السلام عليكم
انا عندي ١٧ سنة في تالتة ثانوي من و انا صغيرة كنت بنت هادية جدا و كل همي المذاكرة و الدراسة و كنت بعاقب نفسي جامد لو نقصت نص درجة في مادة و كنت بحاول دايما اتنافس مع غيري مكنش عندي مشكلة في تكوين الصداقات لان كل البنات زميلاتي كان بيحبوا يصاحبو بنت شاطرة و بتعرف ترسم حلو لكن عندي مشكلة مش عارفة اقول عليها مشكلة و لا لأ بس انا عمري في حياتي ما تعلقت بحد و لا فتحت قلبي لحد و دايما بحط حدود مهما كان الشخص الي قدامي ، كنت مبحبش اجيب زميلاتي في بيتي و حتى لو لاحظتوا انا بقول زميلاتي مش اصحابي لان عمري ما حسيت ان عندي صحاب يمكن الغلط مني بس انا اتربيت على ان الصحاب اشخاص استنفع منهم و بس و لا هيكون في مشاعر ما بنا هو بس منفعة وبس... كبرت على الفكرة دي و كل الي اتكلم معاه امشي معاه بيحس اني هادية ، دايما بسمع و مش بتكلم يمكن عشان اغلب الي عرفتهم معجبتنيش شخصيتهم كنت عايزة دايما واحدة شاطرة جدا مهتمة بشكلها و دينها اسلوب كلامها حلو و ده بصراحة ملقتوش خالص طول حياتي انا بحاول ما امشيش لوحدي و لا اقعد لوحدي في الدروس بس كل يوم بتبقى بنت مختلفة اعرف اسمها و انساه مبتكملش معايا بس زي ما قلت قبل كده انا دلوقتي في اهم سنة في حياتي و نفسي اتصاحب على بنت تكون زي الي في بالي يمكن افتحلها قلبي و انفعها زي ما انا حاسة اني يمكن كده انا بستنفع منها بس يمكن ساعتها هقول انها صاحبتي مش زميلتي
دي احسن حاجه عملتيها وانتي في السن ده انك بتهتمي بهوياتك ودراستك وبتحطي حدود لنفسك وبكره تشكري نفسك علي كدا وممكن يكون مش عارفة تكوني صدقات لان افكار مختلفة شوية عن ناس الي حواليك والافضل متتنزليش او تغيري حاجه في شخصيتك جميلة دي عشان تكوني صدقات لان لو صاحبتي ناس مش شبهك علاقة دي مسيرها هتنتهي حتي لو بعد سنين كتيرة.اتعاملي مع ناس عادي ولو لاقيتي حد شبهك ابدا علاقتك مع ناس بتدريج والمواقف هي اللي هتحكم
تم النشر الأربعاء، ٢١ أغسطس ٢٠٢٤
عليكم السلام ورحمة الله وبركاته عدم العثور على صديق حتى الثانوية ليس أمرًا غريبًا والحمد لله أنك لم تتنازلي عن قيمة شخصية لديكِ لتحظي بصداقات. أنا لا أعني أن كل من قابلوك كانوا سيئين أو غير مشرفين، لكن الإنسان مع من لا يفهمه يحيا معذبًا ويكون مضطرًا دائمًا للتبرير وتوضيح أسباب تصرفاته ومعنى ردات فعله وما إلى ذلك. فكونك لم تلقي بنفسك بين أي مجموعة من الصديقات هذه قوة منكِ. طيب الحل الآن، أقترح عليك أن تشاركينا هنا، فدني مجتمع داعم، وستجدي حلًا أو مشورةً أو دعمًا في أي وقت. لكن هل يمكن أن توضحي لي قصدك عندما قلتِ أنك تربيت على أن الصديق للمنفعة؟ لم أفهمك. موفقة بإذن الله..
تم النشر الثلاثاء، ٢٠ أغسطس ٢٠٢٤
دى حاجه تميزك بانك عندك شخصيه وفكر وعقليتك كبيره دى مش حاجه وحشه عندك مبدأ فى اختيار الصاحب مش بتصاحبى اى حد لذلك الى زيك كده بيعانى انه يلاقى صاحب حقيقى بس هترجعى الأساس فى موضوع الصحاب دا رزق من ربنا زى اى رزق من عيله او تفوق دراسى او حجات تانيه كتيره ونفس الوقت هتلاقى محدش بياخد كل حاجه لازم هتلاقى حته مش موجوده عشان محدش بياخد كل حاجه فى الدنيا لازم نفهم كده عموماً ادعى واختارى صح وهنلاقى إن شاء الله جايز متلاقيش دلوقتى الناس الحلوين او الصحاب الصالحين مش هندور عليهم هيطلعونا قدمنا لا هتلاقى كده صدفه او موقف من غير ترتيب جالك الصحبه دى وخلى بالك مش هتلاقى حد كامل بالمواصفات الى انتى عايزاها الطرف التانى بردو عايز منك صفات كمان.اخيرا كل حاجه هتجيلك فى الوقت المناسب متستعجليش جايز الفتره دى بتمرى بأنك محتاجه حد جمبك دا طبيعى حاولى تكونى صحبه على المدى القصير تعوضك الفتره دى انك تعدى الفتره مش شرط صاحبه ابديه على الاقال تكون قريبه من المواصفات الى انتى عايزها لا صاحبى واحده مثلا فى درس مش شرط تقربى اوى اتلكمو فى دراسه مواضيع عامه كده بلاش امور شخصيه لانك بعد فتره هتدخلى جامعه وتشوفى ناس جديده جايز يكون حظك فى الفتره دى تلاقيها.
تم النشر الثلاثاء، ٢٠ أغسطس ٢٠٢٤
وعليكم السلام! أولاً، فخورة بيك إنك بتشتركي أفكارك وتجربتك معايا. بالنسبة لسؤالك عن الأصدقاء، هو فعلاً مهم يكون عندك أصدقاء. الأصدقاء مش بس للمنفعة، لكن كمان للدعم والمشاركة في الأوقات الحلوة والمرة. من الواضح إنك شخص مجتهد وذكية، وأكيد عندك طموحات كبيرة. ولكن تذكرى إن الحياة مش بس دراسات ومنافسة. الأصدقاء يقدروا يكونوا سند ليكي وقت ما تحتاجي، ويشاركونك اللحظات الحلوة. وكمان، لما تفتحي قلبك لحد، ممكن تكتشفي جوانب جديدة عن نفسك. ممكن تحاولي تتواصلي بشكل خفيف مع البنات اللي حواليك، تبتديوا تحكوا وتتناقشوا في حاجات بسيطة من حياتكم. ولازم تفهمي إن مش كل صحبة هتكون مثالية وبهذا الشكل اللي في بالك، لكن ممكن تلاقى فيهم شغف أو اهتمامات مشتركة مع الوقت. حاولي تخرجي من منطقة راحتك شوية، ولا تخافي تعملي صداقات جديدة. ومع الوقت، هتكتشفي إن الأصدقاء مش بس للأستفادة، لكن كمان للعلاقة الإنسانية وللصداقة الحقيقية. وأنا متأكدة إنك هتلاقي البنت اللي تتعلقى بيها وتشاركيها أفكارك ومشاعرك. ديري بالك على نفسك وكوني مفتوحة للجديد!
تم النشر الثلاثاء، ٢٠ أغسطس ٢٠٢٤
الصداقة الجيدة هي من للامور التي تجعل الحياة اجمل واكثر حيوية ولها معنى لكن عندما تكون الصحبة صالحة وصحية ومبنية على اساس متين
تم النشر الثلاثاء، ٢٠ أغسطس ٢٠٢٤
انا متفهمة إنك عايزة صديقة كويسة وكدة والصداقة شىء كويس لما تكون مع صديق كويس ، بس أنتي دلوقتي في تالتة ثانوي متتشغليش بالك دلوقتي بموضوع تكوين صداقات ده انا بردوا في ٣ ثانوي ومعرفش حد في الدروس بس ممكن تصاحبي لما تدخلي الكلية عادي ساعتها أبقى فكري براحتك في تكوين صداقات أما دلوقتي متشغليش بالك هي سنة مهمة ركزي فيها لو لقيتي حد تتصاحبي كويس عليه بالصدفة خلاص حلو ولو ملقيتيش متشغليش بالك السنادي خالص لما تدخلي الكلية ابقى أسعي إنك تتعرفي على ناس ده رأيي يعني
تم النشر الجمعة، ٢٣ أغسطس ٢٠٢٤
لعرض السؤال في فدني اضغط هنا