حابه اتكلم في حاجه بتحصل مزعلاني سيكا وحابه انكم تردو عليا من غير اي انتقاد لو سمحتو
من وانا صغيره ماما كانت بتخاف عليا ومش بتنزلني الشارع ولما كبرت اتشغلت في دراستي ومليش تعامل مع الشارع والجيران دلوقتي انا عندي ٢٠ سنه حرفيا متقدمليش ولا عريس حتى روحت برضو اشتغلت في مكان تبع دراستي بس برضو مش كان حد بيتقدملي كتير ولما حد كان بيتكلم كانت بتتعقد من بره ومفيش حد جه البيت خالص مع العلم انا الحمد الله على قدر من الجمال انا محجبه عيوني عسلي لون بشرتي ابيض رموشي حواجبي كثيفه متوسطه الجسم والطول ودراستي كويسه وليها مستقبل كويس الحمد الله لاحظت ان اختي الأصغر مني بتلت سنين بيتقدملها عرسان كتير وانا لا خالص لدرجه انها لمحت انها عاوزه تتجوز قبلي طبعا هي لسه صغيره وبابا مش يوافق وانا اكيد مش غيرانه من اختي علشان الكومنتات بالعكس فرحانه ليها انا بس مستغربه من نفسي ومدايقه بسبب الموضوع دا ياريت تفيدوني اعمل اي بالله عليكم انا الموضوع دا تاعبني مع العلم اننا ارياف
اسفه علي الاطاله ياريت تردو عليا
الحاجة دي المفروض ماتزعلكيش سيكا ولا حتى نص سيكا!! أولا سنك مش كبير ثانيا العبرة مش بكترة العرسان لأنك في الآخر هتتزوجي عريس واحد فقط! ثالثا الأمور بمقادير!
تم النشر الاثنين، ١١ سبتمبر ٢٠٢٣
انتي لسه صغيرة اوي على الزواج ... والموضوع حتى مش بيقاس بالشكل ولا الطول ولا الحجم ولا بأي حاجه من الحاجات ديه. وحتى مش بيتقاس بانك بتخرجي او لا. كل ما في الموضوع انه نصيب واقدار ولا اكتر ولا اقل. ونصيبك هيجي .. ومش بكتر العرسان ولا حاجه، لانك اكيد ف الاخر هتختاري واحد بس.
تم النشر الثلاثاء، ١٢ سبتمبر ٢٠٢٣
لو اختك سنها مناسب للزواج رحبي بزواج اختك لابيك وشجعيه انه يوافق الزواج نصيب واستعين بالله واصبري وان شاء الله ربنا يرزقك الزوج الصالح واجعلها دعائك دايما انا تزوجت زوجتي من عشر سنين وكان عمرها 26 سنة والحمد لله على فضل ربنا علينا ورزقنا باولاد ماشاءالله تبارك الله ربنا يحفظهم واسأل الله ان يرزقك الزوج الصالح والذرية الصالحة وان يثبتك علي طاعته
تم النشر الثلاثاء، ١٢ سبتمبر ٢٠٢٣
الجواز رزق وكله بأمر الله في الوقت المحدد كل واحد رزقه مختلف سواء أنتي أو أختك متركزيش مع أختك لأن لازم يكون عندك رضا داخلي أن رزقها مختلف عنك وده ملوش علاقه بأنها أصغر منك أو أنك جميله الأرزاق بتتوزع حسب إراده الله عز وجل سيبها لله وركزي مع نفسك وأرضي ربنا وأرضي من جواكي بتوزيع ربنا للأرزاق وربنا يفرح قلبك ويسعدك يارب
تم النشر الثلاثاء، ١٢ سبتمبر ٢٠٢٣
السلام عليكم ورحمة الله يا حبيبتي متزعليش نفسك ولا تقلقي على الموضوع ده. كل شيء بوقته إن شاء الله. المهم أنك تكوني بنت صالحة ومتدينة. ربنا مش بينسى حد. استمري في حياتك الطبيعية وركّزي على نفسك ودراستك أو شغلك. خلي بالك من مظهرك وكوني واثقة من نفسك. بالصبر والدعاء ربنا حيرزقك باللي فيه الخير الك إن شاء الله. ما تقلقيش كله بأجله. أكيد فيه حكمة ربنا في كده. أسأليه إنه يهديكي للصواب ويرزقك بالزوج الصالح في الوقت المناسب. سيبك من الناس إنتِ عارفة نفسك كويس. ربنا معاكي يا قمر ويفرح قلبك.
تم النشر الاثنين، ١١ سبتمبر ٢٠٢٣
بصي أنتي شايفه حال الدوله دلوقتي فا فعلاً الجواز بقا شبه نادر يعني بدل ما كنا بنشوف زفه على أقل تقدير خاالص كانت بتبقا كل شهر زفه دلوقتي لو لقينا زفه بتبقى كل ٦ شهور مره ولا حاجه وبتبقا حتى لناس منعرفهاش فا فعلاً حالياً معظم شباب مصر مش قادرين على الزواج متفكريش كتير في الموضوع دا كلوا في أوانه إن شاء اللّه
تم النشر الاثنين، ١١ سبتمبر ٢٠٢٣
اول حاجه لازم تكوني عارفه انك ملكيش ذنب في حاجه زي كده دي حاجات دي حاجه بتكون نصيب من عند ربنا و كمان انتي مش سنك كبير بالعكس انتي لسه صغيرة و الحياه لسه شايللك كتير و مش عارفه بكره هيكون عامل ازاي متزعليش نفسك و خليكي دائما في موضوع قوة و عندك ثقة بنفسك محدش بيختار نصيبه و يمكن يكون نصيبك ان شاء الله كويس و في افضل حال و تفتكري
تم النشر الخميس، ١٤ سبتمبر ٢٠٢٣
متستعجليش اوعي تبصي وتفكري في الموضوع ده بالذات بالطريقه دي لازم تعرفي انه رزق ونصيب مش جاي ربنا شايل عنك شر مش هتقدرى تتحمليه او ربنا شايل ليكي خير تعرفي تقدريه متفكريش كده علشان مش مع أي شخص مش مناسب ترضى وتتنازلي علشان ترضى شعورك ادعي دايما ارزقني يارب الخير ربنا يسعدك ويهنيكي يارب
تم النشر الأربعاء، ١٣ سبتمبر ٢٠٢٣
لعرض السؤال في فدني اضغط هنا