انا حاليا شاب عندي ٢٠ سنه وبقالي اربع سنين عندي مشاكل نفسيه و أولهم اني لما كنت ١٦ سنه اتعرفت على واحده اصغر مني ب سنه وحبينا بعض وارتبطنا بس كانت بتخاف مني عشان انا دايما مضغوط نفسيا واجتماعيا بسبب الشغل ومشاكل عيله و الخ ....فا المهم بعدت عني واتظاهرت أنها عندها كانسر و أن اختها الي بكلمني وأنها ماتت بس انا كشفت دا. ...المهم بعدها هي من نوعيه الأشخاص الي بيبقا عارف ومتأكد انو غلطان فا بيحاول انو يطلع الي قدامو غلطان وبعد كدا لما عاتبتها عاشت دور الضحيه وبعد كدا اعز صاحب ليا حكيتلو وجيه يصالحنا بس طلع صديق خاين وارتبطو وبعدو عني .....طبعا فضلت كتير عندي اكتئاب ومشاكل نفسيه وكنت دايما بدعي ربنا اني انسى وكنت بقول حسبي الله ونعم الوكيل لحد ما فجاه لقيت الشخص صاحبي دا أبوه مات وحياتو انقلبت وبقا حالو من غني ل ما يعلم بيه الا الله والبت دي جالها امراض كتير مزمنه وكلام من دا ....فا جمعتنا الصدفه ورجعنا نتكلم فا لما لقت أن الشاب صحبي التاني فقدت الامل في حالو ولقتني حالي اتحسن عن زمان فضلت تقولي انا سيبتو وانا مخونتكش دا انا سيبتك وارتبطت وكلام فارغ من دا ....المهم بقا فضلت تقولي انت الي غلطان وانت الي خليتو يتعرف عليا وانت اللي وحش و انت وانت و انت وحوارات من دي عشان بطبعها كذابه وبتعيش دور الضحيه وهي الي قالت كدا .....فا قررت ابعد نهائي بس الامر مش سايبني مهما وصلت ل مستويات عاليه في حياتي .....( اتمنى اللي يديني نصيحه ميقوليش صلي وقرب من ربنا والكلام دا عشان انا ربنا عارف انا بعمل اي كويس في الجانب الديني ...) وحتى انا جربت اني ادخل في علاقه أو كدا لأنني كمان بعد العلاقه دي حصللي علاقه مش كويسه كانت من انسانه محايده وبردو تعبتني بس انا نسيتها فا بعد كدا بقيت بخاف وقررت اني افضل عازب لأطول فترة ممكنة والزواج أو الارتباط هفكر فيه عند الاربعين افضل ...دمتم بخير وعافية يارب
في الحقيقة العلاقات ديه كلها مكانتش تنفع مش علشان هي بس حرام، بس العلاقات ديه هتاخد منك اكتر ما تديك وده فعلا اللي حصل. اعتبرها ضريبة الغلط اللي حصل .. اي حاجه قبل ما ندخل فيها في الحقيقة احنا بندفع ضريبتها من قبل ما ندخل فيها. ف اعتبرها ضريبة الغلط اللي حصل. نظرتك عن الحب والعلاقات في السن ده مش هتبقى بنفس النظرة كمان شوية لما تنضج .. هتكون عايز ايه مثلا من واحدة عندها 15 سنة! وانت 16 وصاحبك هكذا ... مفيش اي حاجه صح في الموضوع، ولا سن، ولا علاقة صح! ف طبيعي انها تنتهي بالشكل ده. انت 20 حاليا .. نصحيتي ليك بلاش دخول في اي علاقة حاليا .. مازالت برضه مشوش، غير متزن في العلاقات .. والعلاقات محتاجة نضج، وحاجات كتير زي الالتزام والمسؤولية.. ف خد قرار انك هتبدأ تركز في مستقبلك ودراستك .. في الاول وبعد كده لما تلاقي البنت اللي انت عايزاها روح واتعرف عليها بس المرادي ادخل البيت من بابه واعمل بالاصول.
تم النشر الأحد، ٢٣ يوليو ٢٠٢٣
هو كل ده عشان انت ماشي بشكل غلط اصلا وده ال تاعبك عاوز تتجوز يبقى ادخل البيت من بابه وروح تقدم لواحده تكون شايفها مناسبه واخطبها وامشي صح عاوز ترتبط يبقى هتفضل في الدوامه ال انت حاطط نفسك فيها دي تتعلق بواحده تكتشف عندها عيوب تسيبها او تسيبك يجيلك اكتئاب وتكره الدنيا وتستمر الدائرة المفرغه التي لا طائل منها ليه ؟ لانها غلط وحرام والحرام بيمحق بركه اي شئ ادي نفسك سنه او سنتين تفصل فيهم عن كل العك ده وتستعيد فيهم نفسك وشغفك للحياة وتحدد مبادئك واهدافك والصفات ال تحب انها تكون موجوده في شريكه حياتك وحاول تتعلم فقه او تقرا عن شرع ربنا في الزواج وايه الحلال وايه الحرام عشان تمشي صح بالنسبه للاكتئاب الحالي انصحك تعمل حجامه وحاول تقرا سورة البقرة كل تلات ايام وتسمعها برضه وحافظ على اذكار الصباح والمساء وعلى صلواتك في وقتها وادعي كتير كتير اللهم ارزقني زوجه صالحه تعينني على طاعتك رب اني لما انزلت إلي من خير فقير
تم النشر الأحد، ٢٣ يوليو ٢٠٢٣
اول حاجة بس بحييك ع قرارك يعني كنت مستنية اقولك ابعد عنهم لقيتك بالفعل اخدت القرار الصح ده فبراڤو ثانيا لازم تقتنع انك مغلطش فحاجة هما ال أشخاص سيئين و ربنا بينتقم و هينتقم منهم و اكيد هيعوضك عن صبرك و تحملك وقت صعب بسبب الناس دي حاول متفكرش من ناحية انك عندك مشاكل نفسية لا انت بس ف رد فعل طبيعي جدا بعد ال حصلك مهما كان مش قليل فدلوقت حاول تعيش حياتك و تتعود ع عادات جديدة مثلا و هوايات أو شغل يشغل تفكيرك عنهم ممكن تسمع بودكاست ممكن تقرأ كتب زي كتب دكتور محمد طه مثلا ممكن تقرأ فحاجة ليها علاقة بمجالك ايا كان و تطور نفسك و تنزل و تخرج تشم هوا و تعمل اي حاجة ممكن تغير مودك للاحسن و إن شاء الله مع الوقت هتبقى احسن ربنا يريح بالك
تم النشر السبت، ٢٢ يوليو ٢٠٢٣
شوف يا بني .. أنت مشيت غلط في موضوع العلاقات والارتباط بقالك ٤ سنين ودي حاجة ماترضيش ربنا . . وأنت حاليا عندك ٢٠ سنة ويبدو أنك كرهت الموضوع بسبب مرارة التجربة مش بسبب الحرمانية - أفكارك عن الزواج هتتصلح لو مشيت فيه صح وحطيت هدفك أن تدخل البيت من بابه على طول مش ارتباط وكلام فاضي
تم النشر السبت، ٢٢ يوليو ٢٠٢٣
بص هتشوف كتير في حياتك وهتتخل في حاجات كتير وحشه زاي العلاقه دي، بس خليك ديما عارف إن مش كل البنات زاي بعضهم انت الي بتختار البنت اللي انت عوزها انت غلط لما اخترت البنت دي، بس اتعلم من غلطك ولما تختار او تحب واحده تاني اعرفها كويس اكتر لكن مش علشان واحده مش كويسه يبقا كل البنات مش كويسين او خينين او كذابين لا واحنا بشر بنغلط في اختيارتنا كتير في حياتنا ابداء حياة جديده مع نفسك وارمي الماضي مش هيفيدك بحاجه.
تم النشر الاثنين، ٢٤ يوليو ٢٠٢٣
ايه اللي يخليك تتمسك بحد خاين وبيعيش دور الضحية وصاحب مش جدع ومصانش العيش والملح ليه اصلا يشغلوا تفكيرك وياخدوا حيز من وقتك وحياتك اسال نفسك السؤال علاقه من فترة مراهقة فترة قرارات كتير بتكون غلط واختيارك لاشخاص كتير غلط العمر لسه قدامك ومسيرك هتلاقي اللي تغير تفكيرك اشغل بالك بحاجات تانيه في حياتك دراستك جيم شغل كورس اي حاجة غير انك تفكر في الارتباط دلوقتي خلص دراستك وابدا دورعلي بنت الحلال يا هتيجي لوحدها صدفه ي انت هتلاقيها ومتخليش شخص غلط ووحش يعمي عينيك علي ناس تانية حلوة حواليك او هتقابلهم في حياتك
تم النشر الأحد، ٢٣ يوليو ٢٠٢٣
ركز فى مستقبلك وانجح فيه خلى دا هدفك دلوقتى واملى يومك ،انا عارفه أن الحاجات دى بتأثر ف الواحد بس متسيبش نفسك لدماغك ومتفضلش عايش دايما دور المظلوم ،عادى تقبل أن فى الدنيا هيحصلك صدمات وحاجات كتير تضايق ،خاصة انك بادئ الموضوع فى سن صغير طبيعى ينتهى بفشل لأن الطرف التانى كمان صغير هى كمان مكنتش واعيه للى هى بتعمله ،اصبر على نفسك ومتسعجلش على الارتباط دلوقتى انت قدامك حاجات كتير جدا تعملها ،وخليك صريح مع نفسك ،انت حصلك كدا عشان من البداية مشيت فى طريق لا يرضى الله منتظر اى ،واعتبر الحاجات دى تجارب ليك عشان تبقى شخصية واعية اكتر وفاهمه اكتر متفضلش تفكر انك اتخانت أو انجرحت طول الوقت ،الحاجه دى بدل ما تخليك دايما متضايق ،تخليك بتتقى الله فى حياتك اكتر لانك خلاص فهمت نتيجة الأمور دى اى ، اى ذنب فى الحياة لى عواقبه حتى لو توبت الموضوع مش بينتهى فى يوم وليلة ،عواقب الذنوب بتستمر فترة ،فبعد كدا اتقى الله فى حياتك ( ومن يتق الله يجعل له مخرجا و يرزقه من حيث لا يحتسب ) ،(ومن أعرض عن ذكرى فإن له معيشة ضنكا ) ،وخلى بالك الدين مش صلى وبس يعنى مش انك بتصلى بس يبقى لا محدش يقولى قوى علاقتك بربنا وانا علاقتى زى الفل محدش يكلمنى فى الجانب دا ،الدين حياة ،مش معنى أن الإنسان بيصلى انو خلاص كدا عمل الى عليه ،لا لازم يسعى كل يوم أن أمور حياته كلها تبقى مطابقة للدين
تم النشر الأحد، ٢٣ يوليو ٢٠٢٣
حضرتك يا مستر جاد فكرتني ب البودكاست الؤ بيقول أن كل علاقه بدايتها لم ترضي الله نهايتها لم ترضيك ....فعلا شكرا لكلامك
تم النشر السبت، ٢٢ يوليو ٢٠٢٣
لعرض السؤال في فدني اضغط هنا