السلام عليكم ورحمة الله وبركاته
انا عارفه الميك آب حرام شرعا لقول الله تعالي ولا يبدين زينتهن إلا لبعولتهن صدق الله العظيم
هو انا عارفه انه حرام وبحطه بس مش علشان اتزين وكدا لا ابدا
بحط كونسيلر علشان اداري السواد اللي تحت عيني وعلشان عندي أثار حب شباب مش زينه خالص يعلم ربنا انا بحط خفيف جدا
انا كدا هتحاسب علي الميك آب ؟؟
وكمان انا اصلا اللي بحطه حاجات خفيفه جدا علي عكس البنات اللي بشوفهم في الشارع والجامعه
وبرضو في حتي البرفيوم هو حرام لقوله صلي الله عليه وسلم
أيما امرأه استعطرت فمرت علي قوم ليجدوا من ريحها فهي زانيه
انا برضو بحط برفيوم بس نوع هادي ومش لي ريحه اوفر
كنت عايزه اقول بقي اني بحطه بنيه النضافه ليا مش علشان حد يشم البرفيوم وكمان علشان الحر والجو مش مستحمل
الميك اب هنا حرام بغرض إخفاء عيوب البشره وشحوب الوجه من الأرهاق ؟؟
الميكب حرام فعلا إلا لو كان لزوجك وانا فاهمه نيتك وانك قصدك تدارى اى عيب مش عشان تتزينى ولكن حاولى تعالجي المشاكل الى ف بشرتك زى الهالات والحبوب وغيرها من مشاكل تانيه بالعكس أنا بشوف أن الميكب بيزيد من المشكله يعنى لازم تعالجي مشاكلك الاول فاهمه ربنا يهديكى يارب ، تانى حاجه بالنسبه لموضوع البيرفيوم والنظافه كلمتين مينفعوش يكونوا ف جمله واحده ايه الفايده من أن واحده تحط بيرفيوم وهى اصلا مبتهتماش بنفسها ولا ريحتها الكلام مش عليكي ولكن بتكلم على فكره أن البيرفيوم عمره ما كان حل لمشكله النظافه بالنسبه لموضوع الريحه ايه فكرتك عن ريحتك تكون مش حلوه لو بنتكلم عن العرق فى مزيلات عرق كويسه واسعارها كمان كويسه لو هنتكلم عن نظافه الفم هنتكلم عن فرشه ومعجون أسنان شىء أساسي ولو حابه ممكن كمان نحط غسول فم ولو هنتكلم عن الريحه فى حجات كتير هنهتم بيها اعملى سيرش على اليوتيوب عن ناس بتتكلم ف الموضوع ده البيرفيوم ملهوش علاقه بالنظافه ابدا
تم النشر الخميس، ٢٦ سبتمبر ٢٠٢٤
البرفيوم ارجوكى ارجوكى بلاش ..ومفيش حاجة اسمها هادى خالص حطى مزيل عرق ريحته كويسه لنفسك وممكن مخمرية متكونش نفاذة وتكون على الجسم فقط ..بلاش الحاجات اللى بتتبخر من ع الهدوم وتوصل لاى حد معدى جنبك دى وتبقى عرضه لشيل ذنب انتى فى غنى عنه الميكب متقوليش بحط خفيف والفيصل هنا مش ان فى غيرك بيحط اتقل ...لان ممكن نقارن نفسنا باللى مش حاطه حاجة خالص وملتزمة بعدم الزينة لله ومش هاممها مين يشوف الهالات ولا الحبوب الزينة هى دى فكرتها ...انك تكونى بتتجملى او بتضيفى شىء عشان تطلعى حلوه للى بره بيتك فاعتقد الكونسيلر بتحطيه للغرض ده فهينطبق عليه بند الزينة لو ركزتى انك تعالجى بشرتك وتكون طبيعتها على طول مش محتاجة اى اضافات هيكون افضل واتقاءا لاى شبهات انا مش بناقش حلال وحرام لانى مش اهل للفتوى ..انا عرضت عليكى رايى واللى عدى عليا زيك كده من فترة كبيره فى سنى اصغر وجاهدت نفسى فيه الحمدلله وربنا يثبتنا جميعا
تم النشر الخميس، ٢٦ سبتمبر ٢٠٢٤
اعتقد الميكب في الحالتين (الزينة او اخفاء العيوب) حرام. https://youtu.be/HSD1SYADZ_Q?si=5k068rShVPVYHzLC https://www.islamweb.net/ar/fatwa/97550/حكم-وضع-المرأة-كريم-الأساس-على-وجهها-عند-الخروج-إخفاء-التشوه انتي ممكن تعالجي الحبوب والمناطق الغامقة عند دكتور جلدية والنتيجة هتدوم معاكي اما الميك اب مؤقت وليه اضرار. والبيرفيوم عشان ماحدش يشمه ويبقى حرام لازم يكون خفيف جدا بحيث لو حد قعد جانبك مايشموش اما تحطي بودي لوشن او مخمرية.
تم النشر الخميس، ٢٦ سبتمبر ٢٠٢٤
افضل حاجه تعمليها انك تسالي متخصص لان ما فيش حد تقدر انه يجاوب لك قريب جدا بس بيتهيا لي ناس متاكده الميك اب في اي حاله حرام والبرفيوم برده حرام جدا وبس اتمنى ان انتي تكوني استفدتي من اجابتي وعلى فكره طبعا طبعا طبعا الدين اهم من العلم
تم النشر الجمعة، ٢٧ سبتمبر ٢٠٢٤
نصيحة يبقي بلاش .. و خلي نفسك مرايتك مش غيرك في موضوع الخلقة و الشكل اما في الأخلاق ايوه غيرك يكون مرايه ليكي تصرفاتك و خلقك بس لازم غيرك ده يكون اصلا انسان مشهود له هو كمان بحسن الخلق ، مش عيب يبقي عندك حبوب شباب دا شيء طبيعي و انا شاب بقولك عادي و الله احنا مش بنبص للبنت انها مقززة مثلا او وحشة لو عندها حبوب شباب او خلافه لا عادي .. انا لو عملت كده ابقي انسان تعبان في دماغي او عندي ازدواجية في المعايير لأني انا نفسي اسمر و مريت بموضوع العنصرية المستترة اللي موجودة عند بعض الناس في مصر و هكذا .. لما الرسول يقول حاجه يبقي الموضوع انتهي مهما كانت النتيجة .. مواد التجميل بتخفي لكن بتدمر خلايا البشرة برضه ، و الانثي عامة لما بتتجمل و تتبرفن و تعدي قدام الناس التقي اللي فيهم بيبغضها و اللي في قلبه مرض بيطمع فبلاش .. اتمني لك التوفيق و خليكي فاكرة تقدري تعترضي علي كلامي و تختلف معايا و لكن مفيش اي حجج قدام ربنا .. و لعلمك الرتوش الصغيرة اللي في الجسد بتعمل هوية للشخص و بتخليه مش نسخة من غيره و دي نظرة فلسفية شوية بس القصد ، المبررات مع البشر ربنا مفيش مبررات معاه .. ربنا يهديني و يهديكي .. النظافة الشخصية بمستوياتها حاجه و المكياج حاجه تانية .. خليكي طبيعية و سيبي الناس تتقبلك او تبعد عنك علي هذا الأساس .
تم النشر الجمعة، ٢٧ سبتمبر ٢٠٢٤
شكرا ليك بجد ، لا مش ملفت بس برضو يدخل تحت إطار انه حرام وان شاء الله حتي لو كان خفيف امنعه
تم النشر الجمعة، ٢٧ سبتمبر ٢٠٢٤
ههههههه والله انتي طيبة وبنت ناس الاهم ميبقاش حاجه ملفته و تكوني ملتزمه بالحجاب الشرعي انما دي مش حاجه في الليءبنقابله في الشارع الفترة دي
تم النشر الجمعة، ٢٧ سبتمبر ٢٠٢٤
لا بسيط جدا عكس اللي بنشوفه الأيام دي
تم النشر الخميس، ٢٦ سبتمبر ٢٠٢٤
لاعادي اهم حاجة متبقيش حاطة حاجه ملفتة اوي
تم النشر الخميس، ٢٦ سبتمبر ٢٠٢٤
لعرض السؤال في فدني اضغط هنا