وتعرفي إن الحب له وقته الصحيح وإن مشاعر المراهقة بتروح مع الزمن. انتِ نفسك واخدة بالك إن مستواكِ الدراسي بيتدهور وده من أسبابه انشغال تفكيرك وقلبك، البال المشغول والتركيز اللي مش موجود طبيعي يأثر على مستواك. متحاوليش تقاومي مشاعرك عشان المقاومة بتجيب نتيجة عكسية، خليها موجود وهي لوحدها هترجع في الخلفية لما تنشغلي بالأهم. ابدأي من النهاردة بقرار تغيير لعقليتك وتفكيرك وصدقيني مع الوقت هتتجاوزي المرحلة دي بسلام. ومتفكريش هو بيبص عليّ ده معناه بيحبني ولا لأ، لأن أولًا الحب مش بالنظرات ولا حتى بمجرد الكلام وثانيًا حتى لو بيحبك فخطوة الارتباط أصلًا حرام وخطوة الزواج مش متاحة في سنكم، فملوش لازمة أشغل تفكيري بأسئلة إجابتها مش هتفيد. وأخيرًا والأهم من كل ده، اطلبي العون من ربنا يقويك على نفسك ويساعدك تخرجي بسلام من المرحلة دي. بالتوفيق.
تم النشر الأحد، ٢٩ سبتمبر ٢٠٢٤
وعليكم السلام ورحمة الله وبركاته، أقدر مشاعرك وتشتت أفكارك في هذه المرحلة. من الطبيعي أن تشعري بالإعجاب تجاه زميل لك في المدرسة، فهذه مشاعر طبيعية تمر بها الفتيات والفتيان في سن المراهقة. لكن في نفس الوقت، من المهم أن تعي مفهوم الحب والعلاقات في هذه المرحلة من حياتك. أولاً، ينبغي أن تعطي الأولوية لدراستك ومستقبلك. التعليم هو الأساس الذي سيبني لك حياه مستقبلية مشرفة. حاولي أن توازني بين مشاعرك وبين دراستك، فلا تدعي الحب يؤثر سلباً على مستواك الدراسي. ثانيًا، لا تجعلي التفكير في مشاعرك يعكر صفو حياتك. حاولي أن تقضي وقتًا مع صديقاتك وأن تشغلي نفسك بأنشطة تحبينها. هذا سيساعدك على تقليل التفكير في هذا الشاب. ثالثًا، إذا كان لديه أي مشاعر تجاهك، فسوف يظهر ذلك بشكل طبيعي دون الحاجة لمجهود كبير. التواصل مع زملاء الدراسة بطريقة طبيعية، وعدم الضغط على نفسك أو عليه سيساعدكم في التعرف على مشاعر بعضكما البعض بطريقة صحية. يمكنك أيضًا استشارة امرأة ثقة، مثل والديك أو معلمة، حول مشاعرك ومساعدتك في فهم ما يجري. تذكري أن العلاقات في هذه المرحلة يجب أن تكون بسيطة وصحيحة، بعيدًا عن الضغوط. أخيرًا، كوني صادقة مع نفسك، وإذا شعرت أن هذا الأمر يسبب لك قلقًا شديدًا، يمكنك دائمًا البحث عن مربية أو مستشارة لتساعدك على التعامل مع مشاعرك بطرق صحية. وفقك الله في دراستك ومشاعرك.
تم النشر السبت، ٢٨ سبتمبر ٢٠٢٤
وعليكم السلام ورحمة الله وبركاته بركاته اولا ربنا يوفقك السنة دي وتجيبي مجموع يفرح قلبك ثانيا انا هقولك من خلال تجربتي لموضوع زي ده في الأغلب ده مش حب ده اسمه تعلق مش أكتر وهتعرفي ده لما تدخلي الجامعة ان شاء الله وتلاقي مجتمع تاني وناس جديدة حواليكي ممكن يكون عاجبك تصرفات الولد ده بس لو جيتي ركزتي هتقولي لا ده مش مناسب ليا وطالما قولتي الكلمة دي يبقي مش بتحبيه صدقيني هتندمي بعدين لو لا قدر الله جبتي مجموع قليل هي أكيد حاجة في إيد ربنا بس تبقي عملتي اللي عليكي لااازم تركزي في مذاكرتك بجد هي دي اللي هتنفعك مشاعرك مؤقتة إنما مذاكرتك هيترتب عليها مستقبلك وجربي تصلي قيام الليل لمدة 40 يوم وادعي لنفسك دايما وان شاء الله تشوفي الفرق
تم النشر الأحد، ٢٩ سبتمبر ٢٠٢٤
دور على هدف كبير يفرق في حياتك هدف يتعلق بشخصك بعملك بمستقبلك
تم النشر الأحد، ٢٩ سبتمبر ٢٠٢٤
عايزك تعرفي ان مصر كلها حالها زي ما انتي قولتي كده متوسط يميل للتدهور .. ابدئي بالصلاة و القرب من ربنا بالطريقة السهلة السيرة اقري كل يوم في القرآن و لو سورة واحدة مش هقولك جزء و نظمي نفسك و اعملي الأولويات الأول مش لازم تعملي جداول علشان نحس و اعملي وقت محدد للمذاكرة .. و ركزي في الوقت ده كل المطلوب 3 ساعات بتركيز شديد و بدون اي حاجات تافهة تشغل و هتلاقي نفس المداومة مستواك بقي احسن ، و سيبك من موضوع الحب ده علشان غالباً هيشغلك و بدون اي فايدة هتبقي ضيعتي وقتك و مجهودك و مشاعرك ع الفاضي و غالبا علاقات الحي في السن الصغير مش بتكمل فبلاش .
تم النشر الأحد، ٢٩ سبتمبر ٢٠٢٤
لما تشوفيه استعيذي بالله من الشيطان الرجيم (عشان دي وسوسة من الشيطان) واستعيذي واستعيذي وماتبوصيلهوش.
تم النشر الأحد، ٢٩ سبتمبر ٢٠٢٤
لعرض السؤال في فدني اضغط هنا