جماعه انا مشكلتي طويله اوي وانا عارفه ملهاش حل بس انا عايزه افضفض ، انا وحيده معنديش اخوات عندي ٢٢ سنه من صغري كان فيه مشاكل كبيره بين بابا وماما انتهت انهم هيعيشو سوا في نفس الشقه عشاني بس العيشه هتبقي منفصله يعني محدش له دعوه بالتاني ، ماما صاحبتي جدا طول عمري بحكيلها ادق تفاصيلي كانت دايما بتفهمني وتسمعني ومتحبش تشوفني زعلانه الكلام ده وانا مراهقه بس الفكره اننا اغلب الوقت بنقضيه في بيت تيته مامت ماما مع خالتو وتيته وكدا وهما اللي مربيني اصلا بسبب ظروف ماما وبابا وبحبهم جدا والله العظيم بس مشكلة التفاهم بينا للاسف مدمره علاقتنا ، يعني خالتو عايزاني اسمع كلام يضايقني ومردش وبالنسبالي دي حاجه غصب عني بتعصبني اوي خصوصا لما حد يضايقني عن قصد فأرد عليها واطلع انا الغلطانه والبيت كله يتقلب عليا ماما ممكن متعبرنيش بالاسبوعين والتلاته عشان خاالتو زعلانه حتي لو هي اللي غلطانه في حقي وقالتلي اكتر من مره انا ممكن اجي عليكي عشانها لكن مقدرش اعمل العكس اما بسمع الجمله دي بتصعب عليا نفسي انا اه في الاغلب عصبيه وبفهم الكلام غلط وبنفعل بسرعه بس والله ساعات بتغلط في حقي وماما متتكلمش بل بالعكس تطلعني غلطانه ، ماما اتحولت من صاحبتي اللي بحبها جدا لواحده غريبه معرفهاش ومبقتش احبها حقيقي انا بطلت احكيلها تفاصيل حياتي وبطلت اتكلم معاها عشان هي اتغيرت بقيت احس انها مش بتحبني مبيهماش غير خالتو لدرجه ان اي حاجه خالتو تقولها تبقي امر انا حاسه اني يتيمه ووحيده نفسي مره تسألني مالك قبل ما تزعقلي نفسي تلتمسلي العذر مره حتي لو بيني وبينها مش قدام حد نفسي تقولي معلش استحمليها مش تزعقلي طول الوقت عشانها ده انا ببقي مموته نفسي عياط تبصلي بقرف وتمشي محدش فاهمني كله شايف اني تربيه فاشله ومدمنة موبايل واصحابي وماسكه في واحده صاحبتي انطوائية شويه تقولي هي دي اللي مبوظه حياتك ابعدي عنها وصحابتي اقسم بالله اغلب من الغلب مبتعملش اي حاجه لكن ماما مش شايفه غير خالتو وزعل خالتو وبس دي حاجه قاهراني احساس وحش انك تعيش في مكان محدش فاهمك ولا حتي عايز يفهمك انا بروح اتكلم معاها عن حاجه مضايقاني مبترضاش تسمعني وتقولي انتي واخده دور الضحيه بطريقه مفيش حد مظلوم غيرك اقسم بالله ببقي ميته عياط ولا تسأل فيا انا نفسي اموت وربنا يريحني انا كل يوم في تعب نفسي كدا بسببهم ومحدش حاسس بيا ربنا العالم انا حاسه بإيه
السلام عليكم ورحمه الله أتفهم ما تعاني منه ، و أتفهم شعور الابنه الوحيده ، مامتك بتحبك و بتخاف عليكي لاشك في هذا و لكن هذه طبيعه البشر عندما تتحدثين مع الأكبر منك سنا بطريقه غير لائقه فأنتي هنا تقومي بضياع حقك بيدك، و هنا انتي محتاجه تعرفي ازاي تطالبي بحقك بطريقه متجبش عليكي الغلط، يعني خالتك قالت كلمه زعلتك أو مينفعش أنها تتقال تتكلمي بكل وضوح و تقولي لها يا خالتي لو سمحتي انا مبحبش حد يكلمني بالاسلوب دا، او مترديش عليها و تقولي لمامتك يا ماما انا مش بقيت ارد علي خالتي لما قالت كذا لو سمحتي كلميها بينك و بينها و خليها تتوقف عن اللي بتقوله دا. لو عندك اندفاع و بتتعصبي بسرعه انتي هنا محتاجه تعملي استوب STOP 🛑 لاندفاعك : 1️⃣ متديش اي رده فعل فقط تراقبني افكارك و مشاعرك. 2️⃣ تبدأي تاخدي نفس عميق و ليه تمارينات علي اليوتيوب. 3️⃣ راقبي افكارك و تأثيرها علي عقلك، و راقبي مشاعرك و تأثيرها علي جسمك. 4️⃣ اتكلمي عن اللي حساه بتركيز و تقبلي مشاعرك و ادمجيه مع الأعمال اللي هتقومي بيها. ✴️ اسلوب او تقنيه توقف 🛑 هتساعدك في أن العصبيه اللي عندك تقل بشكل كبير و ربما دا اللي مسبب ليكي المتاعب. 🔹 و قربي من مامتك تاني و حاولي توصلي لنقطه وسط، خصوصا انها عايشه حياه زوجيه من برا و لكن في الحقيقه هي اتخلت عن كل شئ فقط لتكوني في بيت متوازن حتي و إن كان فيه بعض المشاكل، و لكن الانفصال الكامل مشاكله اكبر و اكبر. اعذريها و بصي لها كما لو مبتحبش حد في الدنيا دي غيرك، و شوفي التحسن الكبير اللي هيحصل في علاقتكم. تحياتي لك 💐
تم النشر السبت، ٢٩ يونيو ٢٠٢٤
لما بنفرض على نفسنا الباب المقفول يبقى ما تلوميش حد ثاني غير نفسك انت لانه انت اللي قافله الباب انت اللي مش سامحه لنفسك تشوفي حلول فلو اي حد فينا دلوقتي قال لك اي نوع من الحلول انت مش هتشوفيه ليه لان هو دلوقتي موجود ورا الباب المقفول اللي انت قافلاه قفلاه ازاي بمجرد الفكره دي انه انا عارفه انها مشكلتي ملهاش حل. فدي اول نقطه فانا مش هقول لك حلول انا هقول لك. شويه كلام يا جوز انت بسببه تقرري تفتحي الباب المقفول الاول علشان تقدري تشوفي اللي وراها. اممم ان يكون عندنا نوع من الحاجات ما لناش يد فيهاش تحكم فيها ده مش معناه ابدا انه انا كده ما اقدرش اعمل حاجه. كلنا في الحياه موجودين علشان في حاجات. هتكون هي عوامل خارجيه غصبا عننا ولكن احنا نقدر نتاقلم ونكون مرميين بان احنا نقدر نتعامل معها على وضعها حتى لو مش هنقدر نغير فيها اوضاع زي اوضاع الاب والام سواء الاب والام صعبين سواء الاب والام مش متفاهمين سواء عايشين مع بعض او منفصلين ايا كانت الاوضاع فده وضع انا ضروري ابدا ارتب نفسيتي وحياتي عليك لان لو قعدت مستنيه الوضع ده يتغير علشان انا اكون احسن فخلاص كده شكرا انا عملت زي ما انت عملت كده وقفلت باب وفضلت واقفه قدامه. طيب ازاي بنتاقلم على ظروف وحشه من الاقلام على الظروف وحشه نتقبلها يعني زي بالضبط كده لما اتخلقت واتولدت بلون جلد معين يعني لما تكره تستفيدي ايه يعني هيتغير في يوم من الايام لا فهي الظروف اللي حواليه فيها كده برده نتقبلها على حالها وبنشوف اقدر اعمل فيها ايه في حد بيختار ان هو كل اما هينزل هيقوم حاطط داهم جسمه ولون ثاني فهو ده بالنسبه له الحل اللي هو هيتصرفه قصاد الحاجه اللي هو مش مش متقبله في حد ثاني لا هيتقبل لون هو ده اللي ربنا خلقني بيه انا مش هقعد ارفضه واللي مش عاجبه ياخد دماغه في الحيط. حتى لو كان هو بيتمنى يعني لون غيره طيب لما بيكون في حواليا اشخاص انا مش عاجبني طريقتهم. والاشخاص دول الاشخصيات قريبه وعايشين معايا بعمل ايه ببقى مش هينفع خالص لما يكون الاشخاص دول اشخاص اكبر مني سنا ان انا ابقى طول الوقت ااا بعترض عليهم او بحاول ان انا اوجههم او اعدلهم لان مش دي الطريقه بتاعه التعامل مع الكبار خصوصا لو هم ليهم طريقه مش لطيفه. فخلينا نقول ممكن ايه يتعمل عموما في الحياه علشان الواحد يكون مرتاح اكثر اولا يتقبل كل الظروف اللي حواليه يشوف ايه اللي في ايده وهو يقدر يعمله وفي ايده يقدر يعمله يعني يبدا من عند نفسه ايه اللي هو يقدر يعمله اه طبعا في حاجات بتكون صعبه ولكن الواحد لما بيلاقي ان ده في الاخر هيصب في نتيجه وفي مصلحه هتخليه يوصل لشيء افضل يعني مثلا انه انا لو هاجي على نفسي وهدرب نفسي ان انا اعرف ازاي استقبل من اللي قدامي كلام وحش لان هو خلاص هو شخص طبيعته بيوجه الكلام بيوجه النصيحه او بيوجه النقد او ايا كان الشيء اللي هو بيقدمه بيقدمه بكلام صعب فبناء على ده انا مش هقدر اغير في الشخص ولكن اقدر اغير استقبالي انا للكلام ده وما اخذش الكلام ده على محمل الجد ولا اخذ الكلام ده واقعد افكر فيه ولا اي حاجه ولكن دي هتبقى الطريقه اللي انا بستخدمها بشكل مرن علشان ايه عشان اخلي الجو اللي انا عايشه فيه جو مريح اكتر علاقاتي الثانيه مثلا زي علاقتي بامي تكون افضل حتى لو عملت ده من باب البر ان انا هستحمل اختها او طريقه اختها اللي مش لطيفه عشان اكون بابرها هي يعني في كذا حاجه هي شكل من اشكال المرونه اللي انا ممكن اعمله علشان اخلي حياتي افضل لانه النتيجه انا اللي محتاجاها اكثر من اي حد ثاني مش بعمل ده عشان خاطر هم فرضوا عليا ده لكن انا مقرره انه انا هعمل ده علشان اخذ النتيجه اللي انا محتاجاها وحياتي تكون افضل فكري في الحاجات دي كويس قوي قوي قوي قوي وحاولي تفتحي الباب اللي انت قافلاه مقرره بيه انه ما فيش حل ان شاء الله الدنيا هتظبط معاكي احسن كثير.
تم النشر السبت، ٢٩ يونيو ٢٠٢٤
طيب ممكن تهدي خالص ومتخديش الموضوع كدا هي أكيد بتحبك بس عادي ساعات الواحد بيتأثر بحد ممكن هي متأثره بخالتك وكلامها وهي مش فاهمه ارتاحي وحاولي تخلي علاقتك بخالتك حلوه وريحيهم ممكن تكون وسيله عشان مامتك تفهمك عشان طول منتي علي عداوة مع أختها ممكن انتي كدا بتأكدي الي فدماغها ومخلياها تشوفك وحشه ممكن صعب عليكي تتعاملي زي الاول بس علي الاقل حاولي تتعاملي بتفاهم شوية و بأحترام وريهم دا واكسفيهم باحترامك ومتعانديش معلي متبقي علاقتك حلوه لحد ما مع خالتك وتأكدى لمامتك ده وتتكلمي معاها وتفهميها بهدوء وقوللها الكلام ده كلو وحاولي تخلي خالتك متدخلش فعلاقتكوا يعني اتكلمي آنتي ومامتك علي انفراد وحاولي تحلي المشاكل معاها و تسمعيها وتسمعك وقوللها انتي مضايقه فايه ومتسيبيش حاجه تأثر علي نفسيتك كدا اخرجي برا المود ده واعملي حاجه بتحبيها ومتسيبيش نفسك للمشاكل دي إلا متحاولي تصلحي علاقتك مع امك صدقيني رضا الوالدين مهم حتي لو فيهم اغلاط إحنا مش هينفع نصلحهالهم بس ممكن نقولهم عليها ومنكررهاش مع ولادنا اخرجي وصاحبي وعيشي حياتك متخليش حياتك بس تقف علي المشاكل دي
تم النشر السبت، ٢٩ يونيو ٢٠٢٤
فى البداية كده . من الواضح أن المحيط اللى انتى حاليا عايشه فيه فى حاجات كتير تحتاج انك تتفهمى الأمر بهدوء موقف انفصال الوالدين اثر عليكى تأثير نفسى كبير جدا وممكن كمان يكون سبب فى انفعالك وعصبيتك من ضمن الكلام انك قولتى انك بتفهمى الكلام غلط وبتنفعلى بسرعة .والدتك برضوا اكيد بتمر بظروف نفسية وضغوطات كتير وممكن تكون خالتك هى اللى قفت معاها وساعدتها فى الظروف الصعبه وعلشان كده بتحبها كتير بس مش معنى ده انها مش بتحبك بالعكس دى بتحبك جدا. بس ممكن مسافة التفاهم بينكم بعدت شويه. انتى مريتى بظروف صعبه ومشاكل كتير بس حاولى انك تتقربى منها وتفهميها وجهة نظرك بكل الطرق لانك انتى بنتها الوحيدة واكيد هتتقرب منك وهتسمعك وانتى كمان حاولى تهدى وممكن تفكرى اكتر من مره قبل ما تردى فى موقف معين أو تتاخذى قرار علشان تكونى فهمتيه صح وكمان اخدتى وقتك فى التفكير العصبية والانفعال مش بتحل لكن ممكن تزيد الأمور تعقيد . ممكن تسيطرى على عصبيتك انك تمارسى رياضه بتحبيها وممكن تكتبى اللى بتحسى بيه والموقف ايه وكمان تتكلمى مع صديقتك الموضوع هيختلف كتير وافتكرى دايما أن ربنا معاكى فى كل خطواتك وبيساعدك. وانك هتقدرى 🌷
تم النشر السبت، ٢٩ يونيو ٢٠٢٤
يا قلبي، بفهمك وبحس فيكِ. إنك تحسي بالوحدة وضيق الحال ده حاجة مش سهلة أبداً، ومشاعرك دي تستحق تتاخد على محمل الجد. أولاً خليني أقولك إنك مش لوحدك، وأي حد ممكن يمر بمرحلة فيها يحس إنه مش مفهوم أو مش مسموع. مش كل الناس بيفهموا نفس الطريقة ولا بيتعاملوا مع الأمور بنفس الشكل. بس الأكيد إنك محتاجة مساحة تعيشي فيها نفسك وتلاقي الراحة. جرّبي الخطوات دي يمكن تحسن شعورك: ابحثي عن هوايات جديدة : حاولي تشتغلي على حاجة موهوبة فيها أو تحبيها. دايماً بيكون عندك حاجة تملي وقتك وتخليك تحسي بالفخر. اتركي مساحة للتنفيس : اكتبِ مشاعرك على ورق حتى لو مش هتوريها لحد، كوني صريحة مع نفسك واعترفي بشعورك. ابني شبكة دعم : مفيش مانع تدوري على الأصدقاء الجداد أو تشتركي في نشاطات تقدر تتعرفي فيها على ناس جديدة. ممكن تلاقي ناس يحبوا يسمعوك ويدعموك. تواصل مع مختص : لو حسيتِ إن الأمور تفاقمت ومش قادرة تتحمليها، يمكن تلفي لحد متخصّص زي معالج نفسي. ده مش ضعف، بالعكس خطوة شجاعة للاعتناء بنفسك. الحوار مع ماما : جربي يكون بينك وبين ماما جلسة تتكلمي فيها بصدق وهدوء. قولي لها إزاي تحسين ومشاعرك بوضوح، وحاولي تلاقي لغة مشتركة تفهموا بعض بيها. وفكري دايماً إنك تستاهلي تكوني سعيدة، ومحاطة بالناس اللي يفهموا ويدعموك. مش لازم تتخلي عن نفسك ولا عن مشاعرك الحقيقية. انتي قوية وقادرة تعدي المرحلة دي، ودايماً هنا لو احتجتي أي حاجة.
تم النشر الجمعة، ٢٨ يونيو ٢٠٢٤
لعرض السؤال في فدني اضغط هنا