انا عندي 18 سنة كان عندي تجربة صداقة فاشلة وانا صغيره أثرت عليا بشكل كبير لحد دلوقتي
و مش بعرف أثق في اي حد مهما كان
بعد كدة حصلي مشاكل عائلية اثرت على ثقتي بأهلي كمان
انا شخصية هادية وانطوائية جدا و مش بحب التجمعات و لا الدوشة عامة
في الوقت اللي كنت مش واثقه في اي حد خالص صاحبت بنت عمي عشان مكنش عندها صحاب برده في نفس الفترة دي
هي عكسي تماما شخصية اجتماعية و بتحب المغامرات و الخروجات و كدة و عاوزاني اشاركها في كل ده بس انا مش عاوزة
و بضطر اوافق عشان مزعلهاش
هي اكبر مني فبحسها ساعات بتبقي متسلطة عليا و بتنتقدني في حاجات كتير و ان انا لسة صغيرة و مش فاهمه حاجه
كان في مشروع كنت عاوزة اعمله فبحكيهولها فقررت تشاركني فيه و قعدت ترسم معايا خطط للمشروع و حاجات هتعدلها
بس انا مكنتش عاوزة اشاركها المشروع اصلا انا عاوزاه يبقي خاص بيا لوحدي انا بس كنت بحكيلها
و هي هكذا في كل حاجه اعملها تقرر انها هتعملها معايا و تعدل عليها و انا مش بحب كدة
المهم انا مش عارفه هي بتحبني بجد ولا لا بس ايا كان انا فقدت قدرتي علي الثقة او الحب
انا مش عاوزة نبقي صحاب اوي كدة عاوزة نرجع مجرد قرايب تاني
هي صاحبة كويسة بس لحد غيرى
احنا مش شبه بعض خالص
لما بكلمها بحس ان انا منافقة بس انا مش عاوزة اجرحها
ممكن حل ؟
هي مش ضروري تكون وحشه او متسلطه اوقات العشم بيبقا واخدها ومندفعه بس ف العلاقات وبتنسى ان كل شخص ليه حدوده وخصوصيته الي محتاجها كمان ممكن من تجربتك الي فاتت انتي مازلتي مقلقه وخايفه انك تتصدمي تاني وتتأثري بيها بس المهم ف اي علاقه تطلبي الحدود الي تناسبك وتعرفيها انك بتدايقي من حجات معينه ومش حابه انها تكون بينكم اطلبي بأدب وبثقه وثبات واتعملي عادي بعد طلبك ده عشان انتي بتأكديلها كده ع طلبك واهميته عندك وان ده حقك ف حدود علاقتك
تم النشر الخميس، ١٦ مارس ٢٠٢٣
حلو جدا انك قيمتى الموضوع وعرفتى انتى عاوزة ايه وايه يناسبك وايه لا. ده هيحصل فى حاجات كتير فى الحياة عموما. اتبعى دايما الخطوات دى لو مفيش اذى واقع عليكى لان لو فى اذى طبعا تنسحبي بسرعة بغض النظر عن الاثر ...لان دى هتكون ضرورة. حاليا خليكى فى الخطوات الانسب للرجوع من شىء بعد تجربته اثبت انه غير مناسب. ١. كل شىء يكون بالتدريج. ٢. اتكلمى معاها بطريقتك العادية جدا .مش اللى شبهها. ٣. لما تطلب منك تخرجوا ...اعتذرى بلطافه لانك هتذاكرى وحسسيها انك مضطرة ومتضايقه انك مش هتعرفى تخرجى معاها وتشوفيها ٤. بعد ما تكونى فاضيه ...ارفضى الخروجة ووضحيلها ان النوع ده من الخروج مبقاش يبسطك.. ٥. فى مواضيع الافكار والمشروع وغيره قوليلها انك أجلتى كله عشان الثانوية. ٦. اسألى عليها بشكل مختصر ...هيبدا الموضوع يبقي واضح شويه بشويه. ٧.لو عرفتى انتى ترشحيلها البديل ليكى بشكل غير مباشر دى تبقي حاجة مساعدة بردوا. ٣.
تم النشر الجمعة، ١٧ مارس ٢٠٢٣
ممكن عادي تجبيلها شيكولاته وتقوليلها معلش مشغولة ومذاكره وامتحانات وعاوزه أركز وافضلي فعلا مش تردي واهتمي بدراستك و مذاكرتك وكل مره تصالحيها بكلمه حلوة إنك مشغوله منعا انك تكسري بخاطرها لأن شكلها متعلق بيكي.. مش تسلط لا آنتي قولتي ملهاش صحاب فعشان كده هي علاطول معاكي فكل حاجه وبتزن عليكي.. واما تخلصي إمتحانات فاهميها وصارحيها لكن مش وقته حاليا ده يحصل أو أي مشاحنه أو نقاش يضغط عليكي سايري الامور لحد ما تخلصي علي خير وفالوقت المناسب تفهميها و تصاريحها.. وطول مانتم مختلفين هيبقي في شويه عدم راحة إلا لو بتعرفوا تتكيفوا ومرنين ف الحاله دي هتحبوا اختلافكم ومن واضح إنه لا مش سهل عليكم فعادي إنك تكوني مش مبسوطة. وهتلاقي صحاب شبهك مش تستعجلي الصحاب مش ليهم سن.. ال مريتي بيه بقي مش عشان يسيب اثر سلبي لا عشان يزودك خبره ومناعه فال جاي وصدقيني لما تتعلمي وإنتي أصغر أحسن بكتير ويقصر عليكي الرحله بدري وتوعي آكتر.. فإنتي فلتري المواقف وادرسيها استفدتي منها إيه ومتحكميش علي الجديد بذنب القديم ولا أصلا يشغلك غير دلوقتي ،لا تفكري ف الفات ولا الجاي استمتعي بدلوقتي وبس وثقي بربنا فقط مش فأي مخلوق..
تم النشر الخميس، ١٦ مارس ٢٠٢٣
لازم يكون عندك توكيد للذات التوكيد للذات بيخليكى وقت اما تعوزى تقولى لا بتقولى لا شخصيا الموضوع كان صعب فى البداية انى اعمل كدة لكن مع الوقت اصبح سهل جدا مبقتش اهتم احيانا بمشاعر اللى قدامى طالما الموضوع بيضايقني و بس كدة مش مهم بالنسبالى انه سخص كويس او صديق او اى حاجة طبعا فى استثناءات و دى بتكون انتى و نظرك لان مش كل الناس تستحق لا بصورة حادة فى ناس تحتاجها بصورة غير مباشرة
تم النشر الخميس، ١٦ مارس ٢٠٢٣
الحل انك تدريجيا تبدأي تقللي من مكالماتك معاها، وخروجاتك، ولو صادفت وكلمتك اتحججي بأي حاجة بانك مشغولة، عندك مذاكرة، خارجة مع واحدة صاحبتك مثلا هتقولك اجي معاكي، قولي لها لأ مش هينفع هي محتاجة تتكلم معايا في حاجات شخصية. انتي من حقك تختاري الناس اللي شبهك، انا مقدرة جدا انك شخصية وهي شخصية تانية تماما، وديه اللي عامل الفجوة اللي ما بينكم .. علشان كده انتي مش مبسوطة وحاسه انك متكتفة في العلاقة ديه. ابدأي زي ما قولتلك انك تقلي تدريجيا في العلاقة معاها. وابدأي شوفي حاجات تبسطك تعمليها حتى لو لوحدك المهم تكوني مرتاحة ومبسوطة. متقلقيش انك تقولي لا على حاجة انتي عايزاها، الحاجة اللي مش عجباكي قولي لا عليها، فكري في نفسك وفي راحتك، وانتي مش هترجحي اللي قدامك لما تقولي لأ .. بطريقة لطيفة. بالعكس الناس هتقدر صراحتك. اهم حاجة انك تكوني صريحة مع نفسك ومع الناس. حتى لو كانت الصراحة ديه هتزعلهم شوية .. لان الصراحة اهم من ان الواحد يعيش في وهم كبير.
تم النشر الخميس، ١٦ مارس ٢٠٢٣
انا شايف ان لازم توقفي فعلا علاقتك معاها بس واحده واحده مش على طول بأي شكل واي طريقة متخافيش على زعلها او متراعيش مشاعرها لازم تعملي دا طلامه بيأثر عليكي ومن ناحية تانيه انتي مينفعشتفضلي بالشكل دا معندكيش ثقه ولا عارفه تحبي حد طبعا دا من حقك بسبب الي شوفتيه بس لازم نتعلم اننا نحاول. نستفيد بالي بيحصل ايا كان ضرره علينا
تم النشر الخميس، ١٦ مارس ٢٠٢٣
أولاً، أود أن أقول لك أنه من الطبيعي أن تفقد الثقة بعد تجارب سيئة في الصداقة أو بسبب المشاكل العائلية. لكن علينا جميعاً أن نتعلم كيفية التعامل مع هذا الأمر، والعمل على بناء ثقتنا مرة أخرى. بالنسبة لصديقتك، يمكنك محاولة الحديث معها بصراحة والتعبير عن رغبتك في الابتعاد قليلاً عن الصداقة القوية. يمكنك شرح لها الأسباب التي تجعلك تشعر بالتوتر والارتباك في هذه العلاقة، وكيف أنه سيكون لديك المزيد من الراحة إذا كنتما مجرد قريبتان. إذا كانت صديقتك حريصة على المضي قدماً في الصداقة، يمكنك محاولة التعاون معها بشكل أقل ملتزم، وذلك باختيار الأنشطة التي تشاركان فيها والتي تشعرين بالراحة فيها. أخيراً، أوصيك بمعاودة الثقة في النفس وفي الآخرين. يمكنك محاولة الاسترخاء في بعض الأنشطة التي تحبينها والتي تساعدك على الاسترخاء وبناء الثقة في النفس، كما يمكنك التفكير في الالتحاق بنادي أو مجموعة تحتوي على أشخاص يشاركونك نفس الاهتمامات.
تم النشر الخميس، ١٦ مارس ٢٠٢٣
لعرض السؤال في فدني اضغط هنا