انا كنت مخطوبه من شهر ٧اللي فات بس اصلا كنت بحبو بقالي ٣سنين وقعدنا في مشاكل علشان انا مدلعه اوي واتغيرت كتير علشانو وكنت علي كل حاجه اقولو حاضر لحد مابدا يحصل بينا مشاكل وعلطول محسسني ان شكلي وحشه وان هو احلا ومش عاوزني اهتم بنفسي وهو مهتم بنفسو جدا بدا الخناقات تزيد وتعبت وعلقت محاليل وهو حته مسالش عليا وجيه بعدها بكام يوم وفجاه لقيتو بيقولي يا بنتي انا مليش دعوه تنزلي براحتك تلبسي اللي انتي عاوزه انا مليش دعوه انتي في بيت ابوكي وبعد كدا بدا مش يكلمني خالص وبعدها قال كل شيء قسمه ونصيب وسبنا بعض بس والله من امبارح وانا بموت عيني مبطلتش عياط ومش عارفه اعمل اي مع العلم ان هو جاري اعمل اي ونبي حد يفيدني
السلام عليكم ورحمة الله وبركاته شكرا لحضرتك جدا ع المشاركة🌷 اكيد الاحساس تقيل وصعب عليكي يخليكي تشعري بالحزن والغضب والحيرة وتساؤلات كتير جوه دماغك عايزة اجابة الفقد على المستوى النفسي هي نفس خبرة كأن طرف من أطرافك اتقطع .. بالعقل عارف أنه مش موجود بس أنت حاسس بيه لسه وبتمد أيدك تلاقيه فبتتفأجه كل مرة أنه مش موجود وعشان كده من يمرون بالفقد لما بيتلقوا خدمات التدخل النفسي مش بيتقدملهم علاج بيتقدملهم تأهيل وبيتعلموا التقبل عشان يتعلموا يعيشوا أزاى من غير ناس كأنوا جزء منهم بلاش استعجال ع تخطي المرحلة اسمحي لنفسك بالحزن وخدي وقتك عشان تقدري تقومي علي رجلك وتعرفي تكملي حياتك اللي تستحق كل طاقتك بعد كل صدمة في مراحل بندخل فيها زي الانكار والغضب والاكتئاب والمساومة وأخر حاجة التقبل فبلاش تجيبي من الآخر اعرفي انتي مين ؟حاسه بإيه ؟محتاجة ايه؟اعرفي اكتر عن نفسك .افهمي نفسك كل الاشخاص فحياتنا ضيوف اطلعي من التجربه دي برسالة ان الشخص ده علمني كذا عن نفسي أكيد ربنا كاتبتك حياة أحسن قد لاتسمح بوجوده فحياتك اتمني ربنا يبعد عنك الوجع والألم ويبصرك بالحق
تم النشر السبت، ٢٣ سبتمبر ٢٠٢٣
ازيك يا موكا بصي يا حبيبتي انا مقدره اللي انت فيه جدا وعارفه انت حاسه ازاي وبس فكره ان انت بصي انتم كنتم بتحبوا بعض بقى لكم ثلاث سنين اتخطبتوا من شهر سبعه ما كنتش متوقعه بقى ان فتره الخطوبه دي هتبقى احلى كتير كمان من فتره الارتباط وان خلاص الشخص اللي كان بيحبك واختارك عن كل البنات اللي قدامه هو هو ده اللي هيسعدك فالاكسبكتيشنز والتوقعات اللي انت كنت راسماها الموضوع ده ما حصلتش هو فانت من حقك تعملي لايه الخطوات اللي جايه واحد هتقعدي الاول لازم تحسسي جسمك ومخك وكل حاجه ان انت في مرحله من الحزن تتقبليها للصدمه اللي حصلت ان انتم خلاص مش هتبقوا مع بعض تاني فلازم تعيشيها وما تنكريهاش هو ده واقع وده حاصل ومحتاجه انك تتقبليه بسرعه عشان تقدري
تم النشر الجمعة، ٢٢ سبتمبر ٢٠٢٣
انا بفهم انك بتعدي وقت صعب دلوقتي، والفراق دا بيكون صعب جدا على اي حد. من الطبيعي انك تحسي بالحزن والغضب والاكتئاب. في الاول، مهم انك تسمحي لنفسك بالشعور بكل المشاعر دي. متحاوليش تضغطي على نفسك عشان تبقي احسن او تكوني سعيده. سيبي نفسك تعبري عن مشاعرك، سواء كان عن طريق البكاء او الكتابه او الكلام مع حد بتثقي فيه. بعد ما تدي نفسك شويه وقت عشان تتعاملي مع المشاعر دي، ممكن تبدأي في التفكير في الخطوات اللي ممكن تاخديها عشان تتخطي دا. اول حاجه لازم تعمليها هي انك تقطعي اي اتصال مع حبيبك السابق. ده ممكن يكون صعب، خصوصا لو هو جايرك، بس ده مهم عشان تقدر تبدا في الشفاء. ثاني حاجه لازم تعمليها هي انك تركزى على نفسك. اهتمى بنفسك، جسمك، وعقلك. روحى الجيم، اتعلمى حاجه جديده، او اقضى وقت مع صحابك وعيلتك. ثالث حاجه لازم تعمليها هي انك تتقبلي ان دا حصل. الفراق دا مش معناه انك مش كويسه او مش هتلاقى حد احسن. كل اللي بيحصل هو ان العلاقة دي مش كانت مناسبة ليك. ده مش هيكون سهل، بس مع الوقت والدعم، هتتخطي دا. في الوقت الحالي، ممكن تعملي الحاجات دي عشان تساعدي نفسك: اتكلمى مع حد بتثقي فيه عن اللي بيجرى. اكتبى عن مشاعرك. اقضى وقت مع صحابك وعيلتك. اهتمى بنفسك، جسمك، وعقلك. ركزى على الحاجات اللي بتحبيها تعمليها. وانتى بتعدي من الازمه دي، افتكري ان دا وقت مهم عشان تتعلمى عن نفسك واحتياجاتك. هتقدرى تخرجى من دا اقوى وافضل.
تم النشر الجمعة، ٢٢ سبتمبر ٢٠٢٣
مش يمكن المشكلة من الاول انك كل حاجه كنتي بتقولي عليها حاضر! هل ينفع ان كل حاجه تقولي عليها حاضر؟ حتى لو كنتي مش مقتنعة بيها؟ يعني تقولي حاضر دلوقت، ويبدأ بعدها كل شوية هو يزود - كل شوية يزود .. وانتي اساسا ممكن متكنيش مقتنعة ب ده كله، ولكن بتقولي حاضر بس علشان تمشي الموضوع وترضيه. وده اكبر غلط، لازم يبقى فيه مناقشةـ ولازم تبقى عارفه انتي بتقولي حاضر على ايه بالظبط؟ وتبقى فعلا مقتنعة وراضيه. وقصة انه يدخل في اهتمامك لنفسك ديه غريبة! غريبة جدا ... يعني من الاول كده اول ما يحصل الحاجات ديه منه المفروض تعملي stop وتعرفي ان فيه حاجه غلط. انا مقدرة دلوقت انك بتمري بفترة صعبة جدا، ولكن كان لازم ترمي بيها .. ع الاقل علشان تعرفي ايه اللي الغلط اللي انتي عملتيه في العلاقة ديه. وتقدري قيمتك كويس اوي، يعني اكيد مش هتبقى مبسوطة لما تتجوزيه ويبدأ يقولك انتي وحشة؟ امال خطبك ليه وارتبط بيكي ليه من الاول! ديه تلكيكه بصراحه! ف انتي تحمدي ربنا دلوقت انك بعدتي عن الشخص ده، والحمد لله انها جت ع قد كده، وصدقيني الحب مش كل حاجه في العلاقة .. لازم العلاقة اللي انتي فيها تكون مبنيه على حاجات كتير جدا غير الحب. العلاقة اللي كل شوية الطرف التاني يحاول يغير منك ابعدي عنها. العلاقة اللي كل شوية الطرف التاني يبدأ يقلل منك ابعدي عنها. العلاقة اللي تخليكي كل شوية في نكد ومش متفاهمين مع بعض ابعدي عنها. اختاري العلاقة اللي تحسي فيها انك متقدرة وتحسي فيها بالاحترام قبل الحب. وده سؤال عن ازاي تعملي موف اون .. اقري الاجابات بتاعته وان شاء الله فترة وهتعدي https://fedni.net/q/23362448/ازاي-ممكن-الانسان-يعمل-move-on
تم النشر السبت، ٢٣ سبتمبر ٢٠٢٣
بصي انا هكلمك بصراحه.الشخص ده ما بيحبكيش وانت عارفه كده كويس بس بيبقى جوه الانسان حاجه ان هو عايز يوصل لحاجه معينه عايز ياكد ان حاجه معينه عايز ياكد لنفسه ازاي انا ما حدش يحبني او ازاي ده ما يحبنيش وانا احبه شيل الفكره دي من دماغك احنا البشر معرضين ان ممكن حد يحبنا وممكن لا ده شيء عادي جدا مش معنى كده ان انا وحشه معناها ان الشخص ده غير متفق معك طيب انت لو انت عايزه كان الموضوع يتم كان هيتم على انهي اساس وتعيشي معه على انهي وطن ليه ما فكرتيش ان ربنا بيحبك وبعد عنك شخص زي كده ليه ما فكرتيش بكده انك انت تحمدي ربنا ان هو بعد عنك ليه لا بالعكس انت فكري في الجانب التاني ان هو شخص غير مهتم بك وشخص غير مقدر لمشاعرك.وانت ما تتغيريش عشان حد لانه مش هيحبك اللي بيحبك بيحبك زي ما انت واحد جاي عشان يغيرك او انت تتغيري عشانه يبقى اذا هنا في مشكله عندك انت في مشكله عندك انت انت لما هيجي لك الشخص المناسب هيحبك زي ما انت.ان انت صغيره عشان ده مش صحيح ولو جه حد اتغير عشانك.هو كان بوضعه وتغير عشانك صدقيني انت مش هتتقبلي ليه؟ لان الانسان هو كده الانسان لو هو اتغير للاحسن بمعنى ايه الاحسن يعني مثلا هو ما كانش بيهتم بقى بيهتم يبقى انت ساعتها هنا تحبيه لكن التغير اللي هو يعني مثلا كان بيلبس حاجه معينه بقى يلبس حاجه تانيه التغير ان هو ما بقاش يكلم حد عشان خاطرك ده كله تغير مش مش حقيقي دي كده دي لعبه بتتلعب سواء عليك او اي حد بيلعبها على اي حد ودي مش حقيقه الشخص اللي هو بيتغير عشان وساعتها انت هتحترميه الشخص اللي هو يتغير من عدم الاهتمام للاهتمام من اللامبلاء للمبالاه في حاجات كثير في شخصيته مش حلوه ابتدى ان هو يتحسن فيها ما كانش مثلا كان بيكدب بقى بقيتي حسيت ان هو لا قصادك فبقى ده شخص حقيقي ده شخص فعلا.
تم النشر الجمعة، ٢٢ سبتمبر ٢٠٢٣
تفوقى لنفسك يا بنتى هو ولا اول ولا اخر واحد والجواز مش مريح لما تكونى كل سعيك ارضاء الطرف الاخر وخلاص . من الاخر كده الراجل طول ما هو شايفك بلا شخصية مش هتكونى انسب حد يكمل معاه حياته هو مكنش مناسب ليكى وانتى مش واثقة فى نفسك وربطتى نفسك بيه وسيبتيه يعمل ما بداله ...ده اقل واجب انه يسيبك لانك بالنسباله بلا شخصية قدرى نفسك وخلصى صياح ونواح وقومى شوفى حالك واللى يقدرك ويحترمك ويشيلك على راسه بدون تعديلات هو ده بس اللى تقبلى بيه
تم النشر الجمعة، ٢٢ سبتمبر ٢٠٢٣
طب دلوقتي بقا كل لما اسمع صوتو في الشارع بزعل علي ان هو مش زعلان وان كل حاجه عادي وان اكن مفيش حاجه حصلت وبيحط استوري واكن مفيش اي حاجه اعمل اي عاوزه طريقه احرق دمه واحسسو ان انا مفيش حاجه فارقه معايا
تم النشر الاثنين، ٢٥ سبتمبر ٢٠٢٣
متفكريش غير أنه هوسابك في تعبك
تم النشر الجمعة، ٢٢ سبتمبر ٢٠٢٣
أعرفي أن ربنا جل وعلا بعده عنك لأجل أن ده الخير ليكي ويمكن لو كملتي معاه يحصل ليكي أي شيء مش تحبيه أوقات كتير اختيارات ربنا عزوجل خير أكبر لينا وافتكرى أن ربنا عزوجل قال : ( وعسى أن تحبوا شيء وهو شر لكم ) .، ونصيحة أخيرة اشغلي وقتك بكل ما يدخل عليكي من نفع مثل قراءة في مجال معين أو سماع محاضرات نافعة تستفيدي منها وهكذا ومش تسيبي نفسك كتير للتفكير
تم النشر الجمعة، ٢٢ سبتمبر ٢٠٢٣
ربنا هيعوضك حببتي اشاءالله
تم النشر الجمعة، ٢٢ سبتمبر ٢٠٢٣
حسبي الله ونعمه الوكيل فيه
تم النشر الجمعة، ٢٢ سبتمبر ٢٠٢٣
شر وربنا بعدو عنك علشان يراضيكي بالاحسان واللي يستاهلك
تم النشر الجمعة، ٢٢ سبتمبر ٢٠٢٣
لعرض السؤال في فدني اضغط هنا