مبعرفش أذاكر فترات طويلة في اليوم مع إني مجتهدة في دراستي بس من ساعة ما دخلت الجامعة وأنا كده وجيت من فترة ضغطت على نفسي وذاكرت عدد ساعات كبير وبدأت أرجع أجتهد بس مكملتش أسبوع وانتكست تاني وبقيت اذاكر في اليوم وقت قليل جدا يمكن اقل من ساعة والمواد متراكمة وأنا متعودة بذاكر بالقراءة علشان الامتحانات اختيارات وبحل كتير بس السنة دي الامتحانات مقالي وأنا عندي مشكلة في الحفظ حتى حفظ القرآن والمواد حتى السهلة مبعرفش احفظ صفحة واحدة حتى بنساها في ساعتها فأعمل ايه
طريقة مذاكرتك في الجامعة بتختلف عن طرق المذاكرة في مراحل ما قبل الجامعي. انتي مش لازم تحفظي الحاجة بالنص .. او بالحرف، الاسئلة المقالية بتحتاج حفظ عناصر وفهم الفقرة وانتي صيغي الفقرة بمفهومك انتي. ف اعتمدي ع الفهم اكثر من الحفظ .. لانك ازاي هتعرفي تحفظي بالنص مثلا؟ وعلشان تكون طريقتك منظمة اكتر .. قدامك مثلا الكتاب ومثلا 5 فصول .. هتقومي بتفحص الفصل الاول بكل العناصر الاولية اللي فيها .. وتقرأي الفصل قراءة سريعة بتركيز .. وهكذا في باقي الفصول . بعد كده تبدأي طريقتك في المذاكرة .. حفظ عناصر وفهم الفقرة. جربي تستخدمي الالوان وانتي بتذاكري عهتساعدك انتي تفتكري .. وكمان ابثي عن نظام الخريطة الذهنية ديه ممكن تلم المادة كلها في صفحة واحدة او اتنين. متحصريش نفسك اهم حاجة في طرق المذاكرة القديمة بتاعة زمان وجربي كذا طريقة .. وادخلي شوفي فيديوهات ع اليوتيوب تخص الموضوع ده. وممكن كمان وانتي بتذاكري تذاكري بصوت عالي وتسجلي ريكودات لنفسك وتسمعيها لما تيجي تنامي او ف المواصلات .. هتساعدك جدا انك تفتكري لما تسمعي الشرح بصوتك مرة تانية. وعلى فكرة هو مش لازم تذاكري لفترات طويلة علشان تحسي بالانجاز .. المهم يكون استيعابك كويس ده اهم حاجة .. لانك ممكن تكوني بتستوعبي الحاجه اكتر من حد ممكن يقعد فيها ساعتين مثلا .. انتي تقعدي فيها ساعة. وهكذا ...
تم النشر الأربعاء، ٢٨ ديسمبر ٢٠٢٢
استعملى الخرائط الذهنيه فى الحفظ وافهمى الاول اللى بتحفظيه عشان تسهلى عملية الحفظ وممكن تعملى كلمات مفتاحية يعنى مثلا لو إجابة تعريف من ٣سطور ممكن تختارى كام كلمة تفكرك بالتعريف كله وهكذا....بالنسبة لوقت المذاكرة افضل وقت بعد ما تصلى الفجر وتقرأى الأذكار واهتمى بترتيب مكتبك وكتبك لانه بيقلل التوتر ويكون قدامك الكتاب اللى بتذاكرى فيه بس عشان متحسيش بتراكم المواد والكتب الكتير اللى قدامك وأبدأى بالمواد الصعبة او الجزئيات الصعبة فى المادة لأن دماغك فى الاول بتكون فى اقوى درجات الاستعداد وبتمل تدريجياً والاستعانة بالله اهم من كل الكلام اللى قلته بالتوفيق والنجاح الدائم
تم النشر الأربعاء، ٢٨ ديسمبر ٢٠٢٢
الاسئلة المقالية محتاجة قدرة على صياغة جمل مرتبة وواضحه ومعبره عن المعنى اكتر من انك تكونى حافظة صم وخلاص....اعتمدى على طريقة المذاكرة بانك تفقرأى وتفهمى وتلخصى وبعدين تكتبي انتى لوحدك وبعدين تقارنى صياغتك بالاجابة النموذجية وتشوفى جاوبتى نفس الكلام بنسبة كام ف الميه.
تم النشر الجمعة، ١٠ فبراير ٢٠٢٣
لعرض السؤال في فدني اضغط هنا