السلام عليكم ورحمه الله وبركاته...نا عندي ٢٠ سنة من صغري ونا ابويا بيعاملني اسوأ معامله ضرب وإهانه وكنا زمان ساكنين في بيت عيلة كان يروح شغله هوا وماما ونا اقعد مع جدتي وعمتي وكانوا بيعذبوني حرفيا كانت تحمي السكينة وتمشيها علي جلدي وجدتي تعصر ليمون في عيني وكانوا بيضربوا ضرب وحش كبرت وكنت بخاف اقول لوالدي ووالدتي علشان بخاف منهم ليعرفوا واتعقدت منهم وكنت ضعيفة الشخصية جدا ومعرفش ادافع عن نفسي بسبب اللي كانوا بيعملوا كنت بتهان من كل الناس بس حاليا شخصيتي بقت اقوي بس مش قادرة اتخطي العنف بتاع زمان لما ابويا بيقولي كلمه وحشة حتي دلوقتي بفتكر كل حاجه كأنها فيلم بيتعرض قدامي فاكرة كل حاجه بالتفصيل والدي شخص اناني مش بيحب غير نفسه والمشكلة أنه بيتدايق من رد فعلي لما يضربني ويقولي انتي قلبك اسود ومش محترمه وخصوصا بعد اللي حصل الشهر اللي فات هزقني في الشارع اتجرحت اوي لحد دلوقتي م عارفه انسي لحد دلوقتي بيضربني..وعمي الكبير قال عليا هوا ومراته وبناته كلام وحش اوي انتهك في عرضي بقالي سنتين مش بكلمه وعندي عماتي لما يجيو لازم يطلعوا فيا عيب الدنيا كله ويعايروني بيه نفسي أبطل افكر في كل اللي حصلي اينعم مستحيل انسي بس مش عايزة كل شوي اشوف كل حاجه قدامي واتدايق واتقهر وتصعب عليا نفسي عمري ما شوفت من عيلة ابويا حاجه كويسه ولا ابويا ذات نفسه نفسي اشيلهم من دماغي
انتي بطلة بعد كل ال مريتي بيه ده و شخصيتك مش ضعيفة طبيعي تاخدي وقت عبال م تستجمعي قوتك عشان تاخدي موقف ،، حاولي بعد كده متسمحلهمش ابدا يقللو منك حتى لو وصل الموضوع انك تبلغي عن اي حد يضربك ردي عليهم و هما هيخافو و مش هيقربولك و طبعا اهتمي بنفسك و مستقبلك سواء دراستك او شغلك بحيث تقدري تستقلي بنفسك فأقرب وقت و متحتاجلهمش فحاجة و ادعي ربنا كتير يهديهم و يثبتك و يقويكي ربنا معاكي يارب
تم النشر الجمعة، ٢٧ أكتوبر ٢٠٢٣
حبيبتي حاسه بيكي جدا وبألمك والماضي اللي سايب ندوب فيكي بتسببلك في الحزن والحاضر اللي مازال بيؤلمك نصيحتي ليكي اولا ارفعي تقديرك لنفسك انتي بطله مريتي بازمات ومواقف صعبه ومؤلمه واتحملتي خليكي فخوره بنفسك وبقدرتك علي التحمل واشتغلي علي استحقاقك انتي تستحقي وربنا خلقك ليكي قيمه ومكرمه اي اساءه او اهانه او تنمر من اي حد ده يرجعلهم وللي جواهم مشكلتهم هما مش مشكلتك انتي مش كلامهم ثانيا حطي حدود مع اي حد متسمحيش ليهم يتجاوزوها وقفي كل واحد عند حده ومتقبليش اهانتهم ردي عليهم وخليكي واثقه من نفسك متخافيش محمد علي كلاي كان ليه مقوله جميله : عش ضعفك امام الله فقط ثم اخرج لهم بكامل قوتك اما باباكي فهر عمل اللي كان يعرفه واتربي عليه في تربيتك وفي النهايه ابوكي مينفعش نتعدي حدودنا معاه احترميه بس اقفي قدام اي اهانه منه وعبري عن مشاعرك ورفضك لده بهدوء وخلي كل الظروف الصعبه دي حافز ليكي انك تنجحي وتتطوري نفسك وتخرجي من البيئه المؤذيه دي اما اوجاع الماضي دي صدمات متخزنه في ذاكرتك محتاجه تتعالجي منها ربنا معاكي ويكتبلك الخير كله يارب
تم النشر الأربعاء، ٢٥ أكتوبر ٢٠٢٣
حسبي الله ونعم الوكيل فى اى حد اذاكى من عيلة والدك وربنا مبيضيعش حق حد واكيد هما كان بيتعمل فيهم كده زمان يعنى اكيد هما اتربوا بالتربيه المؤذيه دى عشان يطلعوا كل العقد دى فيكى يحبيبتى بجد انا اسفالك بالنيابه عنهم والله 🤍 بالنسبه لموضوع شخصيتك الفكره أن اى حد بيتعرض للتنمر أو التعذيب الجسدي أو اى نوع من أنواع الإهانات بيشوف العالم بنظره مختلفه وبيشوف انو مستعبد وكمان حاجه قليله اوى ف بيتولد وهو معندوش القدر الكافى نن الثقه انو يواجه وده بيرجع للماضي بتاعو 🤍 بالنسبه للماضي بتاعك انا هكون معاكى صريحه جدا انا عارفه انك هتستغربي لكن مفيش حد بيقدر ينسا الماضي بتاعو ، الفكره أننا ممكن نتعامل معاه بطريقه احسن ؟ احنا دماغنا الذكريات الي فيها مينفعش تتمسح بأستيكه مثلا لا احنا غظب عننا بنحتفظ بذكريات دى وبالذات لما بتكون شاغله تفكيرنا بشكل كبير مينفعش ننسا قد ما نحاول نشتغل علي فكرة اننا نقدر نتعايش معاها الاول انتى لازم تكونى عارفه أن كل الي حصل ده كان غظب عنك انتى انسانه كويسه جدا جدا المشكله ان البيئه الي حواليكى كانت غير سويه نفسياً وده باين علي تصرفاتهم الي عمرهم ما هيتغيروا لأن هما حتى مفكروش يصلحوا الغلط بل قالوا كلام ف عرضك وده من اسوأ انواع الأذى .. انتى جواكى حد كويس علفكرا اى حاجه انتى كان نفسك تعمليها أو كان نفسك تتعمل ليكى وانتى صغيره اى مشاعر واهتمام كان نفسك تلاقيهم اديهم لولادك انتى صبرتى كتير اوى سنين كتير اكيد ربنا هيعوضك بناس كويس وأهل كويسين ف المستقبل لما تتجوزى وتخلفي إنشاءالله 🤍 بالنسبه لوالدك ف الواضح أن هو شخص معندوش مشاعر ومش هيتغير واهلك كلهم كده .. فى مقوله حلوه اوى بتقول ( لا يمكنك أن تشفي من نفس البيئه التى جعلتك مريضاً) يعنى مينفعش تتعالجى أو تتخطى حجات حصلتلك ف الماضي وانتى حرفيا عايشه مع ناس بيفكروكي بيه ! انتى مش هتعرفي ولا هتقدرى حاولى تعتمدى علي نفسك وتحطى ف دماغك انك لازم تطلعي من برا البيئه المؤذيه قبل ما تكونى زيهم لان اكيد عمتك متولدتش مؤذيه كده اكيد شافت مامتها بتعمل حجات وبقت مؤذيه زيها ف انتى ممكن غظب عنك تبقي بنفس طباعهم ف حاولى تبعدى عنهم أو تشتغلي علي نفسك لحد ما تلاقي مهرب وتقدرى تتعالجى وحاولى تصاحبي مامتك أو اخواتك ممكن حد يقف جمبك وربنا يهون عليكى ويجبر بخاطرك ويعوضك خير يارب 🤍
تم النشر الثلاثاء، ٢٤ أكتوبر ٢٠٢٣
قولي وافوض امري الى الله واهجريهم هجر جميل يعني تخلي عنهم نفسيا اعتبريهم ناس ربنا باعتهم ليكي اختبار واصبري وبس لا هم اهلك ولا غيره ودايما ادعي لنفسك بكل خير وهاقولك تاني ولازم تبتعدي عن ما يؤذيكي متقعديش معاهم لما يجو واعتزلي كل حاجه وحبي نفسك وطوريها اهم من كل دول
تم النشر الأربعاء، ٢٥ أكتوبر ٢٠٢٣
ادعي كتير لربنا في القيام ❤️
تم النشر الجمعة، ٢٧ أكتوبر ٢٠٢٣
اصبري واحتسبي الأجر وأدعي كتير
تم النشر الثلاثاء، ٧ نوفمبر ٢٠٢٣
ربنا يجبر بخاطرك ويفرح قلبك 💙
تم النشر الثلاثاء، ٧ نوفمبر ٢٠٢٣
لعرض السؤال في فدني اضغط هنا