انا عندي سنه والحمد لله قريبه من ربنا احنا بنات واخ اخويا كبير متزوج وعنده ولد وعايش معانا في البيت واحنا عندي اخت سنوات واخت سنه وانا
مرات اخويا كويسه جدا بقالها ٣ سنين متزوجه اخويا عمرنا ماشوفنا منها حاجه وحشه ودائما ليها دور ايجابي في حل مشاكل البيت وكنا كلنا قريبين من بعض وكويسين
اهلي عندهم مشكله لو حصل بينهم وبين شخص سوء فهم او مشكله بسيطه يكبروها ويوصلوا المشكله لموضوع كبير جدا من سنه بظبط مش هقول حصلت مشكله لان محصلش حاجه ولكن فجاه بعدوا عن مرات اخويا ومفيش كلام بينهم بل بالعكس عايزين يتخانقوا معاها ب اي طريقه ودايما اختي وامي يتكلموا عليها وبيتكلموا كلام محصلش بس من كتر الكلام بيصدقوا ان الموضوع حقيقي دايما يغتابوها وعندهم سوء الظن بالناس شديد جداا يعني مثلا ابن اخويا طفل عنده سنتين طبيعي جدا ان الاطفال في حاجات في الاكل مش بياكلوا في يوم كنا عاملين اكل وهو مش راضي ياكل منها المفروض اي شخص طبيعي هيقول عادي دا طفل لكن امي واختي يقولوا ما اكيد بيعمل كده عشان امه بتعمل الاكله دي وحشه ويتكلموا عليها ونقيس علي الموقف دا اي حاجه دايما سوء الظن وامي تخترع قصص من دماغها وتحكي فيها وتصدقها وخلاص الكلام دا يطبق علي مرات اخي
امي دايما اي حاجه تحصل في البيت لازم كل الناس تعرف بيها الغريب قبل القريب دايما اي حد يقولها مرات ابنك عامله ايه تتكلم عليها كلام محصلش وهي تبقي مصدقه وطبعا حصل بينا وبين مرات اخويا مشاكل كبيره وهما عملوا فيها تصرفات مش كويسه ولكن مش شايفين انهم غلطوا
حاليا انا لما جيت اعرف امي ان كده حرام وغيبه ونميمه وسوء ظن اتهمتني اني منافقه وبقف مع مرات اخويا ضدهم وطبعا حاولت اصلح بينهم كتير ولكن امي واختي لما بيسمعوا اسمها بينفروا جدا منه والمشكله ان اختي دائما تتكلم مع امي عن مرات اخويا كلام مش كويس وخوض في عرضها وطبعا مش بيكون حاجه من الكلام دي حصلت دا بيكون سوء ظن منهم
انا عايزه حل للمشكله لاني فعلا تعبت ونفسي نرجع نعيش كويسين تاني وتعبت من ان طول النهار كلام عليها مفيش سيره غيرها وكلام كدب واتهامات باطله والمشكلة انهم بيصدقوها عايزه حل ازاي اعالجهم من سوء الظن واعرفهم ان دا سوء ظن وحرام لانهم مش عارفين ومفكرين أن دا من الفطنه والذكاء
انا عملت كل اللي ممكن يتعمل شير للبوستات اللي بتتكلم عن سوء الظن والآيه القرأنيه اللي بتتكلم عن سوء الظن وهما مفيش مش فاهمين ان الكلام عليهم اصلا ارجو المساعده واسفه
للاطاله عليكم
ملحوظه بابا عايش وموافق جدا علي الكلام وبيتكلم عليها معاهم واي مشكله يقول انا هطرد ابني من البيت واصلا اخويا من وهو صغير بابا مش بيحبه نهائي وكان بيقعد يهينوا ولحد دلوقتي
اولا احب ان اشكرك علي حسن إدراكك للموقف والمحاولة مرات عده للعلاج. لكن انا لي طلب عند حضرتك كما ذكرتي انك حاولتي مرات عده نقطه ومن اول اسطر.. استوب هنا . انسي امك اخواتك ابوك لا فائدة معهم ولكن انظري الي الجانب الآخر من هو الجانب الآخر. هو ... اخيك ، زوجة اخيك ، احسني معاملة زوجة اخيك جدا وكوني لها اخت وصديقه وان حاولت الخروج والغضب وهي بالفعل ستفعل ولكن عليك لمي شمل العائلة ودائما هدي الموقف خليها ترتاح الي الحديث معك فتكون اصدقاء وستحكي لكي عن أفعال امك وأبيك وهنا عليك أن تكوني برهم لها داء للجروح والألم صبريها حتي تعيش وتحملي عنها بالمساعدة في العمل والخروج معا وستكوني انتي الشئ الوحيد إلا مصبرها ومحببها في البيت . النصيحه الأخيرة والمهمه جدا (شغلي في البيت دائما القران)🌸
تم النشر الأحد، ٢٨ يناير ٢٠٢٤
الوضع اللى انتى فيه مش سهل وفيه اختبار كبير ليكى خلى بالك انتى من انك تثبتى على الحق وتفضلى ترفضية بكل الاشكال ..رغم انك هتواجهى عواقب ده بحاجات مؤذية زى ان ماما واخواتك يزعلوا منك لو وقفتى مع الحق اثبتى على الحق وحاولى تبذلى اللى تقدرى عليه من النصح لكن مش شرط انهم يتغيروا ادعيلهم بالهداية لان فكرة انهم يسمعوا منك مش سهله . لو فى حد كبير وتثقى فيه ممكن تستعينى بيه فى انه ينصحهم وده اقصى شىء ممكن يكون فى ايدك
تم النشر الاثنين، ٢٩ يناير ٢٠٢٤
اول حاجة انتي جدعة بجد ربنا يحميكي💜 ثانيا بقى بصي طالما حاولتي بكل الطرق يبقى خلاص انتي عملتي ال عليكي متحمليش ع نفسك اكتر من كده بس برضو متسمحيش ابدا انهم يتكلمو عنها جنبك لو فتحو الكلام قولي ان ده حرام و لو كملو قومي من جنبهم لازم موقفك يكون ثابت لحد م يفهمو يارب بس برضو لازم تفرقي موقفك ده عن موقفك مع امك و اختك عموما ان علاقتكو تكون كويسة و متوصلش انك تقطعي معاهم و يكون في حزازية مابينكو بسبب الموضوع ده يعني انتي مختلفة مع امك و اختك فالموضوع ده بس غير كده هما مهما.كان اهلك و تعامليهم كويس زي م بتعاملي مرات اخوكي كويس و تكوني النسخة ال ربنا يهديهم و يكونو زيها 💜
تم النشر الأحد، ٢٨ يناير ٢٠٢٤
ربنا يثبتك ويجزيك خير لا تنقطعي عن تذكيرهم بحرمة ما يفعلون كثرة التذكرة والتكرار مرة تلو الاخرى الاخرى تجعل القلب يلين وادعي لهم كثيرا ان يهديهم الله ويتوب عليهم من هذا الذنب العظيم وكوني على يقين ان الله سيستجيب دعاءك ولكن يوجد نقطه مهمه وهي لا تجعلي زوجة اخيك ضحية هذا السلوك السئ صاحبيها واشعريها انك في صفها وانك ضد ما يفعله اهلك معها وتحملي اي انفعال او غضب يصدر منها وصبريها واحتسبي الاجر والثواب عند الله انت بتقولي تعبتي ونفسك ترجعوا زي الاول وانا بقولك احمدي ربنا ان ربنا لم يجعلك مشاركه في هذا الذنب العظيم بل جعل ابتلائك في مقاومة هذا الذنب والتصدي له وتذكري الحديث ما معناه ( من ذب عن عرض اخيه ذب الله عن وجهه النار يوم القيامة) وحديث اخر ما معناه ( ما من مسلم ينتصر لمسلم في موضع ينتقص فيه من شانه الا نصره الله في موطن يحب فيه نصرته وما من مسلم يخذل مسلما في موطن ينتص فيه من شانه الا خذله الله في موطن يحب فيه نصرته ) انت في ابتلاء ولكن الله اصطفاك لشرف كبير وانت بإذن الله لن تفرطي فيه
تم النشر الاثنين، ٢٩ يناير ٢٠٢٤
اخوكى لو يقدر يسيب البيت الموبوء دا يسيبه و يهرب بمراته و ابنه منهم و انتى سندك لمرات اخوكى مهم فادعميها من وراهم و اقعدى معاها ارفعى معنوياتها و قوليلها انتى احسن واحدة فى الدنيا و احنا اللى وحشين و اتحملى لحد ربنا ما يهديهم و قولى لأخوكى مراتك بنت كويسة جدا متصدقش كلام امك و ابوك و اختك عليها و عاملها كويس و خد بالك منها
تم النشر الأحد، ٢٨ يناير ٢٠٢٤
طالما مش طايل مرات اخوكى منهم ضرر جوة البيت خلاص و طالما الناس برة عارفين امك و عارفين مرات اخوكى فاكيد مش هيتأثروا بكلام امك عليها و الايام هتاخد لها حقها فى اختك لما تتجوز و هيشوفوا فى بنتهم اللى عملوه فى مرات ابنهم
تم النشر الأحد، ٢٨ يناير ٢٠٢٤
للاسف ميقدرش ماما وبابا لما بيتكلموا بيتكلموا وهما مش موجودين بيخافوا يتكلموا قدام حد منهم ف محدش بيسخن اخويا علي مراته ولا حاجه
تم النشر الأحد، ٢٨ يناير ٢٠٢٤
كلام سوبر مان صح ✅
تم النشر الأحد، ٢٨ يناير ٢٠٢٤
للاسف الناس مصدقه وكلامهم بيخلي ماما تزيد كلام عليها وكله بيحكم بدون علم بالموضوع كامل
تم النشر الأحد، ٢٨ يناير ٢٠٢٤
لعرض السؤال في فدني اضغط هنا