ربنا سبحانه وتعالى يرزقك العافية من مثل هذه العلاقة. مفيش حاجة اسمها حرام تكسري قلبه والكلام دا، الحرام إنك تكملي في العلاقة المحرمة الي فيها تجاوزات كتيرة دي ولا ترضي الله عز وجل قبل كل شيء. ومن كلامك أصلا إن العلاقة فيها إشكالات كبيرة زي إنه بيسب الدين ودا فعل كفر يخرج من الملة أصلا وزي إنه مش عايز يشتغل وكل متقوليله حاجة يقول عشانك وزي إنه بيمد إيده أمال الي زي كدا هيعمل أيه معاكي بعد الزواج. كنت هقولك أقطعي التواصل معاه ولو حابب تكملوا العلاقة يتقدم لوالدك وتفكري فيها وتقييميه بعقلانية لكن واضح جدا من سؤال إنه شخص لا يمكن الارتباط بيه وأنت متمسكة بيه عشان الانجذاب والمشاعر مش أكتر فمنصحكيش. الي تعمليه فوجهة نظري إنك تقطعي العلاقة دي فورا وتتوبي إلى الله عز وجل وتبدأي صفحة جديدة فحياتك تشوفي فيها نفسك وتعليمك وشغلك وتدوري على صحبة صالحة تعينك على القرب من ربنا وتكون علاقات صحية تقدري ترفهي فيها عن نفسك وتحبيهم ويحبوكي. بالتوفيق يارب
تم النشر السبت، ١٩ أغسطس ٢٠٢٣
استوقفتني حقيقة جملتك هذه كثيرًا ( مفيش غير سبب واحد مخليني خيفه اظلمو وابعد عنه وهو بيحبني وني اكسر قلب بني ادم حرام عليا فمعرفش اعمل اي) وحقيقة لا أعرف أي جزء من أجزاء هذه العلاقة الذي فهمتي منه أنه يحبك وبناء عليه قررتي أنه حرام ظلمه وكسر قلبه. ولنفترض جدلًا أنه يحبك، ولنفترض جدلًا أنه يريدك ولا يفعل شيء من كل تلك الأفعال التي ذكرتيها - والتي برأيي كافية جميعها مجتمعة أو متفرقة لإنهاء أي علاقة في الدنيا - فمن حقك رغم كل هذا أن تنهي العلاقة إن كان بها شيء غير مناسب لك، أي شيء قوي كان أو تافه حتى. النبي صلوات ربي وسلامه عليه لم يعترض على امرأة تطلقت من زوجها لأن شكله وملامحه لا يعجبانها وتخاف أن تفتن بسبب أنها تتمنى رجلًا ذا شكل يسر وجهها. فإن كان هذا الوضع مع من لم تقنع بملامح زوجها فما بال بمن تتعرض للضرب والإهانة من شخص ليس محسوبًا عليها أي شيء لا مخطوب ولا غيره. برأيي أن المواصلة في علاقة كهذه هو من الإهانة الشديدة للنفس والانتقاص من حقها الإنساني في علاقة طبيعية بدون اعتداء جسدي أو نفسي بهذا الشكل. فإن حدث وواصلتِ في هذه العلاقة وكللت بالزواج يومًا ما وإن كنت أشك في هذا، فتذكري وقت اكتشاف مدى السوء الذي أوقعتي نفسك فيه بأنك من ارتضيتي هذا لذاتك من البداية
تم النشر الأحد، ٢٠ أغسطس ٢٠٢٣
حرام ايه؟ حرام تكسري قلبه وتسبيه؟ يعني هو ده السبب الوحيد اللي انتي متمسكة بالشخص ده علشانه؟ هو منطقي مثلا انك ترتبطي بواحد ومش عاجبك، وبيشتمك وبيهينك وبيضربك، وفي الاخر حرام تسبيه؟ الحرام اللي انتي بتعمليه ف نفسك حقيقي، الواحد مش بيتجوز علشان فيه حد يعيني صعبان عليه! الجواز مش كده .. هو هل منطقي مثلا ان والدك يشوف حد في الشارع غلبان ف يقوله تعالى عيش مع بنتي ومراتي في البيت، اصلك غلبان وصعبت عليا؟ هل ده منطقي؟ هل ده صح؟ هل ده اساسا حلال؟ لا طبعا .. هو ده اللي انتي بتعمليه بالظبط ... في الحقيقة الحرام بجد اللي انتي بتعمليه في نفسك، انتي متخيلة مثلا انه هيتغير، عايزة اقولك ان ديه نبذة بسيطة جدا من للي هتشوفيه بعد الجواز اذا اساسا اتجوزك بقى! يعني الاهانة والسب والضرب ده انتي متخيلة انه هيتغير؟ بالعكس ده هيزيد وبعدين هو مش عايزك تعلي بشهادتك .. ده منورش عندك حاجه مثلا؟ ده انسان عنده نقص مش عايزك تبقى احسن منه، لانه حاسس بالنقص، ومش سوي نفسيا. وكمان مش مسؤول .. يعني لو اتجوزك مش هيبقى انسان مسوؤل ولا عنك ولا عن عيالك، هل انتي مستعدة تعيشي كده؟ هل انتي مضطرة انك تعيشي في الحياة بتاعته ديه علشان خايفة تكسري قلبه؟ امال هو بيعمل فيكي ايه دلوقت مثلا؟ بيحترمك، بيقدرك، عايزك احسن حد في الدنيا، بيدعمك.....؟ هل بيعمل اي حاجه من دول ..! زيادة عن ده كله .. هل ديه اساسا علاقة رسمية؟ علاقة في الضلمة ولا النور؟ علاقة ترضي ربنا اساسا؟ العلاقة ديه فاشلة بكل المقاييس .. اهربي منها
تم النشر الأحد، ٢٠ أغسطس ٢٠٢٣
شتايم مهينة وضرب وسب بالدين وكل دة وهو لسة مش جوزك .. طيب بالعقل كدة متوقعة لما المحروس يبقى جوزك إن شاء الله هيعمل في حضرتك إيه؟
تم النشر السبت، ١٩ أغسطس ٢٠٢٣
حاضر انا ققلا الموضوع وخلاص بيني وبينو بس كنت بتاكد ني صح
تم النشر الخميس، ٢٤ أغسطس ٢٠٢٣
حبيبتي ابعدي عنه طبعا الي غيه طبع عمره ما هيغيره ويعني اي بيمد ايده عليكي انفدي بجلدك وتبا للحب يا روحي ده بيهينك و هيبهدلك قدام لو كملتوا
تم النشر الخميس، ٢٤ أغسطس ٢٠٢٣
حاضر
تم النشر السبت، ١٩ أغسطس ٢٠٢٣
سيبيه واقطعي كل حاجه ده انسان مش محترم متخافيش انك تظلميه هو الي ظالم تخيلي معايا كده لو اتجوزتيه وقعد لما بس تختلفوا اختلاف بسيط يعنفك ويضربك ويهزقك ومتعرفيش توصلي لحد ينجدك كل مرة من تحت ايده...طب تخيلي كمان لو بقى عندكوا ولاد وبقى بيعنفهم كده بردو وعشان تطلقي ترفعي عليه قضايا وتقفي قدامه في المحاكم وحاجة قرف...اهربي احسن الموضوع مش سهل اه بس هينجيكي من عذاب بعدين وانتي شكلك صغيرة اوي اصلا بصي ده مينفعش زوج الزوج لازم تختاريه صالح عارف ربنا وبيصلي مش بطلجي يقوم شاتمك شتايم مينفعش تتقال ولا واحد بيسب الدين وخارج من الملة اصلا! ربنا يهديكي ويرزقك الزوج الصالح
تم النشر السبت، ١٩ أغسطس ٢٠٢٣
واحد مش عاوز بشتغل هيفتح بيت ازاي سيبك منه
تم النشر السبت، ١٩ أغسطس ٢٠٢٣
لعرض السؤال في فدني اضغط هنا