ماما قالت لى كدا "انا مش قادرة احبك" انا اتوجعت جدا فعلا من الكلمة مش متخيلة انها بتكرهنى ... ماما رغم انها كويسة مع كل الناس الا انها معايا انا و اخ ليا فعلا شايفانا سبب شقاها و تعبها و انا خصوصا و ديما متعصبة عليا و غلطة صغيرة ممكن تفتح فى الشتايم و التهزيق و قدام الناس ما تترددش فى انها تشتكى عليا حتى مع معلمة اخواتى الصغيرين رغم ان هى المدرسة دى نفسها اقسم بالله كانت بتتوحم عليا عشان بنتها تبقى زيى و ردها ديما ان مفيش بنات ف الوقت دا زى بنتك محترمة و طيبة مش سوسة زى بنات تانية ... و ديما مشيلانى ذنب اى حاجة لو ف المطبخ وقع حاجة منها و انا بكلمها تفضل تدعى عليا و طول ما بابا راضى عنى هى متضايقة و كتير بتبقا حقنة ...انا بعذرها لسبب واحد انى عارفى مامتها كانت شديدة اد ايه عليهم و اكتر من ماما نفسها عليا بس بجد ايه ذنبى انك خلفتينى كارهانى كدا شخصيتى بقت مهزوزة اوى انعدم ثقتى ف نفسى و تعامل مع حوليا قل و انا طفلة صغيرة كنت ناصحة جدا و تعاملى ذكى و عقلى اكبر من سنى بس دلوقتى بقيت اغبى خلق الله. عايزة اتعافى منها حقيقى مش عايزة اعمل كدا مع اطفالى فى المستقبل
مقدرة جدا اللي انتي بتمري بيه، حاولي انك تنفذي اللي بتقوله ومتدخليش معاها في جدال يضيع ويستهلك من طاقتك، وعلى الجانب التاني حاولي انك تكوني احسن، واهتمي بنفسك وبذاتك ، لان للاسف ن الواضح ان نشأتها كانت صعبة مع جدتك، ف ده انعكس بالسلب عليها جامد. ف حاولي بقدر الامكان انك تلاقي ليها عذر، لان النشأة الاسرية بتأثر جدا في حياتنا وتعاملتنا .. باذن اله انتي مش هتبقى كده في المستقبل لانك مش عايزة ده .. بصي في نوعين من الناس .. نوع بيكون بيطبق كل اللي اتعمل فيه وهو صغير واتربي عليه. ونوع تاني بيكون عاوز يدي كل اللي اتحرم منه وهو صغير. ف انتي مش شرط خالص تكوني زيها لما تكبري ... بس الاهم دلوقت انك تبقى كويسة، وتخلي بالك من نفسك ومن مذاكرتك وتنمي نفسك ديما .. واعتبري ده محنة واختبار من عند ربنا واصبري عليه، وزي ما قولتلك تجنبيها ع اد ما تقدري .. متديلهاش الفرصة انها تزعق فيكي، او يحصل اي حاجه. وفي نفس الوقت خلي جواكي ديما عذر ليها على كل اللي حصلها وهي صغيرة .. واطلبي الدعم النفسي طبعا اذا احتاجتي ل ده.
تم النشر الثلاثاء، ١٦ مايو ٢٠٢٣
ممكن اعرف عمرك اد ايه، وهل بتشتغلي ولا لأ؟
تم النشر الخميس، ١٨ مايو ٢٠٢٣
شوفى انتى بصراحة مش اغبى خلق الله ولا حاجة ...انا بشكرك على وعيك ده وذكائك اللى خلاكى عينك مفتوحة على الاسباب للى بيحصل ده. من نفس اللى انتى قولتيه ...ماما معندهاش اى فكرة عن التعبير عن اللى جواها بشكل صح ..بسبب كل اللى انتى قولتيه عن صعوبة طفولتها . طريقة ماما الوحشة معاكى هى نوع الابتلاء اللى محتاجة قدامه تصبري فقط. مش هقولك تتعاملى ازاى صح مع ده قد ما هنصحك تكونى صبورة لاقصي درجة . هنعالج بس ثقتك فى نفسك انك توقفى ارتباط نظرتك لنفسك برأى ماما اللى بيطلع منها ( لانه عبارة عن تعبير خاطىء) ماما جواها غضب كبييير ومش عارفه تطلعه صح فبتتلكك حرفيا عشان تطلعه ....ماما مش بتحب نفسها عشان كده مش لاقيه الحب ...فعبرت عن ده بالشكل الغلط ده ووجهت الجملة ناحيتك انتى. انتى هتبصى لماما بعين الرحمة قبل عين اللوم والعتاب والتقصير فى حقك. فكل ما يطلع موقف هتعملى انتى موقف قصاده يطبطب عليها على قد مقدرتك ....ولو مقدرتيش يبقي الصمت افضل شىء. تخيلى كده معايا اننا نبص لواحد ابكم( وهو كل اللى يملكه انه يصرخ من حنجرته ) ونقوله بطل صريخ حرام عليك ......هى بردوا لا تملك الا هذا من طرق التعبير للاسف . انتى جميلة وصدقينى لحد اخر يوم فى عمرها هتكون بتقول ان انتى احلى حاجة حصلت فى حياتها...لانك صبرتى عليها.
تم النشر الثلاثاء، ١٦ مايو ٢٠٢٣
هحاول
تم النشر الثلاثاء، ١٦ مايو ٢٠٢٣
شكرا لنصابحك ❤️
تم النشر الثلاثاء، ١٦ مايو ٢٠٢٣
تحت امرك ❤️
تم النشر الثلاثاء، ١٦ مايو ٢٠٢٣
متبقيش عاق ولا تكسري كلمها بس ع قد ما تقدري اتجنبيها وحاولي متشليش في نفسك واعتبري وجودك في البيت مجرد وقت
تم النشر الثلاثاء، ١٦ مايو ٢٠٢٣
ابعد عن امى ازاى 😓 مش عارفة اسافر مثلا و واعتمد على نفسى لان هيكون حرام اسافر لوحدى و مش عايزة اكون ابنه عاق بيها انى اجرحها بكلامى ف وشها عشان تبطل
تم النشر الثلاثاء، ١٦ مايو ٢٠٢٣
خلي عندك ثقة في نفسك وابعدي عن اي حد مسببلك تعب نفسي
تم النشر الثلاثاء، ١٦ مايو ٢٠٢٣
لعرض السؤال في فدني اضغط هنا