انا في تانيه اعدادي، مدرستنا نظامها ان اولي اعدادي بنات واولاد يروحو في الصبح هما وتانيه اعدادي بنات بس، وتانيه اعدادي اولاد هما وتالته اولاد وبنات بيروحو في الضهر الفتره المسائيه.
في طابور الصباح، المدير او الاخصائيه الاجتماعيه، بيوقفوا البنات في جهة والاولاد في جهة، بس في بنات بيضحكوا ويتكلموا ويرغوا في الطابور من غير سبب،
وكذا مره المدير يحذرهم وبرضو، كل يوم نفس الحال، المهم النهارده، وصلت المدرسة وهما بيعملوا الطابور، وتفاجأت وصدمت 🙂 انهم موقفين صف اولاد وصف بنات، والمدير مخليهم لازقين في بعض حتي مفيش سنتي واحد بينهم،
في مدرستنا احنا محجبات ونروح بجلباب، الاولاد في المدرسة قليلين أدب جدا جدا، وانا طبعا زيي زيي باقي البنات، وقفت زييهم،
وبيقول انه الولد مش هياكل منك حته دا زي اخوكي، والله الكلام دا كان ينفع لو محترمين، المهم انا واقفه وجنبي ولد سنه اولي بيقول ايه القرف ده والله ماهاجي المدرسة دي تاني، ويبصلنا يعني بقرف كدا مع انه هو المقرف، فكان قاعد يزيح فيا كدا لحد ما كنت هقع، روحت دوست علي رجله بكوتشي اووووي بس كان كاتم الصرخه،
وانا دلوقتي مش عايزه اروح المدرسة تاني لان هيحصل كدا كل يوم وانا مش مستعدة اتعرض للمهزلة دي كل يوم، ولو غبت قبل شهر رمضان هنقص درجات، شهر رمضان عادي نغيب فيه، بس فاضل له 16 يوم، بفكر اني اروح متأخر بعشر دقائق لحد ما يدخلوا الفصل، واروح عشان ما اقفش،
بس كدا همضي وانا قبلها ماضيه مره عشان لبس مخالف، ولو مضيت اكتر من تلات مرات هاخد فصل بس هرجع بس كدا هنقص درجات، فأنا كدا مفيش قدامي اي حل غير اني مروحش وانقص درجات يا اما اروح ويحصل اللي يحصل، لو احد عنده حل يقول وجزاه الله خيرا
، اتكلمي مع بابا وماما انهم يتكلمو مع المدير (المحترم) ان في ولاد (وقحة) هما اللي بيضايقوكو في الطابور ومينفعش تقفو جنبهم روحي المدرسة في معادك ، واتكلمي مع المدرسين بتوعك انك مش عايزة تقفي جنب الولاد عشان بيضيقو عليكو الطابور ، متضريش نفسك باي تصرف في وقت انفعال ، فكري صح بهدوء ، المدرسين والمدير يقدرو يغير نظام الطابور لو كذا بنت اشتكت من الولاد المدرسين والمدير لهم احترامهم واكبر منكم بكتير ، لازم نكلمهم باسلوب هادي ومحترم ، والولاد اللي تبقى قليلة الادب او مش محترمة ، الادارة والمدرسين هما اللى هيتصرفو معاهم
تم النشر الاثنين، ١٧ فبراير ٢٠٢٥
السلام عليكم يا أسماء، الموقف أكيد يضايق ولك حق تزعلي لكن حاولي متاخديش قرار يأثر على دراستك بأي طريقة. المدير أعتقد فكر إن لما البنات تقف كده هيجبرهم يبطلوا ضحك وهزار وهيبقوا مثلا محرجين عشان الولاد واقفين جنبهم لكن ممكن من نفسه يلاقي الموضوع عمل نتيجة عكسية ويلغيه من نفسه. إذا بإمكانك تكلمي أسرتك حد كبير يروح معك يكلم المدير أو الإشراف عندكم أو لو ممكن تشوفي لو فيه بنات غيرك متضايقين من اللي بيحصل ومن وقاحة الأولاد إنكم تتجمعوا وتطلبوا تتكلموا مع إدارة المدرسة وتوصلوا لهم إنكم مش لكم ذنب في تصرفات البنات التانيين وإن الأولاد بيقلوا أدبهم عليكم وبيضايقوك وإن غلط وقوفهم جنبكم لدرجة إنهم يلصقوا فيكم. استحملي الكم يوم الباقيين وجربي الأفضل تقفي في أول الصف علشان تكوني قُدام المدرسين لو ولد حاول يكرر الموقف ده هياخدوا بالهم. كنت هنصحك تقفي في الآخر ومنعزلة لكن مش مضمون الأولاد ورا يعتمدوا إن محدش شايفهم ويضايقوكم أكتر. لو بتخجلي من الوقوف قُدام قاومي خجلك ده واقفي بأول الصف أو في مكان ظاهر منه على الأقل عشان تتجنبي المشاكل دي. بالتوفيق إن شاء الله.
تم النشر الاثنين، ١٧ فبراير ٢٠٢٥
عزيزتي أسماء، أفهم مشاعرك تمامًا وقلقك بشأن الوضع الذي تواجهينه في المدرسة. يجب أن نبدأ بالاعتراف بأن محيط المدرسة يجب أن يكون مكانًا آمنًا ومحترمًا للجميع، سواء من الطلاب أو من الإداريين. أولاً، ليس من الخطأ أن تشعري بالاستياء بسبب تصرفات المدير أو أي شخص آخر يتعامل بشكل غير لائق. من المهم أن تعربي عن مشاعرك، لكن يجب أيضًا التفكير بطرق إيجابية للتعامل مع هذه المواقف الصعبة. إذا كنت تخشين من الاحتكاك بالطلاب الآخرين في الطابور، فإن تعليقك على تأخير وصولك قد يكون فكرة جيدة، لكن يجب أن تفكري في العواقب. يمكنك أيضًا التحدث إلى معلمة أو مسؤولة في المدرسة عن ما يحدث، حيث يمكن أن تقدّم لك المساعدة أو الدعم الذي تحتاجينه. من الأفضل أن لا تقومي بالغياب عن المدرسة، لأن هذا سيؤثر على دراستك، وخاصةً مع اقتراب شهر رمضان. حاولي التحلي بالصبر، وتذكري أن هذا الوقت سيمر، وستمكنين من مواجهة الأمور بطريقة تضمن احترامك لنفسك. الأهم هو أن تحافظي على روحك الإيجابية، وتبحثي عن طرق للتعامل مع هذا الوضع. يمكنك التواصل مع صديقاتك اللواتي يشاركنك نفس المشاعر، والتعاضد معاً لتخطي هذه الأوقات الصعبة. أسأل الله أن يسهل لك الأمور وأن يرزقك القوة لتجاوز هذه التحديات.
تم النشر الاثنين، ١٧ فبراير ٢٠٢٥
شوفي مُدرسة كويسة تحللك الموضوع ومتسكتيش عن حقك ومتعمليش حاجة تغضب ربنا عشان ترضي مدير ولا مديرة وربنا ييسر لك الحال
تم النشر الخميس، ٢٠ فبراير ٢٠٢٥
ماشاء الله يا ريت لو المدارس كلها يكون فيها البنات محجبات بدل القرف اللي بنشوفه الأيام دي وشجاعة منك على انك دوستي على رجليه أنا أختي ضربته على وشه بالقلم 😅 اقترح تتكلمي مع باباك أو مامتك برده بانك ما تحضري الطابور 👍مثلا رجلك تعبانه من الوقفة وكدا يعني . ربنا يحفظك ويحميكي ويحفظ أي بنت تحاول تلتزم، ويهدي العاصي 🤲💛
تم النشر الاثنين، ١٧ فبراير ٢٠٢٥
مش هتاخدي فصل هما بيعملوا كدا وخلاص، او قوليلهم انا والدي محظر عليا اقف جنب الولاد
تم النشر الاثنين، ١٧ فبراير ٢٠٢٥
لعرض السؤال في فدني اضغط هنا