الحمدلله التزمت من فترة في الصلاة و يعني مش عايز اقولكم اني كنت مش عايش والله ، كلمة غفلة دي قليلة انت كأنك لسه مولود اصلا ، وحده وحده بدأت بصلاة الفجر و مكنتش بصلي غيرها مش عارف ليه و الحمدلله التزمت وببعد عن المعاصي و الكبائر ومن هنا بدأت المشكلة ، مش هقول متدين دي كلمة كبيرة ، لما بتبعد عن المعاصي كده بس وتصلي فروضك الخمسة في الجااامع الحاجات اللي مفروض بيعملها اي مسلم ، وسط أهلك و صحابك بتاخد كلام و نظرات منهم لا توصف وانا هنا علشان كده ، بتواجهني مشكلة مع أهلي و انا مكنتش عايز اكلمهم في الدين و كده علشان انتااا هتعملي فيهاا شيخ .. و الكلام ده وهو بيضايقني بصراحة مع اني اتمنى والله بس هي بتكون طالعة شتيمة مش مدح ومش ضامن نفسي وانا بكلمهم لاني كاتم كلام كبير حاسس لو كلمتهم فيه هيحصل حاجة المهم انا الحمدلله بطلت الأفراح و الاختلاط و القرف ده كله ويجي فرح قرايبنا والأهل كلهم رايحين .. يلا يبني علشان الفرح ، مش رايح علشان كذا وكذا وكذا ومش عايز اقولكم ردة فعلهم ولا كأني بشتمهم ، الناس هتزعل وكده .. ده مش هيحللها برضو و فرح في فرح جه فرح خالتي وطبعا نفس المشكلة اختي بتقولي ده خالتك قولتلها ولو فرحك انتي فيه نفس الكلام مش هحضره ف كنت حاسس ان الكلام سيء او تقيل مبحبش برضو اني اتكلم بسبب كده بحس اني مش براعي المشاعر او طريقة كلامي مش كويسة و امي اشتغلت بقا و فضلت تحلل فيها وقولتها نفس الكلام حسيت للحظة لما لاقيتهم كلهم ضدي اني كده مش بطيعهم و سألت و الحمدلله طلع اني صح بس لسه ملقتش حل يناسبني برضو لاني الشيخ قالي اتكلم معاهم و ومتاخدهاش كانها عناد وكده اضحك عليهم و فهمهم وحده وحده وانا مش هقدر اعمل كده علشان مش بستحمل كلامهم و غير اني مش بقدر اسيطر على نفسي وفي مرة كنا بنتكلم لقيت اخويا الصغير لسه لي ابتدائي بيقولي هنجوزك منقبة يا .... الواد بيقولها ولا كانها شتيمة مع ان كده كده ده شيء أساسي هتكون منتقبة (معرفش حكمة بس هتلبسه لاني هغير عليها 🙂 ) بس مش دي المشكلة الأفلام و المسلسلات و الصورة اللي وصلتها للجيل بوظت دماغهم والله ، انا ذات نفسي كنت واخد فكرة عنهم مش كويسة هما و الشيوخ .. ، تاني مشكلة الأفلام و القاعدة مع الأهل
قولتلهم أول مرة علشان اللي فيها ، الموسيقى و المتبرجات وكده و الموضوع عدا بضحك وتقريبا فكروا اني بهزر ، لاحظوا اني مش بقعد معاهم وخايف المرة دي لما اقولهم علشان بتشغلوا افلام و كده يقولوا عليها ارها*بي ولا حاجة ولسبب تاني بحس اني بقلل مش بقدرهم او بعمل حاجة غلط لما بقولهم ده حرام وكده ومش عارف صح اصلا اني انصحهم ولا لا ، مشكلة كمان وهي السلام و المصافحة دي لسه متحطش فيها بس عايز حل ليها هي كمان علشان مش عارف اقولها ليهم ازاي ، صلاة الفجر بيكونوا نايمين و مش عايزين اني يكون معايا مفتاح بسبب اني بنسى 😅 بيقولوا كده علشان مرة من اكتر من ٤ سنين انتوا متخيلين نسيت الباب مفتوح وخرجت بره الشارع اجيب اخويا من الحضانة و انا سايبه قصد اصلا كسلت اقفله وقولت دي مش مستاهلة قفلته بس كده على الاخر و مكفلتش بالكالون وبنسى حاجات زي اي بشر عادي زي ما كلنا بننسى بس من كتر ما بيقولها حاسس اني بقيت بنسى اصلا و بحثت ولقيت ان ده ممكن يحصل فعلا بس اتخلصت من المشكلة دي و بعدين حاليا يعني في فرق أكيد بقول ٤ سنين وأكيد مش هسيب باب مفتوح يعني وهمشي لما بننسى بننسى حاجات صغيرة مش بتكون مهمة اصلا انما هسيب الباب مفتوح و تخيلوا لما قولتلهم كذا مره يقولولي هو احنا كفرة مش عارف اللي جاب دي لدي و ايه العلاقة بس والله ما عارف حاجة وحاليا مبقتش قادر اني اتكلم معاهم في اي حاجة و مش عارف اعمل ايه ، الأيام يوم ورا يوم بتزيد سوء و غير بقى ان لما اخلص تعليم هقرب من ربنا اكتر ، مش عارف ايه هتكون ردة فعلهم بيحسسوني اني غلط بس هعمل اللي في دماغي برضو ، عايز اعرف اللي بعمله صح ولا غلط وهل لما بنصحهم اصلا ده عادي يعني و عايز حل للمشاكل التانية وازاي ارجع طبيعي انا معنديش صحاب تقريبا و مبقتش اتكلم معاهم زي الأول بقيت ساكت دايما و ده حاسس انه سببلي مشكلة تاني هبقى انزلها بعدين بس بجد عايز حل .. ، لو وصلت لحد هنا ف سبب توبتي كانت آية من القرآن للشيخ ياسر الدوسري كانت ترند أخر فترة سمعتها وبدأت اتابع السورة كاملة و اتعمق اكتر واكتر ، و الشيخ اللي بحب اسمعه حاليا محمد الليحدان جمدااان ❤️
آسف لو في أخطاء إملائية أكيد مش هقرأ ده كله تاني 😅
انت دلوقتي متحرر مبروك عليك ♥... خلي بالك يا اخويا الشيطان مش هيسيبك ابدا دلوقتي انا عارف ومتأكد بالجمال اللي بقيت بتحس بيه جواك ما تخلي اهلك او اي عائق دنيوي يسيطر على افكارك للاسف الواقع اللي حواليك بيعلمك تشوف افلام مع ان فيها مشاهد زنا نعم ولو مش جسدي فسمعي وبصري وكون الفنانين انت بتساعدهمفي نجاح اعمالهم فدا ظلم ليك ولغيرك لانك بتساعد في نشرهم انا قولت الكلمتين دول عشان عايزك تسبتهم في دماغك.... المصافحه ما تنفع الا للمحارم وبس ولكن لو واحده ينفع تتجوزه بلاش على فكره جمال انك تعمل كدا في انك غالي وغليت من قيمه البنت... يعني البنت اصلا عشان تحافظ على قيمتها فلا يجوز للرجل مصافحتها لكن التقاليد الحرام هي اللي بتعمل كدا ودا غلط اخويا عايز اقولك انك طالما مش بتعمل شيء حرام فأعرض عنهم وتوكل على الله وحافظ على حياتك جميله لان بجد عباده ربنا هي تحرر من عباده المجتمع.... المجتمع هو اللي بيقيد الناس بالاغاني والافلام والمسلسلات والقزع واللبس الضيق للبنت والتعري وعدم لبس الحجاب كل ده لمجرد ان المجتمع بيطلب كدا والناس بتقلد ربنا يهدينا جميعا اطع اهلك بس مش في حاجه حرام وما تعند معاهم ولو في افراح مش لازم تحضر الفرح يعني روح بعد القاعه او قبلها سلم عليهم كانك سجلت حضور وتمشي بس كدا
تم النشر الأربعاء، ٢٦ يونيو ٢٠٢٤
انصحهم بالطريقة اللى كنت تتمنى حد ينصحك بيها قبل الالتزام و مش بس النصايح و كمان المعاملة معضلة الشباب لما بيلتزموا و بيكتشفوا ان كل محيطهم عكس اللى الدين بيأمر بيه بيبدأ فى مرحلة الثوران و يمكن يكون شديد عليهم حتى لو مش ملاحظ دا و لكن المعاملة الحسنة اللى امر بيها الدين و خاصة مع الاهل و الاقارب و خاصة و هو بيدعوا للدين و بيعرف الناس الحق كنت سمعت الاستاذ احمد عامر بيتكلم عن موضوع السلام دا و بيقول انه فى بداية الالتزام كان السلام دا معضلة بالنسباله و تقريبا كل اللى حضرتك اتكلمت عنه و لكنه كان دايما بيتحجج يمسك اى حاجة فى ايده او اى حاجة لحد ما الكل اتعود انه مبيسلمش على الجنس الاخر و كدا ممكن تتابع سلسلة وعى هتفيدك جدا و كمان امير منير لانهم مروا بتجربتك و اتكلموا عنها و نصايح لكل شاب بيمر و هيمر بيها ممكن تستفاد منهم و حاول دايما تتكلم بطريقة حسنة و لينة معاهم المعاملة الحسنة مش بس بتغير رد فعل الانسان دى بتغير حال قلبه و شخصيته كمان و ربما لما هم يشفوك على هذا الحال هم من نفسهم يطلبوا النصيحة منك لانهم شايفين ازاى الدين أثر على شخصيتك بالايجاب اتمنى انى اكون فدت حضرتك و اتمنالك التوفيق يا رب و بالصبر و الحسنى كله بيتحل ان شاء الله
تم النشر الأربعاء، ٢٦ يونيو ٢٠٢٤
السلام عليكم ورحمة الله وبركاته، أولًا مبارك لك التزامك وإن شاء الله يتمم هدايتك ويثبتك على طريقه. ثانيًا، أعتقد إجابة كوتش ياسمين كانت كفاية ونصائحها لك إن شاء الله تساعدك في تحسين علاقتك مع أهلك ونظرتهم لك. بالنسبة لمشكلتك فهي في الغالب مشكلة يتعرض لها الشباب لما يقرر الالتزام وربنا ينعم عليه بالهداية وخاصة لو خلفيته الاجتماعية والبيئة المحيطة كانت بعيدة نوعًا ما عن الالتزام الديني. وللأسف أحيانًا الشاب دون أن ينتبه يقع في معضلة ما بين التزامه وإدراكه إنّه عرف الحق وإن البقية تصرفاتهم عكس أوامر الدين وبين واجبه وسلوكه تجاه أهله وأصدقائه. المشكلة إن سلوك الملتزم وتصرفه تجاه محيطه ربما يأتي بنتيجة عكسية ويتسبب في نفور الأهل والأصدقاء من الصورة الجديدة وحتى دون أن ينتبهوا قد ينفروا من الدين كله (أو ما يرونه من ناحيتهم تطرفًا وليس التزامًا بالدين) دورك إنك توازن بين التزامك بتعاليم الدين وبين علاقتك بأهلك حتى لا تسبب نفرتهم. لا تنس إن الصورة الذهنية في مجتمعنا ترسخت من سنين طويلة بسبب الإعلام عن إن الملتزم إرهابي أو متطرف أو هو تاجر دين أو مضحوك عليه من جماعات متطرفة. إلى جانب قصور رهيب في تعلم الدين ومعرفة تعاليمه وجهل كبير به. فحاول تتعامل معهم كما نصحتك أستاذة ياسمين في ردها. ******** أيضًا أحب أن أنبهك لأمر مهم: قال صلى الله عليه وسلم (إِنَّ الدِّينَ يُسْرٌ، ولنْ يشادَّ الدِّينُ إلاَّ غَلَبه فسدِّدُوا وقَارِبُوا وَأَبْشِرُوا، واسْتعِينُوا بِالْغدْوةِ والرَّوْحةِ وشَيْءٍ مِن الدُّلْجةِ) ما يقع فيه الملتزم جديدًا هو انطلاقته الحماسية ورغبته الشديدة في التعلم أكثر، يبدأ في الإكثار على نفسه من الفروض والطاعات والعلم بما كان يجهل، ناسيًا أنه عليه الترفق بنفسه وعدم التشديد عليها وأن يتدرج معها حتى لا تشعر بالثقل فيما بعد وربما بعد فترة حين تقل الحماسة للتعلم والعبادة أو يمر بلحظات فتور يبدأ في التقصير ثم الابتعاد ثم يجد نفسه عاد إلى نقطة البداية أو انتكس لا قدر الله. ******* لا تنس أنّ هناك أمورًا ثابتة من العقيدة والشريعة لكن هناك أمور أخرى خلافية فعندما تسمع وتتعلم شيئًا من العلم الشرعي أو تعاليم الدين، ابحث واسمع لكل الآراء حتى لو اقتنعت بأحدها ورفضت الآراء الأخرى، ضعها في ذهنك حتى لا تفعل كما يفعل بعض المسلمين للأسف حين يلتزمون برأي واحد ويحاولون فرضه على كل من حولهم رغم علمهم بوجود آراء أخرى معتبرة تخالف رأيهم ويبدأون بالتشديد على غيرهم وربما معاملتهم بقسوة وتبديعهم. لا تنس أنّ هناك سعة في ديننا وهناك الكثير من الآراء الفقهية التي ترجع إلى دلائل من القرآن والسُنة فلا تتشدد لرأيك أو لرأي شيخك الذي قررت اتباعه أو التعلم منه وتقبل برحابة صدر الآراء الأخرى التي اقتنع الآخرون بها وقرروا اتباعها على اتباع الرأي الذي تقتنع أنت به ما دام الأمر في دائرة الخلاف التي ارتضتها الأمة. ****** أخيرًا، ادع الله دائمًا أن يثبتك على الطاعة والهداية ولا تنس أنّ هدايته هذه فضل منه وحده ولا تسمح للشيطان أن يدخل لك من مدخل العجب والغرور بعملك وهدايتك أو يوسوس لك بالتعالي على المقصرين والمذنبين من المحيطين بك وادع لهم دائمًا (اللهم اهد قومي فإنهم لا يعلمون) وتذكر (ادع إلى سبيل ربك بالحكمة والموعظة الحسنة وجادلهم بالتي هي أحسن) (ولو كنت فظًا غليظ القلب لانفضوا من حولك) تذكر كل هذا ولا تحاول فرض التزامك على الآخرين بل دع تصرفاتك تتكلم عنك والتزامك ينعكس على أخلاقك معهم فتجذبهم إلى الالتزام لا تنفرهم منه. هدانا الله وإياك لما يحب ويرضى وثبتنا على دينه.
تم النشر الأربعاء، ٢٦ يونيو ٢٠٢٤
عاوز ألفت نظرك لنقطة مهمة جدا جدا يا أخي وهي إنك من غير صحبة صالحة هتقع ط، أنا عارف إنك ممكن تكون عندك ثقة دلوقتي، عشان ماشاءالله إيمانك عالي وكده...لكن صدقني الطريق طويييل ولن تثبت إلا بصحبة، قال الملك سبحانه:﴿واصبر نفسك مع الذين يدعون ربهم بالغداة والعشي يريدون وجهه ولا تعد عيناك عنهم.....﴾ [الكهف: ٢٨] عارف الكلام هنا موجة لمين؟ لخير الخلق كلهم، محمد صلى الله عليه وسلم، فمبالك بالغلابة اللي زي وزيك وقال سبحانه :﴿قل إنما أعظكم بواحدة أن تقوموا لله مثنى وفرادى ثم تتفكروا......﴾ [سبأ: ٤٦] فقدم المثنى على المفرد! ومعقل وجود الصحبة الصالحة بلا شك طبعا المسجد ومن النت ومن كل حتة هتلاقي بإذن لله بس ادعي ادعي كتييير وربنا يرزقنا وإياك الصحبة الصالحة
تم النشر السبت، ٢٩ يونيو ٢٠٢٤
https://youtube.com/playlist?list=PLczRZ1lvZJNHezcozJeiCd2Hz_jwgVeBs&si=UZv12wVoMExYleiX القائمة دي جميلة جداً دكتور حازم شومان بيديك خبرة سنين.
تم النشر الأربعاء، ٢٦ يونيو ٢٠٢٤
السلام عليكم ورحمه الله وبركاته. اولا يعني ادعو الله ان يعني يبان عليك دائما بالاستقامه مهما حصل اي حاجه فتنتك ترجع تاني للطريق السليم وربنا يرزقك دائما الهدايه ويرزقنا الهدايه. خايف تقع منه وهي غاليه عليه قوي فتمسكك بالالتزام دلوقتي كده لانك لسه مش ضامن انك تعرف تمسك فيه من غير ما يقع ويتكسر. فالمرحله دي طبيعيه. المشكله في المرحله دي انه اللي حواليك مش ماسكين نفس الكوبايه ما عندهمش نفس الحرص فهم مش فاهمين انت بتعمل ايه وشايفينك بالطرفات غريبه فاحنا هنراعي اولا الاختلاف ده ونراعي ان هم مش في نفس المكان دي اول حاجه خلاص فلما تبص لهم ما تبصلهمش باستنكار او بتبقى زعلان منهم قوي لانه هم بس مش في نفس مكانك فمش فاهمين ايه اللي بيحصل معاك. دي اول حاجه تاني حاجه عايزاك تفهم ان قدام هتبدا تتعامل مع الالتزام بشكل مختلف الالتزام هو هيكون كيانك انت حتى ولو اللي حواليك مش زيك. طب هل ده معناه ان انا مختلطش بالناس اللي هي مش بتعمل زيي لا هتختلط بيهم ولكن؟ هيبان عليك التزامك وواحده واحده واحده هم اللي هيحترموا التزامك واحده واحده هما هيعرفوا ان علشان انت تكون موجود هم مش هينفع ان هم ينكروا التزامك ده طب ده بنعمله ازاي انا هاخد من الامثله اللي انت قلتها وهقول لك شويه حاجات هنقول مثال انك دلوقتي حابب انك تقعد مع اهلك وهم فاتحين التليفزيون بيتفرجوا على فيلم انت هتنقي مكان تقعد فيه ما يكونش. وشك قصاده التليفزيون فمعنى كده انك بتعمل ايه انت بتاكد التزامك انك مش عايز تتفرج وفي نفس الوقت متاكد على اهلك ان انا حابب اكون وسطيكو بس اختياري مختلف عن اختياركم ومع ذلك انا حريص على اني اكون معاكم فانا موجود معاكم ولكن انا مش هتفرج بس بكل بساطه تمام ده بتبقى واحده من الحلول اوكي وممكن اكون متواجد معاهم في المكان كمان ومش عايز اسمع اللي هم بيسمعوه انا هحط السماعات في وداني هسمع قران بس مش هبقى معلي الصوت قوي هيبقى في نفس الوقت ايه سامع اللي حواليا فلو هم بيكلموني هكون سامعهم لكن انا عندي في الباك جراوند بتاعت وداني انا انا مشغل قران ومش منتبه للي هما بيسمعوه حلو كده دي طريق موضوع الافراح نفس الامر بالظبط انا ممكن اتعامل بشكل يناسب كل الاطراف والله في دلوقتي مناسبه هو في الاول وفي الاخر ده ايه ده اشهر زواج يا سيدي بيعملوه بشكل غلط بيبقى فيه مساوئ كتير جدا انا برده هحترم التزامي ولكن في نفس الوقت هقول لهم ان انا مش هقصر معكم لان انتوا مهمين عندي هعمل ده ازاي؟ هروح مثلا في وقت المناسبه وهلبس وهتشيك وهروح مع اهل المشوار ولما هوصل هناك انا هسلم على العريس وهسلم على العروسه طبعا من غير ما تسلم ايدك وهتبارك لهم جدا وهتقول لهم انك مبسوط انك جيت ولكن هتعتذر لهم انك مش هتقدر ايه تبقى موجود اييي وقاعد طول اليوم وفي الاغلب الحاجات دي بتكون معموله في قاعه والقاعه دي مقفوله وبره في مكان ثاني مفتوح فانا هدخل وهسلم عليهم يا جماعه انا منتظركم بره ممكن قبل ما نمشي ادخل برضه اسلم على العريس والعروسه وبعد كده اخذ بعضيه واروح مع اهلي وابقى انا كده وزنت الامور تمام اللي انت بتعمله ده لما تعمله افضل كثير من انك تاخذ عزله بعيد عنهم وكان خلاص احنا ما ينفعش نجتمع الا لو انتوا بقيتوا بتعملوا زي ما انا بعمل زي ما انا فهمت دلوقتي الالتزام الصح. لان ده مش هيساعدهم ان هم يلتزموا معك لما هم يشوفوك حريص عليهم هيبداوا يفهموا ان التزامك ده بياكد انه ما ينفعش انك تبعد عن اهلك. لما يشوفوك اخواتك كده هيبداوا يحبوا اللي انت فيه هيقولوا تصدق انت كده احسن ويبداوا يجوا معاك ويبدا حد من اخواتك بدل ما هو جوه في الفرح يخرج يقول لك انا هقعد معاك شويه بلاش ايه دوشه انا تعبت من الدوشه واحده واحده هتبقى انت مصدر ان شاء الله باذن الله ويبقى دي نعمه وفضل كبير من ربنا عليك ويضاعف حسناتك باذن الله انك تكون انت السبب ان هم كمان يلتزموا بس بالقدوه مش باني احسسهم انه انتوا بقيتوا ناس غريبه. صحابك برده نفس نفس الامر والله هتقدر انك تكون مع صحابك وبتعمل نفس الموضوع لو لما تلاقيهم رايحين لحاجه غلط طب يا جماعه انا هقوم يعني انا بحبكوا اه وانتم صحابي اه لكن طالما في حاجه فيها يعني ذنوب او تغضب ربنا فيا يا سيدي الله هو الغني الواحد مش هينقي الدنيا بس لكن لازم يبص للاخره مره مع مره صحابك من حبهم فيك هيحترموا ده وهيعرفوا ان فلان جه لا خلاص يا جماعه احنا لازم نوقف اللي احنا بنعمله ده عشان هو بيضايق او عشان ده مش مناسبه ودي برده هتبقى فرصه كويسه جدا انك تكون سبب في ان صحابك يوقفوا حاجه غلط يكونوا بيعملوها. الموضوع ااا ممكن يمشي بشكل جميل جدا واحلى حاجه لما انت تلتزم بابتسامتك لما تعمل اي حاجه تلاقي اللي قدامك مستغربينها او بيقولوا لك يا عم الشيخ ابتسم في وشهم واقول لهم من بقكم الباب السما ربنا يقبل منكم الدعوه الحلوه دي قابل المواضيع بابتسامه حلوه وبرد حلو صدقني هتلاقي الموضوع بقى في حته تانيه خالص ربنا يتم عليك نعمته يا رب باذن الله.
تم النشر الأربعاء، ٢٦ يونيو ٢٠٢٤
انا زيك غالباً و لما يتقالي كلام مش عاجبني برد بكلام وحش ويضايق عشان محدش يتكلم معايا بالطريقة دي تاني
تم النشر الأربعاء، ٢٦ يونيو ٢٠٢٤
سلام يا بطل، أولا برافو عليك أنك التزمت بالصلاة وبدأت تعمل تغييرات إيجابية في حياتك. ده شيء عظيم وربنا يثبتك عليه. بالنسبة للمشاكل اللي بتواجهها مع أهلك وأصحابك فدي حاجات طبيعية الواحد بيتعرض لها لما يبدأ في الالتزام. التعامل مع الأهل: حاول تتكلم معاهم بهدوء ومن غير عصبية. وضح لهم أنك مش عايز تتخانق بس بتسعى للخير ليك ولهم. ممكن تقول لهم مثلا: "أنا بحبكم وعايز أعيش بالطريقة اللي أرتاح فيها مع ربنا، ويا ريت تراعوا ده". الأفراح والاختلاط: حاول أنك تكون واضح ومباشر بس بلطف. مش لازم تحضر الفرح كل الفرح، ممكن تحضر جزء معين زي كتب الكتاب وتمشي. ده كحل وسط ممكن يساعد يهدئ الأمور. نصح العيلة: نصيحة خفيفة ولطيفة ممكن تكون أفضل، وربنا قالنا ننصح بعض بالمعروف. فانصحهم بالهدوء وبدون ضغط. مفيش داعي للتضييق عليهم لأن ده ممكن يعقد الأمور أكتر. الأفلام والمسلسلات: ممكن تقول بكل هدوء أنك بتفضل تقضي وقتك في حاجات تانية ومش لازم تدخل في التفاصيل اللي ممكن تسبب مشاكل. المصافحة: لو موقفتش قدام موقف المصافحة، ممكن تستخدم العذر للابتعاد بأدب، زي إنك عندك شعور بالتعافي من برد او سعالك مش عارف توقفه. موضوع المفتاح: بما إن نسيت مرة زمان، حاول تطمنهم أنك حاليا أكثر حرص ووعيك بالمسائل دي زاد. الصحاب والعلاقات الاجتماعية: حاول تلاقي ناس جدد في بيئة تساعدك على الالتزام وانت ممكن تنخرط في نشاطات اجتماعية إسلامية وتتعرف على ناس جدد على نفس الطول الموجي. أهم حاجة، استمر في الدعاء وربنا يهديك للطريق الصح. واعرف انك مش لوحدك في الرحلة دي، في ناس كتير بتمر بنفس الشيء. استعين بالله وخليك هادئ وواثق في نفسك. ولو عندك أي حاجة تانية عايز تحكي عنها، أنا هنا عشانك. ربنا معاك يا بطل!
تم النشر الأربعاء، ٢٦ يونيو ٢٠٢٤
اكتب علي اليوتيوب فن العامل مع الأخطاء علاء حامد
تم النشر الأربعاء، ٢٦ يونيو ٢٠٢٤
لعرض السؤال في فدني اضغط هنا