انا عندي مشكله اني مش بعرف اتعامل مع الناس ومش بعرف ارد عليهم رد مقنع ومبحبش المواضيع الجديه ومش بعرف اتعامل مع اي موقف يحصلي المفروض اعمل اي عشان الموضوع ده مضايقني جدا عاوزه ابقي اجتماعيه واعرف اواجه كل المواقف وارد ردود مقنعه ومخفش من حاجه
لازم تبدأي تنخرطي في مواقف مع ناس علشان تتعلمي مع الوقت، يعني علشان تكوني اجتماعية وتعرفي تدي وتاخدي مع الناس .. وتتكلمي معاهم لازم تنخرطي معاهم ... سواء عن طريق الدراسة، الشغل ، التطوع ، كورسات .. اي حاجه انتي حابه تعمليها او موجودة في حياتك. اما عن المواقف اللي ممكن مش بتعرفي تردي عليها وممكن تكون بتضايقك لازم تعملي حدود ما بينك وما بين اي حد (الناس) انتي لو مش عاجبك حاجة معينة بيعملها الشخص (س) مثلا والحاجة ديه بتضايقك ف هنا انتي لازم تتكلمي وتعبري عن اللي جواكي .. والله يا (س) انت الجملة او الكلمة اللي قولتلها ديه مش عجباني ومضيقاني ومن فضلك بلاش تستخدمها في تعاملك معايا وبس نقطة والكلام انتهي. انتي هنا لازم تعبري عن رأيك وتعملي حدود بينك وبين اي حد علشان ده اللي لازم يحصل، هتقولي مش بحب ازعل حد، بخاف الناس تفهمني غلط، اخاف الناس تبعد عني ويقولي عليا شخصية مقفلة؟ وليكن، اه ... يعني حضرتك تضايقي وتزعلي ولا هما اللي يزعلوا؟
تم النشر السبت، ١ يوليو ٢٠٢٣
سلام، فهمت مشكلتك جيدا. أولا لا تقلقي، فهذه مشاكل شائعة ويمكن حلها. أنصحك بالآتي: 1. تدربي على التواصل مع الآخرين. حاولي التحدث مع أشخاص جدد كل يوم ولو لفترة قصيرة. هذا سيساعدك على اكتساب الخبرة والثقة. 2. ابحثي عن مواضيع مشتركة مع الآخرين للتحدث فيها. هذا يسهل التواصل ويخفف التوتر. 3. لا تخافي من ردود الآخرين. فليس هناك رد صحيح أو خاطئ. تحدثي بثقة واعتمادا على معرفتك. 4. تدربي على الاستماع للآخرين وطرح أسئلة. هذا يجعل المحادثة أكثر إمتاعا ويساعد على الرد. 5. لا تنسي أن تبتسمي وتحافظي على التواصل البصري. فهذا يجعلك أكثر ودا وثقة. أتمنى لك التوفيق. إذا احتجت أي مساعدة أخرى فلا تترددي في السؤال.
تم النشر الجمعة، ٣٠ يونيو ٢٠٢٣
أول حاجة استعيني بالله عز وجل يوفقك لكدا ويعينك ودا أهم سبب بعد كدا كل موقف متاح إنك تتعاملي مع حد حاولي تضغطي على نفسك وتتعاملي (يعني مثلا أنت مع حد ومحتاجين تشتروا حاجة اختاري إنك أنت الي تشتريها مش الحد الي معاكي) كمان حاولي تقللي التواصل مع أصحابك وقرايبك أونلاين وقابليهم واتكلمي معاهم كلما أتيح لأن الأونلاين مختلف عن التعامل الحقيقي ومبيديش خبرة في التعامل مع الناس آخر حاجة الناس المقربين منك قوليلهم إنك عايزة تطوري نفسك في الموضوع دا وخليهم يدعموكي ويشجعوكي ويقولولك رأيهم باستمرار خصوصا لو في ناس من المقربين منك اجتماعيين أصلا حاولي تبقي معاهم كتير وتشوفي بيتعاملوا أزاي واتدربي إنك تتعاملي زيهم بالتوفيق يارب
تم النشر الجمعة، ٣٠ يونيو ٢٠٢٣
أول حاجه مفيش حد مبيخفش من حاجه تاني حاجه مش دايما هنعرف نقنع الناس كلها لأن إحنا مش قرآن علشان نعرف نقنع حد بالأدلة الكامله كل مره المواضيع الجديه علشان تعرفي تتعاملي معاها محتاجه تكوني هادئة و تاخدي 5 أو 10 ثواني تفكري فى كلامك قبل ما تقولية علشان متقوليش كلام فى هزار أو كلام خارج عموماً آخر حاجه علشان تبقى أجتماعية لازم توسعي دائرة نشاطك و تخرجي من البيت و مش كل حاجه سوشيل ميديا يعني تروحي جيم تتعرفي على ناس جديده تعملي نشاط خيري مع مجموعة أو أى كان المهم أنو يكون بره البيت و آخر حاجه كل سؤالك مضمون إجابته إن كلهم بيجوا مع الوقت يعني الخبره فى الرد مش بتيجي من أول مره ولا الخبره فى حاجه معينه مش بتكتسبها من هواه ولا الصحاب بيجوا من خروجه واحده وبس.
تم النشر الجمعة، ٣٠ يونيو ٢٠٢٣
عارفه اللى بيحضر نفسه لدور فى مسرحية ؟ دى البداية عشان يبقى عندك سرعة بديهه وتعرفى تردى كويس تشوفى المواقف اللى بتقابليها عادة وتشوفى ايه افضل رد انتى هتكونى مرتاحه انك تقوليه ...وتدربى نفسك عليه كتير لوحدك ( زى بروفات المسرحية بالظبط) وبعد كده ممكن تجربى قصاد حد من اصدقائك ثقه ...او حتى تقولى فى وسط اى نقاش مثلا انا لو حصل معايا الموقف ده هيكون ردى كذا ....عشان تشجعى نفسك وتبرمجى عقك انك مستعده وان الرد جاهز مش محتاج تفكير.
تم النشر الثلاثاء، ٤ يوليو ٢٠٢٣
سلام عليكم، مفيش داعي للقلق. ده موضوع عادي وممكن تتغلبي عليه بسهولة. اول حاجة لازم تعمليها هي انك تحاولي تخرجي من منطقة الراحة بتاعتك وتبدأي تتعرفي على ناس جديدة. حاولي تشاركي في نشاطات اجتماعية زي الانضمام لنادي او جمعية او حتى تبدأي تخرجي مع زمايلك في الشغل او الدراسة. كمان مهم تتعودي على المواقف الاجتماعية دي علشان تبقي اكتر ارتياح فيها. ولما تتعرفي على حد جديد، حاولي تسأليه عن نفسه واهتماماته علشان تعرفي تتكلمي معاه عن مواضيع مشتركة. واهم حاجة انك متخافيش من رد فعل الناس او ان هما مش هيحبوكي. كلنا بنمر بالتجارب دي ومحدش بيعرف يرد على كل المواقف بشكل مظبوط. بس لما تتعودي هتلاقي انك بتتحسني في التعامل مع الناس والرد عليهم بشكل افضل. خلي بالك من نفسك وابدأي خطوة خطوة، هتلاقي انك هتتغلبي على المشكلة دي قريب.
تم النشر الجمعة، ٣٠ يونيو ٢٠٢٣
ثقي قي نفسك وبس
تم النشر الجمعة، ٣٠ يونيو ٢٠٢٣
لعرض السؤال في فدني اضغط هنا