السلام عليكم و رحمة الله و بركاته
أنا بطبيعتي لما بضايق مش بحكي لحد حاجة و لما نفسيتي تكون تعبانة مبحبش اقول لحد لأني متأكدة ان محدش هيفهمني و بندم لما بقول و مبرضاش اشغل حد بمشاكلي و اقرفه و لما بحكي بحكي لواحد. من صحابي بس مش ع طول، لكن أهلي مش بعرفهم حاجة غير لما اكون وصلت لدرجة الانفجار و جبت اخر اخري و ببقى مش قادرة و الموضوع يوصل معايا لمشاكل نفسية و جسدية ساعتها بتكلم بس برده برجع اندم ان انا اتكلمت بس انا ببقى عايزة مساعدة بس خايفة احكي و اندم
بصي اللي إنتي بتمري بيه ده طبيعي جدًا لأن في ناس بتفضل تحتفظ بمشاكلها جواها لكن ده مع الوقت بيرهق النفسية جدًا الحل إنك تحاولي تلاقي حد تثقي فيه فعلًا وتتكلمي معاه حتى لو مش بتطلبي منه حل بس مجرد الفضفضة بتريح ولو خايفة تندمي بعد ما تتكلمي ممكن تجربي تكتبي اللي مضايقك في ورقة أو على موبايلك وبعدها تشوفي هل فعلاً الفضفضة دي فرقت معاكِ ولا لأ أهم حاجة متسيبيش نفسك توصلي لمرحلة الانفجار لأن ده بيتعبك أكتر خدي وقتك ومتضغطيش على نفسك وكل حاجة هتتحل مع الوقت
تم النشر الأربعاء، ٥ فبراير ٢٠٢٥
بص انت مشكلتك انك بتكتم جواك كل حاجة و ده بيخليك توصل لمرحلة الانفجار لأنك مش متعود تفضفض مع حد و كل ما تحاول تحكي تحس ان محدش هيفهمك او تحس انك تقيل على الناس فترجع تندم و تقفل تاني اللي ممكن يساعدك انك تبدأ تكتب كل اللي حاسس بيه في نوتة او حتى على الموبايل بدل ما تخليه جواك لأن الكتابة هتساعدك تفكر بشكل اوضح و تخفف عنك شوية كمان حاول تختار حد ترتاح له و تبدأ تحكي له حاجة بسيطة الأول مش لازم كل حاجة مرة واحدة المهم انك تبدأ و مع الوقت هتلاقي الموضوع بقى اسهل و طبيعي كمان لو شايف انك مش قادر تحكي لحد جرب تمارين الاسترخاء او التأمل لأنها ممكن تساعدك تهدى شوية و متحسش بالذنب لو اتكلمت او لا الأهم انك تلاقي طريقة تناسبك عشان متوصلش للانفجار ده تاني .. ربنا يروق بالِك ❤️
تم النشر الجمعة، ٧ فبراير ٢٠٢٥
وعليكم السلام ورحمة الله ده فى الاغلب بيكون بسبب الافراط فى توقع ردود الافعال من الاخرين او من اننا بندور على المثاليه ومش عاوزين نظهر اننا بنغلط انتى بتحسى باايه اكتر ؟
تم النشر الأربعاء، ٥ فبراير ٢٠٢٥
ابتدي كتابة مذكرات في نوتة التليفون انا زيك و مبثقش في اي حد او احكيله عن مشاكلي حتى عيلتي و ابتديت اكتب كل اللي بيضايقني و يفرحني في نفس الوقت في النوتة على برنامج مايكروسوفت نوتس عشان سهل و مبيعلقش و الحمد لله مش بحس بنفس الرغبة في اني افضفض لحد عن مشاكلي و ربنا يعينك ان شاء الله
تم النشر الثلاثاء، ٤ فبراير ٢٠٢٥
وعليكم السلام ورحمة الله وبركاته. أحب أن أشير إلى أن مشاعرك عادية ومشتركة بين كثير من الناس، فالشعور بالخوف من أن لا يفهمك الآخرون أو أن تزعجيهم بمشاكلك يعتبر شعورًا طبيعيًا. ومع ذلك، من المهم أن نتذكر أن الحديث عن مشاعرك ومشاكلك ليس عبئًا على الآخرين. في الواقع، قد يشعر الأصدقاء أو العائلة بالسعادة لأنهم يستطيعون مساعدتك ودعمك. عندما تصلين إلى مرحلة الشعور بالضغط أو الانفجار، فهذا يشير إلى ضرورة التعبير عن ما داخلك قبل أن يتفاقم الأمر. يمكنك البدء بالتحدث مع صديقة مقربة أو عائلتك بأسلوب بسيط وبدون ضغط، مثل أن تذكري أنك تشعرين بحاجة للمساعدة أو مجرد الحديث، دون الدخول في تفاصيل عميقة قد تشعرك بالخوف. يمكنك أيضًا كتابة مشاعرك في دفتر أو مذكرات، فهذا يساعدك على فهم نفسك بشكل أفضل ويمكن أن يكون مقدمة للتحدث مع الآخرين. تذكري، لا يوجد خطأ في طلب المساعدة، بل هو خطوة شجاعة نحو تحسين حالتك النفسية. إذا كنتِ تعانين من مشاكل نفسية تؤثر على حياتك اليومية، من المهم جدًّا التفكير في استشارة مختص نفسي يمكنه مساعدتك بشكل احترافي. لا تترددي في اتخاذ هذه الخطوة، فالصحة النفسية مهمة جدًا. أرجو أن أكون قد قدمت لك بعض الأفكار المفيدة وآمل أن تجدي الدعم الذي تحتاجينه.
تم النشر الثلاثاء، ٤ فبراير ٢٠٢٥
انا زيك بالظبط والموضوع متعب نفسيا
تم النشر الأربعاء، ٥ فبراير ٢٠٢٥
انا زيك بردو بس بيكون ليكي اكيد صاحبه مميزه تقدري تتكلمي معاها بحريه بدون خوف لو الموضوع عندك صعب روحي لدكتوره تنميه بشريه اتكلمي معاها عادي جدا
تم النشر الأربعاء، ٥ فبراير ٢٠٢٥
الحل ببساطة إنك تبدأ تعبر عن مشاعرك شوية بشوية بدل ما تكتم كل حاجة لحد ما تنفجر. اختار حد تثق فيه وتحكيله ولو مش مرتاح للكلام، جرب تكتب اللي حاسس بيه. كمان حاول تفرغ طاقتك في حاجات مفيدة زي الرياضة أو هواية بتحبها.. وأهم حاجة، ما تندمش بعد ما تفضفض، لأن الفضفضة حاجة صحية لو كانت مع الشخص الصح وبالطريقة الصح...
تم النشر الأربعاء، ٥ فبراير ٢٠٢٥
انتي حساسه جدا وده واضح ،ده ، حاولي تكتبي كل شي مدايقك ده اصح مرحله بجد وصلي وادعي كتير اوي في كل صلاه ربنا يصلح حالك ويرزقك بالزوج الصالح الي يكونلك نفسك وسكنك آمين
تم النشر الأربعاء، ٥ فبراير ٢٠٢٥
بندم لأن بحس ان الشخص مش فاهمني أو ان انا بقرفه بمشاكلي أو ان ممكن يستغل المشاكل دي و يعايرني بيها، و ساعات بتنتهي النقاش بشناق بدل ما كان فضفضة
تم النشر الثلاثاء، ٤ فبراير ٢٠٢٥
عليكم السلام ورحمة الله وبركاته، فاهماكي جدا ، بس انتي بترجعي تندمي لي ؟ عشان قولتي ولا الشخص أبدى رأي محبتهوش ، أو بتحسي انو لاء مفروض مكنتش احكي اي الي حصل يعني لما حكيت ، ،؟
تم النشر الثلاثاء، ٤ فبراير ٢٠٢٥
لعرض السؤال في فدني اضغط هنا