انا حاليا في سن 19سنه من صغري وانا متفوقه في دراستي لحد الان اتفوقت في المرحله الثانويه حاليا بس انا كنت بتعرض للتنمر من وانا طفله لأن كنت ما بتكلمش مع حد وكانت دايره اصدقائي محدوده ممكن واحد أو اثنين بس وكنت بتعرض للتنمر كتير ولحد الان و بالمرحله الثانويه في كتير طلاب ممكن يقولوا لبعض ألفاظ مش لائقة وبالنسبه ليهم دي حاجه عادي بس انا معنديش حاجه زي دي في قاموسي وانا دايما بتجنبهم وانا معظم الوقت مش بعرف اتعامل مع اهلي ومعظم الوقت مبيفهموش وجهه نظري ودايما يقولوا هما الصح ومتحكمين في حياتي بطريقة سلطوية زياده عن اللازم وانا انسانه مش اجتماعية بالرغم من أن انا عندي رجاحه في الكلام وفي كتير ناس بيقولي انتي عاقله والغريب اكتر أن هما بيفسرو صمتي الدائم على أنه رزانه بس انا دايما بتجنب الناس ولما اكون خارجه بره البيت بمشي بسرعه ولو حد اتكلم معايا بتوتر جدا ومبعرفش ارد بالرغم أن انا بيبقي عندي الرد المناسب بس دايما بسكت ومبتكلمش ومبعرفش اتعامل مع حد حتي مثلا لو في موضوع ارتباط أو حاجه زي كدا انا دايما برفض خوفا من أن انا معرفش اتعامل مع الشخص اللي انا هرتبط بيه وعشان مظلمش نفسي معا
واضح أن محاولة الأهل للسيطرة على سلوكك سببت لك أمية شعورية أنتي لا تستطيعين أن تفهمي مشاعرك من الداخل وبالتالي يعجز لسانك عن التعبير عما بداخلك الحل هو تحرير المشاعر المضطربة والتصالح مع نفسك وذاتك .. اكتبي المواقف السلبية في ورقة بحيث تصفي شعورك الداخلي العميق ناحيتها ثم قطعي الورقة .. كدا العقل اللاواعي بيحذف تأثيرها شوية من الذاكرة تحديد هويتك بعيدا عن تحكم وسيطرة أهلك المفرطة على تفاصيل حياتك تعزيز الشعور بالقيمة وتعزز سلوكيات توكيد الذات .انظري لنفسك في المراية وقولي أنا بحبك يا فلانة . أنت لك قيمة طالما نفخ الله فيك الروح فأنت لك قيمة وذكري نفسك بمميزاتك ..كرري التمرين يوميا لحد ما تنسي تنمر الآخرين عليك وتعززي حبك لنفسك أسمعي لياسر الحزيمي وأحمد الدملاوي وأهم شيء الدعاء إلى الله عز وجل
تم النشر الأربعاء، ١٣ سبتمبر ٢٠٢٣
الحل اننا نفهم - وندرك .. يعني ايه؟ يعني الاشخاص اللي كانوا بيتنمروا عليكي وانتي طفلة سواء بقى كانوا في العيلة او حتى اصدقاء او اقارب .. هل تعتقدي ان الناس ديه هدفهم بالذات لو كانوا الاسرة بتاعتك، هل تعتقدي انهم عايزين يأذوكي؟ اكيد لأ .. ده بيبقى عدم وعي منهم بكده، طبعا ايا كان تصرفهم غير سوي اطلاقا، ولكن ده ف روايتنا احنا .. ف رواية الناس اللي مهتمة بمجال الصحة النفسية والعاملين بيها، والناس اللي عندها دلوقت وعي .. بأن اللي بيعملوه تنمر، مش هزار. ف الحل هنا انك تفهمي وتدركي ايا كان اللي حصل، ف ده لا ينقصك او يعيب منك ف اي شئ .. وان كل واحد اساسا عنده عيوب، يعني الاشخاص ديه مش ملايكة نازلة من السما كده كل حاجه فيها بالمسطرة، كلنا فينا عيوب. الحل التاني هو انك تنغمسي في المجتمع، الحكاية مش هتتفك عندك بكلامي ده وبس، فيه مجود عليكي انتي كمان .. حاولي تعملي كل حاجه انتي مش بتعمليها (وقصدي هنا ع قلة الكلام والتجنب من الناس). اتكلمي مع الناس واتكلمي مع صحابك، لو حد قال حاجه انتي مش راضية عنها اعملي استوب وحدود، قولي الكلام ده مش مسموح بالنسبالي ... اعملي حدود للشخص اللي قدامك وتأكدي انه هيعمل ليكي الف حساب. اما اهلك اتكلمي معاهم واقعدي معاهم اكبر وقت ممكن طالما فاضية .. متحاوليش تقعدي لوحدك، قربي منهم وافهميهم. حكمهم عليكي انتي ممكن تفهميه تسلط شوية ولكن هو بيبقى ف باطنه خوف ولكن زياده عن اللزوم. علشان كده المعظم بيفهم انه تسلط، وعدم حرية واجبار .. لما تفهمي اهلك، وتفهمي ماهية افكارهم وتصرفاتهم هتعذريهم. ومش لازم يبقى كلامهم صح طول الوقت، ولكن برضه مش لازم يبقى كلامهم برضه غلط طول الوقت. ولو ع سؤالك في الارتباط ..لو ارتباط غير رسمي منصحش بيه نهائي.. اما لو كان رسمي فياريت تدخلي تجربي .. تشوفي الدنيا هتمشي ازاي؟ خلي بالك انتي بتحكمي من منظور اساسا انتي بتفرضيه ع نفسك من قبل ما يحصل اصلا. يعني بتقولي خايفة احسن معرفش اتعامل، يعني يمكن ويمكن. طيب ما تجربي علشان تشوفي هتعرفي ولا لا، وتأكدي ان التجربة هتزيدك خبرة مش شئ سئ يعني. وبالتوفيق.
تم النشر الثلاثاء، ١٢ سبتمبر ٢٠٢٣
انتي انا بس ف حياه تانيه 😂 انا شبهك ف كل حاجه قولتيها ولحد دلوقتي بتوتر ولو ف تجمع بحاول انسحب وبجلد نفسي ع جمل عاديه جدا بس بفضل اقول كان لازم اقول كذا واعمل كذا ... والحل الوحيد اللي نفع معايا هو تقبل توتري دا وبجبر نفسي اني اقعد ف التجمعات واتكلم واشترك ف نوادي واماكن واحاول امشي امور حياتي لوحدي بدل م بستخبى ف اهلي وواحده واحده هتلاقي الموضوع عادي والردود هتطلع صح لان حتى لو قعدتي ف تجمع ومتكلمتيش مره مره هترتاحي وتبدأي تشاركي رأيك براحه واختاري الناس اللي تقعدي معاهم لان الراحه النفسيه هي العامل الاساسي ف التوتر والتخبط ف الكلام
تم النشر السبت، ٢٣ سبتمبر ٢٠٢٣
واللّه أنا فاهمك ما أنا كان بيقولوا عليا كدا أصلا بس لما بدأت أتكلم بثقه قدامهم وبدأو يفهموا شخصيتي مبقوش يقولوا عليا كدا
تم النشر الأربعاء، ١٣ سبتمبر ٢٠٢٣
اعملي حساب واعملي الاختبار تقدري تحولي للغه العربيه عادي لو في صعوبه بالانجليزي ..وابقي شاركينا اللي قدرتي تعرفيه من الاختبار ..واتمنالك التوفيق
تم النشر الأربعاء، ١٣ سبتمبر ٢٠٢٣
الاهم من انك تبحثي عن رضا الاخرين وتقبلهم ليكي محتاجه تبحثي داخلك عن مواطن القوه والحب ..ايه اللي انتي بتحبي تعمليه فعلا وايه اللي لما بتقدميه لحد بتحسي انك مبسوطه فعلا ...فيه اختبار جميل جدا هيساعدك تعرفي مواطن قوتك لما تعرفي الحاجات دي هتعرفي تقربي من نفسك اوي وبالتالي تقدري تقربي من الناس وتعرفي تعملي حدودك الشخصيه بسهوله ..https://www.viacharacter.org/Account/Login?ReturnUrl=%2FDashboard%2FResearchProjects
تم النشر الأربعاء، ١٣ سبتمبر ٢٠٢٣
مش محتاجه هما كدا كدا بيقولوا عليا متكبره وشايفه نفسي عشان مبتكلمش
تم النشر الأربعاء، ١٣ سبتمبر ٢٠٢٣
بصي مش لازم تتسرعي وأنتي بتتكلمي وحاولي لو وقعتي في النص ومش لاقيه كلام تقوليه متتوتريش بل أسكتي عادي ٥ او ٧ ثواني لغاية ما تعرفي أنتي هتقولي أيه وتقوليه و حاولي تشعري من جواكي بالثقه بالنفس المصريين دايماً بيحبوا يقولوا عن الثقه بالنفس تكبر فا عارفه شعور التكبر دا حاولي تحطي منوا شويه وأنتي بتتكلمي هتحسن كلامك أكتر وبصي في عين اللي قدامك أكنوا تحدي او لعبه بتلعبيها بس متنسيس أهم حاجه شعور التكبر البسيط دا اللي هو اصلاً من المفترض اسمه ثقه بالنفس
تم النشر الثلاثاء، ١٢ سبتمبر ٢٠٢٣
عملت كدا لدرجه أن انا اشتريت كتب عن لغه الجسد والتعامل مع الناس وفن التعامل مع الاخرين بس لما اجي اتعامل مع حد في الواقع بتلخبط وبتكلم بسرعه والتوتر جامد دا حتي في حد قالي أن انا انطوائية وكلام من ده
تم النشر الثلاثاء، ١٢ سبتمبر ٢٠٢٣
نوعاً ما أنا زيك وكنت واصل لمرحله وحشه من كتر ما انا مش بحب الأختلاط بالبشر والاجتماعية بس فكرت فيها شويه ولقيت إن عالمنا دا من أكتر الحاجات المهمه فيه هي إنك تعرفي تتعاملي مع الناس وتبقي أجتماعيه وكدا فا بس بدأت أتعلم شويه عن لغة الجسد وأزاي اقدر إني أعبر بجسمي قبل ما أتكلم أصلاً دا في الأول هتحتاجي إنك تتعلميه ومن ثم تطبقيه على أي حد علاقتك بيه طفيفه صديقه ليكي تكون مش مقربه أوي عشان تعرفي تطبقي اللي أتعلمتيه وكدا و ممكن حتى لو أنتي داخله مثلاً تكلمي حد أنتي متعرفهوش تحطي نفسك أكنك في لوكيشن تصوير مثلاً وأنتي الممثله المتقمصه للشخصيه الأجتماعيه واللي الناس كلها بتحبها ساعتها هتلاقي نفسك لوحدك بتتكلمي لأنك مفكرتيش في الموضوع كتير مجرد إنك ممثله بتمثل دورها أو كتحدي أو كدا كلامي يبان مش مترتب بس دي الحاجات اللي نفعت معايا وجابت نتائج
تم النشر الثلاثاء، ١٢ سبتمبر ٢٠٢٣
لعرض السؤال في فدني اضغط هنا