أنا حاليا طالبة جامعية وفى السنة الرابعة كمان يعنى خلاص هتخرج بس حصل شوية مواقف أثرت فى شخصيتى وكمان أثرت فى ثقة فى نفسى وللأسف ده كان من أقرب صديقة ليا. الموقف ده من تالتة ثانوى يعنى ليه تقريبا ٥ سنين . أنا من أول ما بدأت تعليم وأنا متفوقة فى دراستى بس مكنتش بطلع من الأوائل ومحدش يسألنى ليه لأنى مش عارفة بصراحة المهم كانوا زميلاتى دايما يتريقوا عليا بكلام زى أنتى من غير الحلق ده أنتى ولد فالوقت ده كنت صغيرة يعنى فى ٥ ابتدائى فعلشان كدة مكنتش فاهمة معناها لغاية لما كبرت وبقيت فى تالتة ثانوى وكانت الامتحانات خلاص قربت ففيوم أنا وزميلتي كانا فى الشارع وابتدت تقول صوت عالى فى الشارع كلام زى امتى البنطلون ده يوسع وامتى القميص ده يطول مع أن لبسى فى العموم واسع فالوقت ده أنا مهتمتش بكلامها بس بعدها بكام يوم كنا أنا وهى وواحدة صاحبتنا فى الشارع بنتمشى فهى قالت لى بصوت عالى هو أنتى ازاى كدة ؟؟ ازاى شكلى كدة مش طبيعى وشك غريب؟؟ لبسك مش طبيعى ومشيتك كمان مش طبيعية ومن هنا ابتدت معاناتى من بعد الموقف ده أنا بقيت كل يوم ببص فى المراية أكتر من ١٠٠ مرة واسأل أى حد أنا شكلى حلو ولا لا وبقيت اتمنى أنى اموت علشان محدش يشوف شكلى ده. بعد كدة دخلت أولى كلية وكنت لابسة ماسك على طول لغاية تانية جامعة وكل اللى فى الكلية دايما بيبحلقوا لى ويستغربونى عشان كدة لغاية لما شلتوه وأنا فى تالتة كلية على الرغم بأخد انتقادات وتريقة كتير بس مش ببين أنى بضايق بس جوايا كانى بتكسر لقطع. أنا مش عايزة انتقم منها ولا حاجة بس فى نفس الوقت مش قادرة اسامحهاولا اتعامل معاها تانى كل اللى عايز اسألها عليه هو أنا عملت إيه علشان استاهل كل ده ؟؟ شوفتى منى إيه وحش علشان تعملى فيا كدة. أنا مش عارفة ارجع ثقتى بنفسى بس ببان قدام الناس أنى قوية وبارده بس جوايا إنسانة ضعيفة وهشة. كل ده علشان أنا متفوقة عنكم فى وقت الدراسة بس على الرغم من ده أغلب زميلاتى اللى بيتنمروا عليا بيطلعوا من الأوائل وأنا لا .
عايزة اقولك ان الشخص السوي اللي عايز حتى يقول لشخص حاجه وينصحه بيها، يقولها بطريقة تكون كويسة، وكمان في السر مش في العلن. الشخصية ديه غير سوية بالمرة، بل انها ممكن اساسا تكون غيرانه منك. وده بيحصل كتير جدا خاصةً من البنات لبعض. عايزة تاخدي قيمة بصحيح .. خديها من نفسك انتي مش من حد. مفيش حد يستاهل انه يتقاله اي كلمة من الكلام اللي قولتيه. ثانيا الجمال ده نسبي جدا .. محدش يقدر يقول على حد وحش .. لان مفيش حد وحش. انتي قولتي ف كلامك ان لبسك واسع ف العموم .. فيه احتمال وارد انها شايفة مثلا انه مش لبس شرعي .. وهنا هقولك هي خلفيتها ايه؟ او هي نوعية لبسها ايه؟ علشان اقولك هي قصدها ايه بالظبط؟
تم النشر الاثنين، ٥ فبراير ٢٠٢٤
عايزة اقولك أن ربنا مخلقش حد فينا وحش ولا شكله م مقبول كلنا حلوين وبغض النظر عن الشكل الجمال دايما ببقي جمال الروح والأخلاق والتربية حبي نفسك الاول وملكيش دعوة بأي حد اي حد بيحاول يقلل منك دا شخص عنده نقص وعايز يحسس كل الي حواليه أنهم زيه كلنا عندنا حد كدا في حياتنا فانتي تبعدي عنها وملكيش دعوة بيها ولا بغيرها انتي جميلة وحلوة في كل حالاتك ي قمر
تم النشر الاثنين، ٥ فبراير ٢٠٢٤
هقولك حاجه لو الجمال له معني اصلا مكانش الجسد هياكله الدود؟ بعد الموت وتبعد الروح هي ونيسك الوحيده هي اللي نحكم عليها إذا هي وحشه أو حلوه كل الحاجات دي شكليات وخلي دائما في عقلك اللي بيستهزاء بالناس ده مريض وفيه نقص ليكمل النقص بتاعه بأذيه الناس واكيد عمر م حد هيجيب سرتك ولا يبينك انك أقل منه غير وانت فعلا احسن واجمل منه حبي نفسك وأثقي في نفسك ربنا مش بيخلق حاجه وحشه كلما لما تبصي في المرايا قولي هو ازي انا جميله كده انا حلوه وذكيه وكفايه أنه ربنا قال ( ولقد خلقنا الانسان في أحسن تقويم) الحياه مش مستهله عيشي حياتك وصاحبتك دي هتتحاسب يوم الحساب قولي وأُفوض امري الي الله وخلاص علي كده ماشي يا جميله؟
تم النشر الاثنين، ٥ فبراير ٢٠٢٤
لعرض السؤال في فدني اضغط هنا