مرتبط ببنت من محافظة تانية وبحبها جدا وهي كمان ، بس للأسف عندها عيب قاتل هي بتكذب زي مابتتنفس بتكدب وخلاص بتكدب حتي لو محصلش حاجة تكدب بسببها او ضغطت عليها ف حاجة فااضطرت تكدب .
طبعا انا مش شايفها بس هي تكون حاكية موقف ولما يتعاد فيه الكلام تاني الاقي الكلام متغير ولما اقولها انتي قولتي كذا تتلعثم وتتلغبط ف الكلام وتقولي انا ماقولتش كده قيسوا بقي كده علي معظم المواقف تقريبا .
للأسف الكدب بيبان جدا ف كلامها واسلوبها وتصرفاتها بس المشكلة اني مش قادر امسك عليها اواجهها بيها .
مش عارف اعمل ايه فكرت كتير اسيبها بس بحبها الحقيقة وهي فيها صفات كتير حلوة لكن الموضوع ده مش مربحني نهائي ومخليني دايما اسمع حكاياتها بطريقتين
رغم ان الكدب سيئ جدا ..ومش هديله عذر او مبرر بس لازم نفهم ليه الانسان ممكن يكدب بالشكل ده ..وابسط سبب انه يحس بالتقبل وسط الناس او الخوف من خساره الناس الي بيحبهم او الخوف ع مظهره ف بيجمله بالكذب مع مشكلتك دي قولها انا مش حاسس بالثقه والامان معاكي لأسباب واحد اتنين تلاته وان المفروض يكون في صراحه وثقه ف اي علاقه وفي حاجه كمان طالما مفيش اي ارتباط رسمي بينكم ف ملكش الحق ف التعليق ع اي سلوك وتغيره او بتعمله حتى لو الكدب لان مفيش رابط رسمي بينكم ولكن ممكن تطلب منها انها تكون صريحه معاك ف اي حاجه عشان تثق فيها اكتر لانكم هتبنوا بيت سوا وطبعا لازم يتبني بناء ع ثقه وامان
تم النشر الاثنين، ٢٠ فبراير ٢٠٢٣
الكذب من اسوأ الصفات ...هو خطأ تقريبا كل البشر بيقع فيه ...المشكلة هنا لو تحول لاسلوب حياه . مع تقدم الوقت الكذب بيبقي عامل زى النار بتاكل كل الصفات اللى جنبه ...يعنى لو خلاص اتأكدت واتواجهت كذا كره مع الشخص بكذبه واتاكدت انه متعود على الكذب ...فده هييؤدى بينا انك هتشك فى كل صفاته اللى انت بتحبها ( لو بيحبك هتقول اكيد هتقول ما ده كمان اكيد كذب ) الموضوع تطوراته فى المستقبل سيئة جدا. ياريت تقيم الوضع باللى تقدر تتحمله ولو تقبلتها زوجتك بصفاتها كده ( الحلو والوحش ) لازم تتحمل مهما حصل وتكون مسؤوليتك انك تحاول معاها انها تكون احسن ...ولكن بشكل لطيف ويكون عندك طولة بال. يجوز يكون ده حاجة متعودة عليها ولم ينصحها احد لخطورتها وتستجيب مستقبلا للى يعينها على انهاء الصفة السيئة دى.
تم النشر الأربعاء، ٢٢ فبراير ٢٠٢٣
إذا افترضنا أنها خطيبتك .. فأنت أدرى بنفسك هل هتقدر تتعايش مع حد بيكذب أم لا وهل كذبها دة بيبقى في حاجات صغيرة ولا ممكن يوصل لحاجات كبيرة وهي خصلة للأسف من أسوأ الصفات اللي ممكن تؤدي لفقدان الثقة في الشخص وإذا افترضنا - لا سمح الله - أنها علاقة ارتباط من بتوع اليومين دول فهي علاقة غير شرعية لابد أن تحسمها فورا إما بخطوبة أو بقطع العلاقة نهائيا - وفي حالة قررت التقدم لها بالخطبة حينها ستظهر مواقف أكثر جدية من الحاجات اللي كنتم بتتكلموا فيها وستعرف إذا كان كذبها ممتد في أمور أخرى أم لا - يعني ستكون الرؤية أوضح بالنسبة لك منها الآن
تم النشر الثلاثاء، ٢١ فبراير ٢٠٢٣
الكدب ده أسوء حاجة بجد ويبوظ كل حاجه حلوه.. بس لو هي فعلا مميزاتها تستحق يبقي صارحها بهداوه وحاول تفهم مش تعيب.. يعني صيغه كلامك وتون صوتك يبقي عشان أساعدك مش تهديد وهسيبك أو نقض وتنظير لأن أكيد في سبب عميق ورا إصرارها ع الكدب
تم النشر الاثنين، ٢٠ فبراير ٢٠٢٣
اي انسانة هترتبط بها في لحظات ما هتكتشف أنها ممكن تكدب ، اي انسانه .. دورك ان انت مش تنتقدها قدام حد اللي هو تنزل من كرامتها او تحسس بالاحراج بالعكس دورك العكس ممكن تكون هي بتكذب عشان حاسه بالاحراج او خايفه او مش حاسه بالامان ممكن بتكذب يا سيدي عشان تضيف نوع من انواع الصبينس للموضوع تبان كبيره عاقله راسيه قدام الناس لما تنتقدها انتقدها بينك وبينها مش قدام الناس وعود نفسك طالما هترتبط مشاكلك انت والانسانة اللي هترتبط بها تحلها بينك وبينها دي نقطه النقطه التانيه انا ملاحظ من طريقه كلامك ان انت من النوع الناقد زي حالاتي كده على فكره نوع الناقد بيبقى مكروه جدا ده بيشوف العيوب بس وبيشوف المميزات على انها كماليات لا ما تبقاش كده علشان ما حدش ياخد عنك فكره وحشه تاني حاجه ان المفروض ان انت تبقى فاهم ان البنات في السن الصغير ده زي اللي انت مرتبط بها دي طبيعتهم على فكره يعني لو ما تعرفش بالنسبه لهم حاجه عاديه مش مش big deal .. موضوع الكذب اعرف مشكلتها ايه بالظبط وكلمها بينك وبينها ما تنتقدهاش حسسها انها كبيره وعرفها ان الموضوع ده بيضايقك وبالتالي هتقدر توصل لحل ربنا يوفقك
تم النشر الاثنين، ٢٠ فبراير ٢٠٢٣
لعرض السؤال في فدني اضغط هنا