بخاف انزل اشتغل

لما بتيجى فرصة شغل بكون خايفة جدا واشتغلت اكتر من مرا بس مش بكمل بسبب الخوف والتوتر

سؤال من Nada Ibrahim

تم النشر الجمعة، ٢٤ فبراير ٢٠٢٣

9 إجابة

بصي يا ستي صلي علي النبي هاتي بقي الموبايل او لاب او ورقه وقلم ورتبي افكارك خايفه من الفشل : بيجيلك دايما افكار بقي زي انا مش عملتها صح وكان مفروض اعمل احسن من كده ومش هعجب حد وهبوظ الدنيا و و و .. ششش براحه كده يا دماغي ونفس ولأ انا عملتها علي قد ما قدرت ومره جايه هتقنها اكتر واقول يارب عني علي الاحسان وارزقني الهمه .. وكل مره واحده واحده اتحسن واركز وافتكر انه محدش كامل واستمتع بالاداء وايا كان نتيجه ايه استمتعي بالعمليه نفسها خايفه من نقض المدير: والله المدير فالاول والاخر بشر زيه زيك فملوش منك غير شغل متقن ,وكده كده بتعملي ده لربنا ولنفسك مش عشانه ,فهو حقه يشد او يطلب منك مهام بس بعقل وبتقدير وباحترام, نقص حاجه من دول.. برضو خدي نفس ونرتب كده هنقوله ايه بمنتهي اللطف, انه مش سامحه لحضرتك تتكلم معايا كده ولوسمحت عاوزه مقابل لشغلي ووقتي وتعبي او لوسمحت ده هيبقي كتير وضاغط عليا وههمل فيه فمحتاجه وقت ازيد. خايفه من الناس : والله الناس بتكلم كده كده فانتي اشغلي نفسك بيكي, واصدقاء العمل اخرهم عمل. الا ما رحم ربي. بس ده الاصح انهم ميدخلوش تفاصيل حياتك. فانتي اول ما يجي فبالك اصل هيقولو / اصل افتكرني .. اسفه.. بس طز يعني.. قولي لنفسك كده ما ال يقول يقول ويارب رد غيبتي وانت عالم بنيتي ,وليهم منك افعال مش نوايا ,فاتقي الله فنيتك واتقي الله معاهم فمعاملتك بكل هدوء وجدعنه وحدود. خايفه من المواصلات : يبقي نشحن قلبنا وروحنا باليقين بربنا ,وانه سبحانه لا ياتي الا بالخير ,ونحمده فالسراء والضراء ونقول اذكارنا تحمينا ونقوي افكارنا باننا نحسن التوكل عليه ونستودعه روحنا ال هي ملكه ,بس من غير ما اتواكل واعرض نفسي لخطر الي بيسمي (الاخذ بالاسباب). خايفه اكون بناهد اصلا في طريق مش طريقي: عادي لاننا مش عارفين الغيب فهنفضل نحاول ونستخير وننبسط بالتجربه ,والمهم انه مش طريق يغضب ربنا وانها خبره جدااا حتي لو كل شغلانه ملهاش علاقه بالي قبلها ,بس خبره العميل متشابهه. فكملي وادعي ربنا ينورلك بصيرتك بالنجاح واختصار المجهود والوقت مع ان الثواب مضاعف عالصبر يعني السهل بركه والصعب ثواب (فكل الاحوال خير). وهكذا افضلي فنطي كل فكره واسالي نفسك ايه اسوء حاجه يعني! والرد هيبقي ظاهري مختلف بس نفس المغزي ((انه يارب ارضيني بكل الاقدار وقني شرها وعجل لي بخيرها والهمني فهم حكمتك وطمني بحبك انك تعلم ولا اعلم وانت علي كل شئ قدير)).. ربنا يريح قلبك حببتي قاومي افكارك بهداوه وحقك تخافي هو الخوف مش وحش بالعكس هو بس اتعلمي تتعاملي معاه ازاي