يا جدعان والله انا تعبت ومعتش عارف نفسى انا طول عمرى عقلى بيتحكم فى كل حاجه فى حياتى وبعرف اتجاوز اى حاجه بعقلى بس الموضوع اللى انا فيه دلوقتى مش عارف اوصفه انا عمرى ما كلمت بنت وكنت بستحرم الموضوع وما زلت كده الوقتى كنت بقابل البنات فى الشارع عادى زى اى حد ممكن بنت تلفت نظرك او اى حاجه من الكلام ده بس كله بيبقى عادى وبيعدى لحد ما قابلت بنت كده ومن ساعتها وانا كل لما افكر فيها او اشوفها قلبى بحس بحاجه مش طبيعية فيه وببقى مش على بعضى حتى صحابى لو قابلتها وانا ماشى معاهم بتوه وانا ماشى معاهم وببقى مش على بعضى وبيلاحظو الموضوع ده فى الاول كنت بدعى انها تكون من نصيبى وخلاص ومعملتش حاجه بعد كده حاولت اكلمها او اعرف اى انطباع منها عنى وهى مؤدبة جدا هى واللى بتمشى معاها وحاولت اتكلم معاهم بس بيمشو ومبيقفوش خالص انا مدايق من نفس جدا لانى عملت الحاجات دى وده مش انا اصلا
قعدت كام يوم والله حرفيا فى عذاب علشان اهيأ نفسى انى انساها وبقيت بدعى فى الصلاة ان انساها وتبعد عن طريقى
اجى امشى فى الشارع فى اماكن ومواقف عمرى ما اتخيل الاقيها فيها وبقول كده لانى تابعتها وتقريبا عرفت عنها كل حاجه بتمشى منين وكده وبقيت اتعمد امشى من طرق هى مبتمشيش فيها وبعيد عنها خالص بس بلاقيها صدفة وبيحصل فى قلبى حاجات غريبة بحس بنغزة اول لما اشوفها زى ما يكون قلبى بيفرح وبتوه للعلم انا كلمت اهلى عنها بس هما مش موافقين عليها علشان مستوى تعليمها بالنسبالى وانا واحد بدرس هندسة وحاسس انى هضيع بس مش قادر اعمل ايه بالله عليكم افيدونى بحاجة
حاولت اركز فى الصلاة والكلام ده كله بقولكم اول لما اقابلها صدفة لو اقعدت شهر مشوفهاش اول لما اشوفها بحس بنغزة كبيرة اوى فى قلبى زى ما يكون بيفرح وبتوه من نفسى
معنديش حل بس بالطريقة اللي انت بتحكي عنها دي بتمناها تبقي من نصيبك بجد+هي لو شافت كلامك عنها هتحبك وش رأيي انك تخلص كليتك وتستقر وبعديها تفاتح اهلك ف الموضوع تاني
تم النشر الاثنين، ١٣ فبراير ٢٠٢٣
طبيعي انك تتشد لبنت وقلبك يلين ليها انت كده انسان طبيعي طيب ليه متفكرش انك ممكن تخطبها لو مخلص دراسه او فرصه الخطوبه مناسبه ليك اخطبها ويبقا انت كده هديت دماغك وكنت قد مشاعرك وكللتها بعلاقه رسميه لانها ماشاءالله عليها محترمه ومحافظه ع نفسها وانت نفسك رافض الغلط ربنا يباركلك وادعي ربنا دعوه حلوه لو ليك نصيب فيها ربنا ييسرلك الحلال ولو مش من نصيبك يبعدها عنك ويراضيك حاول تشتت نفسك بأي انشطه وانك طول منت ماشي تستغفر عشان حتى لو شفتها صدفه تاني تلاقي الاستغفار مانعك انك تطيل النظر ويطمن قلبك
تم النشر الاثنين، ١٣ فبراير ٢٠٢٣
هو مش حب .. هو مجرد انجذاب او اعجاب .. والفكرة ارتبطت في دماغك على انها حب . بس عقلك بيفرز هرمونات .. وبيحسسك فعلا انك فرحان ومنجذب وكل حاجة .. بس الحقيقة ان الحب حاجة واللي انت فيه حاجة تانيه خالص. طبيعي اه انك تكن مشدود بحد .. للدرجة ديه وطبيعي تكون بتعجب بحد .. بس خليك عارف ان العقل ليه دور كبير جدا ان الفكرة تكبر في دماغك بالشكل ده ويتهيأ ليك حاجات هي مش موجودة .. كالحب. ولكن لو انت عايز البنت فعلا متيأسش انك تفضل ورا اهلك لحد ما يوافقو .. انك تروح تتقدم
تم النشر الاثنين، ١٣ فبراير ٢٠٢٣
هي هندسه بتعمل آكتر من كده😅 هونها يا بشمهندس🌻 إنت عارف إن المشاعر ٨٠% منها فكره والفكره فدماغك بتتكون من كلامك مع نفسك و احتياجاتك.. يعني وارد جدا جدا يكون نغزه وشعور حب وهمي وارد مش أكيد.. نفترض إنه أكيد بتحبها! طب وبعدين مانت لسه بتدرس أصلا ولسه في طريق أهم من الارتباط مينفعش تسبق خطواتك وتحط نفسك فمشاكل مش وقتها( إنه أهلي مش موافقين ومش قادر اتخطاها) ده لسه سابق أوانه ليه مستعجل.. الموضوع ببساطه إن المخ بيحب يخلق لنفسه سيناريو يلهيه عن ال وراه فحاول تكثف دعاك آكتر إن ربنا يبعد عنك شتات الامور ويلهمك العزيمه والثبات وتتخرج علي خير يارب وتستقر فشغل يرضيك ويهيأك تفتح بيت وإن كانت هي نصيبك فحط فقلبك بطيخه صيفي واطمن هيتشالك وإن لأ يبقي بردو نفس البطيخه والامان إنه متشالك الاحسن والخير. متشغلش نفسك حاليا غير بصحتك ونجاحك وبلاش تثقل علي نفسك بأمور ليست أوانها ومشاعر الحب موجوده واحترمها طبعا بس لما تكون صافيه مش مشوشه.. حاول كمان تنزل تلعب كوره أو أي رياضه تفرغ فيها طاقتك من ضغط الجامعه و تلهي تفكيرك شويه بس كده ☺️
تم النشر الأحد، ١٢ فبراير ٢٠٢٣
الحب اللى بدون اى منطق ده انا بشوفه من عند ربنا ( ربنا بيؤلف القلوب لبعضها ) هكلمك بكل الاحتمالات... لو هو حب انزل فى قلبك ليها والعلم عند رب العالمين ..فده اختبار ليك ربنا هيشوف انت هتستخدمه ازاى ....تحاول ترتبط بيها لو عندك استطاعه والظروف تسمح ..يبقي تمام ... متقدرش ..يبقي تتحمل الالم حتى يزول باذن الله . او شيطانك يخليك تحاول تكلمها وهتبقي كده منجحتش فى الاختبار. طيب النغزة اللى فى قلبك دى والاحساس ده ايه ...ده احساس عشان انت محتار ومش عارف تعمل ايه ف الموضوع .... حاول تركز فى غض البصر لعله يساعدك متشوفهاش حتى لو عدت من قدامك.
تم النشر الاثنين، ١٣ فبراير ٢٠٢٣
للعلم مش فارق معايا موضوع تعليمها ده اهم حاجه عندى انها تكون مؤدبة وازا اتأكدت من ده من خلال متابعتى ليها
تم النشر الأحد، ١٢ فبراير ٢٠٢٣
لعرض السؤال في فدني اضغط هنا