انا المفروض لسه متخرجه جديد ومن صغري لحد دلوقتي عمري في حياتي ما ارتبطت بشاب ابدا كنت بروح لدروس ومدارس مختلطه كان فيها ولاد حلوين جدا شكلا لدرجه ان كل البنات كانو بيحاولو يكلموهم وانا الوحيده اللي مش بعمل كدا بحكم اني هاديه وتصرفاتي عقلانيه نوعا ما ، فيه كام واحد منهم حاول يكلمني فيس وواتس ايام ثانوي لكن عملتلهم كلهم بلوك لاني مش متعوده علي كدا كنت مراهقه ملتزمه اوي في دروسي ووقتي مليش في الشغل ده ، عدا الوقت وخلصت الجامعه وانا مفيش حد دخل حياتي اطلاقا كنت متضايقه شويه بس في نفس الوقت رافضه موضوع العريسان لاني مش عايزه اتجوز ، لحد ما بدأت انزل استوري لقيت شخص من اللي كانو بيحاولو يبعتولي زمان بيتابع استورياتي ، الولد ده بالذات كان عامل ضجه كبيره بسبب انه حلو اوي وارتبط بكذا بنت منهم واحده زميلتي فضل معاها مده طويله وبعدين سابو بعض دلوقتي انا متضايقه جدا من نفسي انا اللي طول عمري مليش في الشغل ده واي حد يحاول يكلمني ابلكه ولو عمل كدا في الواقع اتجنبه افرح ان واحد اعرفه من ثانوي بيشوف الاستوري بتاعي!!!! لا وكمان بدأت اتابع اكونتاته انا حرفيا مستصغره نفسي جدا انا ازاي اعلق نفسي بواحد زي ده واساسا ده اعجاب سطحي انا معرفهوش ولا اعرف اخلاقه وكل اللي بيعمله انه بس بيشوف الاستوري حتي مش بيبعت حاجه انا ليه عامله كدا في نفسي كدا انا صعبان عليا نفسي اني بتابع واحد الله اعلم اصلا فاكرني ولا لا صحيح بيشوف استورياتي اول بأول بس بردو تلاقيه بيتسلي الله اعلم قولولي اعمل ايه خايفه لو عملتله بلوك ارجع افكه لاني بجد لو فكيته هعمل زي المدمنه المنتكسه ساعتها هكره نفسي جدا واللي هيقولي انتي فاضيه لا مش فاضيه وبعمل مليون حاجه بس الموضوع ده شاغلني اوي مش عارفه انا ازاي اتعلقت كدا وانا اصلا طبيعتي تقيله اوي يمكن عشان بيني وبين نفسي لكن لما بصادفه في الشارع بعمل نفسي مش واخده بالي وانا من جوايا مبسوطه انا محتاجه افوق بجد
فى البداية كده.انك بتحاولي تخرجي من حالة التعلق دى بدايه حل المشكلة. الموضوع مش هيكون ما بين الليل وضحاه الموضوع هياخد وقت شويه. فلازم يكون عندك إرادة قوية وصبر علشان تقدري تخرجي من الحالة دى. حاولي تشتتي انتباهك عنه واشغلي نفسك بحاجات بتحبي تعمليها. اكتبي كل اللى جواكى باستمرار واللى بتحسى بيه هيفرق معاكى جدا لو في تجمعات عائلية أو مع اصدقاء انضمي ليها وشاركيهم الحوار والنقاش هيفرق معاكى كتير لو حسيتي انك بترجعي عن موقفك فكري نفسك بسلبياته وان الشخصيه دى مش متوافقه معاكي ومتعرفيهاش الدعم النفسى مهم جدا علشان كده حاولى تتكلمى مع صديقتك المقربة أو لايف كوتش اتكلمى باستمرار معاهم وشاركيهم افكارك ومشاعرك لأن ده هيفرق معاكى.
تم النشر الأحد، ٢٥ أغسطس ٢٠٢٤
بلكيه عشان ميشوفش الاستوري خدي الخطوه دي ومهما ضعفتي عشان تفكيه اقفي لنفسك ومتعمليش كدا الموضوع عايز قرار صادق منك بعدين انتي بتأذي نفسك متعلقه بوهم بيتابع الاستوري أول بأول واي يعني جه صرح بحاجه لا ويمكن فعلا مافيش حاجه وعادي بيتسلي معجب بذوقك في منشوراتك بما انه مقايلش حاجه بصي بلكيه وارمي وراكي انتي معيشه نفسك في وهم وعشان متتعلقيش اكتر مش هقولك انتي فاضيه زي ما قولتي لا هقولك ركزي اكتر علي المليون حاجه اللي شغلاكي ولا كأنه موجود دا بعد طبعا ما تبلكيه وقربي من ربنا وادعي إنه يخرجه من دماغك
تم النشر الأحد، ٢٥ أغسطس ٢٠٢٤
كملي زي ما انتي واعملي بلوك يعني ايه الكويس في ان توم كروز مثلاً يشوف الاستوري بتاعك ..؟ دي وساوس شيطان بس استعيذي بالله ومتفكريش في الموضوع ده تاني
تم النشر الأحد، ٢٥ أغسطس ٢٠٢٤
بلوك وارجعي لربنا والصلاة وكل شيء هيكون على ما يرام
تم النشر الاثنين، ٢٦ أغسطس ٢٠٢٤
فراغ عاطفي الإنسان بطبيعته بيميل لحد تاني يهتم بيه وهكذا خصوصا لو وسيم، ربنا يرزقك بشاب وسيم وصالح يتقدملك انتي اللي زيك عمله نادره اليومين دول وسط اللي بنشوفه ربنا يهدينا جميعا
تم النشر الاثنين، ٢٦ أغسطس ٢٠٢٤
اتصرفي عادي دا الافضل ذي ما كنتي بتعملي وحاوي تشغلي وقتك بحاجه تانية مثلا شوفي اي دبلومة في مجالك وابدأي فيها وهكذا ..
تم النشر الأحد، ٢٥ أغسطس ٢٠٢٤
لعرض السؤال في فدني اضغط هنا