السلام عليكم
عاملين ايه
بقالي فترة كنت مرتب ومنتظر اني اتقدم لبنت وحبينا بعض وجيت اتقدم الأمور مشت تمام وفل اوي جت وباظت ف الآخر و والدها قال لوالدي ربنا يكرموا وكل شي قسمة ونصيب بابا طبعا كان مضايق وان مكنش فيه سبب الرفض ف الموضوع زعلوا شوية طبعا أنا مرضتش اكمل حتي البنت قالت نشوف حل وكدة بس انا اتقفلت من الموضوع ف من ساعتها بابا كان قالي علي بنت كويسة ومحترمة اتقدمت والدنيا كانت تمام بس مكنش ظاهر مشاكل ف الاول بعد كدة ظهرت المشاكل وحاجات كتير مكنتش اعرفها اتفاجأت بيها ف حصل كذا موقف ومع صلاة الاستخارة مرتحتش وقعدت مش مرتاح فترة المهم نهيت الموضوع وفي خلال ما كنت مع خطيبتي كانت البنت الأولي اللي اتقدمتلها بتبعتلي ازاي سبتني ازاي هونت عليك وازاي قدرت فجأة بكل بساطة تخطب علطول وكلام كتير كلوا عتاب انا مكنتش عارف ارد علشان خلاص كنت خطبت وميصحش اكلمها وانا خاطب ف مردتش قامت ماسحة الرسايل المهم بعد الخطوبة محصلش نصيب بقالي فترة بعمل دايما سيرش علي حساب البنت الاولاني وجيت مرة بالغلط بعتت طلب صداقة وشلتوا لقيتها قفلت البروفيلات كلها وما زلت علي الحال دي عايز ارد عليها واكلمها وارد علي الكلام اللي بعتتوا ومسحتوا بس مش عارف عايز اتخطي الفترة دي واركز ف حياتي ومعلقش حد زي ما عملت مش عارف ملبوخ ف الشغل بس كل ما الاقي وقت فاضي ولو دقايق بدخل اشوف بروفايل الفيس بتاعها اعمل ايه!؟
السلام عليكم. خليني اقول لك انه البنت عندها حق والموقف اللي انت عملته مش حلو خالص. بما انك قلت انه يعني؟ كان في مشاعر ما بينكم بناء عليها انت رتبت امورك علشان تتنقل للمرحله الصح وتخطبها. فلما تبقى انت كراجل مع اول موقف قلت خلاص سلام عليكم يعني حتى ولو كان في عقبه انه الوالد قال كل شيء قسمه ونصيب يعني توقف عند شيء فين النقاش يعني فين التمسك فين انه شوفوا يا جماعه المشكله فين ونرتبها مع بعض فين الكلام ده فين ان انا اهدي والدي واقول له طيب معلش خلينا نفهم الناس ايه فين ان انا اتكلم مع والد البنت افهم الموضوع وبعد كده اكون وسيط كده واهدي الامور ما بيني وما بين والدي لان ده اللي بيحصل في الحياه لما البنت تلاقيك قصاد اول موقف عملت كده وانت كان في وعود بقى وكان في مشاعر وكلام لطيف كثير فده يعني خذلان كبير جدا فانت منتظر ايه يعني انت بقى لما رحت على طول دايركت كده اللي هو خلاص دي ما ظبطتش نشوف غيرها رغم انك يعني واعد وعد واضح ان هو كان اكيد كان قوي. اييي وتشوف ان دي حاجه عاديه وتاخذ انت بقى موقف قصاده انك تشوف فعلا مشاكل حقيقيه. فترجع تقول لا بقى نشوف الاولانيه دي تاني دي مش حاجه خالص بتنم بصراحه عن مواقف تخلي اللي قدامك يثق. ولذلك انت حتى لو رجعت تتكلم مع البنت الموضوع هيبقى صعب فانت دلوقتي اللي عندك الاختيار. عاوز تثبت انك تستحقها روح لبيتهم ثاني وخبط عليهم ما تدورش على اكونتات وما تدورش على انك ترد على كلامها بقى وترجع تاني ايه تحاول معها فتلاقي لنفسك سبب ثاني اصل لما كلمتها هي ردت عليا مش عارفه وحش وقالت ما اعرفش ايه لانه البنت دي زي ما هي اخذت منك موقف بسبب افعال فلو انت عايز تصلح الموقف وعايز تثبت لها عكسه فانت لازم تعمل فعل مش كلام. ده الحل اللي عندك او الحل التاني سيب البنت في حالها يعني يكفي الموقف اللي انت عملته وسيب البنت في حالها ما تتوجهش انك تدور على بروفايلاتها ولا تبعث لها ارجوك يعني لانه اكيد مجرد ظهور اسمك بالنسبه لها حاجه تضايق. دي نصيحتي لك وربنا يوفقك.
تم النشر الثلاثاء، ٢ يوليو ٢٠٢٤
وعليكم السلام ورحمه الله وبركاته ربنا معاك يارب كل الامور تتطيب خاطرك
تم النشر الاثنين، ١ يوليو ٢٠٢٤
وعليكم السلام، أهنئك على شجاعتك في مشاركة تجربتك. بصراحة اللي مريت فيه مش سهل وبيأثر على الواحد بشكل كبير. خلينا نتناقش شوية ونشوف كيف ممكن نخرج من الدوامة دي. أول حاجة، أنسى الحزن اللي مريت فيه وتأكد أن كل حاجة بتحصل لسبب. مش دايماً بنقدر نفهم السبب في الوقت الحالي، بس صدقني مع مرور الوقت حتفهم ليه حصلت الأمور بالطريقة دي. ثاني حاجة، ركز على نفسك. من المهم جداً إنك تتخلص من العيش في الماضي. بدل ما تضيع وقتك في البحث ومتابعة حساب البنت، حاول توجه طاقتك لأشياء تانية. الهوايات، الرياضة، تطوير نفسك في مجالك، وصدقني ده حيخليك تحس أحسن بكتير. ثالث حاجة، التواصل مع البنت مرة تانية ممكن يسبب لك ولها ألم إضافي. لو فعلاً شايف إن الموضوع بعد الخطوبة وصل لنقطة النهاية، حاول ترتاح وتخليها ترتاح هي كمان. مش من العدل إنك تعلقها بمشاعر غير واضحة. أخيراً، لو شعرت إن الموضوع بياخد منك وقت ومجهود عاطفي كبير ومش قادر تتغلب عليه، ممكن تفكر تتواصل مع مستشار نفسي. أحياناً بنحتاج مساعدة خارجية علشان نقدر نتخطى أزمات كبيرة. في النهاية، الحياة مليانة فرص وتجارب جديدة. ركز على الحاضر والمستقبل، ويا رب يكرمك بما هو خير لك.
تم النشر الاثنين، ١ يوليو ٢٠٢٤
تفكك منها لانك خذلتها و تسيبها تشوف حياتها
تم النشر الثلاثاء، ٢ يوليو ٢٠٢٤
لعرض السؤال في فدني اضغط هنا