اهلا اسمي ملك
وانا عندي خمس سنين كنت دايما بشوف اهلي بيتخانقوا و كانت خناقات ميستحملهاش طفل او بني ادم كبير حتى من صوت عالي الي اخره و كنت دايما بخاف انهم يزعقوا لانه لو فتحوا خناقة بتنتهي معظم الوقت من خناقة صغيرة او نقاش حاد شوية لخناقة كبيرة ولما جه اخويا الصغير كنت دايما عايزة اخد اهتمام بابايا ليا لوحدي هو مكنش مقصر لكن كنت حسة بتقصير وانه حاطط فروقات و كان دايما ف دماغي انه لو اتصرفت بشكل صبياني ممكن اخد اهتمامه و قعدت معظم طفولتي اتعامل بشكل صبياني و كنت كارهة كوني بنت ف الفترة الاولى ف المدرسة اتعرفت ع بنتين ممكن نسمي الاولى خوخة و التانية توتة كان في واحدة منهم الاقرب لقلبي الي هي توتة كنت بحبها جدا و كانت اكبر مني ب سنة فا كنت شايفاها زي اختي الكبيرة وانها شخص عاقل جدا و شخص مقاتل لظروف حياتها الصعبة و كنت دايما اعيط ع زعلها و افرح لفرحها اكن الموضوع بتاعي لكن و مع اهتمامي الكبير ليها من وجهة نظري يعني الا انه ردات فعلها بتبقى ابرد من المتخيل وانا كنت مقتنعة انه انا لو اهتميت و بذلت مجهود اكيد الي قدامي حيقدر مجهودي و يهتم ليا برده الا اني محستش ب ده و كنت من النوع الي مش بيعرف يعبر عن الي جواه او يعاتب فا حتى لو عاتبت مش بعرف اقول الي مدايقني بكلمات مختصرة و حتى لو قلتلها ع الي مدايقني منها يا ترد بطريقة مستفزة بالنسبالي يا تقولي انه هي مش من النوع الي بيعرف يهتم ب الي قدامه كانت معظم الوقت تحكيلي عن الي مدايقها و اهتم لمشكلتها اكنها مشكلتي بظبط او اهتم لمشكلتها قبل مشكلتي كمان لكن ف الوقت الي عايزة احكي فيه مشكلتي مقدرش لانه كنت بخاف اطلع مشاكلي برة البيت و كان معظم مشاكلي الي بتأثر عليا نفسيا هي مشاكل البيت الي ممكن متكلمش لمدة اكتر من يومين ولما ابدء كلام معاها اكني مغبتش يومين ممكن يبقوا مدة قصيرة جدا لكن احنا كنا بنتكلم يوميا بشكل متكرر ف اليوم اقصد بقينا من روتين بعض محستش ابدا انه في حاجة ناقصة حصل انه كذه مرة وصلت علاقتنا للمحك لكن ترجع تاني بس ولا مرة لما رجعنا كنت حسة براحة و من فترة اكتر من تلت سهور من دلوقتي اخدت قرار اني اقطع علاقتي بيها انا كان عندي صحاب تانيين كنا تقريبا خمسة او ستة لكن اكتر حد كنت بحبه كانت هي لما قطعت قطعت ب كله و الي استوعبته انه محدش عمل حاجة ليا غيرها هي قبل قراري ده كنا بنتكلم بشكل يومي كعادتنا لكن قعدت خمس ايام مكلمتهاش و زي ما قلت اننا بقينا شبه روتين لبعض لكن مفكرتش تبعت اي رسالة تطمن عليا او تتصل عليا زي ما كنت انا بعمل لما كانت تغيب يوم واحد كنت اتصل عليا و اكلمها ممكن اتصل ع كل التطبيقات الي ممكن نتكلم فيها و اكون قلقانة عليها كان نفسي في حد يدور عليا كده لما كلمنا بعض قبل ما اقطع العلاقة كلمت بشكل تقليدي جدا مش كعادتي ف الكلام و بعدها قطعت علاقتي بيهم كلهم و عيطت جامد ونفسيتي كانت وحشة بعدها بدأ واحدة منهم تكلمني و سعتها كنت بحاول اقفل معاها الكلام مش كرها فيها اكتر من انه كانت نفسيتي لسه متحسنتش وهي كلمتني و قفلت معاها الكلام زي الي قبلها بعدها البنت التانية الي هي خوخة (بعتذر ع السخافة بس مش حبه اقول اسمائهم) البنت التانية كلمتني و الغريب اني اندمجت معاها و رجعنا نتكلم تاني و كنت مرتاحة غير اي مرة و كانت الوحيدة الي كنت لو كلمتها اكلمها بكل ارياحية غير كلامي مع توتةو بعدها خرجنا سوا و كنا بنتكلم عن الموضوع و قالتلي انهم اتكلموا عني ف الجروب الي خرجت منه و لقيت تلاتة متكلمين عني و كان للاسف من ضمنهم توتة الي كانت انصدمت منها ازاي تتكلم عني كده مكنش كلام يقلل مني او من اخلاقي او ادبي الفكرة اننها بتتهمني و انا مش حقدر ارد عليها و ابرر عن نفسي لاني ببساطة خرجت من الجروب و بعتت المحادثة الي بينا لقطة شاشة ع الجروب و كانت بتتكلم قد اي طريقتي وحشة او باردة معاها و كانت بس ماسكة في جزئيتها ف الموضوع لكن مهتمتش بيا قالت اني طريقتي باردة لكن محستش ولو للحظة اني كنت موجوعة بسببها بعد الموضوع ده كان الموضوع صعب جدا اني اتخطى الموضوع بسهولة ع ون كنت بقضي وقتي في حجات مفيدة و ممتعة بالنسبالي لكن مقدرتش انسى او اتخطى بعدها هي كلمتني و بنفس الاسلوب انها مهتمة لشكلها قدام نفسها مش مهتمة ليا انا و داخلة تكلمني بطريقة جافة جدا و سعتها عملتلها بلوك ع معظم التطبيقات لكن و مع ذلك سبتلها فرصة انها تقدر تكلمني ع التليفون الا اني متأكدة انها محاولتش عدى ع الموضوع اربع شهور و الفترة دي انا مشغولة جدا دراسيا الا انه في جزء كبير من تفكيري ف الموضوع ده و مش قادرة اشيله من دماغي او حتى مهتملوش لانها كانت بالنسبالي شخص مهم و عمري ما تخيلت انها تبقى بالجفاف ده و متحاولش تفهم ليه عملت كده او اخدت خطوة زي دي بعتذر عن طول الرسالة بس الموضوع جايبلي صداع عايزة اشيله من دماغي و الي مكبر الموضوع انه حاليا معنديش صحاب و حسة بالوحدة الشديدة من الناحية دي و ده سبب كبير يخليني افكر في موضوعها اكتر
طريقتِك لطيفةة مش سخِيفةة أبدا حببتِي هه ^^. شوفِي انا مقدرة كل المشاعِر الجميلة اللِّي كنتِ بتتعاملي معاها بيها دِي بس خلينِي أقولك ان اي حاجةة بتقدمِيها لِـ حد مشاعِر او خدمةة او أي حاجةة متستنِيش بجد من الشخص ده مقابِل لإنه غالبا هيخذِلك المهم إنتِ تعملي الحاجةة اللي هتخليكِي مرتاحةة من نفسِك هه،خليني أفهمك حاجةة كونِك فِ علاقةة ونتِ فِـ العلاقةة دي صديقةة قومي بواجباتِك كَـ صديقةة فاهمةة وكذلِك لو أخت قومِي بواجباتِك كـ أخت وطالبةة اعملِي اللي عليكِ لِـ كونِك طالبةة او إبنه قومي بواجباتِك تجاه الوالِدين فهمانِي، شوفِي خليكِ الشخص اللي تتمنِي تقابلِيه زيه فاهمةة تمام كده ديِ حاجةة. حاجةة كمان بخصوص توقعاتِك من اللّي قدامِك متتوقعيش ولا تقولِي المفروض كان يعمل كذه وكده لإنه مش مفروض حاجةة أبدا لإن إحنا كلنا مش زي بعض حاولي تقعدي مع نفسك تحسمي الأمر إن انتِ فِ الصداقةة دي مقصرتِيش وأي غلط من شخص ممكن يكون مشكلةة عنده هو ومتتعبيش دماغِك فِ موضوع لِي حصل كده وازاي لإن انتِ مش هتعرفي الشخص اللي قدامك 100% للأسف. ممكن اقترح عليكِ حاجةة كمان فِ الصدقات الجايةة ليكِ انِك تكونِي صريحةة لو حد بدايةً عمل حاجةة زعلتِك تتكلمي معاها بينِك وبينها تاخدي على خطرك منها كده وتتكلمي انتِ وهيا فهمانِي متخليش بعد كده يحصل تراكمات عشان متتغطيش ع نفسِك وكده. بخصوص مشاكِل البيت أتمنى تكون فِـ تحسُن وتكون الأمور بقت أحسن، بخصوص كونِك كنتِي كارهه نفسك كونِك بنت ده اتمنى يكون إتغير اقعدي كده مع حالك ظبطي دنيتِك بصي على الحجات الحلوة اللي جواكِي ومشاعرِك الجميلةة دي والبرائةة اللي باينةة عليكِ دي ومتهنيش نفسِك ولا تخلي حد يأثر فيكِ ومتتعلقيش بحد غير اللي خلقِك فهماني حببتي أتمنى اكون فدتِك لاني حاسةة كلامي شويةة متلغبط! بس كده ربّ يبارك فيكِ 🤲🏻💜💜💜🌻"".
تم النشر الاثنين، ١٦ أكتوبر ٢٠٢٣
ملوكه الصغنونه الجميلة كل الموضوع انك اختصرتى العالم فى شخص واحد ...ده اللى عمل فيكى كده العالم كبييير وفيه ناس هتلاقى جواهم حاجات مختلقة وجميلة كتير بعد ما بنعدى مرحلة دراسية ونخلص الامتحان لو قولتلك ارجعيلها تانى هتقولى لااااااااا ...لا ممكن ابدا عارفه ليه؟ ..عشان خلاص بنبقى كبرنا ومش هنرجع نذاكر الف اسد وباء بطه ...عاوزين الاعلى والافضل عشان مخنا بيكبر اهى البنت دى زى الامتحان اللى خلص ...سيبك منه وشوفى اللى بعده عارفه انك انتظرتى منها كتير ....بس هو بذمتك فى قصب هتعصريه ينزل مانجا ...اكيد لا متنظريش من حد حاجة هو مبيعرفش يعملها خليكى فى المانجا وهتاخدى احلى حاجة وتتبسطى و انتى هتحبى تطلعى احلى ما عندك كمان
تم النشر الأربعاء، ١٨ أكتوبر ٢٠٢٣
طيب نبدأ بأول جزء يا ملك الاهل في الاول طبعا هو اي بيت بيحصل فيه خناقات، وانا مقدرة جدا انك كنتي دفلة صغيرة، متستحملش حتى الخناقات الصغيرة مش الكبيرة بس، ولكن زي ما قولتلك اي بيت لا يخلى من المشاكل. اهم حاجه انك تحاولي بقدر الامكان، انك متدخليش في المشاكل ده، هما هيتخانقوا وهيتصافوا مع نفسهم. تاني شئ وهو حب بابا ل اخوكي الصغير، هو طبعا غلط منك ولازم نبقى معترفين ب ده مع نفسنا ان مينفعش ناخد حب بابا لينا لوحدنا مش كده يا ملك، يعني فيه اخوكي وفيه ماما، وبابا هيفضل يحبك زي ما انتي وانتي بنوته والموضوع ملوش دعوة اذا كنتي بنت او ولد، قربي منه تاني واتعاملي معاه عادي ك بنت مش ك ولد. اما عن موضوع الصحاب من نص كلامك عن صحبتك خوخة .. لو كان الموضوع استمر بالشكل ده كنت هقولك انك تحاولي تعبري ليها عن مشاعرك وان مضايقة ولو لم تستجب للموضوع كنت هقولك قولي لها ان الصداقة ديه بتسبب ليكي ضرر ما وانك بالشكل ده انتي متضررة معاها. وكنت هقولك بعدها خلاص سبي الموضوع. - ولكن فيه شئ مهم جدا حابه اني اكلمك فيه، مش لازم خالص ان الشخص اللي نبادره المشاعر او الاحتياجات يا ملك يبقى هو كمان المفروض انه يعمل معانا كده. وده لاسباب كتير .. اولهم ان ممكن شخصية الشخص اللي قدامك اساسا ممكن متكونش نفس شخصيتك يعني مثلا انتي حنونه وهو لا جاف عاطفيا. السبب التاني ان ممكن الشخص ده يبقى اساسا مش حاطك في المكانة اللي انتي حاطاه فيها. وهنا انتي لازم تعرفي مكانه الشخص اللي انتي معاه. سواء انتي في نفس المكانة او لا. وهنا انتي بتقرري اما الانسحاب او انك تكملي. اللي انتي عملتيه كان ناقص له خطوة واحده بس، انك تتكلمي مع الاشخاص دول بصراحه شديدة، وتقولي لهم على اللي جواكي بكل صراحه وبعدين لو لقتي الشخص مكمل ع كده ومكانش ده مناسب معاكي ف تمشي. الكلام ده لبعد كده .. حاليا انتي ب ايدك برضه انك تكملي مع الاشخاص اللي بيحاولوا يتواصلوا معاكي حاليا .. ولكن تبقى عارفه انتي زي ما هتدي تبقى عارفه انك تاخدي برضه من الشخص اللي قدامك. ولو لقيتي اي وضع مش عاجبك انسحبي طبعا بعد ما توضحي. الدرس ده يعلمك يا ملك .. ف متقفليش على نفسك بالطريقة ديه، يعلمك ازاي تديري علاقاتك بعد كده. بتمنى ليكي التوفيق
تم النشر الاثنين، ١٦ أكتوبر ٢٠٢٣
ربنا يديكي علي قد نيتك كملي اسلوبك حلو جدا اتعاملي من قلبك مع كل الناس بس متخليش حد يشغل بالك انتي اولي بنفسك
تم النشر الثلاثاء، ١٧ أكتوبر ٢٠٢٣
لعرض السؤال في فدني اضغط هنا