أنا كنت طالب في تالته ثانوي وبعد ثلاثة سنوات إعادة لتالتة ثانوي بدون دخول ولا مادة وولا إمتحان ، أهلى حولولى صناعى، وبكدا مش فاضل غير فرصة أخيرة لدخول إمتحانات الثانوية العامة بالنسبة ليا، وفى الحقيقة أنا مش مقتنع بالتعليم الفنى وشايف إنه طريق مسدود مش بيوصل لأى حاجة، دلوقتى الناس هتسألنى ليه مدخلتش ولا مادة بعد تلات سنين اعادة، اجابة السؤال دا هتكون إنى كنت بأشعر إنى مش مذاكر كويس ودا مش مجرد شعور، أنا فعلا مزاكرتش،
طيب ليه مذاكرتش؟
لأن أنا معرفش غير طريقتين ملهمش تالت للمذاكرة بالنسبة ليا ، الطريقة الأولى وهي قراءة الدرس بصوت وبكدا بفهم وبحفظ بشكل كويس، ولكن الطريقة دى مش بقدر أستمر عليها لفترات طويلة لأنها طريقة مجهدة جدا،
الطريقة التانية وهي إنى بقرأ الدرس بعينى بدون صوت ولكن مشكلة الطريقة دى هيا إنى بفهم كويس بس الحفظ بيكون ضعيف، وهي الطريقة التانية إللى بقدر أستمر عليها ولكن الحفظ بيكون ضعيف، يعني بنسى المعلومة بسرعة.
وأنا المشكلة دى مش لاقى ليها حل لحد دلوقتى، الأولى مش بقدر أستمر عليها، والتانية بنسى المعلومة بسرعة وبرضة مش بقدر اذاكر بيها.
رجاء حد يساعدنى فى حل المشكلة دى وبلاش تجريح،
لأنى والله تعبت نفسيا وأهلى ودونى لكذا دكتور نفسي، انهرت ودلوقتى بأشعر بعد التلات سنين إعادة إنى إنسان مسلوب الإرادة مقدرش أعمل أى حاجه فى أى حاجة، وحاليا أنا أشبه بالأموات مش بأعمل أى شئ مفيد فى حياتى ومش قادر كمان أتخطى نقطة إنى زمايلى إللى كانو فى دفعتى هيبقوا السنة دى فى رابعة كلية وأنا لسة مخلصتش ثانوية عامة مع العلم إنى كنت متفوق فى الإعدادية وفى أولى وتانية كنت كويس برضو، النقطة دى مأثرة فى بشكل كبير وتعبانى نفسيا، فلو سمحتوا حد يساعدنى فى حل المشكلة إللى أنا فيها دى وترشدونى أعمل إيه؟
كيف حالك يا صديقي؟ اتمنى أن تكون بخير و في أفضل حال بإذن الله تعالى. لدي سؤال في البداية كنت متفوق في المرحلة الاعدادية ثم في الصف الأول و الثاني الثانوي كنت متفوق ما شاء الله بطرق المذاكرة التي تعرفها و لم تكن هناك مشكلة لماذ اضطرب مستواك مع بداية المرحلة الاخيرة من الثانوية؟! ما الذي طرأ على حياتك حتى اصبحت طريقة المذاكرة لديك التي كانت تجعلك متفوق اصبحت عبئ عليك الآن؟! اعتقد أن الخوف و رهبة الثانوية العامة هي السبب. يا صديقي هون على نفسك هي مرحلة و ستمر مثلها مثل أي شيء يمر. نصيحتي لك: استخدم الطريقتين في المواد التى تحتاج حفظ مع فهم أقرأ بصوت عالي و دون ملاحظاتك على الورق اعلم انها طريقة مجهدة و متعبه ولكن خد راحه استخدم تقنية البرومودورو 25 دقيقة مذاكرة و 5 دقائق راحة تامه بدون فعل أي شيء جدد نشاطك و عد الي المذاكرة مرة أخرى. اما في المواد التي تحتاج الي فهم فقط استخدم طريقة القراءة بالعين. ادمج الطريقتين مع بعضهم البعض أسأل الله العظيم أن يوفقك و تكون متفوق دائماً
تم النشر الخميس، ١٩ سبتمبر ٢٠٢٤
اولآ لما تقرا بعيونك لا تحفظ الا للضروره بل أفهم راح يكون احسن وحط دفتر وقلم واكتب ملاحظات وفهم نفسك وخذ استراحات بين كل درس ولا تحط نفسك بضغط. قسم وقتك وحدد اهدافك وافضل لما تكون بفترات استراحة تستعمل تطبيق loona تكون بمكان هادئ واسمع للنغمات الي في هذا التطبيق تساعد على الاسترخاء وتأمل وخذ شهيق زفير. ركز ب تنفسك عشان تهدأ وترتب افكارك ولا تسهر كتير وركز على تغذيتك وابحث عن اطعمه تزيد قوه الذاكرة باليوتيوب في اي مكان وشوف ابدأ اتكلم بصوتك بالبدايه ولما تتعب ارجع لقراءة العيون وكدا فترات كدا وفترات كدا . اهم حاجه هي النوم والتغذيه والراحه وعدم الضغط على نفسك وحاول لما تفكر بأفكار سلبيه تسكر الباب عليها وتلهي نفسك بحاجه ثانيه. واهم شي توكل ع الله، قل توكلت ع الله لما تدرس لما تعمل اي شي. المهم تعتني بجانبك العقلي والنفسي نظم وقتك كويس فترات راحه فترات دراسه أكل وانت بتدرس حط لك هدف سهل بالبدايه يعني مثلآ انا بخلص صفحه وحده او صفحتين او اي حاجه لما تنجزها حط لنفسك مكأفاه وطور من صعوبه الهدف ودايمآ لا تضغط ع نفسك وتكبر المواضيع وتجي الافكار السلبيه استرخي وتأمل واقفل الافكار السلبيه باي وسيله حطيت لك صوره تطبيق يساعد ع تخفيف القلق ودايمآ راجع الي كتبته من ملاحضات واشياء المراجعه مفيده جدآ الله يسهل عليك الاختبار إن شاء الله. حفز نفسك دايمآ وتذكر لا تحط نفسك بضغط نفسي توكل على الله وادرس كويس وانتبه لنفسك ونفسيتك وعقلك، الله يوفقك بدراستك وحياتك توكل على الله.
تم النشر الخميس، ١٩ سبتمبر ٢٠٢٤
قبل اي حاجة عاوزك تهدى وتاخد نفسك الدنيا بسيطة ان شاء الله تاني حاجة اسمحلي اسالك اخبار الصلاة ايه ؟ والدعاء ؟ وهل بتدعي ربنا يعينك ويساعدك ولا لا ؟ كل دي امور اهم من اي حاجة نيجي لطريقة المذاكرة انت تقدر تجمع بين الاتنين انك تقرا وتفهم وبعدها تسمع بصوت وتحفظ وفيه انك تكتب الكتابة بتساعدك تثبت المعلومات بشكل كبير وكتر الحل والممارسة والمراجعة بيخليك فاكر دايما معظم الشرح والاجابات ومتركزش مع حد سبقك ولا حاجة انت ممكن اللي شايفه سابقك ده ربنا مثلا مديله سن ٤٠ سنة ويتوفى وانت تكمل حياتك وتعديه فهمت الفكرة ؟ فكل واحد ربنا مديله حاجة وواخد منه قصادها وكلنا منعرفش اي هي انت اعمل اللي عليك واطلب العون من الله وتوكل مفيش تأجيل اكتر من كدة واخطبها زي ما تيجي تيجي بس المهم تكون حاولت وان شاء الله ربنا يوفقك
تم النشر الخميس، ١٩ سبتمبر ٢٠٢٤
السلام عليكم و رحمة اللّٰه و بركاته أولاً حتى لو مذاكرتش ف المحاوله كويسه إنك على الأقل تعرف الأسئله ماشيه ازاي و النظام عامل ايه بظبط ثانياً هقولك طريقه مذاكره بتنفع بشكل كبييير جدا معايا و إن شاء اللّٰه تبقا مفيده ليك محتاج الأول تحدد هل انت حاسس انك هتلتزم بفكره الدروس مع مدرسين في سناتر ولا فهمك و انتظامك بيبقا مع نفسك في البيت أفضل لو للمدرسين ف امشي بطريقه إن كل متخلص درس معين تاني يوم تكون مذاكرو و تفضل تراجع عليه لحد يوم الدرس دي طريقه مبحبش اوي امشي بيها بس بتنفع مع كذا حد أنا طريقتي لإن أنا بنسى بسرعه و مبذاكرش غير لما بحس ب خطر و ان لازم اذاكر ف بذاكر يوم الدرس بس الصبح بدري وقت الفجر عشان بيبقا الإستيعاب أعلى بذاكر الدرس بمعنى اشوف فيديو من اول و كأني اول مره اشوف الدرس و بكتب المعلومات المهمه الي المدرسين بيقولوها في الفيديو و بكدا هكون لميت اهم النقط الي كل مره هراجع عليها قبل الدرس او قبل امتحان ، و بعدها و أهم حاجه هو الحل لإن نظام المرحله الثانويه كلوو بيعتمد على الحل مش هقولك حل من كل الكتب لإن دا مرهق جدا بس حل من كتاب واحد و نصيحه بلاش تمشي ب مذكرات المدرسين عشان غالباً بيكون فيها غلطات و التصحيح بتاعها مش مظبوط و طبعااا اختيارك لمدرس لازم يتوافر في شروط انو بيدي كويز كل حصه على الي فات و كل شهر يعمل شامل و بيعمل تسميع شفوي و بيطرد الي مبيذاكرش و كدا، عشان ده هيخليك تضطر تنتظم اكتر حتى لو مش قادر و الشروط دي غالباً بتتوفر مع المدرسين المشهورين و مجاميعهم كبيره عشان وقتها بيبقا في إمكانية لعمل كل الحاجات دي و غير الشوامل الي عليها فلوس دي بتخليك تتحمس ف تذاكر . يبقا كدا أنت عملت ٣ حاجات هو إنك مراكمتش عشان ماشي مع المدرس و ذاكرت الدرس مره استماع و مره كتابه و اكيد مع الكتابه بعد متخلص ورقه كامله من كتابه المعلومات و النقط المهمه سمعها لنفسك و لو غلطت ف كلمه واحده عيد من الأول و افتكر كل مبتعيد كل مبتثبت المعلومه اكتر و لو أنت شايف إنك فهمك في البيت و مع نفسك بيبقا أعلى ف خد منصات مع مدرسين نظامهم كويز كل حصه و متابعه مع الأهل و شوامل و كل الحاجات دي عشان بردو متراكمش ، و انت بتشوف فيديو المنصه بردو سجل المعلومات المهمه صدقني ده هيفييدك بشكل كبير جداااا و عن تجربه ،ليه لإنك قبل الإمتحان بتبقا مش قادر تلم كل الدروس من الأول ف كل الي بتعملو انك بتراجع ع النقط المهمه الي كتبتها و هقولك ع حاجه أنا عن نفسي براكم المنهج كلو قبل الإمتحانات ب اسبوعين كدا بس بمشي بالنظام إن اشوف فيديوهات يوتيوب و اسجل معلومات مهمه و احل اسأله كتير عشان بجد الأسئله هي الي بتثبت المعلومات و بطلع بدرجه حلوه جدا و نصيحه متعتمدش على إنك بتاخد درس ف متشوفش مستر يوتيوب لاء لازم يكون مدرس ف السنتر و مدرس يوتيوب عشان اوقات المدرس بتاع السنتر مبيلمش المعلومات كلها ف بتحتاج حد تاني معاه بس بلاش تاخد اتنين مدرسين سنتر ف ماده واحده عشان ده هيضيع وقت و مجهود ع الفاضي و نظام انك تقرأ المعلومه بعينك او تقولها بس ده مبينفعش خالص لإن مع الوقت بتنسى كل الي اخدتو . و طبعاً المذاكره محتاجه إنك تكون مديلها أهمية بمعنى لو عندك خروجه مع صحبك ف يوم بس انت مراكم ف لاء متخرجش و خلص الي مراكمو و لو شايف ان صاحبك ده مش بيساعدك هو بس بيشغلك عن المذاكره ف أبعد عنو. و اتقرب من ربنا اكتر و انتظم ف صلاتك عشان ربنا يوفقك ف حياتك و مذاكرتك هي سنه و هتعدي بس محتاج تتعب عشان تعرف تعديها و ربنا إن شاء اللّٰه مش هيضيع تعبك و اتمنى لك التوفيق.
تم النشر الجمعة، ٢٠ سبتمبر ٢٠٢٤
ليه محاولتش تدخل أكسر خوفك بالتجربة ؟ طيب سيبك من التلات سنين اللي فاتوا ومتفكرش بسلبيه ومين سابقك وكان المفروض تبقا في سنه كام والكلام دا كله حصل خير هدي نفسك وقول دايما قدر الله وما شاء فعل وربنا بإذن الله هيعوضك خير انا هقولك كنت بذاكر ازاي في الثانويه العامه أو اي الطرق اللي ممكن تساعدك اكيد انت بتاخد حصص سجل للمستر الشرح وعيده تاني يعني يبقا مرجع ليك اسمع فديوهات يوتيوب دايما دا هيساعدك على الفهم والحفظ انت ممكن تعبر بطريقتك خصوصا لو انت دفعه التاب اعتقعد انك من دفع التاب زي والبابل شيت والامتحانات امسكيو فمش محتاج انك تحفظ وتكتب تبيكل افهم وعبر كمان الحل الكتير كويس جدا وبيثبت المعلومه وكمان الطريقتين اللي بتقول عليهم كويسين كل دا هيساعدك بص حط قدامك انك ضروري تدخل السنادي لان مش عندك فرص تانيه وافتكر إن الندم على حاجه عملتها احسن بكتير من الندم على حاجه انت معملتهاش وكان ممكن تحاول ومن خوفك أو اسبابك انك مش جاهز ومش حاسس انك مذاكر كويس وكل دا مخليك متحاولش احساسك بعدين هيبقا وحش ومهلك وضميرك هيعذبك وهتحس انك قصرت في حق نفسك عشان كان قدامك حاجه احسن والأسباب اللي منعتك بعدين مش هتلاقيها فاهمني حاول واسعي تاني وافتكر إن محدش بيحاول ويجيب صفر افتكر انك مسؤول عن السعي من حقك تسعي لأنك تستاهل حاجه احسن انت السنادي بإذن الله داخل يعني داخل الإمتحانات قول كدا لنفسك وسيب الباقي على ربنا وبإذن الله هينصرك حافظ على علاقتك بربنا وادعي كتير وربنا يوفقك
تم النشر الخميس، ١٩ سبتمبر ٢٠٢٤
عزيزي، أشعر بمدى التوتر والمعاناة التي تمر بها، وأتفهم تمامًا مشاعرك تجاه تجربتك مع الثانوية العامة والتحديات التي تواجهها. أولاً، يجب أن نؤكد أن التعليم هو رحلة فردية، ولا يجب أن تقارن نفسك بالآخرين. لكل شخص طريقة تفكير وتعلم مختلفة، وما قد يناسب شخصًا ما قد لا يناسب آخر. ومع ذلك، هناك بعض الاستراتيجيات التي يمكن أن تساعدك في تحسين أسلوب مذاكرتك مما قد يعزز من قدرتك على الفهم والحفظ. تنويع أساليب المذاكرة : يمكنك دمج الطريقتين اللتين ذكرتهما. حاول قراءة الدرس بصوت مرتفع لفترة قصيرة ثم انتقل إلى القراءة الصامتة. بعد ذلك، قم بكتابة ملخصات لما قرأته. الكتابة تساعد على تعزيز الذكريات. استخدام الوسائل البصرية : حاول استخدام الرسوم البيانية، الخرائط الذهنية، والبطاقات التعليمية. هذه الأدوات يمكن أن تساعد في تعزيز الفهم وحفظ المعلومات بشكل أفضل. تقسيم الوقت : قسم وقت المذاكرة إلى فترات قصيرة، على سبيل المثال 25 دقيقة من التركيز ثم 5 دقائق من الراحة. هذا الأسلوب، المعروف بتقنية بومودورو، يمكن أن يساعد في تقليل الشعور بالإرهاق. التكرار : حاول مراجعة المعلومات بشكل دوري. التكرار يساهم في ترسيخ المعلومات في الذاكرة. الدعم النفسي : إن الشعور بالإرهاق والضغط النفسي شيء طبيعي. لا تتردد في طلب المساعدة من أخصائي نفسي أو معالج. هم يمكن أن يقدموا لك الدعم والإرشاد في تخطي هذه المرحلة. حدد أهدافًا صغيرة : بدلًا من التفكير في اجتياز الثانوية العامة كهدف واحد كبير، حاول تحديد أهداف صغيرة قابلة للتحقيق، مثل دراسة مبحث معين لمدة معينة، ثم تقييم أدائك. تذكر أن مشاعر الضعف والانكسار لا تعني الفشل. من المهم أن تتقبل هذه المشاعر وتتعلم كيف تتجاوزها. أنت قادر على تحقيق النجاح والتميّز. حاول أن تكون لطيفًا مع نفسك في هذه العملية ودع نفسك تأخذ الوقت الكافي للتعلم والنمو.
تم النشر الخميس، ١٩ سبتمبر ٢٠٢٤
ببساطة ان شاءالله اولا ...اى كان مجهودك ..قليل او كتير مينفعش متدخلش الامتحان ...كده كده النتيجة دى اللى مكتوبالك عند ربنا قرر انك هتتحرك لقدام ومش هترجع لورا مهما حصل ....يعنى مهما حصل هتدخل الامتحان اقرأ الدرس مره بصوت عالى زى ما انت بس سجل الصوت ده لنفسك ووقت ما تحب تذاكر ...اقرأ بعينك وشغل الصوت كأنك بتقرا ..هيبقى الموضوع اقل جهدا باذن الله ربنا معاك
تم النشر الجمعة، ٢٠ سبتمبر ٢٠٢٤
اولا طالما حضرتك كنت بتزاكر حلو ف اعدادى وكمان ف اولى وتانيه معنى كده انت تقدر تذاكر ف تالته هو اكيد اللى مأثر عليك كلام الناس وإن الثانوى صعب ومحدش بينجح كتير..... لازم يبقى عندك شجاعه الجهل لولاها مكناش هنعرف نعمل اى حاجه لاننا اصلا كنا بنتوقع الفشل من البدايه متفكرش ف مدى صعوبه المرحله ولا عدد اللى فشلوا قبلك دى هى الطريقه الممكنه للنجاح زى ما قال د.احمد خالد توفيق، اما لو حاصرتنا اشباح المخاوف قبل ما نبدا ف هتخرج الكلاب السودا المفترسه وهتمزقنا قبل ما نخطى خطوه واحده. اهم حاجه شجاعه الجهل. اتمنى ربنا يوفقك وإن شاء الله تعدى على خير وتبقى ناجح🤍✨
تم النشر الجمعة، ٢٠ سبتمبر ٢٠٢٤
لعرض السؤال في فدني اضغط هنا