انا عندي 26 سنه ومتجوزة ومعايا بنت جوزي دايما يضربني ويشتمني ويهين فيا ومفيش احترام ليا ولا لاهلي حتي مامته بتدخل في خصوصيات بيتي عشان احنا في بيت عيله ودايما جايه عليا وهو ابن امه اوي كل ده حصل من ساعت ما اتجوزت لحد دلوقتى وبقالنا اربع سنين علي كده يتخانق معايا ويمد ايده واغضب عند اهلي وارجع علي امل يتغير بس مش بيتغير لحد اخر خناقه بينا قالي خلصيني منك ومعتش عاوزك في حياتي وانتي اصلا كنتي مغصوبه عليا انا مكنتش عاوزك من الاول بس امي اللي غصبتني عليكي ومد ايده عليا بردوا وشتمني وكان هيفتح دماغي لولا ستر ربنا دلوقتي انا بقالي اسبوعين عند اهلي وقرفت منه ومن عيشته اعمل ايه افضل علي موقفي واطلق بدل ما اعيش بنتي بينا وتطلع معقدة بسبب المشاكل اللي بيني وبين باباها ولا اعمل ايه عشان انا مش بيحصلي حاجه من العيشه معاه غير ان صحتي بتروح ونفسيتي بتبقي وحشه من اللي بيعمله فيا
انتي ازاي هتكملي مع واحد بيضربك وبيهينك ولو عاملة علي بنتك ف كدا انتي بتعقديها بلاش عيالنا يكون ضحايا لاأختيار غلط او اننا مكملين علشان خاطرهم اطلبي الطلاق والله هو الرزاق وبعدين هو بيقولك مش عايزك يعني مستعد يطلق يبقي تطلقي وعيشي في بيت اهلك معززة مكرمة وبكرامتك وبعدين بتقولي عايشة علي امل انة يتغير بس الطبع غلب التطبع وهو طبعة كدا يعني متستنيش منة تغير انتي لسة عندك بنت وحدة ودا من ستر ربنا نصيحتي ليكي اطلقي مش هتعرفي تكملي وكمان دا بيمد أيدة عليكي يعني ممكن يضربك لقدر الله تحصلك حاجة ف اطلقي وعيشي مع اهلك بصحتك ومع بنتك وربنا يعوضك يارب
تم النشر الأربعاء، ٦ مارس ٢٠٢٤
انتى بقالك اربع سنين ..ومحدش كبير عارف يغير الوضع ده ولا يشرط حتى شرط يحفظلك امانك مع الراجل ده وهو نفسه لا يغير من الامر شىء اذا كانت مواقف الضرب دى والاهانه بسبب انك بتستفزيه فى امور معينه مثلا ...فانتى راجعى نفسك اما اذا كانت نوع من الظلم ..فانا لا ارى ان اى شخص مضطر يكمل فى وضع المظلوم وكمان حياته تبقى مهددة بالخطر استخيرى الله فى قرارك وباذن الله ييسرلك الحال و يحفظك انتى وبنتك من اى وضع مضر ليكم
تم النشر الأربعاء، ٦ مارس ٢٠٢٤
انا هرد عليكى بس ياريت متزعليش لأن ساعات الحق بيزعل بس أنا مش هأكتب التعليق عشانك لكن هأكتبه للى هتاخد منه عبرة و تاخد بالها لو جالها عريس لأن مشكلتنا إن لما بيجينا عريس بنتعمى عن كل عيوبه و عيوب أهله و نجيب التورتة ونفرح و نرقص و ألف مبروك و بننسى خالص إن البيت اللى هتروحه البنت دى شبه بيتهم و الناس اللى فيه شبههم و لاَّ لأ ونتجوز الأول و لما نروح نبقى نغيرهم و نغير اسلوبهم و عيشتهم عشان تتوائم معانا ماهو العريس لما اتنيل على عينه وجه يخطب بيتسأل عليه و على عيلته و بيتهم و العيشة هتكون بيت عيلة و لا مستقلة جوة بيت عيلة و لا سايحة جوة بيت العيلة لأن أمه اللى جوزته وجابت له بنت الحلال اللى تيجى تلبى رغباته بس زى كنبة الأنتريه لما يحب يرتاح يقعد عليها شوية و يقوم ؟ ورأيى بقى فى مشكلتك دى لها حلين اولا الحل الأول ان لو اهلك قادرين يتحملوا مصاريفك انتى و بنتك و بدل ما خرجتى واحدة رجعتى اتنين و البيت واسع و ياخدكم يبقى تفضلى فى بيت أبوكى و ترفعى عليه دعوى نفقة و اعيان جهازك بالقايمة و لو مفيش قايمة تشتكى فى محكمة الاسرة باتنين شهود و هتاخدى عفشك و عشان الموضوع بيطول شوية يبقى قلت قبل ما اقوله دا لو اهلك قادرين يصرفوا او عندك دخل تعيشى منه و الحل التانى و انا لا أحبذه وهو الرجوع لانك مفتقدة الأمان مع واحد اتعود يضرب و يتنرفز و يهين و ممكن فى لحظة عناد منك او تحريض عليكى يخبطك خبطة تكون الأخيرة و هو يتسجن و تبقى البنت فقدت ابوها وامها و ان قررتى تقعدى فى بيت ابوكى وتخلصى منه خالص ارفعى عليه دعوى خُلع و الخلع مش هتخسرى فيه غير المؤخر اللى مكتوب فى القسيمة و نفقة المتعة اللى كانت هتحكملك بيها المحكمة فى حالة الطلاق لكن نفقة بنتك و نفقة الحضانة هتاخديها و لو معاكى قايمة بالعفش هتاخديه و لو اتجوزتى بنتك هتاخدها امك مكانك لو موجودة ومش هياخدها خالص و لو عندك اى استفسار تانى قانونى او اجتماعى اكتبيه و لما ادخل هاجاوب عليه
تم النشر الثلاثاء، ٥ مارس ٢٠٢٤
الصبر اجمل شئ اصبري وأكيد وأكيد انه ربنا مش هيضيع تعبك على الفاضى واسأل مجرب وعلى فكرة الزوج هو سبب دخولك اى زوجة الى الجنة الوحد الرجل مفتح الجنة لية ابوة أمة وهو مفتح جنتك اصبري وهتشوفى معجزات ربنا ليكى اسأل مجرب
تم النشر الثلاثاء، ٥ مارس ٢٠٢٤
انا متشكرة جدا لحضرتك انا اصلا كنت واخده قرار الانفصال ده من فتره بس اقعد اقول يمكن يتغير ولما اول مره مد ايده وقل ادبه عليا اخد موقف وزعلت وهو اتاسف وقال مش هعمل كده تاني بس محصلش تغيير ودايما ازعل وارجع وزي ما هو مش بيتغير في قولت كفايه عليا اوي كده وانا الحمد لله معنديش غير بنت واحده بس يعني ان شاءلله ربنا هيقدرني واربيها كويس غير اني موظفه اصلا وربنا الحمد لله ميسرها وشكرا ليكي مره تانيه ♥♥
تم النشر الثلاثاء، ٥ مارس ٢٠٢٤
اليوم اللى بيعدي من عمرك مش سعيده فيه مش هيرجع ومحدش هيعوضك عنه انتى اللى بتدفع التمن ... النوع ده من العلاقات والشكل ده غلط... وميرضيش ربنا.... حرام عليكى نفسك محدش يستاهل والله ....انك تضيعى حياتك عشانه والصورة المهينة ديه.... متقبليش... متكمليش.... ربنا يصلح ليكى حالك ويقويكى وبإذن الله تشوفى كل الخير والسعاده بعد ما تسيبيه
تم النشر السبت، ٢٥ مايو ٢٠٢٤
اطلقي ، كفاية كدا علي نفسك و علي بنتك ، محدش بيتغير ابدا و لو حد بيتغير حيتغير للأسوأ ، خدي بنتك و ربيها بعيد و ربنا يعينك يارب و حاولي تبني حياه جميلة ليكي و ليها و ربنا يسعدك يارب و يحميكي
تم النشر الخميس، ٧ مارس ٢٠٢٤
لعرض السؤال في فدني اضغط هنا